1 Korint 5
5
Rug lâka mapara aisin ba
1Bara nanara sturkam takan sa, man nani tilamra waitna kum bâra sa, witin ba ai aisika maya pali wal brisa.#Kli S 22.30. Naha lika rug lâka tara pali sa, bara nahmuna lâka na Gâd ra kakaira apia nani tilara sin yan sip daukras sa. 2¡Baku kan, man nani lika yamni daukram luki banhwisma! ¡Kau ni sari pali banhwi kaia kapram! Ani waitna nahmuna dukia daukan ba, man nani tilam wina kangbi sakan kaia sa. 3Bamna yang na wîni tara mapa ra man nani tilam wina laihura sna, sakuna spiritki mapa ra lika tilamra sni; bara naha saurka daukan waitnika ba pat lâka daukri sa, yang na man nani tilamra kapri kan baku. 4Man nani asla aidrubisma ba ra, yang sin spiritki ra man nani aikuki kamna, bara Dawan Jisas Kraist karnika ba man nani wal kabia. Baku lika, wan Dawan Jisas nina ra, 5baha waitnika ba Sitan mihta ra mangkan kaia sa, ai wîna tara ba sauhki tikaia dukiara, bara ai spiritka ba lika Dawan Jisas balbia yua ra, swaki sakan kabia.
6Man nani diara daukisma na kalwi banhwaia apia sma. Sturi aisinka kum naku wi ba man nani kaikisma: “Îs wiria baman plawar akban aiska ba yan puskisa.”#Gal 5.9. 7Baku bamna, saurka îska almuk ba lulki swis, bara man nani ba aiska pali klin kama. Baku mika, plawar akban raya kum îs âpu Insal luan Yua Liliaka ra pi ba banhwi kama, bara yang kasak pali kaikisna man nani ba nanara baku sma.#Imp St 12.5. Kan Kraist pali wan Insal luan Yua Liliaka dukia ba yawan dukiara sakripais dauki ikan sa, bamna witin sika Insal luan sîpka yawan bri ba. 8Baku bamna, wan lilia yua tara ba daukpi, brit îs almuk bri ba wal lika apia,#Imp St 13.7; Kli S 16.3. saurka lâka bara tâski lâka îska ba, sakuna îs âpu britka ba wal mika, sunu lâka bara kasak tânka britka ba wal.
9Wauhtaya wala mai ulbatna ba ra man nani ra mai wîri, upla rugkira nani wal diara âpu banhwi kama. 10Naha tasba uplika sut wina tnaya ra tawma lika mai wiras katna, witinka nani tâski lâka dauki banhwi ba, apia kaka gridikira nani ba, âimplikra nani ba, aidul nani ra ai pura suni mayuni banhwi ba. Witin nani tilara dimaia apia kaka, man nani ba naha tasba wina taki waia kama. 11Yang wiaia lukri tânka ba lika naha: upla kum wan muihni wisa, sakuna tâski lâka daukisa, gridikira sa, aidul nani ra ai pura suni mayunisa, upla dusa kakuhbra sa, rum dadira sa, âimplikra kaka sin, witin wal taukpara. Bahmuna uplika wal iwi plun sin piaia apia sma. 12-13Kan yang bisniski apia sa kristian daknika apia banhwi ba lâka daukaia; Gâd mita witin nani lâka daukbia. Sakuna man nani mita bilara banhwi ba lâka pat daukisma. Baha mita, baha saurakira ba man nani tilam wina brih sâks.#Kli S 13.5; 17.7.
Currently Selected:
1 Korint 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
