لوقا 17
17
بَخشِش، ایمان، وظیفَه
1عیسی اِشتَن شاگِردون نَه واتِشه: «اِم وسوسه که اِنسان گناه بِکَرِه حتمن بومَی، امّا وای بِه حال اَ کسی که وسوسه چَیی واسطه نَه بومَی. 2اَیی را چاکتَر بَه که ایلَه آسیا سِنگی چَیی گردنی کا دَوَسِن و اَیی دریا کا دَرَفَنِن تا اِم که باعیث بِبو ایلَه اِم روکون کا گناه بِکَرِن. 3شِمَه، اِشتَن ویرا بِبییَه. اَگم اِشتِه بِرا گناه بِکَرِه اَیی را زِرَه بِگِه، و اَگم توبه کَردِشه، اَیی بِبَخش. 4اَگم ایی روزی کا هف کَرَه اِشتِه حقی کا گناه بِکَرِه، و هف کَرَه با اِشتِه وَر و بوآجِه ”توبه بَکَردیم،“ تِه بَسی اَیی بِبَخشی.»
5رسولِن عیسایِ خِداوندی نَه واتِشونَه: «چَمَه ایمانی وِر آکَه!» 6عیسایِ خِداوند جَواو دوشَه: «اَگم ایلَه روکَه خَردَل دونه ای قَدر ایمان بِداریرون، بَشایرون اِم تویَه داری نَه بوآجَه: ”بِنَه کا بَرا و دریا کا کاشتَه بِبو“، و دار شِمَه کا اِطاعت بَکَردی.
7«کییَه شِمَه کا که ایلَه نوکَری بِدارِه که زمینی شوم ژَنه یا گوسَندون بَبَردی بِچارنِه و وختی اَ نوکَر زمینی سَری کا آگَردِه، اَیی نَه بوآجِه: ”اَلبَحَل بِری، بِنِش سِفرَه سَری کا“؟ 8مَگم اَیی نَه، نِواجِه: ”چِمِن سوری حاضیر آکَه، اِشتِه کَمَری دَوِند و مِن خدمت بِکَه تا بَرِم و بِنجِم، دومله تِه بَه و بِنج“؟ 9مَگم اَ نوکَری کا اِمی واسی که چَیی دَستورون اَنجام دوعَشَه تشکر بَکَردی؟ 10بَس، شِمَه نی وختی گِرد دَستورونی که شِمَه دوعَه بییَه، اَنجام دورونَه، بوآجَه: ”اَمَه ناچیزه نوکَریمونَه. فقط چَمَه وظیفه اَنجام دوعَمونَه.“»
دَه گِله جذامی شَفا
11عیسی اورشلیمی راه کا، سامِرَه منطقه و جَلیلی ولایتی مرزی میانه کا کارا دوییَری. 12وختی دَشی ایلَه دِهی دیلَه، دَه گِله جُذامی ویندِشه که دور مَندَه بینَه. 13اَوِن بِلندَه سَسی نَه واتِشونَه: «عیسی، اِی اُستاد، بَمون رحم بِکَه!» 14وختی عیسی اَوون ویندِشه، واتِشه: «بِشَه و اِشتَن کاهنی نِشون بِدییَه.» اَوِن هَتَه که کارا بَشین جُذامی کا شفا گِتِشونَه. 15ایلَه اَوون کا وختی ویندِشه شَفا گِتَشه، هَتَه که بِلندَه سَسی نَه خِدا پرستش بَکَردی، آگَردِستَه 16و عیسی پا دَلَکه و اَیی کا تشکر كَردِشه. اَ جُذامی سامِری بَه. 17عیسی واتِشه: «مَگم کسونی که شفا گِتِشونَه دَه نفر نِبینَه؟ بَس اَ نِه نفر کییاری نَه؟ 18اِم خَلکی غیراز، کَسی نِبَه که آگَردِه و خِدا ستایِش بِکَرِه؟» 19دومله عیسی اَ مِردی نَه واتِشه: «پِرِز و بِش، اِشتِه ایمان تِه شَفا دوعَشَه.»
خِدا پاُتشایی اومِه
20فریسیون فِرقه عُلما عیسی کا دَفَرسِشونَه که خِدا پاُتشایی کَینی بومَی. عیسی چوون جَواوی کا واتِشه: «خِدا پاُتشایی اومِه جوری نییَه که بِبو اَیی ویندِه، 21و کسی نِواجِه، ”دَیِس اَ اییا کایَه“ یا ”اوآکایَه“، چوم خِدا پاُتشایی شِمَه دیلَه کایَه.»
22دومله عیسی، شاگِردون نَه واتِشه: «روزونی بومَی که شِمَه آرزو بَکَردیرون که اِنسانی زوعَه ایی روز بِوینَه، امّا نِوینَه. 23مردم شِمَه نَه بَواتین: ”دَیِس اَ اییا کایَه“، یا ”دَیِس اَ اوآ کایَه.“ شِمَه مَشییَه و اَوون کا پِیروی مَکَرَه. 24چوم هَتَه که گِرخونَه شفق ژَنِه و آسِمونی اِنسَر تا اَ سَری روشون آکَرِه، اِنسانی زوعَه نی اِشتَن روزی کا هَتَه بَبی. 25امّا اَ اوّل بَسی وِر رَنج و عذاب بِکَشه و اِم نَسلی مردم اَیی رَد آکَرِن . 26اِنسانی زوعَه دورَه، نوح پیغمبری دورَه شیوار بَبی. 27مردم، هَرین و هِنجین، ژِن بَبَردین و شو بَکَردین تا اَ روزی که نوح دَشَه کَشتی دیلَه. اَ موقع سیل اومَه اَوون گِردی نابود کَردِشه. 28لوطی دورَه کا نی هَتَه بَه. مردم هَرین و هِنجین، خرید و فروش بَکَردین، کِشت و کار بَکَردین و کَ وَج آکَرین. 29امّا اَ روزی که لوط سُدومی شهری کا بِرون اومَه، آتش و گوگِرد آسِمونی نَه بَوارِستی و اَوون گِردی نابود کَردِشه. 30روزی که اِنسانی زوعَه ظهور بِکَرِه نی هِنتَه بَبی. 31اَ روزی کا، کسی که اِشتَن کَ بومی سَری کایَه و چَیی اَساس کَ دیلَه کا، اَساسون پِگِته را ما جیر. و اَ کسی که مزرعه کایَه نی آمَگردِه کَ. 32لوطی ژِنی ویر بواَرَه! 33هَر کسی پیستِشَه اِشتَن جانی حفظ بِکَرِه، اَیی اَز دَس بَدای، امّا هَر کسی اِشتَن جانی فیدا بِکَره، اَیی غَم بَردی. 34شِمَه نَه بَواتیم، اَ شَوی کا دِ نفری کا که ایلَه جِگا کا خِتینه، ایی نَفری بَبَردین و اَ ایلَه بَمَندی. 35و دِ گِله ژِنی کا که یَندی نَه دَس آسیا بَکَردین، ایلَه بَبَردین و اَ ایلَه بَمَندی. 36دِ گِله مِردی کا که مزرعه کا اینَه، ایی نَفری بَبَردین و اَ ایلَه بَمَندی.»
37شاگِردِن عیسی کا دَفَرسِشونَه: «کییا کا، اِی آقا؟» عیسی واتِشه: «هَر جِگا کا که لاشه ای بِبو، لاشخورِن اوآکا جَمع آبون.»
Currently Selected:
لوقا 17: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
