اِنجیل مَتّی 2
2
مُغِن بومَین عیسی ویندِه را
1هیرودیسی پاُتشایی دورانی کا، عیسی، یهودیه ولایتی کا، بِیت لِحِمی شهری کا دنیا اومَه. عیسی دنیا اومِه پَش، چَند گِلَه سِتاره شناس که مُغون گروه کا بینَه، سرزمین شرقی کا اومینَه اورشلیمی شهری را، 2و دَفَرسِشونَه: «یهودیون پاُتشا که تازه دنیا اومَه کییارَه؟ چوم وختی چَیی ستاره بَر اومَه، اَیی ویندَمونَه و اومَیمونَه که اَیی پرستش بِکَرَم.» 3وختی اِم خَوَر هیرودیس پاُتشا گوش آرَستَه، اَ و گِرد اورشلیمی مردم اَیینَه تَشویش بینَه. 4هیرودیس، گِردِ سَران کاهِنون و قومی توراتی معلمون جمع آکَردِشَه و اَوون کا دَفَرسِشَه: «مسیح موعود، کیاکا بَسی دنیا با؟» 5اَوِن جَواو دوشونَه: «یهودیه ولایت، بِیت لِحِمی شهری کا، چوم که میکای پیغمبری واسطه نَه نیویشتَه بییَه که:
6«”اِی بِیت‌لِحِم که یهودا سرزمینی کا ایش،
تِه اَصلا یهودا فرمانروایون کا روکتَر نییش،
چوم بَه تِه کا فرمانروایی بومَی
كه چِمِن قوم، اِسرائیلی، رهبری بَکَردی.“»
7بَس هیرودیس پاُتشا، خَلوتَکی ستاره شناسون اِشتَن وَر دَخوندِشَه و اَوون کا دَفَرسِشَه که اَ ستاره کَیینی ظاهر آبییَه. 8دومله اَوون ویسا آکَردِشَه بِیت لِحِم و اَوون نَه واتِشه: «بِشَه اَ خِردَنی درباره دِقّتی نَه تحقیق بِکَرَه، وختی اَیی تِلَفتِرونَه، مِن خَوَر بِدییَه تا اَز نی بام و اَیی پرستش بِکَرِم.» 9ستاره شِناسِن، پاُتشا گَفون دَرَسِه پَش راه دَلَکینَه و هَ سِتاره‌ای كه چَیی بَراومِه موقع ویندَه شون بَه، چَوون نارناره بَشی تا آخِر هَ جِگایی کَفا کا مَندَه كه خِردَن اوآ کا اِستبَه. 10وختی اَوِن ستاره ویندِشونَه، بَرکَ شادی اینَه وِر خوشحالی کَردِشونَه. 11اَوِن دَشینَه کَ دیلَه و خِردَنی چَیی نَنه، مریمی نَه ویندِشونَه، سجده کَردِشونَه و اَ خِردَنی پَرستش کَردِشونَه. دومله اِشتَن صُندوقون آکَردِشونَه و طِلا و كُندُر و عَطری یَه روعن، اَیی تقدیم کَردِشونَه. 12و چوم خاوی کا اَوون هشدار دوعَه بَه که آمَگردِن هیرودیسی وَر، ایلَه دییَر رایی نَه شینَه اِشتَن وطنی را.
دَوَشتِه بِه مصر
13ستاره شناسون شییِه پَش، خِداوندی ایلَه مَلائیکه خاوی کا یوسفی را ظاهر آبَه واتِشه: «پِرِز، خِردَن و خِردَنی نَنه پِگِه و دَوَز بِش مصری را و تا وختی که بَه تِنَه بوآجِم اوآکا بومون، چوم هیرودیس خِردَنی دومله گردِه که اَیی بِکِشِه.» 14بَس یوسف پِرِشتَه، شَوونَه خِردَن و خِردَنی نَنه پِگِتِشَه شَه مصری طرفی را، 15و تا هیرودیسی مرگی موقع اوآکا مَنده. اِنتَه بَه تا اَ چیی که خِداوند هوشعِ پیغمبری زَوونی نَه واتَش بَه اِتِفاق دَلَکِه که: «چِمِن زوعَه مصری کا دَخوندِمَه.»
هیرودیس خِردَنون بَکِشتی
16وختی که هیرودیس ویندِشَه ستاره شناسِن اَئی گول ژَندَشونَه، وِر عصبانی آبَه و مطابق زمانی که ستاره شناسون کا تحقیق کَردَش بَه، دستور دوشَه تا بِیت لِحِمی شهری کا و چَیی اَطرافی کا گِرد دِ ساله زوعَه اون و دِ ساله کا کمتری، بِکِشِن. 17اِنتَه، اَ چیی که اِرمیای پیغمبری واسطه نَه واتَه بییَه بَه، اِتِفاق دَلَکَه که:
18«رامَه شهری کا سَسی بِه گوش آرَستِه.
بِلندَه شیون و دادی سَس.
راحیل اِشتَن خِردَنون را داد بَکَردی
و نِپیستِشَه آروم بِگِرِه،
چوم چَیی خِردَنون کا دِ اَثری نییَه.»
آگَردِستِه ناصره را
19هیرودیسی مَرده پَش، یوسف که مِصری کا بَه خِداوندی ایلَه مَلائیکه چَیی خاو دَشَه 20و اَیی نَه واتِشه: «پِرِز، خِردَن و خِردَنی نَنه پِگِه و آگَرد اِسرائیلی سرزمینی را، چوم کسونی که پیستِشون بَه خِردَنی بِکِشِن مَردَه اینَه.» 21بَس یوسف پِرِشتَه، خِردَن و خِردَنی نَنه پِگِتِشَه و آگَردِستَه اِسرائیلی سرزمینی را. 22ولی وختی دَرَسِشَه كه یهودیه ولایتی کا آرکِلائوس اِشتَن دَده، هیرودیسی عوض حکومت بَکَردی، تَرسَه كه بِشو اوآ، و چوم که خاوی کا بَیی هشدار دوعَه بَه، شَه جلیلی ولایتی طرفی را. 23یوسف شَه و ایلَه شهری کا که چَیی نوم ناصره بَه ساکن بَه. اِنتَه بَه تا اَ چیی که پیغمبرون واسطه نَه واتَه بییَه بَه اِتِفاق دَلَکِه که: «اَیینَه ناصری بَواتین.»
Currently Selected:
اِنجیل مَتّی 2: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
