Apastil Nani Sturka 7
7
Stiben aisinka bîla ba
1Bamna prîs tara mita Stiben ra makabi walan:
—¿Naha diara nani sut na kasak sa ki?
2Bara witin pana aisin:
—Muihni nani bara aisa nani, ai wals. Wan Gâdka pranakira ba mita wan damika Ebraham ra param takan, witin Mesopotamia ra iwi kan piua, kau Eran ra wih iwras kan ba ra. 3Witin ra naku win: ‘Man tasbayam bara tamya nani sut swis, bara was yang tasba kumi mamrikamna ba kat.’#Bla St 12.1. 4Bara Ebraham Caldea tasbaya swi si, Harán ra wih iwan.#Bla St 11.31. Bahara witin ai aisika ba pruan, ningkara Gâd mita Ebraham naha tasbaya ra brih balan, naiwa man nani nâra iwi banhwisma ba.#Bla St 12.4. 5Sakuna Gâd mita naha tasbaya ra witin ai dukia pali lika kau yaras kan, ai mina kahbaia pliska kum sin apia. Ban sakuna, Gâd pramis munan tasbaya na witin ra yaia, bara prubia ningkara ai kiamka nani dukia kabia.#Bla St 12.7; 13.15; 15.18; 17.8. Baha piua ra Ebraham luhpa nani kau âpu pali kan. 6Baha purkara, Gâd win: ‘Man kiamkam nani ba tasba tringsar kum ra iwbia. Bara alba pali kabia, rau sin munan kabia mani 400.’ 7Ban sakuna, Gâd naha sin win: ‘Baha nisanka alba bribia ba yang mita lâka daukamna; ningkara witin nani baha wina takbia, bara naha pliska ra bal yang duki daukbia.’#Bla St 15.13-14; Imp St 3.12. 8Baha ningkara Gâd mita Ebraham wal lâ kum daukan, bara baha lâka aisin tukinka ba yan.#Bla St 17.10-14. Baha mita sika Ebraham mita Aisak baikan bara yu 8 alkan ba ra, Aisa sainka daukan.#Bla St 21.2-4. Aisak sin ai luhpia Jekob ra baku daukan,#Bla St 25.26. bara Jekob ai luhpia 12 nani ra sin Aisa sainka daukan. Witinka nani sika Israel kiamka 12 nani aisika nani kan ba.#Bla St 29.31—35.18.
9“Bara Jekob luhpia nani wan damika nani kan ba mita ai muihni Josep ra tuman,#Bla St 37.11. ban sin witin ba atkan Idsip kat brih waia,#Bla St 37.28. kuna Gâd lika Josep wal ban kan.#Bla St 39.2,21. 10Bamna Gâd mita trabil nani sut wina swaki saki kan, sins lâka ba yan, ban sin Idsip kingka fero mita yamni kaikaia ba sin. Bara Josep lika Idsip wihtka tara mangkan, bara king fero dukia aiska wihtka sin.#Bla St 41.39-41.
11“Bamna plun tiwan tara bara sari tara pali sin balan Idsip tasbaya aiska ra, Kenan tasbaya aiska ra sin, bamna wan damika nani plun piaia âpu kan.#Bla St 42.1-2. 12Sakuna Jekob walan Idsip ra lika plun mâ manis bâra sa, bamna witin mita ai luhpia nani wan damika nani wi ba bahara blikan wan. Naha na pas trip impakan kata. 13Kli aima wala ra wan ba ra, Josep lika ai muihni nani ra param takan,#Bla St 45.1. bara Idsip kingka kaikan Josep ba ya kiamka ba.#Bla St 45.16. 14Bamna Josep mita blikan wan,#Bla St 45.9-10,17-18. ai aisika bara ai taya nani 75 ba sut brih balaia.#Bla St 46.27. 15Baku sika Jekob Idsip ra wih iwan,#Bla St 46.1-7. bara ban pruan.#Bla St 49.33. Wan damika nani sin bahara pruan. 16Ai wîna tara nani ba Siquem ra bri si bikan, baha raitika Ebraham mita Hamor luhpia nani wina atkan ba Siquem tasbaya ra.#Bla St 23.3-16; 33.19; 50.7-13; Jas 24.32.
17“Gâd bui Ebraham ra swer taki kira pramis munan yua ba pat aimakaia man kan ba ra, Israel nisanka ba Idsip ra ailal pali sahwan kan. 18Bara Idsip ra king kum mangkan ba, witin Josep tânka kaikras kan.#Imp St 1.7-8. 19Naha kingka mita wan taya nani ra kunin munan,#Imp St 1.10-11. bara wan damika nani ra sin rau pali munan, ai luhpia nani nan aisubi sakuya bani ba lulki swika prubia.#Imp St 1.22. 20Baha sim piua ra sika Moses aisubi takan. Naha tuktika Gâd mita yamni kaikan kan, bara ai aisika nani ai watla ra kati yumhpa yukuki paki kan.#Imp St 2.2. 21Witin ba ban lulkaia kan, bara Idsip kingka luhpia mairin mita bri si pakan ai luhpia baku.#Imp St 2.3-10. 22Baha mita Moses ra Idsip sinska lâka nani sut ba smalkan kata, bamna witin lika sinskira bara diara daukaia sin karnika bri kan.
23“Moses pat mani 40 bri kan ba ra, witin ai uplika Israel luhpia nani ba kaikan pali daukan. 24Sakuna witin kaikan, Idsip waitnika kum mita Israel waitnika kum ra saura rausauhki kan; bara Moses taki wan ai uplika ba hilp munaia wisi, bara Idsip waitnika ba ikan. 25Witin luki kan ai muihni Israel luhpia nani ba lukbia, nahki witin mita Gâd bui witin nani ba pri sâkbia, sakuna witin nani baha tânka briras kan. 26Yu wala, Moses kaikan Israel waitnika wâl lika aiklabi kan, bara witin brin dauki kan baha nani wâlsut ba kupia kumi daukaia, bara witin nani ra win: ‘¿Man nani wâlsut ba muihkam apia? ¿Dîa kan pana pana wînam ra rausauhkisma?’ 27Bara witinka ai muihni ra rausauhki kan ba Moses ra platukbi tnaya ra laki, win: ‘¿Ya mita man ba wihta mai mangkan, wan lâka sin aisi daukaia? 28¿Man bui yang ra sin ai ikaia lukisma ki, sim nahwala Idsip waitnika ra ikram ba baku?’ 29Naha walan ba ra, Moses mahka plapan Madián tasbaya ra.#Imp St 2.11-15. Witin bahara tringsar baku iwan, bara ai luhpia waitna wâl sin sakan.#Imp St 18.3-4.
30“Mani 40 ningkara, upla iwras tasbaya Sainai ilka lamara, insal kum witin ra latan takan, kiaya dusa kumi ra pauta klauhi kan tilara. 31Moses baha diara aihka kaikan bara tâ iwan, kuna dîa dukia sapa pain kaikaia wisi witin kau lamara wan, bara Dawan bîla baikra naku witin walan: 32‘Yang ra sika man damikam nani Gâdkam ba, Ebraham, Aisak, Jekob Gâdka sin.’ Bara Moses lika sibrin mita tatatwi kan, sip sin tawi kaikras kan. 33Bara Dawan bui witin ra win: ‘Man minam wina sûskam ba daiks, kan man minam taibisma pliska ba, holikira sa bamna. 34Yang upliki nani Idsip ra pât wahwi ba kaikri, bara ai bîla saki ini ba sin walri, bamna yang bal iwri witin nani ba pri sakaia. Bamna bal, yang bui Idsip ra mai blikaisna.’#Imp St 3.1-10.
35“Naha Moseska na ra sika Israel luhpia nani mita bahki kulkata ba, naku sin makabi walata ba: ‘¿Man na ya mita wan purara wihta bara lâ dadaukra kaia mai mangkan?’ Baha Moseska sika Gâd mita wihta bara upla pri sasakra baku blikan, insal witin ra latan takan kiaya dusa ra pauta baku klauhi kan ba tilara. 36Moses kata sika wan damika nani Idsip wina sakan ba. Baha tasbaya ra witin lika wark aihka nani bara sain nani sin daukan,#Imp St 7.3. Kabu Pauni ra,#Imp St 14.21. ban upla iwras tasbaya ra sin mani 40 kan piua ra.#Kul K 14.33. 37Naha sim Moseska sika Israel luhpia nani ra naku wisata ba: ‘Gâd mita prapit kum mai blîkbia, man nani muihkam nani tila wina, sim yang ai blikan baku. Man nani bui witin bîla wali bas.’#Kli S 8.15,18. 38Moses kata sika upla iwras tasbaya ra upla nani tilara kan ba; bara Sainai ilka ra baha insalka witin ra aisin ba,#Imp St 19.1—20.17; Kli S 5.1-33. wan damika nani ba wal sin bâra kan. Witin sika raya kaia bîla nani ba brin yawan ra wankaia dukiara.
39“Sakuna wan damika nani witin bîla walras kan, kau ni platukbi tnaya ra laki si, witin nani mahka kli Idsip ra tawi waia lukan. 40Baku bamna, Eran ra witin nani mita win: ‘Yang nani want sna, gâd nani dauki wankma, wan kainara impakaia dukiara; kan yang nani kaikras baha Moseska Idsip wina wan sakan ba mapara dîa takan sapa.’#Imp St 32.1. 41Bamna witin nani mita bîp lilka kum daukan, daiwan nani sin ikan baha lilka ra sakripais daukaia. Witin nani sin uya lilia pali taki banhwan, baha ai mihta ni lilka daukan ba dukiara.#Imp St 32.2-6. 42Bara Gâd lika witin nani wina tnaya ra takan, ban sin swin kasbrika purara ba slilmika nani ra ni ai pura sunaia. Baku sin prapit nani wauhkataya nani ra ulban sa:
‘Man nani Israel luhpia nani,
daiwan nani iki banhwi bara
sakripais dauki katma ba
40 mani upla iwras tasbaya ra,
baha ba yang ra lika apia.
43Sakuna Moloc gâdka wal prawaia watla sika
man nani twilki banhwi katma ba,
bara Refán gâdka nani slilma lilka ba sin,
baha lilka ra man nani mihtam ni daukram ba,
bahara puram suni mayunaia wisi.
Baha mita man nani tasbayam pali wina mai saki,
laih Babilon kuntrika ra mai blikamna.’#Em 5.25-27.
44“Upla iwras tasbaya ra wan damika nani, Gâd upla wal lâ daukan tintka watla ba bri kan. Baha ba baku mâkan, Gâd mita Moses ra win baha nahki mâkaia patrangka dauki marikan baku.#Imp St 25.9,40. 45Baha ningkara, wan damika nani baha tintka watla ba prapati baku brin ai aisika nani wina, Jasua wal balan uplika nani ba sin baha bri balan,#45 Jas 3.14-17. witin nani tasba wala nani uplika pura luan piua. Baha nani Gâd mita witin nani mawan wina kangbi sakan ba, bara ban wan Debit yua nani kat. 46King Debit lika Gâd wina hilp brin, bamna witin want kan Jekob Gâdka iwaika watla kum paskaia.#2 Sa 7.1-16; 1 Kr 17.1-14. 47Sakuna Salaman sika Gâd watla ba paskan.#1 Ki 6.1-38; 2 Kr 3.1-17. 48Ban sakuna, Gâd Laih Purara iwi ba, witin lika upla ai mihta ni paskan watla sâtka ra dimi iwras. Prapit aisin ba baku:
49‘Kasbrika purara ba yang king iwaiki sa,
tasba ba lika mini taibaika sa.
¿Bamna dîa sât watla man nani paski aikaisma ki?
Baku Dawan wisa.
¿Ani pliska ra yang ris briaia kamna ki?
50¿Naha diara nani sut yang mihti ni daukri apia?’#Ais 66.1-2.
51“Sakuna —Stiben lika ban aisi wi kan— man nani lika piua bani kupiam karna brisma. Man nani kiamam nani bara kupiam sin brisma, sim baha nani Gâd kakaira apia uplika nani ba baku, piua bani Spirit Holikira mapara. Man nani lika damikam nani wal baku pali sma.#Ais 63.10. 52¿Man nani damikam nani ani prapitka ra nani ra lika saura munras kan ki? Damikam nani mita ikan, baha nani baha kasakkira balaia dukiara aisi banhwi kan ba ra. Witinka ba balan ba ra, man nani waihlam saki upla mihta ra mangki, ikram. 53Man nani sika insal nani bâk lâ briram, sakuna bîla walras sma.
Stiben pruanka ba
54Witin nani naha diara nani walan ba ra, ai kupia sauhkan, ai napa nani sin arkban Stiben ba mapara. 55Sakuna Stiben, Spirit Holikira ni banhwan kan, kasbrika purara kaikan, bara Gâd prana ba kaikan, Jisas sin kaikan ai aisa mihta aihkika tani ra bûi kan. 56Bara win:
—¡Man nani kaiks! Yang kasbrika pura ba kwawan kan kaikisni, bara Upla Luhpia Waitna ba sin Gâd mihta aihkika ra buisa.
57Sakuna witin nani ai kiama nani ba prakan, bara ai tâ baiki wini, Stiben mapara plapi wan. 58Bara tawan ba wina saki, walpa ni sabi kan. Bamna witnis nani naha diara daukan ba ai kwalka nani ba waitna wahma kumi nina Saulo, bahara yan main kaikaia.
59Witin nani mita walpa ni sabi kan ba ra, Stiben ai pura suni, win: “Dawan Jisas, yang spiritki na man mihtam ra bris.”#Law 31.5; Lk 23.46. 60Baha ningkara, witin ai lula kriki ai bîla baikra karna wini aisin: “¡Dawan, naha saurka na witin nani ra kulkpara!”#Lk 23.34.
Bara naha aisin ningkara, pruan.
Currently Selected:
Apastil Nani Sturka 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
