Apastil Nani Sturka 6
6
Hilp mamunra 7 sakan ba
1Baha yua nani ra, kristian nani ba kau ailal taki kan, bara Grik bîla aisi uplika nani mita Hibru bîla aisi uplika nani mapara brukwi aisi kan. Witin nani aisin, yu bani plun yui ba ra, ai piarkika nani ra aitani main kaikras.#6.1 Bîla bahara ulban ba Grik aisi uplika nani aisinka wina, Ju nani Palestina wina uplika nani ba kau wirâ aihka aisi ba, Aram uplika aisi baku aisi nani ba. Baha nani ba Testament Raya ra Hibru nani wisa. 2Bara apastil nani 12 ba mita kristian nani ba sut paiwi, naku win:
—Pain apia sa yang nani na Gâd sturka yamni smalkaia lâka ba swi si, plun yuaia lâka ba ni kau daukaia. 3Bahamna, man nani tilam wina waitna pain 7 pliki sâks, sins lâka aitani bri nani ba, bara Spirit Holikira ni sin aibanhwan kaka; baha nani ra naha warkka na yas daukbia. 4Yang nani lika takaskras ban puri suni kira, Dawan bîla ba upla ra smalki kamna.
5Naha diara na dukiara upla nani sut aitani lukan, bara witin nani mita Stiben ba ai tila wina pliki sakan. Witin lika waitna kumi kasak lukan lâka ni, Spirit Holikira ni sin banhwan kan. Bara Pilip, Prócoro, Nicanor, Timón, Pármenas, bara Nikolas Antíoco wina, witinka kaina piua ra Ju lâka kakulkra kan ba. 6Baha nani ba apastil nani mawanra bri balan, bara apastil nani mita ai pura sunan, ai mihta nani sin baha nani purara kahban.
7Dawan bîla ba kau pâwi kan, bara kristian nani sin kau ailal taki kan Jerusalem ra. Ban Ju prîska nani wina sin manis kasak lukan lâka ba alkan.
Stiben silak ra mangkan
8Stiben lika waitna kumi Gâd karnika bara yamnika ni aibanhwan kan. Witin lika diara aihka nani bara sain nani sin dauki kata upla nani tilara. 9Prias watla uplika nani tila, nina alba kan pri takan nani mâki ba, Cirene wina nani ba sin, Alejandría wina bara Cilicia tasbaya wina bara Asia kuntrika wina nani ba sin, witin nani mahka Stiben wal blahwi kan. 10Sakuna Stiben, Spirit Holikira wina sins lâka yan aisi kan ba mapara, witin nani lika sip buras kan. 11Bamna witin nani bui upla tila nani ra lalah aibapi, naku aisabia win: “Yang nani walri, naha waitna na lika Moses mapara bara Gâd mapara sin saura aisi kan.” 12Naku ni almuk nani bara Lâ Smasmalkra nani ba sut sinska aihka laki banhwan, bamna witin nani mita Stiben ba alki lâ wihtka tara nani mawanra brih wan. 13Witin nani lika witnis kuninkira nani bri balan, bara witin nani mita Stiben mapara mahka naku kunin aisin:
—Naha waitnika lika tempel na mapara bara lâ ba mapara sin saura aisin. 14Yang nani sin walri witin aisi kan, baha Jisas Nasaret wina ba mita naha tempelka na sauhkbia, bara Moses lâ nani wankan ba sin aihka lakbia.
15Bara lâ wihtka tara nani bara upla sut bâra iwi kan ba mita Stiben ra tawi kaikan ba ra, witin mawan ba sin insal mawan baku kan.
Currently Selected:
Apastil Nani Sturka 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua