اِنجیل مَتّی 3
3
یحیی تعمید دهنده مسیح، راه حاضیر بَکَردی
1وِرَه سالونَ پَش، یحیی تَعمید دَهنده، اومَه یهودیه وییاوونی را و تعلیم بَدای، 2و بَواتی: «توبَه بِکَرَه چوم که آسِمونی پاُتشایی، نِزدیکَه!» 3یحیی هَ کسی یَه كه اِشعَیای پیغمبر چَیی درباره بَواتی:
«ایی نفر وییاوونی کا بِلَنده سَسی نَه بَواتی:
”خِداوندی راه اَییرا حاضیر آکَرَه!
چَیی اومِه را دوز آکَرَه!“»
4خَلایی که یحیی دَکَری، دَوَه پَشمی کا بَه و چَرمینَه کَمردَوَندی اِشتَن کَمری کا دَوَسی، و چَیی غذا چَک اُردک و کویَه عَسل بَه. 5مردم، اورشلیمی شهری کا، گِردِه یهودیه ولایت و اُردن رِواری گِردِ دور و اَطرافی کا، گِرد بَشین یحیی وَر 6و اِشتَن گناه اون اِعتراف بَکَردین، و اُردن رِواری کا یحیی اَوون غسل تعمید بَدای.
7ولی وختی یحیی ویندِشَه وِر کَسِن، فریسیون فِرقه عُلما و صَدّوقیون فِرقه عُلما کا، کارا بومَین یحیی وَر تا غسل تعمید بِگِرِن، اَوون نَه واتِشه: «اِی اَفعی کِتَه اِن! کی شِمَه هشدار دوعَشَه تا غَضبی کا که کارا بومَی، دَوَزَه؟ 8شِمَه اَعمالی نَه نیشون بِدییَه که توبَه رون کَردَه 9و اِشتَن نَه مَواجَه که ”اَمَه اِبراهیم پیغمبری نَسلی کا ایمونَه.“ چوم که شِمَه نَه بَواتیم خِدا قادِرَه اِم سِنگون کا اِبراهیمی را خِردَنونی خَلق بِکَرِه. 10حتی حِسَه تَبَری تیشَه، آرَستَه دارون بِن و بِنجِقی کا. هَر داری که چاکَه میوه مَدَه، دَوِرِن و آتشی دیلَه کا دَرَفَنِن.
11«اَز توبَه را، شِمَه آوی نَه غسل تعمید بَدایم؛ ولی کَسی که چِمِن پَش بومَی مِن کا قُدرتمندتَره و اَز لایق نیمَه كه حتّی چَیی کَفشون پِگِرِم. اَ شِمَه روح القدس و آتشی نَه تعمید بَدای. 12اَ اِشتَن چَنگکی دَسی کا دارِه و اِشتَن خَرمَنی تَمیز آکَرِه و اِشتَن گندِمی اَنباری کا جَمع آکَرِه، امّا کِلَشی، اَ آتشی دیلَه کا سونِه که دَکِشتَه نییَب.»
عیسی تعمید
13اَ موقع، عیسی جلیلی ولایتی نَه اومَه اُردن رِواری را، یحیی وَر، تا یحیی اَیی غسل تعمید بِدَه. 14یحیی تَقَّلا کَردِشه که مَرزِه عیسی اِم کاری بِکَرِه و واتِشه: «اَز بَسی تِه کا تعمید بِگِرِم، حِسَه تِه بومَیش چِمِن وَر؟» 15امّا عیسی جَواو دوشَه: «بِدا حِسَه اِنتَه بِبو، چوم اَمَه را مناسِب اِمَه، اَ چیی که درست اِستَه اَنجام بِدییَم.» بَس یحیی راضی آبَه. 16عیسی غسل تعمید گِتَه پَش تا آوی کا اومَه بِرون آسِمونِن آبینَه و اَ ویندِشَه که خِدا روح ایلَه کَفتری شیوار اومَه جیر و عیسی سَری کا قرار گِتِشَه. 17دومله آسِمونی کا سَسی اومَه كه واتِشه: «اِم چِمِن عزیزگِرامی یَه زوعَه یَه كه اَز اَیی کا وِر راضیمَه.»
Currently Selected:
اِنجیل مَتّی 3: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
