لوقا 18

والِخَ ویوه ژِنی مَثَّل

1عیسی اِشتَن شاگِردون را ایلَه مَثَّلی وَردِشه که نیشون بِده بَسی هَمیشه دعا بِکَرِن و هرگز دیلسرد آمَبون. 2عیسی واتِشه: «ایلَه شهری کا ایلَه قاضی بَه که نِه خِدا کا تَرسی و نِه مردمی اَهمیت بَدای. 3هَ شهری کا ایلَه ویوه ژِنی بَه که هِی بومَی اَ قاضی وَر و بَواتی: ”چِمِن حَقی چِمِن دِشمِنی کا ویگِه“‌. 4قاضی چِندی وخت اَیی اِعتنا نِکَردِشه. امّا آخِر اِشتَن نَه واتِشه: ”هَر چَن که اَز نِه خِدا کا تَرسِم و نِه مردمی اَهمیت بَدایم، 5امّا چوم اِم ویوه ژِن مِن وازیدَه کَردَشَه، چَیی حَقّی ویگِرِم، تا اِشتَن اِم هِی اومِه شِه نَه مِن تور آمَکَرِه!“‌» 6اَ موقع عیسایِ خِداوند واتِشه: «دَرَسِرونَه اِم بی اِنصافه قاضی چِه واتِشه؟ 7حِسَه مَگم خِدا اِشتَن اِنتخاب کَردَه اون دادی آنِرسِه که شَو اَندَه روز اَیی دَخونِن؟ مَگم چَوون کمک کَردِه را عَری آکَرِه؟ 8شِمَه نَه بَواتیم که اَلبَحَل چَوون دادی آرَستِه. امّا وختی اِنسانی زوعَه بومَی، زمینی کا ایمانی کا اَثری پیدا بَکَردی؟»

فریسی و باجگیری مَثَّل

9اَ موقع عیسی کسونی را که اِشتَن صالِح بییِه کا خاطر جمع بینَه و بقیه تحقیر بَکَردین، اِم مَثَّلی وَردِشه و واتِشه: 10«دِ نفر شینَه مَعبد که دعا بِکَرِن، ایلَه فریسیون فِرقه عُلما کا بَه و اَ ایلَه باجگیر بَه. 11اَ فریسی مَندَه و اِشتَن نَه اِنتَه دعا کَردِشه و واتِشه: ”خِدایا، تِه شُکر بَکَردیم که دییَر مردمی شیوار دِزد نیمَه، بی اِنصاف نیمَه و زِناکار نیمَه، یا حتی اِم باجگیری شیوار نیمَه. 12هفته ای دِ کَرَه روزه گِرِم، و توراتی دَه یک آدییَه حکمی، هَر چیی را که بِه دَس بواَردیم، انجام بَدایم.“ 13امّا اَ باجگیر دور مَندَه بَه و حتی آسِمونی، نی نِدییَسی، بَلکَم اِشتَن سینه کویی و بَواتی: ”خِدایا، بَه مِن گناه کار رَحم بِکَه.“ 14شِمَه نَه بَواتیم که اِم مِرد صالِح حساب بَه و شَه اِشتَن کَ، نِه اَ فریسی. چوم هَر کسی که اِشتَن یال آکَرِه خار بَبی و هَر کسی که اِشتَن فروتن آکَرِه سَر بِلَند بَبی.»

عیسی خِردَنون را خِیره دعا بَکَردی

15مردم حتی تَرَه خِردَنون نی بواَردین عیسی وَر که اِشتَن دَسی پِنَه چَوون سَر. شاگِردِن وختی اِمی ویندِشونَه، مردمی را زِرَه گِتِشونَه. 16امّا عیسی اَوون دَخوندِشه اِشتَن وَر و واتِشه: «بِدارَه خِردَنِن بان چِمِن وَر؛ چَوون ناری مَگِرَه، چوم خِدا پاُتشایی اِنتَه رَه کَسونی شِنَه. 17حقیقتَن شِمَه نَه بَواتیم، هَر کسی خِدا پاُتشایی ایلَه خِردَنی شیوار قبول مَکَرِه، هرگز چَیی دیلَه نِدَشِو.»

پولدارَه رئیس

18یهودیون ایلَه رئیسون کا، عیسی کا دَفَرسِشه: «اِی چاکَه اُستاد، اَز بَسی چِه بِکَرِم تا اَبَدی یَه زندگی وارث بِبوم؟» 19عیسی اَیی نَه واتِشه: «چیرا مِنَه چاک بَواتیش؟ هیچ کس خِدا غِیراز چاک نییَه. 20اَحکامی بَزنیش: زِنا مَکَه، قَتل مَکَه، دِزدی مَکَه، دوروعَه شهادتی مَدَه، اِشتِه دَده و نَنه حُرمت بِکَه.» 21اَ مِرد جَواو دوشَه: «اَز جَوونی کا اِم کارون گِردی اَنجام دوعَمَه.» 22عیسی وختی اِمی دَرَسِشَه، اَ مِردی نَه واتِشه: «حَلا ایی چی کَم داری؛ هَر چِه هِستِره بِخرَش و چَیی پولی فَقیرون دیلَه کا تقسیم بِکَه، کِه آسِمونی کا گنج داری. دومله بِری و بَه مِن کا پِیرَوی بِکَه.» 23امّا وختی اَ مِرد اِم چییون دَرَسِشَه، وِر ناراحت آبَه، چوم وِر پولدار بَه. 24وختی عیسی ویندِشه اَ مِرد ناراحت آبَه واتِشه: «چِه چَتینَه پولدارِن دَشون خِدا پاُتشایی دیلَه! 25دَوَه دَوییَردِه دَرزِنی خِلَه کا راحتتَره تا اِم که ایلَه پولدارَه آدَمی، دَشو خِدا پاُتشایی دیلَه.»

26کسونی که اِمی دَرَسِشونَه، دَفَرسِشونَه: «بَس کی بَشای نجات پیدا بِکَرِه؟» 27امّا عیسی جَواو دوشَه: «اَ چیی که اِنسانی را غِیر مُمکِنَه، خِدا را مُمکِنه.»

28پطرس واتِشه: «دَیِس، اَمَه، چَمَه کَ وِل آکَردَمونَه و اومَیمونَه اِشتِه دومله!» 29عیسی اَوون نَه واتِشه: «حقیقتَن شِمَه نَه بَواتیم، هیچ کسی نییَه که خِدا پاُتشایی واسی، اِشتَن کَ کا و ژِنی کا یا اِشتَن بِرا اون کا یا اِشتَن دَده نَنه کا یا اِشتَن خِردَنون کا دَس پِگِرِه، 30و اِم دنیا کا چِندی برابر بِه دَس مَوَرِه و اَ دنیا کا نی اَبَدی یَه زندگی بَه دَس مَوَرِه.»

عیسی سِومین پیشگویی، اِشتَنِش مَرگ و زِندَه آبییِه درباره

31عیسی اِشتَن دونزَه گِله شاگِردی بَردِشه کناری را و اَوون نَه واتِشه: «دَیِسه، اَمَه کارا بَشیمون اورشلیم. اوآکا هر چیی که پیغَمبَرِن، اِنسانی زوعَه درباره، نیویشتَشونَه اِتِفاق دَلَکِه. 32چوم اِنسانی زوعَه آدَن اَجنَبیون دَس. اَوِن اَیی مَسخره بَکَردین و اَیی نَه بَدرفتاری بَکَردین و چَیی سَری کا چاف ویکَرِن، 33و شِلاق ژَندِه پَش اَیی کِشِن و اَ، سِوّمین روزی کا زِنده آبو.» 34امّا شاگِردِن هیچ گِله اِم چییون درک نِکَردِشونَه. عیسی گفی مَعنی اَوون کا نِین بَه و نِزونیشونَه عیسی چِه چی درباره گَف ژَنِه.

کورَه گَدایی شَفا

35وختی عیسی آرَستَه اَریحا شَهری نِزدیکی، ایلَه کورَه مِردی راه کَناری کا نِشت بَه و گَدایی بَکَردی. 36وختی اَ جماعتی سَسی دَرَسِشَه که اوآکا دَوییَرِن، «دَفَرسِشه که چِه خَوَره؟» 37اَیی نَه واتِشونَه: «عیسای ناصری کارا دَوییَره.» 38اَ کورَه مِرد خِلِع ژَندِشَه: «اِی عیسی، داوود پاُتشا زوعَه، بَه مِن رَحم بِکَه!» 39کسونی که جماعتی ناری کا بینَه، اَیی را زِرَه گِتِشونَه و اَیی نَه واتِشونَه که ساکت آبو. امّا اَ کورَه مِرد وِرتَر خِلِع بَکَردی، بَواتی: «اِی داوود پاُتشا زوعَه، بَه مِن رَحم بِکَه!» 40عیسی مَندَه و دَستور دوشَه اَ مِردی بواَرِن چَیی وَر. وختی اومَه نِزدیک، عیسی بَیی کا دَفَرسِشه: 41«پیستِره بَه تِرا چِه بِکَرِم؟» اَ مِرد جَواو دوشَه: «آقا، پیستِمه هَنی بِوینِم.» 42عیسی اَیی نَه واتِشه: «بِوین! اِشتِه ایمان تِه شَفا دوعَشَه.» 43هَ لحظه اَ کوری چِمِن هَنی سو اومینَه و هَتَه کِه خِدا شُکر بَکَردی، شَه عیسی دومله. وختی مردم اِمی ویندِشونَه گِرد، خِدا شُکر کَردِشونَه.

Currently Selected:

لوقا 18: ITB

Highlight

Copy