မးသဲ 14
14
အဖဳးစူထံစီၤယိၤဟၣ်အတဲၤသံ
(မၢ် ၆:၁၄-၂၉, လူၤ ၉:၇-၉)
1လှ့နဳၤစီၤဟ့ၤရိာ်, ထဲၢ်အအူအံာ်ကၤလံၤလဲ က့ၤသၱာ်ဟဲဘဲာ် ပၠၤဒီၣ်ယ့ၣ်ရှူးအဝၱၤအကဲ. 2ကၱာ် စဒီၣ်ကဲၤစခီပံၤစဖဳးတစီာ်ကယဳၤ, “အယဳၤတပွဲၤမၱာ် အဖဳးစူထံစီၤယိၤဟၣ်လီၤ. စထာ်ပဳၤက့ၤကဲၤတဲၤ သံအကျဲ. အယဳၤအခဳးအစဲစမဲၤကဲာ်ထာ်ကီတဲၤပီၤတဲၤပၤ.”
3မၤနဲၢ်ကဒီၣ်ဓဳၤဒဳၣ်, မၱာ်ဒဳစသဲပူၤဝ့ၤစီၤဖံးလံးပူး အမှဲနီၢ်ဟ့ၤ ရိၤဒံအခဳးအစဲ, စီၤဟ့ၤရိာ်ဖီးစီၤယိၤဟၣ်, စစဳကျဳၤလၢ်ဝၤကၱာ်ထၱးနံၢ် လၢ် ဝၤတဲၤကၱတၱၢ်အပူၤ လီၤ. 4မၤနဲၢ်, စီၤယိၤဟၣ်ဒီၣ်ကဲၤစဲာ်, “နတမီၤ ဖၱးအမံၤမှူးယဳၤနီး.” 5စသးအဲးမဲၤသံတပွဲးလၢ်ဝၤ ပရၤဆါ စၡံးဆါနံၤထံက့ၤဖဳးတစီာ်အလ့ၤ. မၤနဲၢ်, စဲာ်တစီာ်ကမဳၤဒဳ စီၤယိၤဟၣ်မၱာ် ဝံတပွဲၤနဳၤလီၤ.
6ဘ့စီၤဟ့ၤရိာ်အတဲၤအီၣ်လၤရှံးက့ၤအနံၤၡံး က့ၤအနံၤနဳၤ, နီၢ်ဟ့ၤရိၤဒံအဖဳးမူၤက့ၤစူးက့ၤခးကဲၤပၠၤ အလှီမီၢ်ဒဳၣ် အဘဲာ်သးဆိးကဲၤစဲာ်. 7စဝှိးဒါ စန့ၤကၱာ်အၣ်မါခးအံာ်အကအံာ် စဲာ်တဲၤအရါစတၤ တစီာ်နဳၤ.
8ဒဳၣ်စမဳၤအတဲၤနှးကါအစဲ, စဒီၣ်, “အံာ်ပီၢ်ယဲၤ စီၤယိၤဟၣ် အကဳာ်ဒဳလၤပၤပူၤယဳၤ.”
9ဆးဖြးအသးတမီၤပ့ၤနီး, ပရၤဆါ ဒဳၣ်ဒဳစတဲၤ ဝှိးဒါစန့ၤ တၱတမဲအလှီမီၢ်အခဳးအစဲ, စမှဲးလၤကဲၤပၠၤ အကအံာ်စဲာ်. 10စသဓဳလ့ၤပၠၤအကလ့ၤပ့ၢ်ထဲ ဓူၢ်စီၤယိၤဟၣ်အကဳာ် ဒဳတဲၤကၱတၱၢ်အပူၤနဳၤ. 11ပၠၤလ့ၤအံာ်ကဲၤစကဳာ်ဒဳလၤပၤအပူၤကၱာ် အံာ်ကဲၤ အမံၤမှူးဖဳး, ကၱာ်စလ့ၤအံာ်ကဲၤစမဳၤ. 12စပျဲၢ် စဘီၣ်တစီာ်လ့ၤဇၢ်က့ၤ စန့ၤဘၱ စဲာ်ကၱာ် ဘူလါကဲၤစဲာ်. မဲၤဝှါစလ့ၤဒီဆးကဲၤယ့ၣ်ရှူး.
ယ့ၣ်ရှူးဘဳာ်အၣ်ပၠၤအပွဲၤယဲၢ်ထီး
(မၢ် ၆:၃၀-၄၄, လူၤ ၉:၁၀-၁၇, ယိၤ ၆:၁-၁၄)
13ယ့ၣ်ရှူးသၱာ်ဟဲဘဲာ်ဝှါတဲၤအယဳၤဒဳၣ်, စဒီၣ်ချံ ကၱာ်စက့ၤ ဘးကဲၤဒဳလဳၤသံမံးဇ့ၤခဳးနဳၤ. ပရၤဆါပၠၤအပဳၤအဟီးအအီၣ်ဒဳ အူးပူၤ ဒဳ ပူၤတစီာ်သၱာ်ဟဲဘဲာ်ဒဳၣ်ဟဲး အခၣ်ခီးလိၤကိာ်က့ၤစလ့ၤ. 14ဘ့စဟဲးထာ်ခီ ခဳးနဳၤ, စစာ်ထၱးပၠၤအပဳၤအဟီးကၱာ်ဒီဒဳ စတဲၤခီၣ်ဝဲၤ မှီးဘဲာ်အပူၤ, စမဲၤမှးက့ၤကဲၤကယါပၠၤအရွှံးအဆဲ လဳစါစဲးနဳၤ.
15ဘ့လူၤမူၤလၤနဳၤ စပျဲၢ်စဘီၣ်တစီာ်လ့ၤထၱး စဲာ်ကၱာ်ဒီၣ်, “ဘ့ယဳၤနဳၤမၱာ်လဳၤသံမံးဇ့ၤခဳး ကၱာ်ဒီ လူၤမူၤလၤသူးလၤဘါကဲၤ, နှးက့ၤ ပီၢ်ပၠၤတခး. စကလ့ၤနံၢ်ဒဳပူၤကၱာ် ပွၱၤအၣ်ပွၱၤအီပီၢ်နဳၤ.”
16ပရၤဆါယ့ၣ်ရှူးဒီၣ်စဲာ်တစီာ်, “အတလဳၤပၤ စဲာ်တစီာ်ဟဲး ဖျီးမံနီး. သံအံာ်ပီၢ်စဲာ်တစီာ်တဲၤအၣ်တခီ.”
17စဲာ်တစီာ် ဒီၣ်က့ၤယ့ၣ်ရှူးကယဳၤ, “အအီၣ်နံၤဝၤ မၱာ်တကဳာ်ယဲၢ်ဒဳကၱာ်ဓၢ်ဖဳးကၠံၢ်ဘီလီၤ.”
18ယ့ၣ်ရှူးဒီၣ်, “လ့ၤအံာ်ပီၢ်ဒဳယအီၣ်ယဳၤ.” 19ကၱာ်ဒီ ဘ့စနှးဆးနါလါအီၣ်ဝှါပၠၤဒဳ မံၤနဇ့ၤခဳးနဳၤ, စဖၱးတကဳာ်ယဲၢ်ဒဳကၱာ်ဓၢ်ဖဳး ကၠံၢ်ဘီ, စစာ်ထာ်မီၢ်ခဳး လဲၢ်, စဟိးဝၱၤ, စဘၱာ်ထဲဖးဝှါတကဳာ်ဒဳၣ်, စအံာ် ကဲၤ စပျဲၢ်စဘီၣ်တစီာ်အကပ့ၤအၣ်ပၠၤအပဳၤအဟီးနဳၤ. 20ပၠၤလဳစါ စဲးအၣ်ဆိအၣ်ဝှါ စထူးက့ၤအခဳးလၤကါ ဆဲးအလၤဖွံးလၤဝၢ် တစီာ်နဳၤ ဒဳၣ်, အပ့ထာ်ကဲၤၡံးကၠံၢ် ပးလှူၣ်ပ့ၤ. 21ပၠၤအအၣ်ဘဲာ်တကဳာ်နဳၤ, ကတဒိး စာ်အမံၤမှူးကၱာ်အပံၤစဖဳးနှၱနီး, ထ့အမံၤခဳလီၤနဳၤအီၣ် ကဲၤအပွဲၤ ယဲၢ်ထီး.
ယ့ၣ်ရှူးဟဲးထံခဳး
(မၢ် ၆:၄၅-၅၂, ယိၤ ၆:၁၅-၂၁)
22ကၱာ်ဒီယ့ၣ်ရှူးနှးစပျဲၢ်စဘီၣ်တစီာ် ခဲထာ်နံၢ် ချံပူၤအပျါ, ကၱာ်လ့ၤစလှီမီၢ်ဒဳထံအလဝ့ၤတခီဝဲၢ်နဳၤ, မၱာ်စဲာ်တခီစနှးက့ၤပၠၤအပဳၤ အဟီးတစီာ်နဳၤ. 23ကၱာ်ဒီ စဘါလှိးက့ၤဝှါပၠၤအပဳၤအဟီးတစီာ်ဒဳၣ်, စထာ် ကဲၤခီးလီခဳးစာ်ဘိထဲၢ်စကသဘဲထာ်နဳၤ. ကၱာ်ဒီဘ့ လူၤမူၤဟဲးနဳၤ စအီၣ်ကဲၤဘ့နဳၤတပွဲၤလီၤ. 24ပရၤ ဆါဘ့နဳၤချံဓဳၤဒဳပဲာ်လဲာ် အသကျါမဲဗူအခၠၱး, ထံပးပံးပးပီ ကဲၤ. မၤနဲၢ်ကဒီၣ်ဓဳၤဒဳၣ်ကလံၤတပဳၢ်ဆိးကဲၤ.
25ဘ့ကျံဓိၤအံာ်လွံၢ်ကျၤအခၠၱးနဳၤ, စလ့ၤထၱးကဲၤ လၢ်ဝၤတစီာ်, စဟဲးကဲၤပဲာ်လဲာ်ထံခဳးနဳၤ. 26ကၱာ် ဒီစဲာ်တစီာ်စာ်ထၱးလၢ်ဝၤ ဟဲးပဲာ်လဲာ်ထံခဳးဒဳၣ်, စမှါကၱာ် မၱာ် လူၢ်နှဲးဒဳၣ်, စၡံးဆါကၱာ်စဟးဖူး ဟး ဆရံး, စဒီၣ်, “အနဳၤမၱာ်တဲၤနှဲး.”
27ကၱာ်ဒီ တပျာ်ခါလီၤ, ယ့ၣ်ရှူးယၱၢ်ဘဲာ်ထၱး ကဲၤစဲာ်, စဒီၣ် လၢ်ဝၤ, “အီၣ်မီၤသဳးမီၤသးပီၢ်. မၱာ်ယဲၤ လီၤ. ၡံးဆါပီၢ်မဲး.”
28ကၱာ်ဒီစီၤပ့းတရူးဒီၣ်က့ၤစဲာ်အလံၢ်, “ဘၱာ်စဲာ်, ကမၱာ်နဲၤ ဒဳၣ်, မှဲးလၤပီၢ်ယဲၤအကလ့ၤထၱးနဲၤထံခဳး.”
29“လ့ၤဒဳး” စဒီၣ်လၢ်ဝၤဓဳၤ. စီၤပ့းတရူး ခဲလၤတ့ၢ်ချံပူၤကၱာ် စဟဲးကဲၤထံခဳး စာ်ဘိထဲၢ် စကလ့ၤထၱးယ့ၣ်ရှူးနဳၤ. 30မၱာ်စစာ် ထၱးကလံၤ တပဳၢ်ဆိးဒဳၣ်စၡံးဆါကဲၤ. ကၱာ်ဒီဘ့စလၤပြူးကဲၤ, စဟးဖူး, စဒီၣ်, “ဘၱာ်စဲာ်, မဲၤလှိထာ်က့ၤ ပီၢ်ယဲၤတကၱာ်.”
31ယ့ၣ်ရှူးယီၢ်ယီၤဝဲၢ်ပျါအစူးခီး, စပိာ်ကျဳၤ လၢ်ဝၤကၱာ်စဒီၣ်, “အဳပၠၤအတဲၤဘူၣ်တကၱးဖဳးတပွဲၤ, နထဲးနံၤဝံနံၤဝၤမၤနဲၢ်.”
32ကၱာ်ဒီဘ့စခဲထာ်နံၢ်ဝှါချံပူၤတစီာ်နဳၤ, ကလံၤ အီၣ်ဇီၤကဲၤ. 33ကၱာ်ဒီပၠၤအအီၣ်ချံပူၤတစီာ်လ့ၤ ကီၢ်လၤစလှီမီၢ်ကၱာ်စဒီၣ်, “နမၱာ်နှဲးနှဲးကဘၱာ်စဲာ်အဖဳး ဟဳ.”
ယ့ၣ်ရှူးမဲၤလှဲမဲၢ်ပွဲၤဆဲဒဳကံးန့ၤရ့သးက့ၤ
(မၢ် ၆:၅၃-၅၆)
34ကၱာ်ဒီ စကူဝဲၢ်ဝှါထံ, စလ့ၤနံၢ်ကဲၤဒဳ ကံးန့ၤရ့သးအက့ၤ အပူၤနဳၤ. 35ကၱာ်ဒီ ပၠၤအအီၣ် ဒဳနဳၤတစီာ်သၱာ်ဟဲစဲာ်ဒဳၣ်, စနှးလ့ၤ ပၠၤသဒဲက့ၤ, လ့ၤအံာ် လဳပၠၤအဘဲာ်ရွှံးဘဲာ်ဆဲတစီာ်နဳၤလၢ်ဝၤအီၣ်. 36ကၱာ်ဒီစတၤမီၤကဲၤလၢ်ဝၤ စာ်ဘိထဲၢ်အနဳၤတစီာ် ကတီးဝဲၢ်ဘဲာ်ပီၢ် စၡံာ်ဒဳအကါယွံၢ်အလီၤနဳၤ. ကၱာ်ဒီ ကယါပၠၤအတီးဝဲၢ်တစီာ်မှးက့ၤ လဳတပွဲး.
Currently Selected:
မးသဲ 14: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
