Popular Bible Verses from Epesus 4

Share

Sakuna, sut aikuki pain banhwi bas, pana pana kupiam swapni bri bas, bara pana pana walkam pâtka swih tiki bas, Gâd bui Kraist ra mai praki pâtkam swih tikan ba baku.

Man nani ba praut âpu bara bawikira bas; wihka sin bîla kaiki kama, pana pana walkam ra latwan lâka ba mariki kama.

Sturi aisi banhwisma ba ra uplikam mapara bîla saura lika aisapara, sakuna hilp munaia bîla ni aisas, dîa witin want dukia ba yama bara baha wal pâwbia, bara bahmuna bîla aisaram wali uplika ba mapara hilpka pali sa.

Kupiam tahplika nani sut ba mahka swis, brinka saura nani, kupiam baiwanka nani, bara upla ra pura wini swira daukaia lâka nani, bara diara saura bani sut ba mahka swis.

Ban kra kupiam baiwbia kaka, kuna saura lika daukpara; bara kupiam baiwanka ra yu dimpara. Bara dibil ra sans sirpi kumi sin yapara.

Bamna man nani blasi natkam almuk ra iwi katma lâka ba mahka swis, kan baha daukanka mita mai sauhkisa, bara ai brinka saura ba ni kunin mai munisa. Sakuna man nani lika spiritkam bara sinskam wal ba aiska pali raya nani kaia sma, bamna Gâd kupia lâka kat prâka ba ni dimi banhwaia sma, bara sin marikma nahki rayaka kumi kasak pali wapni bara holikira ba.

Trai kaiks, piua bani aikuki kumi kaia Spirit Holikira hilpka ra, kupia kumi lâka mita asla mai praki bamna.

Bara upla nani ra prisant nani yan, tila nani apastil nani kaia, wala nani ra lika Gâd dahra aisaia, bara wala nani ra swaki sakan lâka sturka ba smalkaia, wala nani ra lika sepad nani bara smasmalkra nani kaia. Witin naku daukan, Gâd uplika nani bani kristian warkka daukaia ba mata, Kraist wîna tara ba pain paskaia dukiara, yawan sut kasak lukan lâka ra asla takbia bara Gâd Luhpia tânka ba kaikbia kat. Baku lika yawan aitani pâwan kabia, Kraist pâwanka aiska pali ba kat.

Bara yawan na tuktan ban kaia apia sa, witin nani ai natka isi sât wala takisa, ya ya smalkanka raya smalki nani ba payaska ba mita raski brih auya, âuya mâira nani aimawahkan yabalka ra tauki nani ba mita sin kunin munisa. Kau pain sa, latwan lâka spiritka ni yawan diara kasak baman aisi kaia, diara sut ra Kraist wal asla taki pâwi kaia sa, kan witinka sika wîna tara aiska lal ba.