لوقا 22

یهودا خیانت

1فَطیرَه عید که اَیی نَه پِسَخ عید بَواتین کارا نِزدیک آبی، 2و سَران کاهِنِن و توراتی معلِمِن ایلَه راهی دومله گردین که عیسی بِکِشین، چوم مردمی کا تَرسین. 3اَ موقع شیطان، یهودای معروف بِه اَسخَریوطی دیلی کا رَخنه کَردِشه. یهودا ایلَه اَ دونزَه گِله شاگِردون کا بَه. 4یهودا شَه سَران کاهِنون و معبدی نگهبانون فرمانده اون وَر و اَوون نَه اِمی درباره که چِنتَه عیسی آدَه چَوون دَس گَف ژَندِشَه. 5اَوِن خوشحال آبینَه و موافقت کَردِشونَه که بَیی پول آدَن. 6یهودا نی قبول کَردِشه و ایلَه فرصتی دومله گردی که جماعتی نِینَکی، عیسی آدَه چَوون دَس.

آخِرین سور

7فَطیرَه عیده روز آرَستَه که اَ روزی کا بَسی، پِسَخ عیدی قِربونی یَه وَرَه سَر آبِرین. 8بَس عیسی، پطرس و یوحنا ویسا آکَردِشه، و واتِشه: «بِشَه و پِسَخ عیدی سوری اَمَه را آمادَه آکَرَه تا بَرَم.» 9اَوِن دَفَرسِشونَه: «پیستِرَه کیا کا تَدارک بِوینَم؟» 10عیسی جَواو دوشَه: «وختی که شهری دیلَه دَشییَه، ایلَه مِردی ایلَه آوَه نِرَه ای نَه شِمَه نَه دیمادیس بَبی. چَیی دومله بِشه هَ کَیی دیلَه که اَ بَشی. 11اَ کَ صاحیبی نَه بوآجَه: ”اُستاد بَواتی: ’میهمون خونۀ کییارَه تا پِسَخ عیدی سوری چِمِن شاگِردون نَه بَرِم؟“ 12اَ، ایلَه یالَه بالا خونه ای که فرش بییَه شِمَه نیشون بَدای. اوآکا تَدارک بِوینَه.» 13اَوِن شینَه و هَمه چی هَتَه ویندِشونَه که عیسی اَوون نَه واتَش بَه و پِسَخ عیدی سوری آمادَه آکَردِشونَه.

14سوری وخت آرَستَه و عیسی رسولون نَه سِفره سَری کا نِشتَه. 15عیسی اَوون نَه واتِشه: «چَدَه مشتاق بیمَه چِمِن عَذاب کَشِه پیش، اِم پِسَخ عیدی سوری شِمَه نَه بَرِم. 16چوم شِمَه نَه بَواتیم که دِ اَیی کا نییَرِم تا اَ موقع که خِدا پاُتشایی کا اَنجام بِبو.» 17دومله قَدَرَه پِگِتِشه و شُکر کَردِه پَش واتِشه: «اِمی بِگِرَه و شِمَه میانَه کا تَقسیم بِکَرَه. 18چوم شِمَه نَه بَواتیم که حِسَه نَه تا خِدا پاُتشایی اومِه موقع اَز دِ اَنگِرَه رَزی مَحصولی کا نِنجِم.» 19دومله نونی پِگِتِشه و شُکر کَردِه پَش اَیی ‌پَله کَردِشه و آدوشَه اَوون و واتِشه: «اِم چِمِن بَدنَه که شِمَه را آدوعَه بَبی؛ اِم کاری چِمِن یاد وَردِه را اَنجام بِدییَه.» 20هِنتَه نی، سورَه پَش قَدَرَه پِگِتِشه و واتِشه: «اِم قَدَره چِمِن خونَ كه اِم تازه عَهدی، اَیی نَه مهر بَکَردیم و چِمِن خون شِمَه واسی ویبو. 21امّا اَ کسی که بَه مِن خیانت بَکَردی، چَیی دَس چِمِن دَسی نَه سِفره دیلَه کایَه. 22چوم اِنسانی زوعَه، هَتَه که اَیی را مقَدرَه، بَشی، امّا وای بِه حال اَ کسی كه اَیی دِشمنی تسلیم بِکَرِه.» 23اَوِن دَمَندینَه یَندی کا دَفَرسین کَمیله اَوون کا بَشای کسی بِبو که اِنتَه کاری بَکَردی.

24شاگِردون دیلَه کا نی بَحثی دَلَکه که کَمیله اَوون کا گِردی کا یالتَرَه. 25عیسی اَوون نَه واتِشه: «دییَر قومون پاُتشایِن و حاکِمِن اَوون را حکمرانی بَکَردین؛ ولی مردم هَنی اَوون نَه خِیرخواه بَواتین. 26امّا شِمَه اِنتَه مَبییَه. یالتَرین شِمَه دیلَه کا بَسی روکَه گِله شیوار بِبو و رئیس بَسی نوکَری شیوار بِبو. 27چوم کَمیله یالتَرَه، اَ کسی که سِفره سَری کا نِشِه یا اَ کسی که نوکَری بَکَردی؟ بَگم اَ کسی که سِفره سَری کا نِشِه یالتَر نییَه؟ ولی اَز شِمَه دیلَه کا اَ کسی شیواریمَه که نوکری بَکَردی.

28«شِمَه کَسونی اِستیرونَه که چِمِن آزمایشون کا مِنه مَندَه بیرونَه. 29بَس هَتَه که چِمِن دَده، سَلطنتی مِن آدوعَشه، اَز نی اَیی آدَم شِمَه، 30تا شِمَه نی چِمِن پاُتشایی کا چِمِن سِفره سَری کا، بَرَه و بِنجَه و تَختون سَری کا بِنِشه و اِسرائیلی دونزَه گِلَه قبیله داوری بِکَرَه.

31«اِی شمعون، اِی شمعون، دَیِس شیطان پیستِشَه تِه اِشتَه را جِدا آکَرَه هَتَه که گَندِمی چَیی پوشه کا جِدا آکَرِن. 32امّا اَز بَه تِرا دعا کَردِمه تا اِشتِه ایمان اَز بین مَشو. وختی هَنی آگَردِستیش اِشتِه بِرا اون قوّت بِدَه.» 33پطرس جَواو دوشَه: «آقا، اَز حاضریمه تِنَه هَم زیندون دَلَکِم و هَم تِنَه بِمِرِم.» 34عیسی جواو دوشَه: «پطرس، تِنَه بَواتیم که اوری، سوکی خَندِه پیش، تِه سِه کَرَه هاشا بَکَردیش که مِن آزونی.»

35دومله عیسی اَوون نَه واتِشه: «وختی که بیدون پولَ کیسه، کوله بار و کَفش، شِمَه ویسا آکَردِمه، بَگم چیی محتاج بیرونه؟» اَوِن جَواو دوشونَه: «نِه، هیچ چی.» 36عیسی اَوون نَه واتِشه: «امّا حِسَه هَر کسی پول کیسه یا کوله بار هِستِشه، اَیی پِگِرِه و اَ کسی که قَمَّه نیشَه اِشتَن اَبا بِخرَشه، قَمَّه بِخِرِه. 37چوم شِمَه نَه بَواتیم که مقدّسَ نیویشته اون اِم پیشگویی چِمِن درباره بَسی اِتِفاق دَلَکه که بَواتی: ”اَ، تقصیر کارون دَسته کا حساب بَه،“ ها، چیی که چِمِن درباره نیویشته بییَه، کارا اِتِفاق دَلَکه.» 38شاگِردِن واتِشونَه: «آقا، دَیِس، اییا کا دِ گِله قَمَّه هِستِمونَه.» عیسی جَواو دوشَه: «اِم گِفِن دِ وَستینَه.»

عیسی زیتون کوه کا دعا بَکَردی

39دومله عیسی شَه بِرون و طبق عادت، شَه زِیتون کوه را و چَیی شاگِردن نی چَیی دومله شینَه. 40وختی عیسی آرَستَه اَ جِگا، اَوون نَه واتِشه: «دعا بِکَرَه که آزمایش مَبییَه.» 41دومله عیسی ایلَه سِنگی فِر آدوعَه مسافتی قَدر، اَوون کا فاصله گِتِشه و زِنگ ژَندِشَه، دعا کَردِشه 42واتِشه: «اِی دَده، اَگم اِشتِه اِراده یَه، اِم عَذابی قَدرَه بَه مِن کا دور آکَه، امّا حَلا نی اَ چیی که از پیستِمَه مَبو، بَلکَم اَ چیی که تِه پیستِرَه اَنجام بِبو.» 43اَ موقع ایلَه مَلائیکه آسِمونی کا بَیی آشکار آبَه و اَیی قوّت دوشَه. 44عیسی اَ رنج و عذابی کا که کارا کَشی، وِرتَر دعا کَردِشه و چَیی عَرق، یالَه خونَ چِله اون شیوار زمینی کا ویبی. 45وختی عیسی دعا سَری کا پِرِشتَه و آگَردِستَه شاگِردون وَر، اَوون ویندِشه که غَم و غُرصه کا خاو آشَینه. 46اَوون نَه واتِشه: «چیرا خِتیرونَه؟ پِرِزَه و دعا بِکَرَه که آزمایش مَبییَه.»

عیسی دستگیر بییِه

47عیسی حَلا کارا گَف ژَنی که ایلَه یالَه جماعتی راه نَه آرَستینَه. یهودا که ایلَه اَ دونزَه گِله شاگِردون کا بَه، اَوون هدایت بَکَردی. یهودا اومَه عیسی وَر تا اَیی ماچ بِکَرِه، 48امّا عیسی اَیی نَه واتِشه: «اِی یهودا، اِنسانی زوعَه ایلَه ماچی نَه تسلیم بَکَردیش؟» 49وختی عیسی دور و بَری اِن ویندِشونَه که چِه اِتِفاقی کارا دَلَکِه، واتِشونَه: «آقا، چَمَه قَمَّه اون بَروَرَم؟» 50و ایلَه اَوون کا، کاهن اَعظمی نوکَری قَمَّه نَه ژَندِشَه و چَیی راستَ گوشی دَوِردِشه. 51امّا عیسی واتِشه: «اِم کاری مَکَرَه!» و اَ مِردی گوشی دَس آسوشَه و شَفا دوشَه. 52دومله عیسی سَران کاهنون و معبدی نگهبانون فرمانده اون و شِیخون نَه که چَیی دستگیر کَردِه را اومِه بینَه، واتِشه: «بَگم از راهزَنیمَه که چماقون و قمَّه اون نَه اومَیرونَه مِن بِگِرَه؟ 53اَ موقع که اَز هَر روز معبدی کا شِمَه نَه بیمَه، شِمَه مِن دَس نِژَندِرونَه. امّا حِسَه شِمَه وختَه، تاریکی قدرتی وخت.»

پطرس، عیسی هاشا بَکَردی

54دومله اَوِن عیسی گِتِشونَه و بَردِشونَه کاهِن اَعظمی کَ. پطرس دوری نَه چَوون دومله بَشی. 55کَ سِرا وسطی کا، آتش روشون بَه و چَن نفر آتشی دوری کا نِشت بینَه. پطرس نی چَوون دیلَه کا نِشتَه. 56اِم موقع، ایلَه خاتَک، پطرسی ویندِشه که آتشی روشونی کا نِشت بَه، بَیی زول ژَندِشَه و واتِشه: «اِم مِرد نی عیسی نَه بَه.» 57امّا پطرس هاشا ژَندِشَه واتِشه: «اِی ژِن، اَز اَیی آنِزونِم.» 58تِلی پَش ایی نفر دییَر پطرسی ویندِشه و واتِشه: «تِه نی ایلَه اَوون کا ایش.» امّا پطرس جَواو دوشَه: «اِی مِرد، از اَوون کا نیمَه.» 59ایی ساعت دَوییَرده و ایی نفر دییَر تأکیدی نَه واتِشه: «یَقین دارِم که اِم مِرد نی اَیی نَه بَه، چوم که اِم نی جلیلی یَه.» 60امّا پطرس واتِشه: «اِی مِرد، اَز نیمَزنِم تِه چِه بَواتیش.» پطرس حَلا کارا گَف ژَنی که هَ لحظه سوک خَندِشه. 61دومله عیسایِ خِداوند آگَردِستَه و پطرسی دَیشتَه. پطرس عیسایِ خِداوندی گَفی ویر وَردِشه که چِنتَه اَیی نَه واتَش بَه: «اوری، سوکی خَندِه پیش تِه سِه کَرَه مِن هاشا بَکَردیش.» 62پطرس شَه بِرون، و های های داد کَردِشَه.

عیسی ریشخند بَکَردین

63کسونی که عیسی کا نگهبانی بَکَردین، اَیی مسخره کَرین و ژَنین. 64اَوِن عیسی چِمون دَوَستشون بَه و هِی اَیی کا دَفَرسین: «حِسَه غِیبی نَه بوآج کی ته ژَنِه؟» 65اَوِن عیسی نَه وِر بَد و بیرا بَواتین و فَش بَداین.

عیسی محاکمه یهودیون شورا پیشی کا

66وختی صِبح آبَه، قومی شیخِن، یعنی سَران کاهِنِن و توراتی معلِمِن، جمع آبینَه ایی جِگا و واتِشونَه که عیسی بواَرِن چَوون وَر. اَوِن عیسی نَه واتِشونَه: 67«اَگم تِه مسیح موعود ایش، بَمون نَه بوآج.» ولی عیسی واتِشه: «اَگَم بوآجِم، چِمِن گَفی باوَر نِکَرَه، 68و اَگم شِمَه کا دَفَرسِم، چِمِن جَواوی نِدییَه. 69امّا چِمی پَش، اِنسانی زوعَه خِدا قدرتی راستَ دَسی کا بَنِشتی.» 70اَوِن گِرد واتِشونَه: «بَس تِه خِدا زوعَه ایش؟» عیسی جَواو دوشَه: «شِمَه بَواتیرون که اِستیمَه.» 71بَس اَوِن واتِشونَه: «دِ شاهِدمون چیرایَه؟ اَمَه اِمی، چَیی اِشتَن زوونی کا دَرَسِمونَه.»

Currently Selected:

لوقا 22: ITB

Highlight

Copy