1 Korint 4
4
Apastil nani warkka ba
1Baku bamna, man nani mita yang nani na Kraist dukia dadaukra nani baku ai kulkaia sma, Gâd dahra prakan tânka nani ba aisi smalkamna wisi wan mangkan ba. 2Bamna, dukia dadaukra ba mita latan marikaia sa, witin ba ai dawanka ra kasak sa. 3Sakuna, yang maipa ra lika, man nani mita nahki lâika aisi daukma ba, apia kaka upla wala nani kra lâika aisi daukbia ba sin, uya lukras sna; yang mita sin lâika aisi daukras sni. 4Kupi dara walra na klin brisna, sakuna baku ba ra wisi yang na pâtkira apia sna lika wiras sna. Dawan sika lâika aisi dauki ba.#1 Jn 3.19-21. 5Baku bamna, piu kau kan ba ra diara nani ba lâka aisi dauki kapara. Dawan bal, tihmu ra yukukan dukia nani ba ingni ra brih sâkbia ba, bîla kaiki bas. Dawan mita upla nani ai kupia ra dîa daukaia luki ba sut latan sâkbia. Bâra mika, upla bani mayunra briaia ba kat, Gâd wina bribia.
6Muihki nani, man nani painkam dukiara naha dukia sut na mai wisna, Apolos wih yang wal praki. Yang nani daukri ba baku daukma wisi naha na aisisna, bara baku mika lan taki kama diara nani ulban ba, pura lui kau kainamra waia apia. Man nani wina kumi sin upla kumi tâwan aimayuni bara wala ra bahki kulkaia lika apia sa. 7Bamna, ¿man ba ya mita upla wala nani purkara kau tara mai daukan sa ki? ¿Diara nani brisma ba sut, Gâd bui maikras kata ki? Bara witin bui maikan kaka, ¿dîa kan tara pulisma, diara nani brisma ba man mita saki briram kan baku?
8Diara nani luha sma ba pat sut yuya brisma, man nani pat yuyakira nani sma. Pat king sma lukisma, bara yang nani wina diara want apia sma. Kasak, ¡king nani pali kapram kaka, yang aitani lukaia kapri, bara baku mika yang nani sip kaia kapri man nani aikuki king aimakaia! 9Bamna yang lukisni, yang nani apastil nani sna na, Gâd mita ningka pali ra ai swin baku sa. Yang nani na prura pâtka ra tawan uplika nani baku sna; tasba aiska ba, insal nani wihki upla nani wal sin, wan kaikbia wisi wan mangkan sa. 10Kraist tâwan yang nani na sins âpu baku ai kulkan; sakuna man nani lika Kraist tânka nani briaia mapa ra sinskira nani sma lukisma. Yang nani na swapni, sakuna man nani lika karna. Yang nani bahki ai kulki, sakuna man nani ra lika mai kulkisa. 11Naiwa yua pali kat plun wahwi banhwisna, din wan daukisa, bara kwala sin âpu banhwisna, upla nani rau wan sauhkisa, yang nani waitla pali âpu, 12bara yang nani mihti ni baman wark taki swapisna.#Ap St 18.3. Upla nani mita saura wan wisa, sakuna pana yang nani mita bîla yamni nani wisna. Rau wan sauhki banhwisa, sakuna ban bapi bûi wahwisna. 13Yang nani ninira saura aisisa, sakuna pana kupi takaski âpu witin nani ra smalkisna. Naiwa yua pali kat, upla nani mita naha tasba dipastika bara upla nani tâski saki lulki ba baku wan kulkisa.
14Man nani swiram dauki baku lika naha na mai ulbras, sakuna kupia kraukanka kum maikaia dukiara, luhpi laitwankira nani ra baku. 15Bamna man nani ba, Kraist tânka mai smalkaia smasmalkra 10,000 bri kama sakuna, aisikam ailal lika âpu sma. Kraist Jisas ra kasak lukan lâka brisma ba mapa ra, yang sika man nani aisikam, swaki sakan sturka yamni maikri ba mita. 16Baku bamna, man nani ra mamkabisna, yang daukri ba baku dauki kama.#2 Ko 11.1; Pil 3.17.
17Naha dukiara, Timoti ba man nani ra blikuna. Witin sika Dawan ra luhpi laitwankira bara kasak pali ba. Witin ba yang na Kraist ra lalukra baku nahki iwisna tânka ba man nani kupiam kraukbia, plis sut ra serts bani ra smalkisna ba baku. 18Man nani wina tila ba tara takan ai dahra walisa bara yang na man nani bal mai kaikamna apia luki; 19sakuna, Dawan baku wibia kaka, pat pali bal man nani mai kaikamna. Bâra mika yang kaikamna prautkira nani ba dîa daukaia sip ba, bara aisi banhwi ba baman lika apia. 20Kan Gâd king aimaki lâka ba, bîla nani aisi bisniska apia sa, sakuna karnika dukiara. 21Bamna, ¿man nani dîa ba kau lihkisma: man nani ra balamna bara klala maikamna, apia kaka, latwan lâka bara kupi swapni bri balamna?
Currently Selected:
1 Korint 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua