မးသဲ 15
15
ယ့ၣ်ရှူးကၱာ်ဖၤရံၤၡဲဖဳးတစီာ်
(မၢ် ၇:၁-၁၃)
1ဘ့နဳၤပၠၤအသၱာ်အတဲၤသိၣ်တဲၤသီကၱာ် ဖၤရံၤၡဲဖဳးအအီၣ် အူးယရူၤၡလ့ၣ်အူးတစီာ် လ့ၤထၱး ယ့ၣ်ရှူးကၱာ်စဒီၣ်, 2“နပျဲၢ် နဘီၣ်တစီာ် ခဲဘးမၤ အဓဳၤအပွ့ၤလှ့းမဳၤတစီာ်အနူၤအဒီနဲၢ်. မၤနဲၢ်ကဒီၣ်ဓဳၤဒဳၣ် ဒဳၣ်, ဘ့စအၣ်တကဳာ်နဳၤ, စတဟူစဘါစစူးခီးနီး.”
3မၱာ်စဒီၣ်က့ၤလၢ်ဝၤတစီာ်ကယဳၤ, “သံမၱာ်သဲ သံခဲဘးကဘၱာ်စဲာ်အတဲၤမှဲးလၤဒဳ သံတဲၤနူၤတဲၤဒီ အပူၤနဳၤနၱၢ်. 4မၤနဲၢ်ကဒီၣ်ဓဳၤဒဳၣ်, ကဘၱာ်စဲာ်ဒီၣ်, ‘ဒဳဘဲာ်ယးဘဲာ်နမဳၤကၱာ်နပာ်.’ ကၱာ်ဒီ ‘ပၠၤအဟိး ကၱကဲာ် အပာ်မၱာ်ဝၱၤ, အမဳၤမၱာ်ဝၱၤတပွဲၤ ကဘဲာ်ဒီဧဲၤတဲၤသံ.’ 5ပရၤဆါသံဒီၣ်, ‘ပၠၤတပွဲၤပွဲၤကဒီၣ်အမဳၤမၱတမၱာ် နီးအပာ်ကယဳၤ, “တဲၤ လှူၣ်အရါယလှူၣ်နဳၤ, ကမၱာ်ကီ ကဘၱာ်စဲာ်အနံၤခံ.” 6ကၱာ်စတဒဳ တယးဘဲာ်ကီ စမဳၤမၱာ်ဝၱၤစပာ်မၱာ်ဝၱၤနီး, ကၱာ်စတမဲၤဇဳၤ ဘဲာ်ကီစမဳၤ မၱာ် ဝၱၤစပာ်မၱာ်ဝၱၤနီး,’ ကၱာ်ဒီသံမဲၤကဲကဲၤကဘၱာ်စဲာ် အတဲၤမှဲးလၤဒဳသံတဲၤ နူၤတဲၤဒီအကျဲနဳၤ. 7ပၠၤ အဝၱၤတပီးခဳး, စီၤယၡါယၤဒီဆးတီၤလီၤ သအူသအဲး ကဲၤသံဝၱၤသံကဲကယဳၤ, 8‘ပၠၤအယဳၤတစီာ် ဒဳဘဲာ် ယးဘဲာ်ယဲၤကၱာ်စလီၤမီၤလီၤ. မၱာ်စသးအီၣ်ယၱၤကၱာ် ယဲၤ. 9စသဘူၣ်သဘဲနှးနှါတပွဲးယဲၤ. နီၣ်သီနှီနူၤ, စတဲၤသိၣ်တဲၤသီတစီာ်မၱာ်ပၠၤ အတဲၤမှဲးလၤလီၤ.’”
တဲၤအမဲၤဘီာ်ပၠၤ
(မၢ် ၇:၁၄-၂၃)
10ဘ့နဳၤစယဳၤဘိးထၱးဝှါပၠၤအပဳၤအဟီးခွဲဘး စဲာ်ဒဳၣ်, စဒီၣ် လၢ်ဝၤ, “ဆီးခ့န့းကၱာ်သၱာ်ဟဲပီၢ်အယဳၤ. 11တဲၤအလ့ၤနံၢ်ပၠၤအဧီၢ်ဗူတမဲၤဘီာ်ပၠၤနီး. အမဲၤ ဘီာ်ပၠၤမၱာ်တဲၤအဟဲးထာ်ပၠၤဧီၢ်ဗူတခီ.”
12ဘ့နဳၤစပျဲၢ်စဘီၣ်တစီာ် လ့ၤဒီၣ်စဲာ်ကယဳၤ, “ဖၤရံၤၡဲတစီာ် သၱာ်ဟဲဘဲာ်ဝှါတဲၤယၱၢ်ဘဲာ်အယဳၤဒဳၣ်, စသးဆဲဘဲာ်ကဲၤနဲၤနဳၤ နသၱာ်ဟဲ ပီၢ်ဧါ.”
13မၱာ်စဒီၣ်က့ၤလၢ်ဝၤတစီာ်, “တဲၤမူၤထဲၢ်အပာ် အအီၣ်မီၢ် ခဳးတပွဲၤတဆဳးလၤနီးနဳၤ, တဲးကၡးကဲကီ ကိအဘီလီၤ. 14စအီၣ် ဒီဧဲၤစအဲ. စမၱာ်အကၢ်ဓူ ခံးထဲၢ်အဒဲလၱၢ်အကၢ်ဓူခံးအကျဲးလီၤ. အကၢ် ဓူခံး ကၱာ်အကၢ်ဓူခံးကဟဲးအံာ်ဟူလှဲးလၢ်ဝၤဒဳၣ်, စလၤဓ့ၢ်နံၢ် ပီၤပူၤကၠံၢ် ပွဲၤလဳၢ်လဳၢ်လီၤ.”
15စီၤပ့းတရူးဒီၣ်က့ၤစဲာ်ကယဳၤ, “ဒီၣ်လှၱထာ်နံၤ ပီၢ်ဝၤတဲၤ ကလဲၤယဳၤအထာ်ပဳၤထာ်ဘါတကၱာ်.”
16စဒီၣ်, “ထိခဳနူၤယဳၤ သံတသၱာ်ဟဲတဲၤနှၱနီးဧါ. 17တဲၤအရါအလ့ၤ နံၢ်ပၠၤဧီၤဗူနဳၤ, အဓဳၤနံၢ်ပၠၤ အဖူပူၤဒဳၣ်, အဟဲးထာ် ကဲဒဳ ပီၤပူၤနဳၤ, သံတသၱာ် ဟဲနီးဧါ. 18ပရၤဆါ တဲၤအဟဲးထာ်ပၠၤ အဧီၢ်ဗူမၱာ် တဲၤအဟဲးထာ်ပၠၤအသးပူၤ, ကၱာ်ဒီအမဲၤဘီာ်ပၠၤမၱာ် တဲၤအနဳၤ တစီာ်နဳၤ. 19မၤနဲၢ်ကဒီၣ်ဓဳၤဒဳၣ်, တဲၤကမဳၤအကၱကဲာ်, တဲၤမဲၤသံ ပၠၤ, တဲၤလၤသူးလၤကမဲာ်, တဲၤဒဳသဗွံ, တဲၤအၣ်ဟူၣ်, တဲၤခးသဲသၱးအတတၱၢ် တမှးနီး, တဲးဒီၣ်ကဲဒီၣ်အိးတဲၤ, အယဳၤတစီာ်မၱာ်အဟဲးထာ်ဒဳပၠၤ အသးအပူၤလီၤ. 20တဲၤအယဳၤ တစီာ်မၱာ်အမဲၤဘီာ်ပၠၤ. ပရၤဆါ ပၠၤအတဟူစဘါအစူးခီး နီး, စအၣ်စအီနဳၤတမဲၤဘီာ်စဲာ်နီး.”
ကနၤဧၣ်မဳၤတပွဲၤအတဲၤဘူၣ်
(မၢ် ၇:၂၄-၃၀)
21ဝှါဒဳၣ်, ယ့ၣ်ရှူးဟဲးထာ်ဒဳနဳၤ, ကၱာ်စလ့ၤအီၣ် တသဳးကဲၤဒဳ စိၢ်ကၱာ်စံဒိၣ်အူးအဘိးထၱးဘိးဝၤနဳၤ. 22ကၱာ်ဒီ စာ်ပီၢ်, ကနၤဧၣ် မဳၤ အဟဲးထာ်ဒဳတဲၤအလ့ၤ အနဳၤတကျးဝးအပူၤတပွဲၤ ကဲာ်ဧဳၤကၱာ်စဒီၣ် လၢ်ဝၤ, “ခီၣ် ဝဲၤပီၢ်ယဲၤ, အဳဘၱာ်စဲာ်, အဳစီၤဒၤဝံးအဖဳး. တဲၤနှဲး လိၢ်ဆိး ကဲၤယဖဳးမူၤ.”
23ပရၤဆါစတဒီၣ်က့ၤလၢ်ဝၤတဲၤယၱၢ်ဘဲာ် တမှိနီး. စပျဲၢ်စဘီၣ်တစီာ်လ့ၤဘိးထၱးကၱာ်တၤမီၤကဲၤ စဲာ်ကယဳၤ, “နှးဟဲးပီၢ်စဲာ်. မၤနဲၢ် ကဒီၣ်ဓဳၤဒဳၣ်, စဟဲး ကဳၤဟဲးတြးကိာ်ကလ့ၤ.”
24မၱာ်စဲာ်နဳၤစဒီၣ်က့ၤ, “ယဘဲာ်သဓဳလ့ၤမၱာ်ထ့ သဳထဲၢ်အအီၣ် အံၣ်စရ့လးအရှံၣ်ပူၤအလှဲမဲၢ်တစီာ် အနံၤခံနဳၤလီၤ.”
25ပရၤဆါ, အမံၤမှူးလ့ၤကီၢ်လၤစခၣ်ထၱး ကၱာ်စဒီၣ်, “ဘၱာ် စဲာ်, မဲၤဇဳၤပီၢ်ယဲၤတကၱာ်.”
26စဒီၣ်က့ၤလၢ်ဝၤကယဳၤ, “ဖဳးလံၤအတကဳာ် ကဖၱးကၱာ်ကဝှ့ နံၤထွံၣ်အၣ်မၱာ်အတဘဲာ်နီး.”
27အမံၤမှူးဒီၣ်, “ဘဲာ်ဟဳဘၱာ်စဲာ်, ထွံၣ်တစီာ် အၣ်ဘဲာ်တပွဲး တကဳာ်အကနၱးကနိး အလၤတ့ၢ်ဒဳ အဘၱာ်စဲာ်အတဓၢ်လဲၢ်တစီာ်နဳၤ.”
28ဘ့နဳၤယ့ၣ်ရှူးဒီၣ်က့ၤစဲာ်, “အမံၤမှူး, နတဲၤ ဘူၣ်ဓဳၤဟဳ. တဲၤကဖၱထာ်ဒီဧဲၤ အစာ်ဘိနသးအဲးနံၤ နဳၤ.” ကၱာ်ဒီအနဳၤတသရဲးအပူၤ လီၤ, စဖဳးမူၤမှးက့ၤကဲၤ.
ယ့ၣ်ရှူးမဲၤမှးက့ၤပၠၤအခးဘဲာ်တဲၤရွှံးတဲၤဆဲတစီာ်
29ယ့ၣ်ရှူးဟဲးထာ်ဝှါဘ့နဳၤဒဳၣ်, စလ့ၤကိာ်ကဲၤဒဳ ကၤလံၤလဲ ပဲာ်လဲာ်ဝ့ၤနဳၤ. ကၱာ်ဒီစထာ်ဝှါခီၤလီတမဲ အခဳး, စဆးနါအီၣ်ကဲၤဒဳနဳၤ. 30ကၱာ်ဒီပၠၤအပဳၤအဟီးလ့ၤထၱးစဲာ်, လ့ၤအံာ်အခၣ်ဒ့း, အမ့ၢ်ခံး, အစူး သံဝံၤခၣ်သံဝံၤ, အတမူၢ်တအးကၱာ်အလဝ့ၤပွ့တမံၤ, ကၱာ်ဒီစဘဲ လါ လၢ်ဝၤဒဳယ့ၣ်ရှူးအခၣ်ထၱး ကၱာ်စမဲၤမှး က့ၤလဳတပွဲးလၢ်ဝၤတစီာ်. 31ထိမၱာ် ပၠၤအပဳၤအဟီးတစီာ်စာ်ထၱးအတမူၢ်တအးယၱၢ်ဘဲာ်, အစူးသံဝံၤ ခၣ်သံဝံၤအဲးက့ၤ, အခၣ်ဒ့းဟဲး, အမ့ၢ်ခံးစာ်ထၱးတဲၤ ဒဳၣ်, စထဲးတမိၢ်တမှါကဲၤကၱာ် စထါအံာ်ကဲၤ အံၣ်စရ့ လးအဘၱာ်စဲာ်.
ယ့ၣ်ရှူးဘဳာ်အၣ်ပၠၤအပွဲၤယဲၢ်ထီး
(မၢ် ၈:၁-၁၀)
32ယ့ၣ်ရှူးယဳၤပျဳာ်ဝှါသၱာ်ဟဲဘဲာ်ဒဳၣ်တစီာ် စဒီၣ် လၢ်ဝၤ, “ယခီၣ်ဝဲၤပၠၤအပဳၤအဟီးယဳၤတစီာ်ယဳၤ, မၤနဲၢ်ကဒီၣ်ဓဳၤဒဳၣ်, စဟဲးကိာ်ယကါ အီၣ်ထဳသဳသဲအဓၢ် ပူၤ, ကၱာ်စတဲၤအၣ်တအီၣ်တမံနီး. ယတသးအဲးနှး က့ၤဆီတအၣ်စဲာ်တစီာ်နီး. စကလၤဖျၱးလၤဓၢ်တၤ သရီ ကျဲးခဳးကျဲးလီၤ ဒီၣ်ဗ့.”
33ကၱာ်ဒီစပျဲၢ်စဘီၣ်တစီာ်ဒီၣ်က့ၤစဲာ်, “ဒဳမှၱးလဲၢ် ကျဲယဳၤကမဲၤနံၤကဲာ်ထာ်တကဳာ်ထိကၱာ် အကဆိ အၣ်ပၠၤအီၣ်အဲးအီးအီၤပွ့အယဳၤ ဒီၣ်လဲၢ်.”
34ယ့ၣ်ရှူးဒဲစဲာ်တစီာ် “သံတကဳာ်အီၣ်ပွံၢ်ဒဳ.”
စဲာ်တစီာ်ဒီၣ်ရှံက့ၤလၢ်ဝၤ, “အီၣ်သါသိးတဒဳကၱာ် ဓၢ်ဖဳးအကူၤရူၤတကၱာ်.”
35ဘ့နဳၤစနှးပၠၤအပဳၤအဟီးဆးနါလါလၢ်ခဳး. 36ကၱာ်ဒီ စဖၱးတကဳာ်သါသိးတဒဳကၱာ်ဓၢ်ဖဳး, ကၱာ်စဟိးဝၱၤ, စဘၱးဖးကၱာ်စအံာ်စပျဲၢ်စဘီၣ်တစီာ်ပ့ၤလၤနံၤ တပွဲးပၠၤ. 37ပၠၤအၣ်လဳကိအပွဲၤကၱာ်စအၣ် ဆိ အၣ်တပွဲးတစီာ်ကၱာ်စဖၱးက့ၤ အကီဘူးကီလၢ်, အခဳး လၤကါဆဲးပ့ထာ်သါသိးတပးလှူၣ်ဗ့ၤ. 38ပၠၤအအၣ်ဘဲာ်တစီာ်အီၣ်ကဲၤလွံၢ်ထီး, အပံၤစဖဳးကၱာ်အမံၤ မှူးတစီာ်အီၣ် ဝ့ၤ.
39ကၱာ်ဒီစနှးက့ၤဝှါပၠၤအပဳၤအဟီးဒဳၣ်, စခဲထာ် နံၢ်ချံတဘဲာ် အပူၤ. စလ့ၤကဲၤဒဳမၤကဒၣ် အလၢ်ခဳး ပူၤနဳၤ.
Currently Selected:
မးသဲ 15: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
