2 Korint 4

1Ba mita, yang nani lukanki ba kauhras, kan Gâd umpira wan kaiki ba lâka ra naha warkka ra wan mangkan bamna. 2Wan swira daukaia dukia baman yukuwi dauki ba, yang nani swiri; bara kunin lâka wal taukras, Gâd bîla smalkanka ba kunin lâka praki smalkras. Sakuna baha watlika ra diara kasak ba baman aisisna, bara baku yang nani tâinka ba upla wala nani sut kupia lukra ra mangki swiri Gâd mawanra. 3Swaki sakan sturka yang nani smalkisna ba, param apia sa kaka, baha lika tanis tiwaia uplika nani ba mapa ra prakan sa. 4Witin nani sip kasak lukras sa, kan naha tasba gâdka ba mita sinska nakra ba blain daukan; Kraist pranakira smalkanka ingnika ba kaikbia sîa, witinka lika Gâd talia pali ba. 5Yang nani aisi smalkisna ba, wîni tânka lika smalkras, sakuna aisi smalkisna Jisas Kraist ba Dawan sa; yang nani lika man nani dukiam dadaukra nani sna, Jisas latwanka lâka ra. 6Tihmia ra ingbia dukiara ingni blikan Gâdka ba mita sika, ai ingnika wan kupia ra yan ingwan,#Bla St 1.3. bara baku mika baha ingnika wal Gâd prana Jisas Kraist mawanra ingwi ba, yawan kaikaia.

Kasak lukan lâka mita raya kaia ba

7Sakuna baha diara manakira ba, yang nani wîni na sumi dakawa baku ba ra mangki brisna, bara baku mika upla kaikbia naha karnika na yang nani wina apia, sakuna Gâd wina sa. 8Baku, tnaya bani wina trabil ailal takisa, anik swak takaia yabalka âpu; wan kupia trabilka nani brisna, sakuna yang nani dring pruras. 9Wan nina bliki rau wan sauhkisa, kuna wan lulki lika swiras; tasba ra wan batakisa, sakuna wan sauhki lika tikras. 10Ani anira yang nani auna ba, Jisas ikan ba tânka piua bani wîni ra brih auna, yang nani pali ra sin Jisas rayaka tânka ba mairikan kaia dukiara; 11bamna yang nani kau raya sna na piua ra, yu bani Jisas tâwan pruaia ai saki ai swin sa, baku lika yang nani upla pruikira sna na wîni ra Jisas rayaka ba marikaia dukiara. 12Baku bamna, prura ba yang nani ra ai warkka daukisa, sakuna rayaka ba lika man nani ra ai warkka daukisa.

13Ulbanka ba wisa: “Kasak lukri, baha mita yang aisari”;#Law 116.10. bamna baha baku natka ra, yang nani sin baha kasak lukan daukanka ba, yang nani kasak lukisna bara sin aisisna. 14Kan yang nani pain kaikisna, Gâd, witinka mita wan Dawan Jisas pruan wina bukan ba, yawan na sin pruan wina kli wan bukbia Jisas wal; bara man nani aikuki wan brih wabia ai mawanra. 15Naha diara nani sut na baku takan sa, man nani hilpkam kaia ba mata, baha mita upla manis Gâd wina yamnika bri nani ba, baha wina manis mita sin tingki wibia, Gâd prana daukaia dukiara.

16Baku ba mita piua kumi sin yang nani si briras. Wan wîna tara ba tawa tawa mâyara iwisa sakuna, wan spiritka lika yu bani kau raya sakisa. 17Kan pât nani nahara wahwi ba lika diara wirha apia bara isti luisa, bara tnata ra prana ban kaia ba manis pali wankisa. 18Bamna wan nakra kaiki diara bâra ba kaikras sa, sakuna sip kaikras dukia ba ra kaikisa; kan diara nani yawan kaiki ba lika ban kaia dukia apia sa, kuna sip kaikras dukia ba lika ban kaia ra ban sa.

Currently Selected:

2 Korint 4: MSKTU

Highlight

Copy