یوحنا 1

اِنسانی کَلمه آبییِه

1صِفته نَه کَلمه بَه و کَلمه خِدا نَه بَه و کَلمه، خِدا بَه؛ 2هَ صِفته کا خِدا نَه بَه. 3گِرد چییِن چَیی واسطه نَه بِه وجود اومینَه، و هَر چِه که بِه وجود اومَه، هیچ چی نییَه بیدون چَیی بِه وجود اومَه بِبو.

4اَیی کا زندگی اِستبَه و اَ زندگی، آدَمون نور بَه. 5اِم نور تاریکی کا دَتاوه و تاریکی اَیی اَفجور نِبه.

6ایلَه مِردی بَه که خِدا طرفی کا ویسا آبَه بَه؛ چَیی نوم یحیی بَه. 7اَ ایلَه شاهدی شیوار اومَه، که اَ نوری را شهادت بِده، تا گِردِ مردم چَیی واسطه نَه ایمان بواَرِن. 8یحیی اَ نور نِبه، بَلکَم اومَه تا اَ نوری را شهادت بِده. 9اَ نور حقیقی که هَر اِنسانی را روشونی بَبَخشِستی، کارا بومَی بِه جهان.

10اَ دنیا کا بَه، و دنیا چَیی واسطه نَه بِه وجود اومَه؛ ولی دنیا اَیی آنِزونیشَه. 11اَ اومَه اِشتَن قومی وَر، ولی چَیی قوم اَیی قَبول نِکَردِشونَه. 12امّا بِه گِرد کَسونی که اَیی قَبول کَردِشونَه، اِم حقّی دوشَه که خِدا خِردَنِن بِبون، یعنی هَر کسی که چَیی نومی ایمان بواَرِه؛ 13اَ خِردَنِن جِسمی کا دنیا اومَه نینَه، گوشت و خونی کا نی دنیا اومَه نینَه، اِنسانی پیستَه کا نی نِبینَه، بَلکَم خِدا کا دنیا اومینَه.

14و کَلمه، اِنسان آبَه و چَمَه دیلَه کا ساکن آبَه. اَمَه چَیی شکوه و جلالی ویندِمونَه، شکوه و جلالی که اَ زوعَه یِ یِگانه شَئنی کایَه، که دَده طرفی نَه اومَه، فیض و حقیقتی نَه پُور. 15یحیی چَیی درباره شهادتی بَدای و خِلِع بَکَردی و بَواتی که: «اِم هَ کسی یَه که چَیی درباره واتَمَه: ”اَ کسی که چِمِن پَش بومَی و بَه مِن کا یالتَره، چوم چِمِن پیش اَ اِستبَه“.» 16چَیی پُوری کا اَمَه گِرد پُوری نَه ویگِتَمونَه، فیض فیضی سَر. 17چوم شریعت موسی واسطه نَه آدوعَه بَه، و فیض و حقیقت عیسی مسیح واسطه نَه اومَه. 18هیچکس هَرگز خِدا ویندَه نیشَه. امّا اَ زوعَه یِ یِگانه که دَده وَری کایَه، هَ اَ، خِدا بَمون آزونییَشه.

یحیی شاهادت

19اِمَه یحیی شهادتی، اَ موقع که یهودییِن، کاهِنون و معبدی خادِمون، اورشلیمی شهری نَه ویسا آکَردِشونَه چَیی وَر تا اَیی کا دَفَرسِن که: «تِه کییش؟» 20یحیی اِعتراف کَردِشه، اِنکار نِکَردِشه، بَلکَم اِعتراف کَردِشه که: «اَز مسیح موعود نیمَه.» 21اَوِن دَفَرسِشونَه: «بَس کییش؟ ایلیای پیغمبریش؟» یحیی جَواو دوشَه: «نیمَه.» اَوِن دَفَرسِشونَه: «تِه اَ پیغمبریش که موسی چَیی اومِه بَمون وعده دوعَش بَه؟» یحیی جَواو دوشَه: «نِه!» 22اَ موقع اَیی نَه واتِشونَه: «بَس کییش؟ اَمَه بَسی ایلَه جَواو چَمَه ویسا آکَردَه اون را بِبَرم. اِشتِه درباره چِه بَواتیش؟» 23یحیی واتِشه:

«اَز اَ کسی سَسیمَه که وییاوونی کا خِلِع بَکَردی و بَواتی:

”خِداوندی راه هموار آکَرَه. دُرست هَتَه که اِشعَیای پیغمبر واتِشه.“‌»

24اَوِن فریسی فِرقه عُلما طرفی نَه ویسا آبَه بینَه. 25اَوِن یحیی کا دَفَرسِشونَه: «اَگم تِه نِه مسیح ایش، نِه ایلیا، و نِه اَ پیغمبر، بَس چیرا تعمید بَدایش؟» 26یحیی جَواو دوشَه: «اَز آوی نَه تعمید بَدایم، امّا شِمَه دیلَه کا کسی مَنده که شِمَه اَیی آنِزونَه، 27هَ کسی که چِمِن پَش بومَی و اَز لایق نیمَه چَیی کفشون بَندی آکَرِم.»

28گِردِ اِم چییِن بِیت‌عَنْیا دِه کا، که اُردن رِواری اَ طرفی کا یَه، اِتِفاق دَلَکینَه، اوآ که یحیی تعمید بَدای.

خِدا قِربونی یه وَرَه

29صَبایی نَه روز، یَحیی ویندِشه که عیسی بومَی چَیی طَرفی را، یحیی واتِشه: «اِمَه خِدا قِربونی یَه وَره که گناه دنیا کا پِگِرِه! 30اِمَه کسی که چَیی درباره واتِمَه”چِمِن پَش مِردی بومَی که بَه مِن کا یالتَرَه، چوم چِمِن پیش اَ اِستبَه.“ 31اَز اِشتَن اَیی آنِزونیم، امّا اِمی واسی اومَیمَه و آوی نَه تعمید دوعَمَه تا اَ قوم اسرائیلی را ظاهر آبو.» 32یحیی شهادتی دوشَه، واتِشه: «از خِدا روح ویندِمَه که ایلَه کَفتری شیوار آسِمونی کا اومَه جیر و چَیی سَری کا مَندَه. 33اَز اِشتَن نی اَیی آنِزونیم، امّا اَ کسی که مِن ویسا آکَردَشَه تا آوی نَه تعمید بِدَم، مِنَه واتِشه: ”هَر موقع ویندِرَه خِدا روح ایی نفری سَری کا نِشتَه و مَندَه، بِزون هَ اَ کسی یَه که روح القدسی نَه تعمید بَدای.“ 34و اَز ویندَمَه و شهادتی بَدایم که اِم خِدا زوعَه یَه.»

عیسی اوّلین شاگِردِن

35صَبایی نَه روز، هَنی یَحیی اِشتَن دِ گِله شاگِردون نَه مَنده بَه. 36هَتَه که عیسی کارا دَوییَری، یحیی اَیی دَیشتَه و واتِشه: «دَیِسه، اِم هَ، خِدا قِربونی یَه وَرَه یَه!» 37وختی اَ دِ گِله شاگِرد اِم گَفی دَرَسِشونَه، عیسی دومله راه دَلَکینَه. 38عیسی آگَردَه و اَوون ویندِشه که چَیی دومله بومَین. اَوون نَه واتِشه: «چِه چی پیستِرونَه؟» اَوِن واتِشونَه: «رَبّی، (یعنی اِی اُستاد)، کیا کا بَمَندیش؟» 39عیسی اَوون نَه واتِشه: «بایَه و بِوینَه.» بَس اَوِن اومینَه و ویندِشونَه کیا کا بَمَندی، اَ روز اَیی نَه مَندینَه. چوم که تقریبا ساعت چهار بعد اَز ناهار بَه.

40ایلَه اَ دِ نفری کا که یحیی گفی دَرَسِه نَه شَه عیسی دومله، آندریاس، شمعون پِطرسی بِرا بَه. 41آندریاس اوّل، اِشتَن بِرا شمعونی تِلَفتِشه و اَیی نَه واتِشه: «اَمَه مسیح موعودی تِلَفتَمونَه، هَ مَسح بییَه موعود.» 42و شمعونی بَردِشه عیسی وَر. عیسی شمعونی دَیشتَه و واتِشه: «تِه شمعونْ یونا زوعَه ایش، امّا ”کیفا“ دَخونده بَبیش (که چَیی معنی صَخره ی سِنگَه).»

عیسی دعوت، فیلیپُس و نَتَنائیلی کا

43صَبایی نَه روز، عیسی تصمیم گِتِشه بِشو جَلیلی ولایتی را. اَ فیلیپُسی تِلَفتِشه و اَیی نَه واتِشه: «چِمِن دومله بِری!» 44فیلیپُس، بِیت‌ صِیْدا اَهالی کا بَه که آندریاس و پطرسی شهر بَه. 45فیلیپُس، نَتَنائیلی تِلَفتِشه و اَیی نَه واتِشه: «اَمَه اَ کسی که موسی، توراتی کا بَیی اِشاره کَردَشه، و پیغمبرِن نی چَیی درباره نیویشتَشونَه، تِلَفتَمونَه! اَ عیسی، یوسفی زوعَه، ناصره شهری کایَه!» 46نَتَنائیل اَیی نَه واتِشه: «مَگم بَبی ناصره کا نی چاک چیی بِرون بَرا؟» فیلیپُس جَواو دوشَه: «بِری و بِوین.»

47عیسی ویندِشه نَتَنائیل چَیی طَرفی را بومَی، چَیی درباره واتِشه: «دَیِسه، ایلَه اسرائیلی حقیقی که اَیی کا هیچ مَکر و حیله ای نییَه!» 48نَتَنائیل اَیی نَه واتِشه: «چِنتَه مِن آزونیش؟» عیسی جَواو دوشَه: «پیش اَز اِم که فیلیپُس تِه دَخونِه، وختی که حَلا اَ اَنجیل داری جیری کا مَندبیش، تِه ویندِمَه.» 49نَتَنائیل جَواو دوشَه: «اُستاد، تِه خِدا زوعَه ایش! تِه اِسرائیلی پاُتشا موعودیش!» 50عیسی جَواو دوشَه: «اِمی واسی که واتِمه تِه اَنجیل داری جیری کا ویندِمَه، ایمان بواَردیش؟ چِمی پَش، اِمی کا یالتَرَه چییون بَویندیش.» 51و واتِشه: «حقیقتَن، شِمَه نَه بَواتیم: آسِمونی بَویندیرون که آبَه و خِدا مَلائیکه اون بَویندیرون که اِنسانی زوعَه سَر، بَشین کَفا و بومَین جیر.»

Currently Selected:

یوحنا 1: ITB

Highlight

Copy