မးသဲ 16
16
တဲၤတၤယ့ၣ်ရှူးဒဲလၱၢ်တဲၤစီးကျၱး
(မၢ် ၈:၁၁-၁၃, လူၤ ၁၂:၅၄-၅၆)
1ဖၤရံၤၡဲဖဳးတစီာ်ကၱာ်စးဒူၤကဲဖဳးတစီာ် လ့ၤထၱး စဲာ်ဒဳနဳၤ, စနှးလၢ်ဝၤအကါကၱာ်စတၤလၢ်ဝၤအကဒဲ လၱၢ်တဲၤစီးကျၱးဒဳမီၢ်ခဳး လဲၢ်နဳၤ တဓဲ. 2မၱာ်စဲာ်နဳၤ စဒီၣ်က့ၤလၢ်ဝၤ, “ဘ့လူၤမူၤဟဲးလၤနဳၤကပီၤ ကဲၢ်ဒဳၣ်, တဲၤကယီၤသံဒီၣ်တပွဲးဓဳၤ. 3ကၱာ်ဒီဘ့လူၤမူၤဂီၤ နဳၤ, မီၢ် ခဳးလဲၢ်လၱၤကၱာ်အဘိးလၤ, ကလံၤကတပဳၢ် သံဒီၣ်တပွဲးဓဳၤ. မဲၤကနဳၤဒဳၣ် သံသၱာ်ဟဲသဲမီၢ်ခဳး လဲၢ်အမူၢ်ကါအဟိအကလဲၤနၱၢ်, သံတသၱာ်ဟဲဇၤမၤ အခၠၱးအကျၤ အတဲၤဒဲလၱၢ်နီးနဲၢ်. 4ပၠၤအကၱကဲာ် ကၱာ်အဘၱာ်စဲာ် ကျဲးထီးတအီၣ်နီးတဇိၤဝၢ်လှဲးတဲၤစီးကျၱး, ကၱာ်ဒီ ဝံယိၤနါအတဲၤစီၤကျၱး အချဳ တဲၤကတအံာ်ကီ စဲာ်တဲၤစီးကျၱးအလဝ့ၤတမံနီး.”
ကၱာ်ဒီစလဲၢ်ကဲဝှါလၢ်ဝၤတစီာ်စဟဲးကဲၤ.
ဖၤရံၤၡဲဖဳးကၱာ်စးဒူၤကဲဖဳးတစီာ်အကမံၤ
(မၢ် ၈:၁၄-၂၁)
5ကၱာ်ဒီဘ့စပျဲၢ်စဘီၣ်တစီာ် ဓဳၤဝဲၢ်ဒဳအလဝ့ၤ တခီဝဳၢ်နဳၤ, စသၱာ်ဟဲကီ စဆီးသိပိၢ်နှဲးဟဲးအံာ်နံၤ တကဳာ်နဳၤ. 6ကၱာ်ဒီ ယ့ၣ်ရှူး ဒီၣ်စဲာ်တစီာ်, “ဆီး အံာ်ပီၢ်သံန့ၤဖၤရံၤၡဲဖဳးကၱာ်စးဒူၤကဲဖဳး တစီာ်အကမံၤ.”
7ပရၤဆါ စကမဳၤဒဳ စသးပူၤတစီာ်ကၱာ်စဒီၣ်, “ဝၤတလ့ၤ အံာ်နံၤကဲၤတကဳာ်နီး.”
8ယ့ၣ်ရှူးသၱာ်ဟဲအယဳၤဒဳၣ် စဒီၣ်လၢ်ဝၤတစီာ်, “ပၠၤအတဲၤ ဘူၣ်တကၱးဖဳးတစီာ်, သံတလ့ၤအံာ်နံၤ တကဳာ်နီးအစဲ သံဘဲာ်ၡဳမၤ ဒဳသံ သးပူၤနဳၤနဲၢ်. 9သံတသၱာ်ဟဲတဲၤနှၱနီးဧါ. သံတကမဳၤထာ်နံၤက့ၤ တကဳာ်ယဲၢ်ဒဳကၱာ် ပၠၤယဲၢ်ထီးသံဖၱးက့ၤအကါဆဲး ပွံၢ်ပးလှူၣ်နဳၤနီးဧါ. 10မၱတမၱာ်နီးပၠၤလွံၢ်ထီးအၣ် ကဲၤတကဳာ်သါသိးတဒဳ ကၱာ် သံ ဖၱးက့ၤ အကါဆဲး ပွံၢ်ပးလှူၣ်နဳၤနီးဧါ. 11ဆီးအံာ်ပီၢ်သံန့ၤ ဖၤရံၤၡဲဖဳး ကၱာ် စးဒူၤကဲဖဳးအကမံၤယဒီၣ်သံဓဳၤဒဳၣ်, တဘဲာ်ယသးအဲးဒီၣ်တကဳာ်နီးနဳၤ သံတသၱာ်ဟဲမၤနီးနဲၢ်.”
12ဘ့နဳၤစသၱာ်ဟဲကီတစီာ်, ထဲၢ်စတဒီၣ်လၢ်ဝၤ ကဆီးအံာ် အန့ၤကၱာ်တကဳာ်အကမံၤနီး, မၱာ်ဖၤရံၤၡဲဖဳး ကၱာ်စးဒူၤကဲဖဳးအတဲၤသိၣ် တဲၤသီတခီ.
စီၤပ့းတရူးအတဲၤအဳလါဖျးလၤ
(မၢ် ၈:၂၇-၃၀, လူၤ ၉:၁၈-၂၁)
13ကၱာ်ဒီယ့ၣ်ရှူးဓဳၤလ့ၤကဲၤစါရံၤဖံးလံးပံးအူး အဝၢ်ထၱးကၱာ် ဒဳနဳၤ စဒဲကဲၤစပျဲၢ်စဘီၣ်တစီာ်ကယဳၤ, “ပၠၤဒီၣ်ပီၢ်ပၠၤအဖဳး ယဲၤယဳၤမၱာ်ပီၢ် ပွဲၤ.”
14မၱာ်စဲာ်တစီာ်ဒီၣ်, “ပၠၤတစီာ်ဒီၣ်, အဖဳးစူထံ စီၤယိၤဟၣ်, တစီာ်ဒီၣ်, စီၤအ့ၤလံယၤ, အလဝ့ၤတစီာ်ဒီၣ် စီၤယံးရမံယၤ, မၱတမၱာ်နီး ဝံအလဝ့ၤတပွဲၤပွဲၤ လီၤ.”
15ယ့ၣ်ရှူးဒီၣ်စဲာ်တစီာ်, “ကဘဲာ်ဒီသံနဳၤ, သံ ဒီၣ်ဒီယဲၤမၱာ်ပီၢ် ပွဲၤ.”
16ဘ့နဳၤစီၤၡံမိၣ်ပ့းတရူးဒီၣ်ကဲၤကယဳၤ, “နဲၤမၱာ်ခရၱာ်, ကဘၱာ်စဲာ်အသမိတပွဲၤအဖဳးခဳ.”
17ကၱာ်ဒီယ့ၣ်ရှူးဒီၣ်က့ၤစဲာ်, “နဘဲာ်တဲၤဟိးဝၱၤ, စီၤၡံမိၣ်ဘၢ် ယိၤနါ. မၤနဲၢ်ကဒီၣ်ဓဳၤဒဳၣ်, အဒီဆးနဲၤ တမၱာ်နဟၱးနသွံၣ်နီး. မၱာ်ယပာ်အအီၣ်မီၢ်ခဳးတပွဲၤနဳၤ. 18ယဲၤယဳၤ, ယဒီၣ်နဲၤ, ထဲၢ်နမၱာ်ပ့းတရူး, ကၱာ်လဳၤအယဳၤတဒဳအခဳး ယဆဳးလၤကီယတဲၤအီၣ် ပျဳာ်, ကၱာ်ဒီလရာ်အခးကျဲၢ်ကတနဳၤတပဲၤကီစဲာ်နီး. 19ကၱာ်ဒီယအံာ်နဲၤမီၢ်ခဳးအခး ကျဲၢ်အနှဲးဝၱၢ်ကါ ကၱာ် နကစဳကျဳၤတဲၤအရါဒဳလၢ်ခဳးယဳၤ, တဲးကစဳကျဳၤစဲာ် ဒဳမီၢ်ခဳးနဳၤနဳၤ. ကၱာ်နကဘါပျဲးတဲၤအရါအီၣ်ဒဳလၢ်ခဳး ယဳၤ, တဲၤကဘါပျဲး ကီစဲာ်ဒဳမီၢ်ခဳးနဳၤနဳၤ.”
20ဘ့နဳၤယ့ၣ်ရှူးမှဲးလၤဒၱာ်ဒါကဲၤစပျဲၢ်စဘီၣ် တစီာ် စာ်ဘိ ထဲၢ်စကတဒီဆးပၠၤတဗွဲနီး, ထဲၢ်စဲာ်နဳၤ စမၱာ်ခရၱာ်နဳၤ.
ယ့ၣ်ရှူးဒီဆးတီၤလီၤအတဲၤဆဲးညဲပီၤတီၤကၱာ်တဲၤသံ
(မၢ် ၈:၃၁—၉:၁, လူၤ ၉:၂၂-၂၇)
21ဘ့နဳၤဖျီအလှီမီၢ် ယ့ၣ်ရှူးဒီၣ်ဖျီထာ်ကဲၤစပွဲၤ အပျဲၢ်အဘီၣ်တစီာ်, ထဲၢ်စကလ့ၤဘဲာ်ယရူၤၡလ့ၣ်အူးနဳၤ, စကခးဘဲာ်အန့ၤဓဳၤသး ပွ့ၤ, ပၠၤလှူၣ်တဲၤအခဳးကၱာ် ပၠၤသၱာ်ယူဒၤအတဲၤသိၣ်တဲၤသီ တစီာ်အစူးခီး ပူၤအဇၱၢ် အဇိၢ်, စကခးဘဲာ်တဲၤသံကၱာ်သဳနံၤတနံၤ စကထာ်ပဳၤ က့ၤ ဘဲာ်ကီနဳၤ.
22ဘ့နဳၤစီၤပ့းတရူးစွံးတပီၤစဲာ်ကၱာ် စဟီလၢ် ဝၤ, “တဘဲာ် နီး, ဘၱာ်စဲာ်, တဲၤအယဳၤကတဖၱထၣ်နံၤ ဘဲာ်နဲၤနီး.” စဒီၣ်ဓဳၤ.
23မၱာ်ယ့ၣ်ရှူးစာ်ဘး စီၤပ့းတရူးကၱာ်စဒီၣ်လၢ် ဝၤ, “က့ၤဘး ယလ့ၤ ကါ, မဳၤဒဲးလၱး. နဟဲးဖြီးအံာ်ဟူ ယဲၤ, မၤနဲၢ်ကဒီၣ်ဓဳၤဒဳၣ်, တဲၤကမဳၤအယဳၤတစီာ် တဘဲာ်ကဘၱာ်စဲာ်အဲနီး. မၱာ်ပၠၤအဲလီၤ.”
သဳာ်ပျီၤထူၣ်စူညါအတဲၤသိာ်တဲၤသီ
24ဘ့နဳၤယ့ၣ်ရှူးဒီၣ်အပျဲၢ်အဘီၣ်တစီာ်ကယဳၤ, “ပၠၤတပွဲၤပွဲၤ ကသးအဲးလ့ၤကိာ်ယလ့ၤဒဳၣ်, စယၤဘံာ် ဒီဧဲၤစန့ၤ. စယးထာ်စသဳာ်ပျီၤထူၣ်စူညါ ကၱာ်စကလိၤကိာ်ဒီဧဲၤ ယလ့ၤ. 25မၤနဲၢ်ကဒီၣ်ဓဳၤဒဳၣ်, ပၠၤထဲၢ်အသးအဲး လဲၢ်အိဓဳၤအံာ်အသးတပွဲၤ, ကမဲၤလှဲမဲၢ်ကီအအဲ, ကၱာ် ဒီပၠၤထဲၢ် အမဲၤလှဲမဲၢ်အသးယခဳးယစဲတပွဲၤ, ကပးထၱး က့ၤကီအအဲ. 26မၤ နဲၢ်ကဒီၣ်ဓဳၤဒဳၣ်, ပၠၤတပွဲၤ ကနံၤဘဲာ်ဝှါလၢ်ခဳးသဒဲဘဲာ်, စကမဲၤဆူးမဲၤ လှဲမဲၢ်စသးဒဳၣ် စနံၤခံအချဳထာ်မၤမ့ၤကမၱာ်ပီၢ်တၤနဲၢ်. ပၠၤကဘါချဲး အံာ် ကဲာ်ထာ်အသးသမိကၱာ်တၤနဲၢ်ပ့ၤ. 27မၤနဲၢ်ကဒီၣ်ဓဳၤဒဳၣ်, ပၠၤအဖဳးကလ့ၤလၤကီ, စဲာ် ကၱာ်မီၢ်ခဳးပွဲၤဇဳၤတစီာ်ဒဳစပာ်အတီၤအသ့းအကျဲနဳၤ, ကၱာ်ဘ့နဳၤ, စကအံာ်က့ၤကီပၠၤကိအပွဲၤအစာ်ဘိ စတဲၤဖၱးတဲၤမဲၤတး နံၤ နဳၤ. 28ယဒီဆးသံအတၱၢ် အမှး, ပၠၤအဆီထဳးအီၣ်ဘ့ယဳၤ တစီာ် စီာ် အကျဲကတသံနှၱနီး, စစာ်ထၱးကီပၠၤအဖဳးလၤကီအစာ်ဘိ ဆးဖြး နဳၤ.”
Currently Selected:
မးသဲ 16: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
