لوقا 24

عیسی زِنده آبییِه

1هفته اوّلین روزی کا، صِبی زو ژِنَکِن اَدویه اونی که آمادَه شون کَردَه بَه پِگِتِشونَه و شینَه مَقبره را. 2اَوِن ویندِشونَه اَ سِنگی که مَقبره دَهَنه پوشوندَش بَه مَقبره پیشی کا کنار ژَندَه بییَه. 3وختی شینَه مَقبره دیلَه، عیسایِ خِداوندی جَنازه نِویندِشونَه. 4اَوِن اِم اِتِفاقی کا مات بینَه که ایی دفعه دِ گِله مِرد خَلا اونی نَه که شَفق ژَنین چَوون کَناری کا مَندینَه. 5هِنتَه که ژِنَکِن تَرسَه بینَه و اِشتَن سَری جیر وَردَشون بَه؛ اَ دِ گِله مِرد اَوون نَه واتِشونَه: «چیرا مَرده اون دیلَه کا، زِندَه دومله گَردَه؟ 6اَ اییا کا نییَه، بَلکَم زِنده آبییَه! ویر بواَرَه وختی که حَلا جلیلی ولایتی کا بَه، چَنتَه شِمَه نَه واتِشه که 7اِنسانی زوعَه بَسی گناه کارون دَسی نَه تسلیم بِبو، مصلوب بِبو و سِوّمین روزی کا زِنده آبو.» 8اَ موقع ژِنَکِن عیسی گَفون ویر وَردِشونَه. 9وختی مَقبره کا آگَردِستینَه، گِردِه اِم چیون اَ یازده گِله رسولی را و بقیه را نی واتِشونَه. 10اَ ژِنَکِنی که اِم چیون رسولون را واتِشونَه، اِمِن بینَه، مریم مَجدَلّیه، یوآنّا، یعقوبی نَنه مریم و دییَر ژِنَکِنی که چَوون هَمراه بینَه. 11امّا رسولِن، اِنتَه بَزنین که ژِنکِن هَذیان بَواتین و چَوون گَفی باوَر نِکَردِشونَه. 12ولی پطرس پِرِشتَه ویریتَه مَقبره طرف؛ شَت آبَه مَقبره دیلَه دَیشتَه، امّا کَفَنَی غِیراز چیی نِویندِشه. اَ هَتَه که اِم اِتِفاقی کا حَیرون بَه، آگَردِستَه کَ را.

عِمائوسی راه کا

13هَ روزی کا، دِ نَفر شاگِردون کا، کارا بَشین ایلَه دِیی طَرف که اَ دِه نوم عِمائوس بَه و تقریبا اورشلیمی دِ فَرسَخی کا بَه. 14اَوِن گِردِ اِم چیون درباره که اِتِفاق دَلَکه بَه، یَندی نَه کارا گَف ژَنین. 15هِنتَه که یَندی نَه گف ژَنین و بحث بَکَردین، عیسی اِشتَن اومَه چَوون وَر و اَوون نَه هَمرا بَه. 16امّا اِم قدرت که اَ لَحظه کا عیسی آزونِن اَوون کا ویگِتَه بَه. 17عیسی اَوون کا دَفَرسِشه: «راه دیلَه کا، چِه چی درباره یَندی نَه گف ژَنَه؟» اَوِن ناراحتَه قیافه اون نَه، ساکیت مَندینَه. 18دومله ایلَه اَوون کا که چَیی نوم کلِئوپاس بَه جَواو دوشَه: «مَگم اورشلیمی کا تنخا مسافِر تِه ایش که اَ چیونی کا که اِم روزون کا اوآکا اِتِفاق دَلَکه بیخَبریش؟» 19عیسی دَفَرسِشه: «چِه چییِن؟» جَواو دوشونَه: «اَ چیی که عیسایِ ناصری سَر اومَه! اَ، ایلَه پیغمبری بَه که خِدا پیشی کا و گِرد مردمی پیشی کا، هَم گف ژَنده کا و هَم اَنجام دوعِه کا قوی بَه. 20چَمَه سَران کاهنِن و قومی پیله تَرِن، اَیی تسلیم کَردِشونَه که محکوم بِه مرگ بِبو و اَیی صَلیبی سَری کا کِشتِشونَه. 21ولی اَمَه اُمید داریمون اَ، هَ کسی بِبو که بَسی اِسرائیلی آزاد آکَرِه. اِمِن گِرد هیچ، حِسَه سِومین روزَه که اِم چییِن اِتِفاق دَلَکَه ای نَه. 22چِمی غیراز بعضی ژِنکِن نی که اَمَه نَه اینَه، اَمَه مات و مبهوت کَردِشونَه. اَوِن اوری صِبی زو شینَه مَقبَره سَر، 23وختی نِشاستِشونَه عیسی جَنازه بِتلَفِن، آگَردِستینَه و اَمَه نَه واتِشونَه که حتّی رویا کا مَلائیکه اونی ویندَشونَه که اَوون نَه واتَشونَه عیسی زِنده یَه. 24بعضی کسونی کا که چَمَه همراه بینَه، شینَه مَقبره سَر و اوضاع هَتَه ویندِشونَه که ژِنَکِن واتَشون بَه، امّا عیسی نِویندِشونَه.» 25دومله عیسی اَوون نَه واتِشه: «اِی نادونِنی که هِندی عَری گِردِ چییونی که پیغمبرِن واتَشونَه باوَر بَکَردیرون! 26بَگم نَبی مسیح اِم درد و رنجون بِکَشِه و دومله اِشتَن جلالی آرَستِه؟» 27دومله موسی توراتی کا و گِرد پیغمبرون نیویشته اون کا شروع کَردِشه و اَ چَیونی که گِردِ مقدّس نیویشته اون کا چَیی درباره نیویشته بییَه بَه چَوون را توضیح دوشَه. 28وختی اَوِن اَ دِهی نِزدیک آبینَه که چَوون مقصد بَه، عیسی وانِمود کَردِشه که پیستِشَه اِشتَن راه اِدامه بِدَه. 29امّا اَوِن وِر اِصرار کَردِشونَه و واتِشونَه: «چَمَه وَری کا بومون، چوم روز کارا تمون آبو و شَو نِزدیکه.» بَس عیسی دَشَه دیلَه تا چَوون وَری کا بومونِه. 30وختی اَوون نَه سِفره سَری کا نِشت بَه، نونی پِگتِشه و شُکر کَردِشه، پَله کَردِشه و آدوشَه اَوون. 31هَ موقع، چَوون چِمِن آبینَه و عیسی آزونِستِشونَه، ولی اَلبَحَل عیسی چَوون چِمی پیشی کا غِیب آبَه. 32اَوِن یَندی نَه واتِشونَه: «ویندِرَه وختی راه کا اَمَه نَه گف ژَنی و مقدَس نیویشته اون اَمَه را توضیح بَدای، چِنتَه چَمَه دیل چَمَه سینه کا کارا بَروَزی!» 33بَس اَوِن هَ لحظه پِرِشتینَه و آگَردِستینَه اورشلیم. اوآکا ویندِشونَه اَ یازده گِله شاگِرد و کسونی که چَوون همراه بینَه، یَندی دور جمع آبَه اینَه، 34و بَواتین: «عیسایِ خِداوند واقعا زِنده آبییَه و شمعونی را ظاهر آبییَه.» 35دومله، اَ دِ نفر نی واتِشونَه که راه کا چِه بییَه، و چِنتَه نونی پَلَه کَردِه موقع، عیسی آزونِستَشونَه.

عیسی شاگِردون را آشکار آبَه

36هَتَه که اِم چیون درباره کارا گَف ژَنین عیسی اِشتَن چَوون میانه کا مَندَه و اَوون نَه واتِشه: «سَلام بَر شِمَه!» 37امّا اَوِن تَرسی نَه و وَحشت کَردِشونَه و خَیال کَردِشونَه که روح بَویندین. 38عیسی اَوون نَه واتِشه: «چیرا اِنتَه آشُفتَه ایرونَه؟ چیرا شِمَه دیلی کا شَک دَلَکه؟ 39چِمِن دَس و پا بِوینَه. اَز اِشتَنیمَه. مِن دَس بژَنَه و بِوینَه؛ چوم روح، گوشت و اَستَه نیشَه، امّا هِنتَه که بَویندیرون اَز هِستِمَه.» 40اِمی واتِشه و اِشتَن دَس و پا اَوون نِشون دوشَه. 41هَتَه که اَوِن شادی و حیرتی کا حَلا نیمَشاین چییونی که بَویندین باوَر بِکَرین، عیسی اَوون نَه واتِشه: «اییا کا چیی هَرده را هِستِرونَه؟» 42اَوِن ایی پَله بِریون مایی آدوشونَه عیسی. 43عیسی اَیی پِگِتِشه چَوون چِمی پیشی کا هَردِشه.

44دومله اَوون نَه واتِشه: «اِم هَ چیی یَه که وختی حَلا شِمَه نَه بیمَه بَواتیم. شِمَه نَه واتِمَه هَر چیی که موسی توراتی کا، پیغمبرون نیویشته اون کا و داوودی مزموری کا، چِمِن درباره نیویشته بییَه بَسی اِتِفاق دَلَکِه.» 45دومله چَوون ذِهنی آکَردِشه تا بِشان مقدّس نیویشته اون درک بِکَرِن. 46و اَوون نَه واتِشه: «نیویشته بییَه که مسیح، بَسی رنج و عَذاب بِکَشه و سوّمین روزی کا مَرده اون دیلَه کا زِنده آبو، 47و چَیی نومی نَه گِردِه میلَّتون را توبه و گناه اون بَخِشِسته اِعلام بَبی که چَیی شروع بییِه نی اورشلیمی کایَه. 48شِمَه اِم چییون شاهِدیرونَه. 49اَز اَ چیی که چِمِن آسِمونی یَه دَده وَعده دوعَشَه شِمَه را ویسا آکَرِم؛ امّا تا وختی که خِدا قدرت آسِمونی کا شِمَه پور آکَرِه، اِم شهری کا بومونَه.»

عیسی بَشی آسِمونی را

50دومله اَوون بَردِشه شهری کا بِرون تا بیت عَنیا دِه نِزدیکی و اِشتَن دَسون بِلَند آکَردِشه و چَوون را خیره دعا کَردِشه؛ 51و هَتَه کِه چَوون را دعا بَکَردی، اَوون کا جِدا آبَه آسِمونی را بَرده بَه. 52اَوِن عیسی پَرستش کَردِشونَه و دومله بَرکَه شادی نَه آگَردِستینَه اورشلیم. 53اَوِن دائم معبدی دیلَه کا بینَه و خِدا پرستِش بَکَردین.

Currently Selected:

لوقا 24: ITB

Highlight

Copy