لوقا 23

عیسی محاکمَه پیلاتُس و هیرودیسی وَری کا

1دومله شورا اعضا گِرد پِرِشتینَه و عیسی بَردِشونَه پیلاتُسی وَر که رومی فرماندار بَه. 2اَوِن دَمَندینَه عیسی متهم کَردِه، واتِشونَه: «اَمَه اِم نتیجه آرَستیمونَه که اِم مِرد چَمَه میلّتی راه کا بَرکَرِه و اَمَه قَدَغَن بَکَردی که رومی اِمپِراطوری خَراج آمَدییَم و اِدعا بَکَردی که اِشتَن مسیح و پاُتشایَه.» 3بَس پیلاتُس عیسی کا دَفَرسِشه: «تِه یهودیون پاُتشاایش؟» عیسی جَواو دوشَه: «تِه اِشتَن واتِرَه که اِستیمَه!» 4دومله پیلاتُس، سَران کاهِنون و جَماعتی نَه واتِشه: «اَز هیچ تَقصیری اِم مِردی محکوم کَردِه را نِوینِم.» 5امّا اَوِن اِصرار بَکَردین، بَواتین: «اَ اِشتَن تعلیمون نَه گِردِ یهودیه کا مردمی جوکو ژَنِه که آشوب بِکَرِن. جلیلی ولایتی کا شروع کَردَشه و حتی تا اییا نی آرَستَه.»

6وختی پیلاتُس اِمی دَرَسِشَه، دَفَرسِشه بِزونِه که عیسی جَلیلی یَه. 7وختی زونِستِشه عیسی، هیرودیسِ حاکِمی قَلمروی شِنَه، اَیی ویسا آکَردِشه هیرودیسی وَر، چوم اَ موقع هیرودیس اورشلیمی شهری کا بَه. 8وختی هیرودیس، عیسی ویندِشه، بَرک شاد آبَه، چوم وِر زمان بَه پیستِشَه که عیسی بِوینِی. چوم که عیسی درباره دَرَسَش بَه و امید داریسته چَن گِله معجِزه اَیی کا بِوینی. 9بَس وِر سوالونی عیسی کا دَفَرسِشه، امّا عیسی جَواوی بَیی نِدوشَه. 10سَران کاهِنِن و توراتی معلِمِن که اوآکا مَند بینَه، بَرک بَیی بُختون ژَنین. 11هیرودیس و چَیی سَربازِن نی عیسی تحقیر کَردِشونَه و اَیی مَسخره کَردِشونَه. دومله ایلَه زَرق و بَرقی یَه اَبایی پِرَندِشونَه چَیی دوشی سَر و اَیی ویسا آکَردِشونَه پیلاتُسی وَر. 12هَ روزی کا، هیرودیس و پیلاتُس یَندی نَه رَفِق بینَه، چوم پیشتَری یَندی نَه دِشمِن بینَه.

13دومله پیلاتُس، سَران کاهِنون و قومی پیله تَرون و مردمی دَخوندِشه، 14و اَوون نَه واتِشه: «شِمَه اِم مِردی اِم اِتهامی نَه وَردِرونَه چِمِن وَر که مردمی راه کا بَرکَرِه. اَز شِمَه پیشی کا اِم مِردی بازجویی کَردِمَه و اَیی کا هیچ تقصیری نِویندِمَه که شِمَه بُختوتون ثابت بِکَرِه . 15هیرودیسی نظر نی هِمَه، چوم اَیی آگاردِنیشه چَمَه وَر. دَیِسه اَ، کاری کَردَه نیشَه که مَرگی مستحق بِبو. 16بَس اَیی شِلاق ژَنِم و آزاد آکَرِم.» 17هَر عیدی کا بَسی پیلاتُس، ایلَه زندانی اَوون را آزاد آکَری.

18امّا اَوِن گِرد یَندی نَه خِلِع ژَندِشونَه که: «اِم مِردی بِکِش، باراباسی اَمَه را آزاد آکَه!» 19باراباس کسی بَه که شهری کا آشوب کَردِه واسی و آدَمَه کِشی واسی زندانی کا بَه. 20پیلاتُس که پیستِشَه عیسی آزاد آکَری، ایی دفعه دییَر نی مردمی نَه گَف ژندِشه. 21امّا اَوِن هَتَه هی خِلِع بَکَردین که: «اَیی صلیبی سَری کا بِکِش! اَیی صلیبی سَری کا بِکِش!» 22سِوّمین کَره اَوون نَه واتِشه: «چیرا؟ چِه بَدی کَردَشه؟ اَز هیچ تَقصیری اَیی کا نِویندِمَه که مرگی مستحق بِبو. بَس اَیی شِلاق ژَنِم و آزاد آکَرِم.» 23امّا اَوِن بِلندَه سَسی نَه خِلِع بَکَردین و اِصرار بَکَردین که اَ بَسی مصلوب بِبو. آخِرسَر چَوون خِلِع کَردِه پیروز بَه. 24بَس پیلاتُس، تصمیم گِتِشه حکمی که اَوِن پیستِشونَه صادر بِکَرِه. 25پیلاتُس اَ، مِردی که آشوبی واسی و آدَمَه کِشی واسی زندانی کا دَلَکَه بَه و جماعت چَیی آزادی پیستِشونَه، آزاد آکَردِشه ولی عیسی آدوشَه چَوون دَس تا هَر کاری که پیستِشونَه اَیی نه بِکَرِن.

عیسی، صلیبی سَری کا

26وختی که عیسی کارا بَبَردین، ایلَه مِردی که چَیی نوم شمعون بَه و قیرَوانی اَهالی بَه، مزرعه نَه کارا بومَی شهری را. اَوِن شمعونی گِتِشونَه و صلیبی چَیی کَلَندوشی سَر نوشونَه تا اَیی بِبَره عیسی دومله. 27وِرَه گروهی مردمی کا و ژِنَکِنی که عیسی واسی سینه کو بَکَردین و شیون بَکَردین، چَیی دومله راه دَلَکینَه. 28امّا عیسی اِشتَن دیمی آگاردِنیشه چَوون طرف و واتِشه: «اِی اورشلیمی کِلَه اِن، بَه مِرا داد مَکَرَه؛ بَلکَم شِمَه را و شِمَه خِردَنون را داد بِکَرَه. 29چوم روزونی بومَین که بَواتین: ”خَسَه بِبو نازا یَه ژِنکون و اِشکَمونی که هرگز خِردَن وَرده نیشونَه و سینه اونی که هرگز شِت دوعَه نیشونَه!“ 30اَ موقع، کوه اون نَه بَواتین: ”چَمَه سَر بَرگِنَه!“ و کولون نَه نی بَواتین: ”اَمَه بوپوشونَه!“ 31چوم اَگم تَره لِسی نَه اِنتَه بَکَردین، خِشک لِسی سَر چِه بومَی؟»

32دِ گِله دییَر مِرد نی که هَر دِ نفر جنایتکار بینَه، کارا بَبَردین تا عیسی نَه بِکِشِن. 33وختی آرَستینَه جِگایی که چَیی نوم جُمجُمه بَه، عیسی اَ دِ گِله جنایتکاری نَه صلیبی سَری کا مِخَ کو کَردِشونَه، ایلَه عیسی راستَ طرفی کا و اَ ایلَه نی چَیی چَپَ طرفی کا. 34عیسی واتِشه: «اِی دَده، اِمون بِبَخش، چوم نیمَزنِن چِه بَکَردین.» اَوِن عیسی خَلااون را قُرعه دَرَفَندِشونَه که اِشتَن میانه کا تَقسیم بِکَرِن. 35مردم مَندَه بینَه و تَماشا بَکَردین و قومی پیله تَرِن نی عیسی ریشخند بَکَردین و بَواتین: «بقیه نجات دوشَه! اَگم اِم مِرد خِدا مَسیحَه، یعنی هَ اِنتخاب بییَه، حِسَه اِشتَن نجات بِده.» 36سَربازِن نی اَیی مَسخره بَکَردین. اَوِن عیسی نِزدیک آبین، تِرشِسَه شَراوی آدَن بَیی 37و بَواتین: «اَگم تِه یَهودیون پاُتشاایش، اِشتَن نجات بِده.» 38عیسی سَری کَفا کا نی اِم نیویشته وَصل کَردِشونَه که ’اِمَه یَهودیون پاُتشا.‘

39ایلَه اَ جنایت کارون کا که مصلوب بَه بینَه، بَد و بیراه نَه عیسی نَه بَواتی: «بَگم تِه مَسیح موعود نیشَه؟ اَمَه و اِشتَن نجات بِده!» 40امّا اَ ایلَه اَیی را زِرَه گِتِشه و واتِشه: «تِه خِدا کا نِتَرسی؟ تِه نی هِم جَزا محکوم بَییش! 41چَمَه مکافات حَقَّه، چوم چَمه کارون جَزا یَه. امّا اِم مِرد هیچ تقصیری نیشه.» 42دومله واتِشه: «اِی عیسی، وختی اِشتِه پاُتشایی آرَستیش، مِن نی یاد بوعَه.» 43عیسی جَواو دوشَه: «حقیقتَن تِنَه بَواتیم، اوری مِنَه بِهِشتی کا بَبیش.»

عیسی مرگ

44ساعت حدود دونزَه ناهار بَه که تاریکی گِردِ اَ سرزمینی گِتِشه و تا ساعت سه بعد از ناهار اِدامه داریسته. 45چوم آفتاوی نور دِ دَنِتاوی. معبدی پَرده میانه کا دِ پَله بَه. 46اَ موقع عیسی بِلَندَه سَسی نَه خِلِع ژَندِشَه و واتِشه: «اِی دَده، چِمِن روح اِشتِه دَسون تسلیم بَکَردیم.» اِمی واتِشه و جان دوشَه. 47وختی که سَربازون فرمانده ویندِشه که چه اِتِفاقی دَلَکه، خِدا ستایِش کَردِشه و واتِشه: «واقعا که اِم مِرد بی گناه بَه.» 48گِردِ مردمی که تَماشا کَردِه را جَمع آبَه بینَه وختی ویندِشونَه که چِه اِتِفاقی دَلَکه، سینه کو آگَردِستینَه اِشتَن کَ اون را. 49گِردِ عیسی آشنایِن و ژِنَکونی که جَلیلی ولایتی نَه چَیی دومله اومَه بینَه، دور مَندَه بینَه و اِم چییون دَیِسین.

عیسی دَفن کَردِه

50اوآکا ایلَه مِردی بَه که چَیی نوم یوسف بَه. یوسف رامَه شهری اَهالی کا بَه که یهودیون ایلَه شهرون کا بَه. اَ ایلَه چاک و صالِحه مِردی بَه. با اِم که یوسف شورا عضو بَه، 51امّا چَوون رأی و تصمیمی نَه موافِق نِبَه. یوسف خِدا پاُتشایی را چِم بِه را بَه. 52اِم مِرد شَه پیلاتُسی وَر و عیسی جَنازه پیستِشَه. 53دومله عیسی جَنازه صَلیبی کا جیر وَردِشه و کتانَه کَفنی دیلَه کا دَپیچِستِشه و ایلَه مَقبره ای کا نوشه که ایلَه صخره دیلَه کا تِراشتَه بییَه بَه و تا حِسَه کسی چَیی دیلَه کا نوعَشون نِبَه. 54اَ روز، آمادَه آبییَه روز بَه که اَ روزی کا یهودییِن اِشتَن آمادَه آکَرین پِسَخَ عیدی را و چیی مَندَه نِبَه که مقدّس شنبه شروع بِبو. 55ژِنَکِنی که جَلیلی نَه عیسی دومله اومَه بینَه، شینَه یوسفی دومله. اَوِن مَقبره ویندِشونَه و هَم ویندِشونَه که چِنتَه عیسی جَنازه اوآکا نوشَه. 56دومله آگَردِستینَه کَ، اَدویه و عَطری یَه روعَن آمادَه آکَردِشونَه. اَوِن مطابق شریعتی حکم، مقدّس شنبه روزی کا اِستراحت کَردِشونَه.

Currently Selected:

لوقا 23: ITB

Highlight

Copy