မးသဲ 3

အဖဳးစူထံစီၤယိၤဟၣ်အတဲၤဒီထိးလၤ

(မၢ် ၁:၁-၈, လူၤ ၃:၁-၁၈, ယိၤ ၁:၁၉-၂၈)

1လှ့နဳၤ အဖဳးစူထံ စီၤယိၤဟၣ် ဟဲးဒီၣ်အူဒီဆးကဲၤတဲၤဒဳယူ ဒၤအမှၱးလဲၢ်ကျဲခဳကျီးခဳးနဳၤ. 2ကၱာ်ဒီစဒီၣ်, “ခးလှိပီၢ် သံတဲၤခီၣ် ဝဲၤ. မၤနဲၢ်ကဒီၣ်ဓဳၤဒဳၣ်, မီၢ်ခဳးအထံအက့ၤဘိးထၱးထဳ.” 3အယဳၤ တပွဲၤမၱာ်ကဲၤပၠၤ ထဲၢ်ဝံယၡါယၤဒီၣ်အံာ်ကဲၤအဝၱၤအကဲတပွဲၤနဳၤ. စဒီၣ်,

“ပၠၤအကဲာ်ဧဳၤ ဒဳမှၱးလဲၢ်ကျဲနဳၤတပွဲၤအလ့ၢ်.

‘ပြးပီၢ်ဘၱာ်စဲာ်အကျဲး,

မဲၤနၢ်က့ၤပီၢ်စကျဲးစသအီတစီာ်နဳၤ’ စဒီၣ်ဒဳၣ်.”

4စီၤယိၤဟၣ်အယဳၤတပွဲၤ အတဲၤကိတဲၤသီး မၱာ်ကီၤလၤအူး အဆိး, နှၱယၢ်ပံၤတဲၤဖ့းအီၣ်ကဲၤစယၤဓ့ၢ်လီၤတဘီ, ကၱာ်ဒီစတဲၤအၣ်မၱာ် ကဲၤ ဒၱပၢ်မှူးကၱာ် ကနၱၤစါလီၤ. 5ဘ့နဳၤဒဳယရူၤၡလ့ၣ်အူး, ယူဒၤ သဒဲက့ၤ, ပၠၤအအီၣ်ကိာ် ယၢ်ဒ့ၣ်ကီၤလီၢ်ဝ့ၤတစီာ်နဳၤ လ့ၤထၱးစဲာ်. 6ကၱာ်ဒီ စဒီၣ် ဖျီထာ်စတဲၤခီၣ်ဝဲၤ ကၱာ်စခးဖဳးစူထံ ဒဳလၢ်ဝၤအစူးခီးပူၤဘ့ ယၢ်ဒ့ၣ်ကီၤလီၢ်ပူၤနဳၤ.

7ပရၤဆါဘ့စစာ် ထၱးဖၤရံၤၡဲဖဳး ကၱာ်စၤဒူးကဲဖဳတစီာ်အီၣ် အဲပွဲၤ လ့ၤဖဳးစူအန့ၤ ထံစစူးခီးပူၤဒဳၣ်, စဒီၣ်လၢ်ဝၤတစီာ်, “သံ ကလၤ ပူးမဳၤအခွံ, ပီၢ်ပွဲၤဒဲလၱၢ်သံ အကဟဲးကိ နံၤ ကဘၱာ်စဲာ် တဲၤသဲးထဲးအကဓဳၤကီတဓဲ အလ့ၤပွဲၤ. 8မဲၤကနဳၤဒဳၣ်, သဲာ် ထာ်ဖီထာ် ပီၢ်တဲၤ သဲာ်အဘဲာ်နံၤပီၤနံၤ တဲၤခးလှိအံာ်တစီာ် နဳၤ. 9ကၱာ်ဒီ ကမဳၤပီၢ်မဲး အကဒီၣ်သံ သးပူၤ, ‘အၤဘြၤဟၣ်မၱာ်ဝၤပာ်’ နဳၤမဲး. မၤနဲၢ်ကဒီၣ်ဓဳၤဒဳၣ်, ယဒီၣ်သံထဲၢ် ကဘၱာ်စဲာ်နဳၤ စမဲၤကဲာ်ထာ် စာ်ဘိထဲၢ် လဳၤအယဳၤတစီာ် ကဖၱထာ်အၤဘြၤဟၣ်အဖဳးနဳၤ. 10ခူနူၤ ယဳၤ, တၱးမးအီၣ်ဘဲလၤ နှဲးအန့ၤသဳာ်အခၣ် ထၱးထဳ. မဲၤကနဳၤဒဳၣ်, သဳာ်ထဲၢ်အတသဲာ်ထာ် တဲၤသဲာ် အဝၱၤနီးအသရ့ဘဲာ်ကိၢ်ကဲ, ကၱာ်ဘဲာ် ပၢ်နံၢ်ဒဳမှၱးအူသးကျဲလီၤ. 11သံတဲၤဆးလၤ သးအနံၤခံ ယဖဳးစူသံကၱာ်ထံဟဳ. ပရၤဆါ အကလ့ၤကီ ယလ့ၤကါတပွဲၤ အစိသလဲဓဳၤဒဳၣ် လံယဲၤ, ပွ့းကၱာ်ယကတတးနံၤ အကဘါပျဲး စခၣ်တကီးအပံၤနီး. စကဖဳးစူကီသံကၱာ်သးစါ ထံကၱာ်မှၱး. 12စကတီးပျဳာ်ဝှါဘူၣ်ဒဳဘူၣ် သရးအလ့ၤနဳၤ, စကဝၢ်ဘါကဲအံာ်ကီဘး ဘ့. မဲၤဝှါစကရွှံးကဲကီအသရဳာ်သခွးကၱာ်မှၱးထဲၢ် အတလၤပၱၢ်ဇၤနီးနဳၤ.”

ယ့ၣ်ရှူးအတဲၤဖဳးစူထံ

(မၢ် ၁:၉-၁၁, လူၤ ၃:၂၁-၂၂)

13ယ့ၣ်ရှူးအီၣ်ဒဳကၤလံၤလဲက့ၤ, လ့ၤထၱးကဲၤ စီၤယိၤဟၣ်ဒဳ ယၢ်ဒ့ၣ်ကီၤလီၢ်ဝ့ၤ စာ်ဘိထဲၢ်စကခးပီၢ်တဲၤဖဳးစူထံဒဳလၢ်ဝၤ အစူး ခီးပူၤ နဳၤ. 14ပရၤဆါ, စီၤယိၤဟၣ်သးအဲး မဲၤဒၱာ်ဒါစဲာ်ဒဳၣ်စဒီၣ်, “ယမီၤ ခးဖဳးစူယန့ၤ ထံနစူးခီးပူၤ, မၱာ်နလ့ၤထၱးယဲၤတခီဧါ.”

15ယ့ၣ်ရှူးဒီၣ်က့ၤစဲာ်, “ခဳနူၤယဳၤခီးသးဒီ မဲၤမိၢ်ကိာ်ကယဳၤ. မၤနဲၢ်ကဒီၣ်ဓဳၤဒဳၣ် အဘဲာ်ဝၤ ကမဲၤပ့ထာ်တဲၤတၱၢ်တဲၤမှးလဳစါစဲး.” ဘ့နဳၤ စဖဳးစူကီလၢ်ဝၤထံ.

16ယ့ၣ်ရှူးနံၤဘဲာ်ဝှါတဲၤဖဳးစူထံဒဳၣ်. စခဲထာ်က့ၤတနၢ်ခီခဳး, ကၱာ်ဒီစာ်ပီၢ်, မီၢ်ခဳးဘါထာ်အန့ၤစလှီမီၢ်, ကၱာ် စစာ်ထၱးကဘၱာ်စဲာ် အသး စါထံ လ့ၤလၤအစာ်ဘိ သကဳတြူၤတဘဲာ်နဳၤ ကၱာ်အလၤအီၣ်ကဲၤစခဳး. 17ကၱာ်ဒီစာ်ပီၢ်, တဲၤလ့ၢ်သဲာ်ထာ်ဒဳ မီၢ်ခဳး နဳၤအဒီၣ်, “အယဳၤမၱာ် ယဖဳးယဘဲာ်လီၢ်ကဓူၤ ထဲၢ်အမဲၤသဳးလဳၢ်သးလၤသအူသအဲးယဲၤတပွဲၤနဳၤ.”

Currently Selected:

မးသဲ 3: GBA

Highlight

Copy