Epesus 4

Spirit Holikira mita asla prakan ba

1Baha mita, yang Dawan warkka ba tâwan silak ra sna ba, man nani ra mamkabisna, Dawan mita mai paiwan tânka kat iwi kama, sim piua luan ra nahki kapram ba baku. 2Man nani ba praut âpu bara bawikira bas; wihka sin bîla kaiki kama, pana pana walkam ra latwan lâka ba mariki kama.#Kol 3.12-13. 3Trai kaiks, piua bani aikuki kumi kaia Spirit Holikira hilpka ra, kupia kumi lâka mita asla mai praki bamna. 4Wîna tara ba kumi baman bâra sa, bara Spirit sin kumi baman, bara baku sin Gâd mita diara kumi baman kainamra briaia dukiara mai paiwan. 5Dawan ba kumi baman sa, kasak lukan lâka bara tahbi daukan lâka sin kumi baman sa, 6Gâd kumi baman sa upla nani sut Aisika. Witin lika sut purkara sa, diara sut bâk ai warkka daukisa, bara sut ra sin dimi iwisa.

7Sakuna yawan kumi bani ra prisant painkira wankan sa, Kraist mita wankan ba kat. 8Baha mita Ulbanka ba wisa:

“Witin diara nani sut wal

kau kasbrika pura ba kat ulan ba ra,

priskan uplika nani ailal brih uli wan,

bara upla nani ra sin prisant nani yan.”#Law 68.18.

9¿Bamna, “purara uli wan ba”, dîa tânka sa ki? Baha tânka sika, witin pas tâura tasba kau mâyara pali iwi wan. 10Mâyara pali iwi wan uplika ba sika, kasbrika pura ba wina kau laih purara pali uli wan, baha mita witin mita tasba aiska na banhkaia ba dukiara. 11Bara upla nani ra prisant nani yan, tila nani apastil nani kaia, wala nani ra lika Gâd dahra aisaia, bara wala nani ra swaki sakan lâka sturka ba smalkaia, wala nani ra lika sepad nani bara smasmalkra nani kaia. 12Witin naku daukan, Gâd uplika nani bani kristian warkka daukaia ba mata, Kraist wîna tara ba pain paskaia dukiara, 13yawan sut kasak lukan lâka ra asla takbia bara Gâd Luhpia tânka ba kaikbia kat. Baku lika yawan aitani pâwan kabia, Kraist pâwanka aiska pali ba kat. 14Bara yawan na tuktan ban kaia apia sa, witin nani ai natka isi sât wala takisa, ya ya smalkanka raya smalki nani ba payaska ba mita raski brih auya, âuya mâira nani aimawahkan yabalka ra tauki nani ba mita sin kunin munisa. 15Kau pain sa, latwan lâka spiritka ni yawan diara kasak baman aisi kaia, diara sut ra Kraist wal asla taki pâwi kaia sa, kan witinka sika wîna tara aiska lal ba. 16Kraist ba mita wîna tara aiska asla pain sa; bamna wîna sirpika bani witin ra asla takan ba ra, sut ba pain wark takuya, bara wîna sirpika bani ba mahka latwan lâka ra pain pâwisa.#Kol 2.19.

Rayaka raya Kraist ra

17Bamna Dawan nina ra, yang naha na taibi pali mai wisna: man nani kli Dawan ra tawras uplika nani baku raya iwi kapara, kan baha nani lika gâdkas nani ba tânka kat baman taukisa, 18bara witin nani kupia lukra ba tihmia takan sa. Gâd wina raya kaia lâka aula ba, witin nani briras sa, kan sins aitani briras ba mita kupia sin karna pali sa. 19Witin nani ai swira lâka ba tiki brinka saura ra ni diman, bara diara tâski nani ba witin nani want pali ni dauki banhwisa.#Ro 1.21-25. 20Sakuna man nani lika baku Kraist wina lan takras katma, 21ban kra man nani bui witin ba dukiara aisin walram, bara witin mita sika praki mai smalkan, nahki Jisas ra baman kasak tânka ba bâra sa. 22Bamna man nani blasi natkam almuk ra iwi katma lâka ba mahka swis,#Kol 3.9. kan baha daukanka mita mai sauhkisa, bara ai brinka saura ba ni kunin mai munisa. 23Sakuna man nani lika spiritkam bara sinskam wal ba aiska pali raya nani kaia sma, 24bamna Gâd kupia lâka kat prâka ba ni dimi banhwaia sma,#Kol 3.10. bara sin marikma nahki rayaka kumi kasak pali wapni bara holikira ba.#Bla St 1.26.

25Baha mita kli kunin aisapara, sakuna kumi bani ai muihnika ba wal diara kasak baman aisi kabia,#Sak 8.16. kan yawan sut lika wîna tara kum sirpika nani sa.#Ro 12.5.

26Ban kra kupiam baiwbia kaka, kuna saura lika daukpara;#Law 4.4; Je 1.19-20. bara kupiam baiwanka ra yu dimpara. 27Bara dibil ra sans sirpi kumi sin yapara.

28Ya impliki kan ba, kli implikaia apia, sakuna wark takaia sa, bara ai mihta ni wark kum pain dauki ba mita witin sip kabia diara bri ba ni ai uplika nani ra hilp munaia.

29Sturi aisi banhwisma ba ra uplikam mapara bîla saura lika aisapara, sakuna hilp munaia bîla ni aisas, dîa witin want dukia ba yama bara baha wal pâwbia, bara bahmuna bîla aisaram wali uplika ba mapara hilpka pali sa. 30Gâd Spiritka Holikira ba sarka paskpara, kan man nani aihka saki mai muni baha sim Spiritka Holikira ni, Gâd dukia kaia wisi sîl mai mangkan sa, aiska mai swaki sakan kaia yua witin maikbia ba kat.

31Kupiam tahplika nani sut ba mahka swis, brinka saura nani, kupiam baiwanka nani, bara upla ra pura wini swira daukaia lâka nani, bara diara saura bani sut ba mahka swis. 32Sakuna, sut aikuki pain banhwi bas, pana pana kupiam swapni bri bas, bara pana pana walkam pâtka swih tiki bas, Gâd bui Kraist ra mai praki pâtkam swih tikan ba baku.#Kol 3.13.

Currently Selected:

Epesus 4: MSKTU

Highlight

Copy