1 Korint 3
3
Gâd warkka ra ai pânika wal wark dauki ba
1Muihki nani, yang bui man nani ra Spirit uplika nani ra baku sip mai aisaras katna; yang bui man nani ra naha tasba uplika nani baku mai aisari, Kraist tânka nani mapa ra tuktan sirpi nani ra baku. 2Smalkanka tânka karna apia kum maikatna, tuktan swap lupia ra plun karna yabaia watlika ra tiala laya dakaki ba baku, kan man nani ba plun karna piaia sip apia katma.#Hib 5.12-13. ¡Sakuna nanara kat sin baha pata sip piras sma, 3man nani ba naha tasba uplika nani baku, kau ban raya iwisma ba mita! Man nani tilamra tuman lâka bâra sa, bara pana pana walkam nani aikuki sin unsabi dakwi takisma kaka, tasba uplika nani sma, bara upla sut dauki dukia nani ba kau daukisma. 4Kan upla kum bila: “Yang na Pal uplika sna”, bara wala bila: “Yang lika Apolos uplika” wisa kaka,#2 Ko 1.12. naha tasba uplika nani dauki ba baku daukisma.
5Bamna, ¿Pal ba ya?, ¿bara Apolos ba ya? Yang nani lika Gâd dukia dadaukra nani baman sna, bara yang nani mita sika Dawan ra kasak luki banhram ba. Yang nani kumi bani lika Dawan wark aikan ba kat daukisna: 6saumuk ba yang mangkri,#Ap St 18.4-11. Apolos lî laikan,#Ap St 18.24-28. sakuna Gâd sika yan pâwan ba. 7Baku bamna, saumuk mangki uplika ba bara lî laiki ba sin bahki atia sa; sakuna Gâd sika diara sut ba, kan witin sika dusa ba yan pâwi ba. 8Mangki uplika nani ba wih lî laiki nani ba wal kumi sa; sakuna Gâd mita kumi bani ra ai warkka daukan ba kat ai mana yabia. 9Yang nani lika wark uplika Gâd warkka ra asla pâna nani baku wark dauki banhwisna, bara man nani ba Gâd warkka dauki ba tasbaya baku banhwisma. Man nani ba sin, Gâd watla tara kum mâki ba baku banhwisma. 10Gâd mita sins aikan ba kat, yang lika utla papaskra wihta baku sna bara playa bapanka ba mangkri, bara upla wala baha purara paskisa. Sakuna kumi bani aman kaikaia sa, witin nahki baha purara paskisa sapa. 11Kan Gâd mita Jisas Kraist pali ba playa bapanka baku pat mangki brisa, bara baha purara upla mita playa bapanka wala sip mangkras sa. 12Sakuna upla sip sa baha playa bapanka purara gul ni paskaia, silbar ni, walpa manakira nani wal sin; upla wala nani sip sa dus nani wal paskaia, twi ni, waha nani wal sin. 13Upla bani warkka ba lâ daukan yua ra latan kaikbia; kan baha yua ba pauta klauhan wal kabia, bara pauta klauhan ba mita upla bani dîa sât warkka daukan sapa tânka trai kaikbia. 14Ani uplika utla tara mâkan ba, pauta klauhan ba mapara ban bapi bubia kaka, witin lika ai mana bribia. 15Sakuna witin paskan dukia ba amuya kaka, witin ai dukia sut tikbia, witin pali swak sakan kabia sakuna, upla kum pauta wina swakwi ba baku.
16¿Man nani kaikras sma ki Gâd tempelka banhwisma ba, bara Gâd Spiritka ba man nani ra iwisa?#2 Ko 6.19; 2 Ko 6.16. 17Baku bamna, ani uplika Gâd tempelka ba sauhkbia kaka, Gâd mita uplika ba sauhkbia. Kan Gâd tempelka ba holikira sa, bara baha tempelka ba lika man nani pali sma.
18Upla ai kupia ra kunin munbiara. Man nani tilam wina kumi, naha tasba sinska lâka kat witin ba sinskira sa lukisa kaka, witin ba sins âpu baku takaia sa, bara baku lika kasak sinskira pali kabia. 19Kan naha tasba sinska lâka ba Gâd mapa ra sins âpu dukia baku sa. Ulbanka ra wi ba baku: “Gâd mita sinskira nani ba ai âuyama lâka kat prak alkbia.”#Job 5.13. 20Bara naku sin wisa: “Dawan ba kaikisa, sins lâka kakaira nani lukanka nani ba bahki atia sa.”#Law 94.11. 21Baha mita, upla kumi sin upla nani dîa daukaia sip ba dukiara aimayunaia apia sa; kan diara sut ba man nani dukiam nani sa: 22Pal ba, Apolos ba, Pita ba, naha tasba na, raya kaia ba, prura ba, nanara piua na, naika piua ba sin; sut na man nani dukiam atia sa, 23bara man nani lika Kraist dukia sma, bara Kraist ba Gâd dukia sa.
Currently Selected:
1 Korint 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
