Epesus 5

Gâd luhpia nani ba nahki tasba ra iwi kaia sa

1Man nani, Gâd luhpia nani latwan mai kaikan ba, witin baku kaia trai kaiks. 2Latwan lâka ra iwi bas, sim Kraist latwan wan kaiki, yawan tâwan ai rayaka pât mihta ra mangkan ba baku. Witin ba sin sîp baku sakripais daukan kata, bara Gâd ra kîa painkira kum baku angki yan.#Imp St 29.18; Law 40.6.

3Man nani ba Gâd uplika sma ba mita, rug lâka ba nina mâkaia apia sma, tâski lâka wala nani kra, gridi lâka kabia sin apia. 4Swira dukia nani aisapara, sins âpu bîla nani, bîla tâski nani sin aisapara, kan naha diara nani na pain apia sa; kau pain kabia Gâd ra baman tingki wi kaia. 5Man nani pat kaikisma, sunu uplika marit takras kira ban ai maya brisa, diara tâski pali daukisa, gridikira pali sa kaka (baha lika aidul ra mayunaia tânka wal baku sa), baha ba sip sa Kraist bara Gâd wal king aimaki ba tasbaya ra dimaia. 6Upla mita yarka bîla bahki aisi kunin mai munbiara, kan bahmuna dukia saura nani wina sika, Gâd klalka tara ba aula, bîla wali daukras nani ba klala yaia dukiara. 7Baha mita, man nani lika witin nani wal asla dukiam kumi sin bripara.

8Pas piua man nani lika tihmia ra iwi katma, kuna nanara Dawan uplika takram ba mita, ingni ra iwi banhwisma. Bahamna man nani ingni uplika nani baku bas, 9kan ingni ba latwan lâka brih aula, kasakka lâka bara rayaka wapni briaia lâka sin. 10Bamna man nani trai kaiks, Dawan dîa brin dauki ba lan takaia. 11Diara bahki nani tihmia uplika nani dauki ba wal sin prawpara; sakuna kau pain sa baha diara nani ba ingni ra sal sâkma. 12Kan baha nani yukuwan ra diara dauki ba nina mâki aisaia ba sin wan swira pali sa; 13sakuna ingni ba diara nani sut param ra sâkbia ba ra, diara bani ba param kabia, kan ingni ba lika diara sut param ra sakisa. 14Bahamna naku wisa:

“Man yapisma ba, mahka rawi bus;

pruan nani tila wina sin mahka raya taki bus,

bara Kraist man puramra ingbia.”

15Bamna, man nani nahki sma ba aman kaiki bas, sins aitani briras nani ba baku kapara, sakuna sinskira nani bas. 16Piua brisma na pain yus muni bas,#Kol 4.5. kan yua nani na saura sa. 17Man nani sins âpu baku kapara; sakuna Dawan kupia lâka ba dîa sapa tânka pain bris. 18Bamna bla âpu bas, kan baha mita ban tanis tiwaia ra wan brih auya; sakuna Spirit Holikira ni aibanhwi bas. 19Man nani pana pana walkam wal Pura Sunra Lawana nani baman aisi bas, spirit lawana nani aiwani bas, bara kupiam aiska kira ni Dawan ra aiwani mayuni bas. 20Piua bani diara sut dukiara, Gâd Aisa ra tingki wi bas, wan Dawan Jisas Kraist nina ra.#Kol 3.16-17.

Kristian watla bîla rayaka tânka ba

21Kraist ra kulki lâka ra, man nani pana pana walkam ra bawi bas.

22Maya mairin nani ai maya waitna nani ra pain kulki kaia sa,#Kol 3.18; 1 Pi 3.1. sim Dawan ra kulki baku. 23Kan maya waitna ba ai maya mairin lal sa, sim Kraist serts ra lal ba baku. Kraist ba lika serts Swaki Sasakra, bara baha sika witin ai wîna tara; 24bamna maya mairin nani ba diara sut mapa ra ai maya waitna nani ra pain kulki kaia sa, sim serts mita Kraist ra kulki ba baku.

25Maya waitna nani, mayam mairin ra latwan kaiki kaia sma,#Kol 3.19; 1 Pi 3.7. sim Kraist mita serts ra latwan kaiki baha pura mata ai rayaka pât mihta ra mangkan ba baku. 26Kraist naha daukan serts ba holikira sakaia mata, bara lî ni bara ai smalkanka bîla ni klin daukan, 27bara baku mika witin ai mawanra bri balan sim serts pranakira baku, taya tâski âpu, bara taya sriwan âpu, dîa dîa bahmuna sâtka wala sin âpu, sakuna holikira bara kasakkira pali.#2 Ko 11.2; Par M 21.2,9. 28Bamna maya waitna ai maya mairin ra baku latwan kaikaia sa, sim ai wîna latwan kaiki ba baku. Ya ai maya mairin ra latwan kaikisa kaka, witin ai wîna latwan kaikisa. 29Bamna upla kumi sin âpu sa witin ai wîna ra misbara kaiki ba, sakuna witin plun dakakisa bara main sin kaikisa, bara Kraist mita serts ra dauki baku, 30kan serts ba witin ai wîna tara sa, bara yawan lika sim baha wîna sirpika nani sa, ai wîna tara bara ai dusa nani wina wan paskan. 31“Baha mita waitna ba ai yapti bara ai aisa wina dakwi taki ai maya mairin ra asla takbia, bara wâl ba wîna kumi baku takbia.”#Bla St 2.24. 32Naha na dahra prakan tara kum sa, bara yang aisisna naha na Kraist wih ai sertska ba wal tânka sa. 33Sakuna naha sin wiaia want sa, man nani kumi bani mayam mairin nani ra latwan kaikaia sma sim wînam pali ra baku, bara maya mairin ba ai maya waitna ra kulkaia sa.

Currently Selected:

Epesus 5: MSKTU

Highlight

Copy