1 Korint 6

Wihta lalukra apia nani mawanra lâ dimaia ba

1Man nani wina kumi ai walka wal unsaban bri kaka, ¿nahki sibrin âpu wihta idan nani ra wih lâ dimbia ki, Gâd uplika nani ra baha bisniska ba wapnika mangkbia makabaia ba watlika ra? 2¿Man nani kaikras sma ki, Gâd uplika nani mita tasba na lâka daukbia sa? ¿Bara man nani mita naha tasba na lâka daukaisma kaka, naha bisniska sirpi lupia nani na lâka daukaia sip apia sma ki? 3¿Man nani kaikras sma ki, yawan mita insal nani pali sin lâka daukbia sa? Ban kaka, ¡yawan yu bani bri bisniska nani ba kau pali daukbia! 4Bamna, man nani ba yawan yu bani bri bisniska nani dukiara unsaban brisma kaka, ¿nahki witinka nani serts mapara bahki nani ba wihta mangkisma ki? 5Naha lika man nani swiram daukaia wisi mai wisni: ¿Man nani tilamra sinskira kumi pan âpu sa ki, upla ai muihni wal unsaban bri ba lâka daukaia sip ba? 6¿Aitani sa ki, muihni kum ai walka wal unsaban bri ba, wihta idan nani ba mawanra wih yaka ai lâka ba daukbia?

7Kasak pali sa, man nani pana pana walkam nani aikuki unsaban brisma ba latan marikisa ba ra, aiska pali kauhram sa. ¿Kau pain kabia apia, yarka watawi mai munaia ba? ¿Kau pain kabia apia, yarka mai impliki banhbia ba? 8Sakuna, man nani kasak lâka daukras bara impliki banhwisma, muihkam pali nani ra sin.

9-10¿Man nani kaikras sma ki, taniskira nani ba, Gâd king aimaki ba lâka ra ai dukia bribia apia? ¡Baku bamna, man nani aimawahkpara! Kan ai maya takras tâski lâka dauki ba, aidul nani ra ai pura suni mayuni banhwi ba, marit lâka sasauhkra nani ba, waitna nani ai tahkia wal tâski lâka dauki nani ba, âimplikra nani ba, gridikira nani ba, bla tatakra nani ba, upla dusa kakuhbra nani ba, upla dukia dadakbra nani ba sut sin, Gâd king aimaki ba lâka ra ai dukia bribia apia. 11Man nani tilam wina tila nani ba baku nani kata. Sakuna man nani ba saurka wina pat klin mai sakan sa, holikira nani sin mai daukan sa, bara Dawan Jisas Kraist nina ba mita bara wan Gâdka Spiritka ba mita sin, kasakkira nani mai kulkan sa.

Wan wîna tara holikira bri kaia ba

12Man nani tilam wina kumi kra naku wibia: “Yang lika pri bara dîa daukaia sna ba laikki.”#2 Ko 10.23. Kasak, sakuna diara sut ba pain baman lika apia sa. Upla ba dîa daukaia want ba ai laikka pri sa, sakuna diara kumi mita sin yaka upla ra alba briaia apia sa. 13Upla wala kum bila wibia: “Plun ba wan biara dukia sa, bara wan biara ba plun dukia.” Kasak, sakuna Gâd mita dukia wâlsut ba sauhki tikbia. Upla wîna tara ba tâski lâka daukaia dukiara lika apia sa, sakuna Dawan dukia mika; bara Dawan ba wan wîna tara dukia sa. 14Bara Gâd mita Dawan ba pruan wina kli bukan ba baku, yawan ra sin ai karnika ni wan bukbia.

15¿Man nani kaikras sma ki, man nani kumi bani wînam tara ba Kraist wîna sirpika nani sa? ¿Bara yang na Kraist wîna tara sirpika ba kum brih, rug mairin wîna tara ra bri si mangkamna ki? ¡Sip apia pali! 16¿Man nani kaikras sma ki, ani uplika rug mairin kum wal asla prawan kaka, wâlsut ba wîna tara kumi baku takuya? Kan Ulbanka ra wisa: “Wâl ba wîna tara kumi takbia.”#Bla St 2.24. 17Sakuna upla kum Dawan ra asla takuya kaka, wâl ba kumi takisa spirit mapa ra.

18Baku bamna, tâski lâka wina man nani plaps. Saurka wala nani upla tila dauki ba, ai wîna tara lata tani ra daukisa; sakuna ai maya briras tâski lâka dauki uplika ba, ai wîna tara mapara saura daukisa. 19¿Kaikras sma ki, man nani wînam tara ba Gâd mita Spirit Holikira maikan ba tempelka sa, bara Spirit Holikira ba man nani ra iwisa?#2 Ko 3.16; 2 Ko 6.16. Man nani lika man nani dawanka nani apia sma, 20Gâd mita mana kum ni mai atkan sa. Baha mita man nani, wînam ra Gâd ra pain kulkaia sma.

Currently Selected:

1 Korint 6: MSKTU

Highlight

Copy