یوحنا 3

عیسی و نیقودیموسی دیدار

1فریسییون فِرقه کا ایلَه مِردی بَه، که چَیی نوم نیقودیموس بَه، و اَ یهودییون پیله اون کا بَه. 2ایی شَو اَ اومَه عیسی وَر و اَیی نَه واتِشه: «اُستاد، بَزنیمون تِه معلّمی اِستیش که خِدا طرفی نَه اومَیش، چوم هیچکس نیمَشا علامت و معجزه اونی که تِه بَکردیش، بِکَرِه، مَگم اِم کِه خِدا اَیی نَه بِبو.» 3عیسی جَواو دوشَه: «حقیقتن، تِه نَه بَواتیم، تا کَسی اَز نو دنیا ما، نیمَشا خِدا پاُتشایی بِوینِه.» 4نیقودیموس اَیی نَه واتِشه: «کسی که پیرَه، چِنتَه بَشای هَنی دنیا با؟ مَگم بَشای هَنی آگَردِه اِشتَن نَنه اِشکَمی دیلَه و دنیا با؟» 5عیسی جَواو دوشَه: «حقیقتن، تِنَه بَواتیم، تا کسی آو و خِدا روح کا دنیا ما، نیمَشا خِدا پاُتشایی دیلَه دَشو. 6اَ چِه که بَشر خاکی کا دنیا با، بَشری یَه؛ و اَ چِه که روح کا دنیا با، روحانی یَه. 7تعجب مَکَه که تِنَه واتَمَه، تِه بَسی اَز نو دنیا بای! 8وا هَر جِگا که پیستِشَه وَزِه؛ چَیی سَسی دَرَسی، امّا نیمَزنی کییا کا بومَی یا کییا را بَشی. کسی نی که خِدا روح کا دنیا با اِنتَه یَه.» 9نیقودیموس بَیی کا دَفَرسِشه: «اِنتَه رَه چیی چِنتَه مُمکنَه؟» 10عیسی جَواو دوشَه: «تِه اسرائیلی معّلمیش و هَنی اِم چییون نِفهمی؟ 11حقیقتن تِنَه بَواتیم، اَمَه اَ چیی کا که بَزنیمون گف ژَنَم و اَ چیی را که ویندَمونَه شهادتی بَدایمون، امّا شِمَه چَمَه شهادتی قبول نِکَرَه. 12اَگم وختی که زمینی یَه چییون درباره شِمَه نَه گَف ژَندِمَه باوَر نِکَردِرونَه، چِنتَه باوَر بَکَردیرون اَگم آسِمونی یَه چییون کا شِمَه را بوآجِم؟ 13هیچکس کَفا شَه نییَه آسِمون، مَگم اَ کسی که آسِمونی نَه اومَه بِبو جیر، یعنی اِنسانی زوعَه[که آسِمونی کایَه]. 14هَتَه که موسی اَ نَلتی که مَفرقی نَه وَج آبَه بَه ویاوونی کا ایلَه چویی سَری کا مِخه کو کَردِشه و بِلند آکَردِشه، اِنسانی زوعَه بَسی هَتَه بِلند آکَردَه بِبو، 15تا کسی که اَیی ایمان بواَرِه، اَبَدی یَه زندگی بِدارِه.

16«چوم خِدا دنیا مردمی نَه هَدَه خِش بَه که اِشتَن ایلَه زوعَه فیدا کَردِشه تا هَر کسی که اَیی ایمان بواَره هلاک مَبو، بَلکَم اَبَدی یَه زندگی بِداره. 17چوم خِدا، اِشتَن زوعَه ویسا آنِکَردِشه دنیا دیلَه تا دنیا مَحکوم بِکَرِه، بَلکَم ویسا آکَردِشه تا دنیا چَیی واسطه نَه نجات پیدا بِکَرِه. 18هَر کسی که اَیی ایمان هِستِشه مَحکوم نییَب، امّا هَر کسی که اَیی ایمان نیشَه، حِسَه مَحکوم بییَه، چوم خِدا یگانه زوعَه نومی ایمان وَردَه نیشَه. 19و محکومیت اِمَه که نور اومَه بِه دنیا، امّا مردم تاریکی نَه نوری کا وِرتَر خِش بینَه، چیرا که چَوون اَعمال بد بَه. 20چوم هَر کسی که بَده کارون اَنجام بَدای نوری کا بیزارَه و نوری وَر نا، نَبادا چَیی کارِن آشکار آبون. 21امّا کسی که دُرست کارون اَنجام بَدای بومَی نوری وَر تا آشکار آبو که چَیی کارِن خِدا کمکی نَه اَنجام بَیینَه.»

22چَیی پَش، عیسی و چَیی شاگِردِن شینَه یَهودیه ولایتی دِه اون را. اَ چِندی وخت اوآ کا اَوون نَه مَندَه، و مردمی تعمید بَدای. 23یَحیی، عِیْنونی دِه کا، سالیمی شهری نِزدیکی کا، تعمید بَدای، چوم اوآ کا آو وِر بَه و مردم بومَین، تعمید بَگتین. 24اَ موقع حَلا یحیی زیندون دَلکَه نِبَه. 25ایی روز یحیی شاگِردون و ایلَه یهودی میانَه کا، بحثی دَگِنَه که چِنتَه بَبی نِجس بییِه کا پاک آبون. 26اَوِن اومینَه یحیی وَر، اَیی نَه واتِشونَه: «اُستاد، اَ کسی که تِنَه اُردن رِواری اَ طرفی کا مَند بَه، و تِه اَیی را شهادتی دورَه، حِسَه اِشتَن تعمید بَدای و گِرد مردم بَشین چَیی وَر.» 27یحیی جَواو دوشَه: «اِنسان نیمَشا چیی بِه دَس بواَره، غِیر اَز اَ چیی که خِدا طرفی کا اَیی عطا بِبو. 28شِمَه اِشتَن شاهِدیرونَه که اَز واتِمَه مسیح نیمَه، بَلکَم چَیی نارناره ویسا آبَیمَه. 29وَیو زِما شِنَه، امّا زِما رَفِق که چَیی کَناری کا مَندَه و بَیی گوش بَدای، زِما سَسی دَرَسه کا وِر شادی بَکَردی. چِمِن شادی نی هَتَه کامل بییَه. 30اَ بَسی بَرده بِبو کفا اَز بَسی جیر بام.

31«اَ کسی که کَفا نَه بومَی، گِردی کا یالتَرَه، اَ کسی که زمینی کا یَه، زمینی یَه و زمینی یَه چییون کا گف ژَنِه. اَ کسی که آسِمونی نَه بومَی، گِردی کا یالتَرَه. 32اَ، اَ چیی را که ویندَه و دَرَسَشه شهادتی بَدای، امّا هیچکس چَیی شهادتی قبول نِکَرِه. 33هَر کسی که چَیی شهادتی قبول بِکَرِه، تائید بَکَردی که خِدا حقیقتَه. 34کسی که خِدا طرفی نَه ویسا آبَه، خِدا کلامی بَواتی، چوم خِدا اِشتَن روح، بی اَندازه عَطا بَکَردی. 35دَده، زوعَه نَه خِشه و گِرد چییون چَیی اِختیاری کا نوعَشه. 36کسی که بِه زوعَه ایمان هِستِشه، اَبَدی یَه زندگی هِستِشه؛ کسی که زوعَه کا اِطاعت مَکَرِه، زندگی نییَه ویند، بَلکَم خِدا غَضب چَیی سَری کا بَمَندی.»

Currently Selected:

یوحنا 3: ITB

Highlight

Copy