မးသဲ 2
2
မၢ်ကူးအဆးဖြး
1ဘ့ယ့ၣ်ရှူးအီၣ်လၤဒဳဘ့ၤသလ့ဃ့ၣ် အူးပူၤ, ယူဒၤအက့ၤ, ဆးဖြး စီၤဟ့ၤရိာ်အဇိၤခဲ နဳၤ, စာ်ပီၢ်ပၠၤအဇၤအပျၤ, အအီၣ်ဒဳလူၤမူၤထာ် တခီ, ဓဳၤလ့ၤကဲၤဒဳယရူၤၡလ့ၣ်အူးနဳၤ. 2စဒီၣ်, “ယူဒၤဖဳးအဆး ဖြးအအီၣ်လၤသဲတပွဲၤ အီၣ်ကဲၤဒီၣ်လဲၢ်. မၤနဲၢ်, ဝၤစာ်ထၱးကဲၤ စဆဲၣ် ဒဳလူၤမူၤထာ်နဳၤ, ကၱာ်ဝၤလ့ၤမၱာ်အကလ့ၤသဘဲ စဲာ်ဝၤဒီၣ်ဓဳၤ.”
3ဆးဖြးဟ့ၤရိာ်သၱာ်ဟဲဘဲာ်တဲၤအဝၱၤအကကဲ ယဳၤဒဳၣ်, စတအီၣ်မီၤအီၣ်မၤနီး, ကၱာ်ဒီယရူၤၡလ့ၣ်သဒဲအူး မၱာ်ကဲၤအစာ်ဘိစဲာ်နဳၤ. 4စယဳၤလၤ တ့ၢ်ပျဳာ်ပၠၤလှူၣ် တဲၤအဓဳၤတစီာ်, ကၱာ်ပၠၤသၱာ်ယူဒၤအတဲၤသိၣ် တဲၤသီတစီာ်, စဒဲစာ်လၢ်ဝၤခရၱာ်ကအီၣ်လၤ ဘဲာ်ဒီၣ်လဲၢ်နဳၤ.
5မၱာ်စဲာ်တစီာ်ဒီၣ်လၢ်ဝၤ, “ဒဳဘ့ၤသလ့ဃ့ၣ်အူး, ယူဒၤက့ၤနဳၤ. မၤနဲၢ်ကဒီၣ်ဓဳၤဒဳၣ်, ဝံဝှ့းလၤကဲၤကယဳၤ,
6‘နဲၤဘ့ၤသလ့ဃ့ၣ်အူး, ယူဒၤက့ၤ,
ဒဳယူဒၤအဆးဖြးဖဳးတစီာ်အကျဲ
နတမၱာ်အၡံးဖဳးကဓူၤနီး.
မၤနဲၢ်ကဒီၣ်ဓဳၤဒဳၣ် အခဳးအန့ၤအဒဲလၱၢ်ကျဲး
အကအူအံာ်ဘဲာ်ယပၠၤအံၣ်စရ့လးတပွဲၤနဳၤ,
ကပီးထာ်ကီဒဳနအီၣ်နဳၤ.’ ”
7ဘ့နဳၤ, စီၤဟ့ၤရိာ်ယဳၤဟူၣ်ဇီၤကဲၤ ပၠၤမၤကူးဖဳးတစီာ် ဒဲစာ် လၤတံၤလၤဆ့းကဲၤ လၢ်ဝၤ ဆဲၣ်အပီးထာ် ထၱးစဲာ်တမဲအခၠၱးအကျၤ. 8ကၱာ်ဒီ စနှးလ့ၤကဲၤလၢ်ဝၤတစီာ်ဒဳ ဘ့ၤသလ့ဃ့ၣ်အူးနဳၤဒဳၣ်, စဒီၣ်, “လ့ၤကၱာ်ထိးစာ်ဒဲစာ်လၤတံၤလၤဆ့း အပံၤစဖဳးအီၣ်ဒီၣ်လဲၢ်နဳၤ. သံကပး ထၱးစဲာ်ဒဳၣ်, က့ၤဒီဆးပီၢ်ယဲၤ, စာ်ဘိထဲၢ်ယဲၤမၱာ်မၱာ် ယကလ့ၤသဘဲပီၢ် စဲာ်နဳၤ.”
9စသၱာ်ဟဲဘဲာ်ဝှါ ဆးဖြးအတဲၤယၱၢ်ဘဲာ် ဒဳၣ် စလ့ၤကဲၤစကျဲးတစီာ်, ကၱာ်ဒီစာ်ဘိဆဲၣ်, ထဲၢ်စစာ်ထၱးကဲၤဒဳလူၤမူၤထာ်တမဲနဳၤ လ့ၤစလှီ မီၢ်ထိအဓဳၤကၱာ်အဆီထဳးအီးကဲၤဒဳ အပံၤစဖဳး အီၣ်အလ့ၤအခဳးနဳၤ. 10စဲာ်တစီာ်စာ်ထၱး ဆဲၣ်ဒဳၣ်, စသးကနၢ်အံာ်ကဲၤအဇၱၢ်အဇိၢ်. 11ကၱာ်ဒီ စလ့ၤနံၢ်ၡံၣ်ပူၤဒဳၣ်, စစာ်ထၱးအပံၤ စဖဳးကၱာ်စမဳၤ နီၢ်မၤရၱ, စကီၢ်လၤသဘဲထာ် လၢ်ဝၤ. မဲၤဝှါစဘါထာ်ကဲၤ တဲၤလံၢ်ဓဳၤပွၱၤသဲအကဳ ကၱာ်စမဲၤလှူၣ်လၤကဲၤလၢ်ဝၤထဲ, လီၢ်ဘၣ်ကၱာ်မူရၣ်.
12တဲၤဒီဆးစဲာ်တဲၤဆီးမံဘးအပူၤ, စာ်ဘိထဲၢ် စတက့ၤဘးစလ့ၤကါ ဒဳဆးဖြးဟ့ၤရိာ်အီၣ်နီးဒဳၣ်, စက့ၤကိာ်ကဲၤကျဲး အလဝ့ၤတဘီ.
တဲၤဆဲးဖျီးမံဒဳအဲးကူပတူးက့ၤနဳၤ
13ပၠၤမၢ်ကူးဖဳးတစီာ်က့ၤဝှါဒဳၣ်, ကဘၱာ်စဲာ်အပွဲၤဇဳၤ ပီးထာ် ထၱးစီၤယိၤသး တဲၤဆီးမံဘးအပူၤ, စဒီၣ်, “ဝဲၢ်ထဳး, ဖၱးအပံၤစဖဳး ကၱာ်စမဳၤကၱာ်ဆဲးဖျီးမံပီၢ်ဒဳ အဲၤကူပတူးက့ၤနဳၤ, ကၱာ်အီၣ်ပီၢ်ဒဳနဳၤ ထိယဒီဆး နဲၤနဳၤ. မၤနဲၢ်ကဒီၣ်ဓဳၤဒဳၣ်, စီၤဟ့ၤရိာ်ကဝၢ်လှဲးကီ အပံၤစဖဳးစာ်ဘိထဲၢ်စကမဲၤကဲမဲၤလှဲမဲၢ်လၢ်ဝၤနဳၤ.”
14စဝဲၢ်ထဳး, ဖၱးသါအပံၤစဖဳးကၱာ်စမဳၤ, ကၱာ်စလ့ၤအီၣ်ဟူၣ် အီၣ်ဇီၤတပွဲၤဒဳ အဲၤကူပတူး က့ၤနဳၤ, 15ကၱာ်ဒီစအီၣ်ကဲၤဘ့နဳၤထိ စီၤဟ့ၤရိာ်သံနဳၤ. စာ်ဘိထဲၢ်တဲၤယၱၢ်ဘဲာ် ထဲၢ်ကဘၱာ်စဲာ်ဒီၣ်ကဲၤဝံ အလီၤ မီၤပူၤတမှိ ကပ့ထာ်ပီၢ်နဳၤ, ထဲၢ်အဒီၣ်, “ယယဳၤဟဲးထာ် ကဲၤယဖဳး ဒဳအဲၤကူပတူးက့ၤပူၤနဳၤ.”
တဲၤမဲၤသံအပံၤစဖဳးတစီာ်
16ဘ့စီၤဟ့ၤရိာ်သၱာ်ဟဲဘဲာ် ပၠၤမၤကူးဖဳး တစီာ်ပျၤကဲၤစခဳး ဒဳၣ်, စသဲးထဲးဆိးကၱာ်ဒီ စနှးလ့ၤမဲၤသံလဳအပံၤစဖဳး အအီၣ်ကၠံၢ်ဒ့ာ်ကၱာ် အကါလဲၢ်တစီာ် ဒဳဘ့ၤသလ့ဃ့ၣ်အူးပူၤ ကၱာ်အူး အဇဳၤခဳးဇၤဝၤတစီာ်, အစာ်ဘိ ပၠၤမၤကူးဖဳးတစီာ်ဒီဆးလၤတံၤလၤဆ့းစဲာ် ဆဲၣ်ပီးထာ်အခၠၱး အကျၤနဳၤ.
17ဘ့နဳၤ, ဝံယံးရမံယၤအတဲၤဒီၣ်တီၤလီၤ ပ့ထာ်ကဲၤထဲၢ်အဒီၣ်, 18“တဲၤအလ့ၢ်သဲာ်ကဲၤဒဳရၤမါအူးပူၤဟဳတသီထာ်, တဲၤဟး ဖူဟးဆရံးကၱာ် တဲၤယဳၤတဲၤဟးအဇၱၢ်အဇိၢ်. နီၢ်ရၤဃ့လး ဟးအံာ်အဖဳး အလံၤကၱာ် စတသးအဲး နံၤပၠၤဒီၣ်ခူဒီၣ်မီၤက့ၤစဲာ်နီး, မၤနဲၢ်, စဲာ်တစီာ်တအီၣ်ပ့ၤနီး.”
တဲၤက့ၤဘးဒဳနစၤရ့းအူး
19စီၤဟ့ၤရိာ်သံဝှါနဳၤ, စာ်ပီၢ်, ကဘၱာ်စဲာ်အပွဲၤဇဳၤ တပွဲၤပီၤ ထာ်ထၱးစီၤယိၤသး ဒဳစတဲၤဆီးမံဘးအပူၤ, ဒဳအဲၤကူပတူးအပူၤနဳၤစဒီၣ်, 20“ဝဲၢ်ထဳး, ဖၱးအပံၤစဖဳးကၱာ်စမဳၤ ကၱာ်ဒီ က့ၤပီၢ်ဒဳအံၣ်စရ့လး အလၢ်ခဳး ပူၤနဳၤ. မၤနဲၢ်ကဒီၣ်ဓဳၤဒဳၣ်, ပၠၤအသးအဲးမဲၤသံ အပံၤ စဖဳး တစီာ်သံထဳ.” 21စီၤယိၤသးဝဲၢ်ထဳး, စဖၱး အပံၤစဖဳး ကၱာ်စမဳၤ ကၱာ်ဒီစက့ၤတပွဲးကဲၤဒဳ အံၤစရ့လးအလၢ်ခဳးပူၤနဳၤ.
22ပရၤဆါ စသၱာ်ဟဲဘဲာ်ကဒီ စီၤအၢ်ဃ့လး အူအံာ်စပာ် စီၤဟ့ၤရိာ်အလ့ၤ ဒဳယူဒၤက့ၤနဳၤဒဳၣ်, စတက့ၤဘူၣ်နီး. ကၱာ်ဒီတဲၤဒီဆးစဲာ် တဲၤဆီးမံဘးအပူၤဒဳၣ်, စက့ၤတခီဘၱကဲၤဒဳ ကၤလံၤလဲက့ၤတခီဘဲာ်နဳၤ. 23ကၱာ်ဒီ စဓဳၤက့ၤဒဳၣ်, စလ့ၤအီၣ်ကဲၤ ဒဳအူး အမံၤမၱာ် နစၤရ့းတအူးနဳၤ, အစာ်ဘိဝံတစီာ်အတဲၤဒီၣ်တီၤလီၤထဲၢ်, “ပၠၤကယဳၤကီစဲာ် နစၤ ရ့းဖဳး” ကပ့ထာ်ပီၢ်နဳၤ.
Currently Selected:
မးသဲ 2: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
