لوقا 20
20
عیسی اِختیارات
1ایی روز وختی که عیسی معبدی کا مردمی تعلیم بَدای و خِدا پاُتشایی شادَه خَوَری اَوون را اِعلام بَکَردی، سَران کاهِنِن و توراتی معلِمِن، شیخون همراه اومینَه چَیی وَر 2و واتِشونَه: «بَمون نَه بوآج، چِه حقّ و اِختیاری نَه اِم کارون بَکَردیش؟ کی اِم اِختیاری تِه آدوعَشه؟» 3عیسی جَواو دوشَه: «اَز نی شِمَه کا سوالی دَفَرسِم؛ مِنَه بوآجَه، 4غسل تعمیدی که یحیی بَدای خِدا طرفی کا بَه یا اِنسانی طرفی کا؟» 5اَوِن یندی نَه مشورت کَردِشونَه، واتِشونَه: «اَگم بوآجَم، ”خِدا طرفی کا بَه“، عیسی بَواتی، ”بَس چیرا اَیی ایمان نِوَردِرونَه؟“ 6اَگم بوآجَم، ”اِنسانی طرفی کا بَه“، گِرد مردم اَمَه سِنگسار بَکَردین، چوم اَوِن قانِع بَه اینَه که یحیی ایلَه پیغمبر بَه.» 7بَس واتِشونَه: «اَمَه نیمَزنَم چی کی طرفی کایَه.» 8عیسی اَوون نَه واتِشه: «اَز نی شِمَه نَه نِواجِم چِه حقّ و اِختیاری نَه اِم کارون بَکَردیم.»
شَرورَه باغَوونون مَثَّل
9عیسی مردمی را اِم مَثَّلی وَردِشه، واتِشه: «ایلَه مِردی ایلَه اَنگِرَه باغی وَج آکَردِشه و اِجاره دوشَه چَن گِله باغَوونون و اِشتَن وِرَه مدتی را شَه ایلَه دییَر مملیکتی را. 10اَنگِرَه چینی فصل که آرَستَه، باغَ صاحیب ایلَه نوکَر، ویسا آکَردِشه باغَوونون وَر تا تِلی باغی میوه کا بَیی آدَن. امّا باغَوونِن اَ نوکَری ژَندِشونَه و تِی یَه دَس ویسا آکَردِشونَه. 11باغَ صاحیب ایلَه دییَر نوکَری ویسا آکَردِشه. امّا باغَوونِن اَیی نی ژَندِشونَه و اَیی نَه بَد رفتاری کَردِشونَه و تِی یَه دَس ویسا آکَردِشونَه. 12بَس سِومّین کَرَه ایلَه نوکَری ویسا آکَردِشه. امّا اِم ایلَه نی زَخمی کَردِشونَه و بَرکَردِشونَه. 13بَس باغَ صاحیب واتِشه: ”چِه بِکَرِم؟ چِمِن عَزیزَه زوعَه ویسا آکَرِم؛ بَلکَم اَیی حرمت بِکَرِن.“ 14امّا وختی باغَوونِن زوعَه ویندِشونَه، یَندی نَه واتِشونَه: ”وارث اِمَه. بایَه اَیی بِکِشَم تا اِرث اَمَه آرَستِه.“ 15بَس اَ زوعَه اَنگِرَه باغی کا بَرکَردِشونَه و کِشتِشونَه.
«حِسَه باغَه صاحیب اَوون نَه چِه بَکَردی؟ 16باغَه صاحیب بومَی و اَ باغَوونون نابود بَکَردی و اَنگِرَه باغی دَسپارِه دییَر کَسون.» وختی مردم اِمی دَرَسِشونَه، واتِشونَه: «خِدا مَکَرِه!» 17امّا عیسی اَوون زول ژَندِشَه و واتِشه: «بَس مقدّس نیویشته اون اِم بخشی معنی چَه که بَواتی:
”اَ سِنگی كه بَنّا اِن اَیی رَدکَردِشونَه،
حِسَه بینا اَصلی یَه سِنگ بییَه“ ؟
18هَر کسی اَ سِنگی سَر بَرگِنِه خُرد بَبی، و وختی که اَ سِنگ کسی سَر بَرگِنِه، اَیی لِه بَکَردی.» 19توراتی معلِمِن و سَران کاهِنِن چِمی دومله بینَه که هَ ساعتی کا اَیی دَستگیر بِکَرِن چوم زونِستِشونَه که اَ مَثَّلی چَوون درباره بَواتی، امّا مردمی کا تَرسین.
اِمپراطوری خَراج آدوعِه
20بَس اَوِن عیسی زیر نظر گِتِشونَه و جاسوسونی ویسا آکَردِشونَه که اِشتَن صاف و صادِق نیشون بَداین تا عیسی گفون کا بهونه ای پیدا بِکَرِن، که عیسی بِکَشونِن فرمانداری مَحکمَه را. 21بَس جاسوسِن عیسی کا دَفرسِشونَه: «اُستاد، اَمَه بَزنیمون که تِه هر چیی که بَواتیش و تعلیم بَدایش دُرستَه و هیچ کسی کا طرفداری نِکَری، بَلکَم خِدا راه، درستی نَه تعلیم بَدایش. 22رومی اِمپِراطوری خَراج آدییِه شرعَن اَمَه را دُرستَه یا نِه؟» 23امّا عیسی چَوون حیلَّه زونِستِشه، و اَوون نَه واتِشه: 24«ایی دینار بَه مِن نیشون بِدییَه. چیکی دیم و چیکی نوم سکه سَری کایَه؟ اَوِن جَواو دوشونَه: «رومی اِمپِراطوری شِن.» 25عیسی اَوون نَه واتِشه: «بَس اَ چیونی که اِمپراطوری شِنَه آدییَه اِمپراطوری و اَ چیونی که خِدا شِنَه آدییَه خِدا!» 26اِنتَه، اَوِن نِشاستِشونَه که مردمی پیشی کا عیسی چَیی اِشتَن گفون نَه تَلَه کا دَرَفَنِن، بَلکَم هَتَه که چَیی جَواوی کا حَیرون بینَه، ساکیت مَندینَه.
سوال دَفَرسِه مَردَه اون زِندَه آبییِه درباره
27دومله چَن نفر صَدوقیون فِرقه عُلما کا اومینَه عیسی وَر. صَدوقییِن قبول نِدارین که مَردَه اِن زِندَه آبون. 28اَوِن عیسی کا سوالی دَفَرسِشونَه و واتِشونَه: «اُستاد، موسی پیغمبر اَمَه را نیویشتِشَه که اَگم ایلَه مِردی بِرا بِمِرِه، و اَ مَردَه ژِن بِدارِه امّا خِردَن مَدارِه، اَ مِرد بَسی اَ ویوَه ژِنی بِبَره که اِشتَن بِرا را نسلی بِنَه. 29حِسَه هفت گِله بِرا بینَه. اوّلین بِرا ایلَه ژِنی بَردِشه و بیدون اِم که خِردَنی بِدارِه مَردَه. 30دومله دوّمین بِرا 31و سوّمی بِرا اَ ژِنی بَردِشونَه و هِنتَه هَر هف گِله بِرا مَردی نَه، بی اِم که خِردَنی بِدارِن. 32آخِرسَر اَ ژِن نی مَردَه. 33حِسَه، روزی کا که مَردَه اِن زِندَه آبون، اَ ژِن چَوون کَمیله ژِن بَبی؟ چوم هَر هف گِله بِرا اَیی نَه اِزدواج کَردَشونَه.»
34عیسی اَوون نَه واتِشه: «اِم دنیا مردم ژِن بَبَردین و شو بَکَردین. 35امّا کَسونی که لایِقی نَه آرَستِن اَ دنیا و مَردَه پَش زِندَه آبون، نِه ژِن بَبَردین و نِه شو بَکَردین، 36چوم اَوِن دِ نیمَشان بِمِرن چوم که اَوِن مَلائیکه اون نَه بَرابری نَه. اَوِن خِدا خِردَنی نَه، چوم که قیامتی خِردَنی نَه. 37امّا اِم حقیقتی که مَردَه اِن زِنده آبون، چیی اِستَه که حتی موسی پیغمبر نی، وَش گِتَه بوته ماجرا تعریف کَردِه موقع، اَیی آشکار آکَرِه. اوآ کا که موسی، خِداوندی نَه، اِبراهیمی خِدا و اِسحاقی خِدا و یعقوبی خِدا بَواتی. 38خِدا، مَردَه اون خِدا نییَه، بَلکَم زِنده اون خِدایَه؛ چوم چَیی وَری کا گِرد، زِنده اینَه.» 39اَ موقع بعضی توراتی معلِمِن واتِشونَه: «اُستاد، چاک واتِرَه!» 40و دِ هیچکس جرئَت نِکَرِدِشه عیسی کا سؤالی دَفَرسی.
مَسیح موعود چیکی زوعَه یَه؟
41دومله عیسی اَوون نَه واتِشه: «چِنتَه یَه که بَواتین مسیح موعود داوود پاُتشا زوعَه یَه؟ 42چوم داوود اِشتَن، مزمورَه کیتابی کا بَواتی:
«”خِداوند چِمِن خِداوندی نَه واتِشه:
چِمِن راستَ دَسی کا بِنِش
43تا وختی که اِشتِه دِشمَنون اِشتِه پا جیری کا دَرفَنِم.“
44اَگم، داوود اَیی نَه ’خِداوند‘ بَواتی، بَس چِنتَه بَبی که مسیح داوودی زوعَه بِبو؟»
45هَتَه که مردم گِرد گوش بَداین، عیسی اِشتَن شاگِردون نَه واتِشه: 46«توراتی معلِمون کا دوری بَکَرَه، اَوِن خِشینَه که بِلَنده اَبا اون نَه راه بِشون. خِشینَه که مردم کوچه بازارون کا اَوون را سلام بِکَرِن و عِبادتگاه اون کا چاکترین جِگا اون بِدارِن و میهمونیون کا مِجلِسی کَفایی نَه سَری کا بِنِشن. 47اَوِن، ایی وَری نَه ویوه ژِنکون کَ اون غارت بَکَردین و اَ وَری نَه، اِشتَن چاک نیشون دوعِه واسی، طولانی دعا بَکَردین. چَوون مکافات بَرک چَتین تَر بَبی.»
Currently Selected:
لوقا 20: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
Free Reading Plans and Devotionals related to لوقا 20
The Book of Luke - ARISE
Holy Week
Salvation Has Come: 5 Devotions in Luke
