لوقا 21

فقیرَه ویوه ژِنی هِدیه

1عیسی اَطرافی دَیشتَه و ویندِشه که پولدارِن اِشتَن هِدیه اون دَرَفَنِن معبدی صُندوقی کا. 2ایلَه فقیرَه ویوه ژِنی، نی ویندِشه که دِ قِران دَرَفَندِشه صُندوقی کا. 3عیسی واتِشه: «حقیقتَن شِمَه نَه بَواتیم، اِم فَقیرَه ویوه ژِن گِردِ اَوون کا وِرتَر پول دَرَفندَشه. 4چوم اَوِن گِرد، اِشتَن دارایی اِضافی کا آدوشونَه، امّا اَ ژِن اِشتَن فقیری نَه، گِرد چیی که داریستِه، آدوشَه.»

عیسی معبدی ویرونَگی پیشگویی بَکَردی

5وختی که چَن نفر معبدی درباره گَف ژَنین و بَواتین که چِنتَه خاسَه سِنگون و هَدیه اون نَه بَزَک بییَه، عیسی واتِشه: 6«روزونی بومَی که اِم چییونی کا که بَویندیرون، دِ اییا کا سِنگی، سِنگی سَر باقی نِمونِه بَلکَم گِرد ویبون.»

7اَوِن عیسی کا دَفَرسِشونَه: «اُستاد، کَینی اِم چییِن اِتِفاق دَلَکِن و چَوون نِزدیک آبییِه نیشونه چَه؟» 8عیسی واتِشه: «ویرا ببییَه که گمراه مَبییَه؛ چوم وِر کَسِن چِمِن نومی نَه بومَین و بَواتین: ”اَز اَ، اِستیمه“ و ”زمان موعود آرَستَه.“ چَوون دومله مَشییَه.

9وختی جَنگون و آشوبون خَوَری دَرَسَه، مَتَرسه. چوم اوّل بَسی اِم چییِن اِتِفاق دَلَکِن، ولی اَلبَحَل دنیا بِه آخِر آنِرَستِه.» 10دومله عیسی اَوون نَه واتِشه: «ایلَه میلَّتی دییَر میلَّتی ضِد و ایلَه حکومتی دییَر حکومتی ضِد، پِرِزِن. 11یالَه زلزله اِن بومَین و جور بَه جوره جِگا اون کا قحطی و طاعون بومَی. تَرسناکَه چییِن اِتِفاق دَلَکِن و آسِمونی کا یالَه نیشونه اِن ویندَه بَبین. 12امّا گِردِ اِم چییون اِتِفاق دَلَکِه پیش، شِمَه دَستگیر بَکَردین و اَذیت آزار بَکَردین. شِمَه عبادتگاه اون و زندانون تحویل بَداین. و چِمِن نومی واسی، شِمَه بَبَردین پاُتشا اون و فَرماندارون وَر. 13ولی اِم شِمَه را ایلَه فرصتی بَبی تا شهادتی بِدییَه. 14بَس اِمی چاک شِمَه یادی کا بِدارَه که نارنارِه فیکر مَکَرَه که چِنتَه بَسی جواو بِدییَه. 15چوم اَز، شِمَه اِنتَه قدرت گَف ژَندِه و حکمتی بَدایم که هیچ گِله شِمَه دِشمنون کا نیمَشان اَیی نَه مقاومت یا مخالفت بِکَرِن. 16حَتی شِمَه دَده نَنه و شِمَه برا اِن و شِمَه خویشِن و رَفِقِن، شِمَه دِشمِنی تسلیم بَکَردین و بعضی شِمَه کا نی کِشِن. 17گِردِ مردم چِمِن نومی واسی شِمَه کا بیزار بَبین. 18امّا ایلَه تار مو نی شِمَه سَری کا کَم نییَب. 19شِمَه صبر و تحملی نَه، شِمَه جانی نجات بَدایرون.

20«امّا وختی ویندِرونِه اورشلیمی شهر، لَشکَرون نَه محاصره بییَه، بِزونَه که چَیی ویرونَه بییِه نِزدیکه. 21اَ موقع، کسونی که یهودیه ولایتی کا مَندینَه دَوَزِن کوه اون را و کسونی که شهری دیلَه کا مَندینَه شهری کا بِرون بَرشون، و کسونی که دشت و صحرا کا اینَه شهری دیلَه مَدَشون. 22چوم اَ روزِن، مکافاتَه روزی نَه که اَوون کا، مقدّس نیویشته اِن گِرد اِتِفاق دَلَکِن. 23وای بِه حال ژِنکونی که اَ روزن کا حامیله اینَه و ژِنکونی که خِردَن شِت بَداین! چوم بَرکَ مصیبتی اِم سرزَمینی دومنگیر بَبی و اِم قوم غَضب الهی گیرفتار بَبین. 24اَوِن شَمشیری دَم دَلَکِن و گِردِ قومون اَسیر بَبین، و تا اَجنَبیون سلطنتی دوران بِه آخِر آرَستِه، اَجنَبی اِن اورشلیمی پایمال بَکَردین.

25«آفتاو و مانگ و ستاره اون کا علامتونی آشکار بَبی. زمینی کا، میلّتِن، دریا جوش و خروشی کا پریشون و تشویش بَبین. 26مردم ترسی کا و اِم فکری کا که دنیا سَر چِه بَلایی کارا بومَی بیهوش بَبین، چوم اَ قدرتِنی که آسِمونون محکم غَم بَردین، لَرزِن. 27اَ موقع اِنسانی زوعَه بَویندین که قدرت و بَرکَ جلالی نَه ایلَه خِری نَه بومَی. 28وختی اِم چیون اِتِفاق دَلَکِه شروع بَه، راست بومونَه و شِمَه سَرون کَفا بِگِرَه، چوم شِمَه آزادی نِزدیکه!»

29عیسی اَوون را اِم مَثَّلی وَردِشه و واتِشه: «اَنجیلَ دار و گِردِ دارون دَیِسه. 30هِنتَه که لیو بواَردین، بَشایرون بِوینَه و بِزونَه که تاوستون نِزدیکه. 31هِنتَه نی، وختی بِوینَه اِم چییِن اِتِفاق دَلَکِن، بِزونَه که خِدا پاُتشایی نِزدیکَه. 32حقیقتَن شِمَه نَه بَواتیم، تا گِرد اِم چییِن اِتِفاق مَدَلَکِن، اِم نَسل اَز بیِن نِشون. 33آسِمون و زمین اَز بِین بَشین، امّا چِمِن گفِن اَز بین نِشون.

34«ویرا بِبییَه، نَبادا، عیش و نوش و مَستی و زندگی نِگرانی اِن شِمَه دیلی سَنگین آکَرِن، و اَ روز ایلَه تَلَه ایی شیوار ایی دفعه شِمَه گیر دَرَفَنه. 35چوم اِم اِتِفاق گِردِ دنیا مردمی سَر بومَی. 36بَس هَمیشه ویرا بِبییَه و دعا بِکَرَه که قدرت بِدارَه تا گِرد اِم چییون کا که هِم زودییون پیش بومَین، بِشایَه دَوَزَه و اِنسانی زوعَه حضوری کا بومونَه.»

37عیسی هَر روز معبدی کا تعلیم بَدای ولی هَر شَو شهری کا بِرون بَشی و زیتونَ کوه کا شَوی صِب آکَری. 38صِبَ دَم گِرد مردم عیسی گَفون دَرَسِه را بومین معبد چَیی وَر.

Currently Selected:

لوقا 21: ITB

Highlight

Copy