لوقا 19

عیسی و باجگیرَه زَکّای

1عیسی شَه اَریحا شهری دیلَه و شهری دیلَه نَه کارا دَوییَری. 2اوآکا ایلَه مِردی بَه که چَیی نوم زَکّا بَه، زکّا باجگیرون سَر دَسته بَه و پولدار بَه. 3اَ، پیستِشَه بِوینی عیسی کییَه، ولی چوم جماعت وِر بینَه نیمَشای عیسی بِوینی، چوم که زکّا پاچ بَه. 4بَس نارتَر ویریتَه و ایلَه چِنارَه داری کا پِشَه کَفا تا عیسی بِوینِه، چوم قرار بَه که عیسی اَ راه نَه دَوییَری. 5وختی عیسی آرَستَه اَ جِگا، کَفا دَیشتَه و اَیی نَه واتِشه: «زَکّا، بِمِج بِری جیر، چوم بَسی اوری اِشتِه کَ کا بومونِم.» 6بَس زَکّا اَلبَحَل اومَه جیر و شادی نَه عیسی بَردِشه اِشتَن کَ. 7وختی مردم اِمی ویندِشونَه، گِرد غُرغُر بَکَردین بَواتین: «عیسی شَه ایلَه گناه کاری کَ میهمونی.» 8زَکّا پِرِشتَه و عیسایِ خِداوندی نَه واتِشه: «آقا دَیِس، چِمِن دارایی نِصبی آدَم فَقیرون. و اَگم کسی کا چیی ناحَق ویگِتَمَه، چار برابر بَیی آگاردِنِم.» 9عیسی اَیی نَه واتِشه: «اوری نِجات اومَه بِه اِم کَ، چوم که اِم مِرد نی اِبراهیم پیغمبری اولادَه. 10چوم اِنسانی زوعَه اومَه تا ژون آبَه دومله بِگردِه و اَیی نِجات بِدَه.»

پاُتشا و دَه گِله نوکری مَثَّل

11هَتَه که اَوِن اِم گفون گوش بَداین، عیسی اِشتَن گفی دومله کا ایلَه مَثَّلی وَردِشه، چوم اورشلیمی نِزدیکی کا بَه و مردم خَیال بَکَردین خِدا پاُتشایی هَ موقع آشکار بَبی. 12بَس عیسی واتِشه: «ایلَه نَجیب زاده ای شَه دورَه مملِکتی را که اِشتَرا پاُتشایی مَقامی ویگِره و دومله آگَردِه. 13بَس دَه نفر اِشتَن نوکَرون کا دَخوندِشه و هَر نفری ایلَه طِلا سِکه آدوشَه که ایلَه کاریگری سِه مانگی دستمزد بَه و واتِشه: ”تا چِمِن آگَردِستِه موقع اِمی نَه کار بِکَرَه.“ 14امّا مردمی که قرار بَه اَوون سلطنت بِکَرِه، اَیی کا بیزار بینَه؛ مردم چَیی دومله قاصِدونی ویسا آکَردِشونَه که بوآجِن: ”اَمَه نِپیستِمونَه اِم مِرد چَمَه سَر حکومت بِکَرِه.“ 15وختی که اَ مِرد پاُتشایی مَقامی ویگِتِشه، آگَردِستَه و دستور دوشَه تا نوکَرونی که اَوون سِکه آدوعَش بَه دَخونِن تا بِوینِه که هَر کَمیله چَدَه سود کَردَشونَه. 16اَوّلی اومَه و واتِشه: ”آقا، اِشتِه سِکه دَه گِله سِکه دییَر سود کَردَشه.“ 17پاُتشا اَیی نَه واتِشه: ”اَحسَنت، اِی چاکَه نوکَر! چوم ایلَه روکَه کاری کا اَمانتدار بیش، دَه گِله شهری حکومتی بَه تِن دَسپارِم.“ 18دوّمی اومَه و واتِشه: ”آقا، اِشتِه سِکه پینج گِله دییَر سِکه سود کَردَشه.“ 19پاُتشا اَیی نَه نی واتِشه: ”تِه نی پینج گِله شهری حکمرانی بِکَه.“ 20دومله سومی اومَه و واتِشه: ”آقا، بفرما، اِم اِشتِه سِکه! اَیی دَسمالی کا دَپیچِستِمَه، غم هَردِمَه. 21چوم تِه کا تَرسیم، چوم که تِه سختگیرَه مِردی اِستیش. اَ چیی که نوعَه نیرَه، پِگِری و اَ چیی که کاشتَه نیرَه دِرو بَکَردیش.“ 22پاُتشا اَیی نَه واتِشه: ”اِی بَدکارَه نوکَر، تِه اِشتِه گفون نَه محکوم بَکَردیم. تِه که بَزنیش اَز سختگیرَه مِردی اِستیمَه، اَ چیی که نوعَه نیمَه، پِگِرِم و اَ چیی که کاشتَه نیمَه دِرو بَکَردیم، 23بَس چیرا چِمِن پولی صَرافون آدوعَه نیرَه که وختی آگَردِستیمَه، اَیی چَیی سودی نَه ویگِرِم؟“ 24بَس پاُتشا، کسونی نَه که اوآکا مَندَه بینَه، واتِشه: ”سِکه اَیی کا ویگِرَه و آدییَه اَ کسی که دَه گِله سِکه هِستِشه.“ 25اَوِن پاُتشا نَه واتِشونَه: ”آقا، اَ که دَه گِله سِکه هِستِشه!“ 26پاُتشا واتِشه: ”شِمَه نَه بَواتیم، هَر کسی هِستِشه، وِرتَر بَیی آدوعَه بَبی؛ امّا اَ کسی که نیشَه، حَتی اَ چیی که هِستِشه نی اَیی کا ویگِته بَبی. 27حِسَه چِمِن اَ دِشمَنِن که نِپیستِشونَه اَز اَوون سلطنت بِکَرِم، بواَرَه اییا و چِمِن پیشی کا سَر آبِرَه.“‌»

عیسی ایلَه شاهی شیوار دَشو اورشلیمی دیلَه

28وختی عیسی اِم چییون واتِشه، چَوون نارنارِه راه دَلَکَه اورشلیمی را. 29وختی عیسی، بیت فاجی و بِیت عَنیا دِه اون نِزدیک آبَه که زیتونَ کوه کا بینَه، دِ گِله اِشتَن شاگِردون کا ویسا آکَردِشه و واتِشه: 30«بِشَه اَ دِهی که شِمَه رو بَه رو کایَه. وختی دِه دیلَه دَشیرونَه، ایلَه اُلاغَ کُره ای اوآکا دَوَسته پیدا بَکَردیرون که حَلا کسی اَیی دَنِشتَه نییَه. اَیی آکَرَه و بواَرَه اییا. 31اَگم کسی شِمَه کا دَفَرسِشَه: ”چیرا اَیی آکَرَه؟“‌ بوآجَه: ”خِداوند اَیی لازِم دارِه.“‌» 32بَس اَ دِ نفر شینَه و همه چی هَتَه که عیسی واتَش بَه ویندِشونَه. 33وختی اُلاغَ کُره آکَرین، چَیی صاحِبِن اَوون نَه واتِشونَه: «چیرا اُلاغ کُره آکَرَه؟» 34اَوِن جَواو دوشونَه: «خِداوند اَیی لازِم دارِه.» 35اَوِن اُلاغَ کُره وَردِشونَه عیسی وَر، و اِشتَن اَبا اون اُلاغَ کُره سَری کا پِرَندِشونَه و عیسی نِشوندِشونَه چَیی سَری کا. 36هِنتَه که عیسی بَشی، مردم اِشتَن اَبا اون راه سَری کا جیکَرین. 37وختی عیسی زِیتونَ کوه سَرا جیری نِزدیک آبَه، چَیی شاگِردون جَماعت گِرد، شادی نَه گِردِ معجزه اونی را که اَیی کا ویندَشون بَه، بِلَندَه سَسی نَه خِدا شُکر بَکَردین، 38و بَواتین:

«مُتِوارَکَه پاُتشایی که خِداوندی نومی نَه بومَی!

صُلح و سلامتی آسِمونی کا و جلال عَرش بَرینی کا بِبو!»

39بعضی فریسیون کا جَماعتی دیلَه نَه عیسی نَه واتِشونَه: «اُستاد، اِشتِه شاگِردون را زِرَه بِگِه!» 40عیسی جَواو دوشَه: «شِمَه نَه بَواتیم اَگم اِمِن ساکیت آبون، اِم سِنگِن خِلِع بَکَردین!»

41وختی عیسی اورشلیمی نِزدیک آبَه و شهری ویندِشه، اَیی را داد کَردِشه 42و واتِشه: «کَشکی تِه نی، اِم روزی کا بِفهمیش که چِه چیونی بَه تِرا صُلح و سَلامتی بواَردین. امّا حِسَه اِشتِه چِمون کا نِینَه. 43چوم روزونی بومَین که اِشتِه دِشمَنِن اِشتِه دوری کا سَنگر وَج آکَرِن و تِه محاصره بَکَردین، و هَر طرفی نَه تِه فشار بواَردین، 44و تِه خاکی نَه یَکسان بَکَردین، تِه و اِشتِه خِردَنون اِشتِه دیلَه کا. اَوِن نییَرزِن سِنگی، سِنگی سَری کا بومونِه؛ چوم اَ موقعی که خِدا اِشتِه کمکی را اومَه نِفهمِسترَه.»

عیسی معبدی کا

45دومله عیسی شَه معبدی دیلَه و دَمَنده بازارمِجون بِرون بَرکَردِه، 46و اَوون نَه واتِشه: «مقدّس نیویشته اون کا نیویشته بییَه: ”چِمِن کَ عبادتی کَ بَبی،“ امّا شِمَه اَیی ’دِزدون لونَه‘ وَج آکَردَرونَه.» 47هر روز عیسی معبدی کا تعلیم بَدای. سَران کاهنِن و توراتی معلِمِن و قومی رئیسِن، چِمی دومله بینَه که عیسی نابود بِکَرِن، 48امّا کاری چَوون دَسی کا نِبَرای، چوم مردم گِرد عیسی گفون نَه وِر خِش بینَه.

Currently Selected:

لوقا 19: ITB

Highlight

Copy