یوحنا 2

معجزه عروسی کا

1سوّمین روز، جَلیلی ولایتی، قانا دِه کا عروسی بَه و عیسی نَنه نی اوآ کا بَه. 2عیسی و چَیی شاگِردِن نی عروسی دعوت بینَه. 3وختی شَراو تمون آبَه، عیسی نَنه اَیی نَه واتِشه: «اَوِن دِ شَراو نیشونَه!» 4عیسی اَیی نَه واتِشه: «اِی ژِن، اَز اِم کاری نَه چِه کارِم اِستَه؟ چِمن وخت حَلا آرَستَه نییَه.»

5چَیی نَنه نوکَرون نَه واتِشه: «هَر چِه شِمَه نَه بَواتی، هَتَه بِکَرَه.» 6اوآ کا شیش گِله سِنگی یَه خُمره اِستبَه که یهودیون مذهبی کا چَوون آوی، نِجِس چییون پاک آکَردِه را اِستفاده بَکَردین و هر کمیله صد و بیست لیتر جِگا دارین. 7عیسی، نوکَرون نَه واتِشه: «اِم خُمره اون آوی نَه پُور آکَرَه.» بَس اَوِن لِبالِب پُور آکَردِشونَه. 8دومله عیسی اَوون نَه واتِشه: «حِسَه روکتِه اَیی کا پِگِرَه و بِبَره مِجلسی رئیسی وَر.» بَس اَوِن بَردِشونَه. 9وختی مِجلسی رئیس اَ آوی که شَراو آبَه بَه چَشِشَه نیمَزنی اَیی کییا کا وَردَشونَه، ولی نوکَرِنی که آوی پِگِتشون بَه، بَزنین. بَس مِجلسی رئیس، زِما دَخوندِشه 10و اَیی نَه واتِشه: «گِرد اوّل چاکَه شَراوی نَه پذیرایی بَکَردین و وختی میهمونِن مَست آبینَه، اَرزونَه شَراوی بواَردین؛ امّا تِه چاکه شَراوی تا اِم موقع غَم هَردَره!»

11اِنتَه عیسی اِشتَن اوّلین علامت و معجزه قانای جَلیلی کا اَنجام دوشَه و اِشتَن شکوه و جلالی آشکار آکَردِشه و چَیی شاگِردِن بَیی ایمان وَردِشونَه.

12دومله اِشتَن نَنه و بِرا اون و شاگِردون نَه شَه کَفَرناحومی شهری را، و چَند روز اوآ کا مَندینَه.

عیسی معبدی کا

13یهودیون پِسخَ عید نِزدیک بَه و عیسی شَه اورشلیمی شهری را. 14معبدی سِرا کا، ویندِشه که چِندی نفر دَمنده اینَه گا و گوسَند و کَفتر خِرَشِن، و صَرافِن نی نِشتینَه و کَسب کار بَکَردین. 15عیسی ایلَه لافِندی نَه ایلَه شِلاقی وَج آکَردِشه و گِرد اَوون، چَوون گوسَندون و گا اون همراه، معبدی کا بِرون بَرکَردِشه و صَرافون سکه اون ویکَردِشَه زمینی سَری کا و چَوون میزون ویگاردِنیشه، 16و کَفتر خِرَشون نَه واتِشه: «اِمون اییا کا بِرون بِبَره، چِمِن دَده کَ محل کسب و کار آمَکَرَه!» 17اَ موقع چَیی شاگِردِن ویر وَردِشونَه که مقدّس نیویشته اون کا نیویشته بییَه: «آتشی نَه غیرتی که اِشتِه کَ را هِستِمَه مِن سونِه.» 18بَس یهودییِن بَیی نَه واتِشونَه: «چِه علامت و معجزه ای بَمون نِشون بَدایش تا بِزونم اِنتَه رَه کارون اِجازه هِستِره؟» 19عیسی چَوون جَواوی کا واتِشه: «اِم معبدی خَراوه آکَرَه اَز سِه روزی کا اَیی هَنی وَج آکَرِم.» 20یهودییِن واتِشونَه: «اِم معبدی وَج آکَردِه چِل و شیش سال طول کَشَشَه، و حِسَه تِه سه روزی کا اَیی وَج آکَری؟» 21امّا معبدی که عیسی اَیی کا گَف ژَنی اِشتَنِش بَدن بَه. 22بَس وختی که مَردَه پَش زِنده آبَه، چَیی شاگِردِن چَیی اِم گَفی ویر وَردِشونَه، و مقدّس نیوشته اون و چَیی گفون ایمان وَردِشونَه.

23مدتی که عیسی پِسخَ عیدی واسی اورشلیمی کا بَه، وِر کَسون وختی ویندِشونَه علامت و معجزه اون اَنجام بَدای چَیی نومی ایمان وَردِشونَه. 24امّا عیسی چَوون ایمانی اعتماد نِداری، چوم مردمی گِردی آزونی 25و لازِم نِبَه کسی درباره اِنسان چیی اَیی نَه بوآجِه، چوم اَ اِشتَن بَزنی که اِنسانی دیلی دیلَه کا چِه خَوَرَه.

Currently Selected:

یوحنا 2: ITB

Highlight

Copy