မးသဲ 4

တဲၤနှးကါ

(မၢ် ၁:၁၂-၁၃, လူၤ ၄:၁-၁၃)

1ဘ့နဳၤသးစါထံလ့ၤအံာ်ဟူကဲၤယ့ၣ်ရှူးဒဳ မှၱးလဲၢ်ကျဲနဳၤစာ် ဘိထဲၢ် စဘဲာ်မဳၤဒဲးလၱးအတဲၤနှးကါနဳၤ. 2ကၱာ်ဒီ ဘ့စဒူၣ်ဝှါတဲၤ အၣ်တဲၤအီအနံၤလွံၢ်ၡံ အသဲလွံၢ်ၡံနဳၤ, စသးဝံာ်ကဲၤ. 3မဲၤဝှါဒဳၣ် မဳၤဒဲးလၱးလ့ၤဘိာ်ထၱးကၱာ်ဒီၣ်စဲာ်, “နကမၱာ် ကဘၱာ်စဲာ်အဖဳးဒဳၣ်, မှဲးလၤပီၢ် စာ်ဘိထဲၢ်လဳၤအယဳၤတစီာ် ကဖၱထာ်တကဳာ်နဳၤ.”

4မၱာ်ယ့ၣ်ရှူးဒီၣ်က့ၤစဲာ်, “အအီၣ်ဝှ့းလၤ စဲာ်ပူၤ, ‘ပၠၤတအီၣ် သမိအံာ်ကိာ်မဲၤတကဳာ်လီၤနီး. မၱာ်စအီၣ်သမိအံာ်ကိာ်တဲၤ ယၱၢ်ဘဲာ်ကိ အမှိ, ထဲၢ် အဟဲးထာ် ကဘၱာ်စဲာ်အဧီၢ်ဗူနဳၤ.’ ”

5ဝှါဒဳၣ်မဳၤဒဲးလၱးထာ်အံာ်စဲာ်ဒဳ အူးစါထံအပူၤနဳၤ, ကၱာ်အဒီ ထာ်စဲာ်ဒဳ တဲၤလှူၣ်ၡံၣ်အခဳးတစီအခဳးနဳၤ. 6ကၱာ်အဒီၣ်စဲာ်, “နကမၱာ်ကဘၱစဲာ်အဖဳးဒဳၣ်, ထၱးလၤတ့ၢ်ပီၢ်နန့ၤ, မၤနဲၢ်ကဒီၣ်ဓဳၤဒဳၣ်, အအီၣ် ဝှ့းလၤစဲာ်ပူၤ,

‘ထဲၢ်စကမှဲးလၤကီ စမီၢ်ခဳးပွဲၤဇဳၤတစီာ်, ကဇၢ်ထာ်ကျဳၤအံာ်ကီနဲၤ

ကၱာ်ဒီ စကဇၢ်ကျဳၤကီနဲၤ စစူးခီးပူၤ

စာ်ဘိထဲၢ် နခၣ်ခီးကတတီး လၤဘဲာ်ပီၢ်လဳၤအခဳးနီးနဳၤ.’ ”

7ယ့ၣ်ရှူးဒီၣ်က့ၤစဲာ်, “နတနှးဘဲာ် နဘၱာ်စဲာ် ဘၱာ်စဲာ်အကါနီး, အအီၣ်ဝှ့းလၤ ဝ့ၤစဲာ်ပူၤဓဳၤ.”

8တပျာ်ဗ့ၤ မဳၤဒဲးလၱး ထာ်အံာ်စဲာ်ဒဳ ခီမူၤဓဳၤခီးလီထိ တမဲအခဳး, ကၱာ်ဒီ အဒဲလၱၢ်စဲာ် လၢ်ခဳးအထံအက့ၤလဳစါစဲး ကၱာ်အတီၤ အသ့းတစီာ်နဳၤ ကၱာ်အဒီၣ်စဲာ်, 9“နကကီၢ်လၤသဘဲထာ်ဘ့ာ်မ့မၤယဲၤဒဳၣ်, ယကအံာ်တပွဲးနဲၤ တဲၤအယဳၤလဳစါစဲး.”

10ဘ့နဳၤ ယ့ၣ်ရှူးဒီၣ်စဲာ်, “ဆဲးဖျီးမံ, မဳၤဒဲးလၱး. မၤနဲၢ်ကဒီၣ် ဓဳၤဒဳၣ်, အအီၣ်ဝှ့းလၤ ကယဳၤ, ‘နသဘဲဘဲာ်နဘၱာ်စဲာ် ဘၱာ်စဲာ်ကၱာ် နခး ဇိၤဘဲာ်စဲာ်တပွဲၤလီၤ.’ ”

11ဘ့နဳၤလီၤ မဳၤဒဲးလၱးဟဲးသံဝံၢ်စဲာ်, ကၱာ် ဒီစာ်ပီၢ်, မီၢ်ခဳးပွဲၤ ဇဳၤတစီာ်လၤခးဇိၤကဲၤစဲာ်.

ယ့ၣ်ရှူးဒဳကပ့းရနီၣ်အူးနဳၤ

(မၢ် ၁:၁၄-၁၅, လူၤ ၄:၁၄-၁၅)

12ကၱာ်ဒီဘ့ ယ့ၣ်ရှူးသၱာ်ဟဲဘဲာ်ဝှါ စီၤယိၤဟၣ် ဘဲာ်ဖီးကဲၤ နဳၤ, စက့ၤဘးအီၣ်က့ၤကဲၤဒဳ ကၤလံၤလဲအက့ၤ ပူၤနဳၤ. 13ကၱာ်ဒီစဟဲးထာ်ဝှါ နစၤရ့းအူး, စလ့ၤအီၣ်ကဲၤဒဳကပ့းရနီၣ်အူး, အအီၣ်ပဲာ်လဲာ် ဝ့ၤဒဳ စဘူလိၣ်ကၱာ် နးသၤလံအလၢ်ခဳးအဆဳထၱးနဳၤ. 14စာ်ဘိထဲၢ် ဝံယၡါယၤအတဲၤယၱၢ်ဘဲာ်ဒီၣ်ကဲၤနဳၤကပ့ထာ်ပီၢ်, ထဲၢ်စဒီၣ်,

15“စဘူလိၣ်အလၢ်ခဳး ကၱာ်နးသၤလံအလၢ်ခဳး,

ကျဲးအလ့ၤဒဳပဲာ်လဲာ်, ယၢ်ဒ့ၣ်ကီၤလီၢ်အလဝ့ၤတခီဝ့ၢ်,

ထဲၢ်ပွဲၤသူကူာ်ဖဳးတစီာ် အအီၣ်ကၤလံၤလဲနဳၤ.

16ပၠၤအဆးနါအီၣ်ကဲၤတဲၤခံးကျဲတစီာ် အလၢ်ခဳးပူၤတစီာ်နဳၤ,

စာ်ထၱးထဳတဲၤလှၱအဓဳၤကၱာ် ပၠၤဆးနါအီၣ်ဒဳ တဲၤသဲအအဳး လၤ တစီာ်အခဳး, တဲၤလှၱလၤဘဲာ်ထဳစဲာ်တစီာ်စီာ်.”

17ဘ့နဳၤဖျီအလှီမီၢ် ယ့ၣ်ရှူးသိာ်အံာ်သီအံာ်ပၠၤ, စဒီၣ်, “မဲၤ ပီၢ်တဲၤခးလှိ, မၤနဲၢ်, မီၢ်ခဳး အထံအက့ၤဓဳၤထဳ.”

အပျဲၢ်အဘီၣ်အအူဆူးတစီာ်

(မၢ် ၁:၁၆-၂၀, လူၤ ၅:၁-၁၁)

18ကၱာ်ဒီယ့ၣ်ရှူးလ့ၤကိာ် ကၤလံၤလဲပဲာ်လဲာ်ဝ့ၤဒဳၣ်, စစာ်ထၱး ကဲၤအသဲပူၤဝ့ၤကၠံၢ်ပွဲၤ, ထဲၢ်စီၤၡံမိၣ် ပၠၤယဳၤ စီၤပ့းတရူးနဳၤ, ကၱာ်စမဲၢ်စီၤ အၣ်ဒရ့းပၢ်လၤဓွံၢ်ဒဳပဲာ်လဲာ်ပူၤနူၤဒဳၣ်, (စမၱာ်ကဲၤအပိာ်အၣ်ဓၢ်ဖဳးတစီာ်) 19ကၱာ်ဒီ စဒီၣ်လၢ်ဝၤ, “လ့ၤကိာ်ယလ့ၤ, ကၱာ် ယကမဲၤဖၱထာ် ကီသံအပိာ်ပၠၤ.” 20ကၱာ်ဒီ စပၢ်လၤတ့ၢ်စဓွံၢ်, ကၱာ်စလ့ၤ ကိာ်တနၢ်လၢ်ဝၤ အလ့ၤလီၤ.

21ကၱာ်ဒီ စဖျီးတသဳးဝှါဒဳနဳၤဒဳၣ် စစာ်ထၱး အသဲပူၤဝ့ၤ အလဝ့ၤကၠံၢ်ပွဲၤ, ထဲၢ်စီၤယၤကိာ်, စီၤစ့းဘ့းဒဲအဖဳးခဳ, ကၱာ်စပၱးကီ စီၤယိၤဟၣ် နဳၤ. စအီၣ်ကိာ်စပာ်စီၤစ့းဘ့းဒဲအကါဒဳချံတဘဲာ် အပူၤနဳၤ. စဆးက့ၤစဓွံၢ် တစီာ် ကၱာ်ဒီ စယဳၤ လၢ်ဝၤ. 22ကၱာ်စလဲၢ်တၤကဲတနၢ်ချံကၱာ်စပာ်, ကၱာ် စလ့ၤကိာ်တနၢ်လၢ်ဝၤအလ့ၤ.

ယ့ၣ်ရှူးသဲာ်လှိ, ဒီထိးလၤကၱာ်မဲၤမှးက့ၤပၠၤ

(လူၤ ၆:၁၇-၁၉)

23ကၱာ်ဒီယ့ၣ်ရှူးဟဲးကၤလံၤလဲ သဒဲက့ၤအပူၤ, စဒီၣ်အူဒီ ဆးတဲၤဒဳလၢ်ဝၤ တစီာ်အဘူၣ်ဘျီၣ်အပူၤ. စဒီထိးမီၢ်ခဳအထံ အက့ၤအတဲၤသးလဳၢ်သးလၤအံာ်အဝၱၤအကဲ ကၱာ်စမဲၤမှးက့ၤပၠၤအရွှံးအဆဲကၱာ် အတမိၢ် တမှးနီးအမဳအမဳၤအရါလီတစီာ်နဳၤ. 24စမံၤစခဲဟဳ ထာ် သဲာ်လၤစူၤရံသဒဲက့ၤပူၤ ကၱာ်ဒီပၠၤလ့ၤအံာ်စအီၣ်အတမိၢ်တမှးနီးလဳစါစဲး ထဲၢ်အဘဲာ်တဲၤဆဲတမဳၤတမဳၤ ကၱာ်အခးဘဲာ် ယၤဘဲာ်တမဳၤတမဳၤ အစာ် ဘိအနှဲးအီၣ်တစီာ်, အပျူၤအသြီးတစီာ်ကၱာ် အစူးသံခးသံတစီာ် ကၱာ် စမဲၤမှးက့ၤတပွဲးလၢ်ဝၤ. 25ကၱာ်ဒီပၠၤအအီၣ်ဒဳ ကၤလံၤလဲက့ၤ, ကၱာ်ဒ့းကၤပလံၣ်, ကၱာ်ယရူၤၡလ့ၣ်, ကၱာ်ယူဒၤကၱာ် ယၢ်ဒ့ၣ်ကီၤလီၢ် အလဝ့ၤ တခီဘဲာ်တစီာ် လိၤကိာ်အီၣ်အဲးအီးအီး ကဲၤစလ့ၤ.

Currently Selected:

မးသဲ 4: GBA

Highlight

Copy