اِنجیل مَتّی 4
4
عیسی، اِمتحانون کا
1اَ موقع خِدا روح، عیسی هدایت کَردِشَه ویاوونی را، تا اِبلیس اَئی اِمتحان بِکَرِه. 2عیسی چِل روز و چِل شَو، روزه گِتَه پَش، وِشیش بَه. 3اَ موقع اِمتحانَ کَرار اومَه و عیسی نَه واتِشه: «اَگم تِه خِدا زوعَه ایش، اِم سِنگون دستور بِدَه که نون آبون!»
4امّا عیسی جَواو دوشَه: «توراتی کا نیویشته بییَه که:
«”اِنسان فقط نونی نَه زِندَه نییَه،
بَلكَم هَر كلمه اینَه كه خِدا گَ کا بِرون بومَی.“»
5دومله اِبلیس، عیسی بَردِشَه مقدّس شهری را یعنی اورشلیم و اَیی معبدی بومی تِکی سَری کا نوشَه 6و اَیی نَه واتِشه: «اَگم تِه خِدا زوعَه ایش، اِشتَن اییا کا فِرآدَه جیری را، چوم داوودی زَبوری کا نیویشته بییَه که:
«”خِدا اِشتِه درباره، اِشتَن ملائیکه اون دستور بَدای،“
و
”اَوِن اِشتَن دَسون سَری کا تِه بَبَردین،
نبادا که اِشتِه پا سِنگی کا بِژَنی.“»
7عیسی بَیی جَواو دوشَه: «توراتی کا اِم نی نیویشته بییَه که:
«”خِداوند، اِشتِه خِدا اِمتحان مَکَه.“»
8هَنی اِبلیس، عیسی بَردِشَه بِلنده کویی کفا و گِرد دنیا پاُتشایی اون و چَوون شكوه و جلالی، بَیی نیشون دوشَه 9و اَیی نَه واتِشه: «اَگم بَه مِرا سجده بِکَری، مِن پرستش بِکَری، گِرد اِمون آدَم بَه تِن.» 10عیسی واتِشه: «دور آبو اِی شیطان! چوم توراتی کا نیویشته بییَه که:
«”خِداوند، اِشتِه خِدا پرستش بِکَه
و فقط اَیی عبادت بِکَه.“»
11اَ موقع اِبلیس عیسی وِل آکَردِشَه و ملائیکه اِن اومینَه، عیسی خِدمت کَردِشونَه.
عیسی اِشتَن خِدمتی شروع بَکَردی
12وختی عیسی دَرَسِشَه یحیی گِتَشونَه، آگَردِستَه جَلیلی ولایتی را. 13دومله عیسی، ناصره شهری ترک کَردِشَه، اوآنَه شَه کَفَرناحومی شهری را و اوآکا مَنده. کَفَرناحوم، جلیلی دریاچه کناری کا و زِبولون و نَفتالی نواحی کا بَه. 14اِنتَه بَه تا اَ چیی که اِشعَیای پیغمبری واسطه نَه واتَه بییَه بَه اِتِفاق دَلَکِه كه:
15«زِبولونی سرزمین و نَفتالی سرزمین،
دریا راه، اُردنی رِواری اَطراف،
قومون جلیل،
16مردمی که تاریکی کا مَندینَه،
بَرکَ نوری ویندِشونَه،
و کسونی را که مَرگی، دیار و سا دیلَه کا مَندینَه،
ایلَه نوری دَتاوِستَه.»
17اَ موقع نَه عیسی دَمنده اِم پیغومی اِعلام کَردِه که: «توبَه بِکَرَه، چوم آسِمونی پاُتشایی نِزِدیکَه.»
عیس اوّلین شاگِردِن
18عیسی هَتَه که جلیلی دریاچه کَناری کا قدم ژَنی، دِ گِلَه بِرا ویندِشَه. چَوون ایلَه نوم شَمعون بَه که اَیی نَه پطرس نی بَواتین و چَیی بِرا آندریاس بَه. اَوِن دریا کا ماشک دَرَفَنین، چوم صَیّاد بینَه. 19عیسی اَوون نَه واتِشه: «چِمِن دومله بایَه و از شِمَه آدَمون صَیّاد وَج آکَرِم.» 20اَوِن اَلبَحَل اِشتَن ماشکون وِل آکَردِشونَه و شینَه عیسی دومله. 21هِنتَه که عیسی اِشتَن راه بَشی، دِ گلَه دییَر بِرا ویندِشَه که چَوون نوم یعقوب و یوحنا بَه که زِبِدی زوعَه اِن بینَه. اَوِن اِشتَن دَده، زِبِدی نَه لوتکا دیلَه کا بینَه و اِشتَن ماشکون آمادَه آکَرین. عیسی اَوون نی دَخوندِشه؛ 22اَوِن اَلبَحَل لوتکا و اِشتَن دَده وِل آکَردِشونَه و شینَه عیسی دومله.
مریضون شفا
23عیسی جلیلی ولایتی گِردی،گَردی و یهودییون عبادتگاه اون کا دَرس بَدای و خِدا پاُتشایی شادَه خَوَری اِعلام بَکَردی و مردمی هَر جورَه درد و مرضی شفا بَدای. 24بَس چَیی شور و شُورَت گِردِ سوریه کا دَپیچِستَه و مردم گِردِ مریضون که جور بَه جوره درد و مَرضشون اِستبَه، و تور و دیوونَه اون، غَشی اون و اِفلیجون نی بواَردین چَیی وَر و عیسی اَوون شفا بَدای. 25وِرَه جماعتی جلیلی ولایت و دِكاپولیسی مَنطقه کا، اورشلیمی شهر و یهودیه ولایت و اُردنی رِواری اَ طرفی کا، عیسی دومله راه دَلَکینَه.
Currently Selected:
اِنجیل مَتّی 4: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
