1 Korint 7
7
Marit lâka tânka kupia kraukanka nani ba
1Bara nanara, man nani ai makabi walram tânka nani ba mai wisna. Waitna kum marit takras kaka, baha ba pain sa; 2sakuna rug lâka bâra ba mita, waitna bani ai maya mairin bri kaia sa, bara mairin bani sin ai maya waitna bri kaia. 3Bara waitna ba ai maya, bara mairin sin ai maya ba wal dîa daukaia ba daukbia. 4Maya mairin ba ai wîna tara dawanka apia, sakuna baha ba ai maya waitna dukia sa. Bara baku sin, maya waitna ba ai wîna dawanka takras, sakuna baha ba ai maya mairin dukia sa. 5Baha ba mita, pana pana wal prawaia apia wipara, ban kra pura sunra warkka daukaia dukiara wal lâ daukma piu wiria wal asla prawaia apia. Baha ningkara, kli asla prawi banhwaia sma, wînam tara nani sip alki takaskras sma ba mita, Sitan mita kra traikam kaikbiara sîa.
6Naha na adar baku lika mai wiras sna, sakuna hilp kum baku. 7Yang pali na want kaina upla sut ba, yang wal baku kabia; sakuna Gâd mita upla bani ra sinska sât sât yaban sa, upla tila nani ra naku, wala nani ra lika baku.
8Nanara, waitna mairin briras nani ra, bara piarka mairin nani ra sin wisni: man nani mampa ra kau pain kabia mairin briras kama kaka, yang wal baku. 9Sakuna man nani wînam brinka ba sip alki takaskras sma kaka, marit taks; kan aitani sa marit takaia ba, wan wîna brinka karna ni amaia ba wal.
10Marit takan nani ra adar yabi wisna, maya mairin ba ai maya waitna swiaia apia sa. Naha adarka bîla na yang duki lika apia sa, sakuna Dawan dukia. 11Sakuna maya mairin ba ai maya waitna swibia kaka, mairka ba ban marit takras kaia sa, ai maya waitna wal kli ai uplika takaia. Bara baku sin, maya waitna ba ai maya mairin ra swiaia apia sa.#Mt 5.32; 19.9; Mk 10.11-12; Lk 16.18.
12Wala nani ra yang pali wisni, Dawan lika apia: wan muihni kum ai maya mairin kum brisa, bara mairka ba lalukra apia sa, sakuna ai kupia kumi luki waitna ba wal ban brih iwi kaia lukisa kaka, wan muihnika ba mairka ba ra swiaia apia sa. 13Bara kristian mairin kum maya ba lalukra apia sa, sakuna ai kupia kumi luki mairka ba wal ban brih iwi kaia lukisa kaka, mairin ba mita waitnika ba swiaia apia sa. 14Kan kasak lukras waitna ba, ai maya mairin lalukra ba wal asla takan ba mita, holikira kulkan sa; bara kasak lukras mairka ba, ai maya waitna kristian ba wal asla takan ba mita, holikira kulkan sa. Naku apia kaka, man nani luhpiam nani ba idan nani luhpia banhwi ba baku kaia kan; sakuna naha mita, witin nani ba holikira nani kulkan sa. 15Sakuna, waitnika ba, apia kaka mairka ba sapa kasak lukras, dakwi takaia lukisa kaka, baku daukbia. Bara baku daukbia kaka, wan muihni, wan lakra ba, witin pri sa dîa pliki briaia ba ai laikka; kan Gâd mita kupia kumi lâka ra iwi kabia wisi wan paiwan sa. 16Man, maya mairin kristian sma ba, ¿nahki kaikisma mayam waitna ba swaki sakaia sip sma sapa? Man, maya waitna kristian sma ba, ¿nahki kaikisma mayam mairin ba swaki sakaia sip sma sapa?
17Nahki kabia kra, kumi bani Dawan dîa yaban ba kat iwi kaia sa, bara Gâd mita paiwan bara witin nahki kan ba kat. Serts nani sut ra yang naku adar yabisna. 18Gâd mita Aisa sainka pat bri uplika kum paiwisa kaka, uplika ba baha Aisa sainka ba ban bri kaia sa; bara Gâd mita Aisa sainka briras uplika kum paiwbia kaka, uplika ba Aisa sainka mangkaia apia sa. 19Aisa sainka bri, kaia apia kaka âpu kaia ba lika, bahki sa; Gâd lâka nani bîla wali daukaia ba sika diara tara ba. 20Upla bani Gâd mita paiwan bara nahki kan ba kat, ban kaia sa. 21Gâd mai paiwan bara alba kapram kaka, man baha dukiara uya lukpara; sakuna pri takaia sanska bri kama sin, baku ni dauks. 22Kan upla kum Dawan bui paiwan bara alba kan kaka, nanara lika pri uplika sa, bara Dawan dukia daukisa; bara baha sim natka ra, ani uplika Kraist mita paiwan bara pri uplika kan kaka, nanara lika witin albika sa. 23Gâd bui man nani ba mana tara ni mai atkan sa; baku bamna, upla nani mita yarka alba nani mai daukbiara. 24Muihki nani, upla kumi bani Gâd mita paiwan nahki kan ba kat, ban witin mawanra baku pali kaia sa.
25Bara marit takras uplika nani ba dukiara lika, Dawan wina lâ kumi sin briras sna; sakuna yang dîa lukisna ba aisuna, Dawan mita umpira ai kaikan ba mita upla kasak kum baku. 26Yang lukisna ba lika naku sa: ani uplika nahki ba, baku ban kaia kau pain sa, trabil piua nani yawan nanara brih iwi na mita. 27Man ba mayam mairin kum brisma kaka, witin wina dakwi takaia lukpara; bara mayam mairin âpu sma kaka, man plikpara. 28Sakuna marit takuma kaka, man saurka kumi sin daukras sma; bara tukta mairin kum marit takbia kaka, witin sin saurka kumi sin daukras sa. Sakuna marit taki uplika nani ba tani trabil nani bribia, bara naha trabilka nani bri ba yang want apia sna.
29Muihki nani, yang wiaia want sna tânka ba lika naku sa: yawan kau piu wiria baman brisa. Bamna, nanara wina ai tâura, marit waitna nani ba ai maya âpu baku iwi kaia sa; 30ini nani ba, sari âpu baku kabia; kiki banhwi ba, lilia âpu baku nani kabia; bara upla wina diara atki nani ba, dukia nani atkuya ba ai dukia nani apia kan baku lukbia; 31naha tasba wina ai hilpka saki ba, baha hilpka ba aiska pali bri banhras baku kabia. Kan naha tasbaya yawan nanara kaiki na, mahka lui auya sa.
32Yang want sna man nani ba kupiam trabilka nani wina pri kama. Waitna maya âpu ba, Dawan warkka nani baman trabil taki lukisa, kan Dawan dîa lihki ba kat witin dauki yabaia trai munisa; 33sakuna marit takan waitnika ba, tasba bisniska nani dukiara baman trabil taki lukisa, bara ai maya dîa lihki ba kat daukaia sin, 34bara waitna ba baku tawi witin nani ra aubi brih wan sa. Bara mairin maya âpu ba, apia kaka tiara aihwa pali ba, Dawan warkka dukiara trabil taki lukisa, kan witin want sa holikira takaia, ai wîna ra bara ai spiritka ra sin; sakuna marit mairin ba tasba bisniska nani dukiara trabil taki lukisa, bara ai maya waitna dîa lihki ba kat daukaia sin.
35Naha na mai wisna lâ karna maikaia dukiara lika apia, man nani ra hilp mai munaia want sna ba mita. Sakuna, yang want sna man nani ba kulkanka lâka pali ba bri kama, bara Dawan warkka ba aiska pali daukaia.
36Sakuna ani uplika luki kaka, ai luhpia mairin ba marit takbia ba kau pain sa, witin tiara piua ba pat lui auya ba mita, bara baku daukbia ba kau pain sa kaka, witin dîa kau pain sa lukbia ba daukaia sa; witin nani sip sa marit takaia, kan baha ba saurka kumi sin apia sa bamna. 37Sakuna ani waitnika, baku daukaia witin ra taibi munras sa, bara witin dîa daukaia lukbia ba pri pali sa, bara ai kupia ra ai luhpia mairin ba marit takras ban kabia dukiara ban bapi lukisa kaka, witin pain daukisa. 38Baku bamna, ani waitnika ai luhpia mairin maya baikisa kaka, witin pain daukisa; bara ani waitnika ai luhpia mairin maya baikras ba, witin lika kau pain daukisa.
39Marit takan mairka ba kau ai maya waitna ba raya piua ra, witin lika pri apia sa; sakuna ai maya waitna ba prubia kaka, witin ani waitnika ra want ba wal marit takaia pri; sakuna waitna ba lalukra kaia sa. 40Sakuna, mairka ba kli marit takras kaka, witin kau lilia kabia. Yang maipa ra lika baku sa, bara lukisni yang na sin Gâd Spiritka ba brisna.
Currently Selected:
1 Korint 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
