Zaburi 7
7
Isengesho ry’intungane itotezwa#7.0 . . . intungane itotezwa: umuririmbyi wa zaburi arinubira abamutoteza, n’abagiranabi bose (2—3.6—7.10), aribaza niba hari ibyaha bikomeye yaba yarakoze, byamukururira icyo gihano arimo (4–6). Aratakambira Imana ngo imurengere, we n’abandi bose bafite umutima utunganye, kuko Uhoraho ari umucamanza utabera (7–12); akanasaba ko abo bagiranabi na bo bakugarizwa n’ibyago nk’ibyo bateganyirizaga intungane (13–17).
1Ni amaganya ya Dawudi. Yayiririmbiye Uhoraho abitewe na Kushi w’Umubenyamini.
2Uhoraho Mana yanjye, ni wowe buhungiro bwanjye;
ntabara, unkize abankurikirana bose!
3Naho ubundi, barampotora nk’intare,
bakantanyaguza, nta we ubatesheje.
4Uhoraho, Mana yanjye, niba narahemutse mu byo nakoze,
niba hari ubugome bundangwaho,
5niba narituye inabi uwangiriye neza,
nkareka umubisha akabaho,
6nanjye umwanzi azankurikirane, amfate mpiri,
andibatire ku butaka nkanuye amaso,
anteshe ishema angaragura mu mukungugu! (guceceka akanya gato)
7Uhoraho, hagurukana uburakari!
Cubya ubukana bw’abandwanya,
kanguka, Mana yanjye,
wowe ubwiriza umuntu iby’ubutabera.
8Imiryango nikorane igukikize,
nawe uganze uyitegeke.
9Uhoraho ni we ucira imanza amahanga!
Uhoraho, urancire urubanza ukurikije ubutungane,
n’ubuziranenge bwanjye.
10Ubugome bw’abagizi ba nabi nibuhoshe,
ukomeze ushyigikire intungane!
Koko rero uzi akari mu mutima no mu nda y’umuntu,
wowe Mana Nyir’ubutabera.
11Ingabo inkingira ni Imana ubwayo,
ari na yo mukiza w’abafite umutima utunganye.
12Imana ni umucamanza utabera,
ikaba n’Imana ikangara buri munsi.
13Iyo umugiranabi atigaruye, ityaza inkota yayo,
ikabanga umuheto wayo maze igatamika.
14Yegeranya izo ntwaro za kirimbuzi,
imyambi yayo ikayivubura ari ibishashi.
15Umugome we, asama inda y’ubugizi bwa nabi,
agatwita inda y’ubwicanyi, akabyara ikinyoma.
16Acukura urwobo, akarugira rurerure,
ariko uwo mutego akaba ari we uwugwamo!
17Ubugome bwe ni we bukoraho,
urugomo rwe rukamugaruka.
18Nzashimira Uhoraho ubutabera bwe,
ndirimbe izina ry’Uhoraho, Umusumbabyose.
Currently Selected:
Zaburi 7: KBNT
Highlight
Share
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.