2 Korint 5

1Bamna yawan kaikisa, wan wîna tara na utla kum baku sip ban apia ba mita, sauhki tikan kabia; kuna Gâd mita wan watla ban kaia kasbrika purara ridi daukan sa, bara baha lika upla mita ai mihta ni daukras sa. 2Kasak pali, yawan wan wîna tara mapa ra kau raya ba ra, wan mamna sin lulkisa, bara wan watla kasbrika purara ba ra mahka brin wan daukisa wih dimaia; 3baha ba prâk baku wan dingkan kabia, prâk âpu wan taya baman ba baku kaia apia ba mata. 4Yawan lika naha tintka ra iwi na piua ra, wan mamna lulkisa bara sari sin wan daukisa. Wan wîna tara almuk na wina prâk baku daiki sâkbia lika wiras, kuna brin wan daukisa, wîna tara raya ba ni wan dingkan kabia, baha mita naha wîna tara pruikira na, raya ba mita âpu daukan kabia dukiara. 5Bamna Gâd mita naha pali dukiara sika ridi wan daukan ba, bara baha mita witin Spirit Holikira ba wankan, diara naika briaia ba tukinka wisi.

6Bahamna, piua bani ban baha kat, yang nani kupi mangki lukisna. Yawan kaikisa, wan wîna tara ra kau raya iwi ba piua ra, utla ba wina laihura banhwisa, wiaia kaka, yawan ba Dawan wal sin asla apia sa; 7bamna yang nani lika kasak lukan lâka mita taukisna, wan nakra ni kaiki ba mita lika apia. 8Wan kupia ra aitani kat mangki luki banhwisa, bara kau ni brin wan daukisa, naha wîna tara lâka ra iwisna na mahka swi si, Dawan lamara wih iwaia. 9Baha mita piua bani Dawan dîa want ba kat daukaia trai muni banhwisna, wan wîna tara kau raya na piua ra sapa, wan wîna tara wina laihura kabia kra sin. 10Kan yawan kumi bani Kraist lâ iwaika mawanra bubia sa,#Ro 14.10. bahara kat upla bani ai mana dîa kabia ba briaia dukiara, mana yamni, apia kaka mana saura, witin ai wîna ra raya kan piua daukan ba tânka kat.

Kupia kumi lâka smalkanka ba

11Yawan tânka brisa Dawan ra kulkaia ba dîa, baha mita yawan bui upla nani kupia lakaia trai kaikisa. Gâd lika pat yang nani tâinka pain kaikisa, baku bamna brin wan daukisa man nani mita sin baku wan kaiki kama. 12Kli yang nani painki dukiara lika aisaras, sakuna brin wan daukisa man nani mita piua brima yang nani dukira âmyapah takaia, baku mika sip kama baha nani upla mawan kulkanka bri sakuna kupia lukra lika kulkras si aimayuni nani ba mapara aisaia. 13Bamna yang nani na tanis atia sna kaka, baha lika Gâd dukiara ba mita; bara tanis apia banhwisna kaka, baha lika man nani dukiamra. 14Kraist latwanka lâka ba mita yawan ra lâ wankisa, kumi ba upla sut pura mata pruan baha yang nani tânka briri ba wina, yang nani sin pat kaikisna upla sut lika pruan sa. 15Kraist upla sut tâwan pruan, baha mita raya nani ba ai wîna dukiara raya kaia apia sa; sakuna witinka, witin nani ai dukiara pruan bara kli sin raya buan ba dukiara mika raya kabia.

16Baha mita, yang nani kum dukiara sin tasba uplika nani luki ba baku kli lukras: Kraist dukiara sin kanra yang nani tasba uplika nani luki ba baku luki kapri; sakuna nanara yang nani witin dukiara kli baku lukras. 17Baku bamna, ya Kraist wal asla takan sa kaka, witin lika upla raya kumi sa; diara almuk nani ba lui wan sa, bara nanara diara raya baman takan sa.#Jn 3.3-7; Gal 6.15.

18Naha diara sut na Gâd mita daukisa, witin mita Kraist bâk witin wal kupia kumi wan daukan ba, bara adar wankan sa upla sut ba yang nani mita witin wal kupia kumi daukaia. 19Baha tânka ba lika, Gâd lika Kraist bâk tasba ra iwi uplika nani ba witin wal kupia kumi daukuya, upla nani saurka ba kulkras pali; bara yang nani ra adar aikan sa naha kupia kumi lâka na tânka smalkaia. 20Baha mita yang nani ra Kraist ai blikan sturi yamni smasmalkra nani, baha lika Gâd bui man nani ra yang nani bâk mamkabisa. Bahamna, yang nani Kraist nina ra man nani ra mamkabisna, mahka Gâd wal kupia kumi takma. 21Kraist lika saurka kumi sin daukras pali kan, kuna yawan tâwan Gâd mita, witin ba saura dadaukra kum baku kulkan; baku mika yawan Kraist wal asla taki, wan rayaka ba Gâd want ba kat wapni bri kabia dukiara.

Currently Selected:

2 Korint 5: MSKTU

Highlight

Copy