Apastil Nani Sturka 5
5
Ananías Safira wal saurka ba
1Waitna kumi bâra kan nina Ananías, ai maya nina lika Safira. Witin nani tasba pîs kumi bri kan ba wauhi atkan. 2Ananías lalahka ba bakriki prais brin, bakriki wala ba baman apastil nani ra bri si yan; bara lalah aiska praiska ba ai maya mairin Safira ba sin kaikan. 3Bara Pita bui Ananías ra win:
—¿Dîa muni swiram Sitan mita man kupiam alkan Spirit Holikira ra kunin munaia, bara tasba atkram lalahka ba wina bakriki briaia? 4Baha tasbaya kau wauhi atkras kapram piua ra man dukiam kan, nanara wauhi atkram na piua ra lalahka ba sin man dukiam sa. Bamna kaiks, ¿dîa muni baku daukaia kupiam ra lukram? Gâd ra sika man kunin munisma ba, upla ra lika apia.
5Ananías naha walan ba ra, tasba ra kauhi pruan; bara upla sut baha sturka walan ba sibrin pali takan. 6Bara wahma nani kum kum aidrubi bal, wîna tara ba kwala ra karbi raiti ra bri si bikan.
7Awar yumhpa luan ningkara, maya mairin Safira sin bal diman, dîa takan ba walras kan. 8Pita mita makabi walan:
—Ai wis, ¿mayam wal naku praiska mana tasbayam pîs ba atkram ki?
Bara Safira bila:
—Âu, yang nani baku mana wauhi atkri.
9Pita bila:
—¿Dîa kan man mayam wal lâmka dauki Dawan Spiritka ra traika kaikisma? Kaiks, mayam bri si bikan wahmika nani ba lata wina dimi aula, bara man sin mai brih taki wabia.
10Baha sim piua ra Safira lika Pita mina kat kauhi pruan. Wahma nani lata wina dimi balan ba ra, kaikan pat pruan kan, bara saki bri si ai maya lamara bikan. 11Serts uplika nani bara ya ya sin baha sturka walan ba, sut sibrin pali takan.
Wark aihka nani bara sain nani uya sin
12Apastil nani ba mita sain nani bara diara aihka nani uya sin upla nani tilara dauki kan, bara lalukra nani ba sut asla takan Salaman durka wi ba lamara. 13Witin nani ai tilara upla wala kumi sin bal dimras kan, ban sakuna upla nani sut mita yamni kulki kan. 14Upla Dawan ra kasak lukan ba kau ailal takan, waitna nani bara mairin nani sin. 15Witin nani mita siknis uplika nani ba yabal nani ra sakan, krikri nani ra bara aitnikaia dukia nani ra sin tniki swin kan, Pita kra bâk lubia ba ra ai distika ba mita kumi ra pan madiskbia dukiara. 16Jerusalem tnaya ra tawan nani ba wina upla manis pali balan, sikniskira nani bara pirit saura nani bri nani ba sut brih balan; bara baha nani sut ba rakan kan.
Pita bara Jan ra rausauhkan ba
17Sakuna prîs tara bara sadiusi uplika nani sut apastil nani ra tuman lâka brin. 18Witin nani apastil nani ba alki silak watla tara ra mangkan. 19Sakuna tihmia ra, Dawan insalka kum mita bal silak watla durka ba kwâki, apastil nani ba latara saki, naku win: 20“Man nani tempel ra wih, upla nani ra naha raya sturka yamni na,#Jn 11.25; 14.6; Ro 6.4. param aisi smalks.” 21Bamna apastil nani naha walan ningkara, yu wala titan pali witin nani tempel ra dimi, mahka upla nani ra smalkan.
Bara prîs tara bara ai uplika nani ba mita, Ju almukka nani sut paiwan, witin nani aikuki aidrubanka tara kum daukaia. Bamna witin nani win apastil nani ba silak watla ba wina saki bri balbia. 22Sakuna suldiar nani silak watla ra wan ba ra, apastil nani sakras kan, bara witin nani kli tawi wih sturka ba maisa paki, 23win:
—Yang nani wari ba ra, kaikri silak watla ba lika pain pali prakan kan, aihwawakra nani sin get ra aihwaki kan, sakuna silak watla durka sakri ba ra, bilara upla kumi sin âpu kan.
24Bara prîs tara nani, tempel main kakaira wihtka ba sin naha diara walan ba ra, witin nani aisi kan:
—¿Dîa pali apastil nani ra takan ni?
25Baha sim piua ra waitna kum bal win:
—Waitna nani man nani mita silak ra mangkram kata ba, nanara pali witin nani tempel ra upla nani ra smalkisa.
26Bara suldiar wihtka ba, suldiar nani aikuki wih apastil nani ba alki brih balan, kuna diara munras kan, upla nani kra walpa ni sabiara sîa. 27Apastil nani ba bri sal, aidrubanka wihtka mawanra kat yan buan, bara prîs tara ba naku win:
28—Yang nani bui man nani ra adar maikri, baha waitnika nina mâki kli smalkaia apia, ban sakuna, kaiks dîa daukisma ba. Man nani smalkankam ni Jerusalem aiska banhkram sa, bara sin trai kaikisma baha waitna pruan ba dukiara yang nani na pâtkira ai daukaia.#Mt 27.25.
29Sakuna Pita bara apastil wala nani sut, naku win:
—Yang nani Gâd bîla ba kau walaia sna, upla nani ra lika apia. 30Wan damika nani Gâdka mita Jisas ba pruan wina kli bukan, witinka ra sika man nani dus prihni kum ra pami ikram ba. 31Gâd mita witin ba purara buki ai mihta aihkika tani ra yan iwan. Witin ba sin Wihta Tara bara Sasakra sin mangkan, Israel nisanka ra piua yaia, ai kupia lakaia bara ai saurka nani ban swin tikan lâka briaia ba dukiara. 32Bara naha diara witniska sika yang nani bara Spirit Holikira ba sin, witinka Gâd mita ai bîla wali dauki nani ra yan ba.
33Aidrubanka uplika nani sut naha walan ba ra, ai kupia baikan bara ban sin apastil nani ra ikaia lukan. 34Kuna witin nani ai tilara parisi waitna kum kan, nina Gamaliel. Witin Lâ Smasmalkra tara kata, upla nani mita sin pain kulkan kata. Witin ai mina ra bûi win apastil nani ba wiria latara sâkbia. 35Ningkara, baha aidrubanka wihtka nani ra win:
—Israel luhpika nani, aman kaiks dîa daukaisma ba naha waitnika nani wal. 36Man nani kupiam krawi banhwisa krani, nahki piua luan ra takan ba; Teudas kata ba buan, bara wisata witin lika upla tara kum sa, bara 400 waitna nani witin nina blikan. Sakuna witin ba ikan ningkara, baha nani ai nina bliki kan ba sut aihka aihka baman plapan. 37Baha ningkara, nina mangkaia yua nani ra, Judas Galili wina kata ba buan, bara upla ailal sin ai nina blikan, ban sakuna witin ba ikan ningkara, ai nina bliki kan nani ba sut aihka aihka plapan. 38Bahamna, man nani naha waitnika nani na ban swis, witin nani tilara dimpara. Naha diara na upla wina sa kaka, sut ba bahki ra tiwbia. 39Sakuna Gâd wina sa kaka, man nani sip sauhki tikma apia. Bamna man nani aman kaiks, Gâd mapara aiklapara.
40Witin nani Gamaliel aisin ba pain walan. Bamna apastil nani ba winan balan, bara wipi muni, win:
—Man nani kli pali Jisas nina brih smalkpara.
Baha ningkara mahka pri sakan. 41Apastil nani lika lâ wihtka nani mawan wina liliakira pali taki wan, kan Gâd mita adar yan kata, witin nani ba Jisas nina tâwan swira bara pât wahwaia sin. 42Witin nani yu bani Jisas Misaya ba sturka yamni ba witniska aisi smalkaia ba swiras kata, tempel ra bara utla wala nani ra sin.
Currently Selected:
Apastil Nani Sturka 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua