لوقا 16
16
حُقَه بازَه مِتِری مَثَّل
1هِنته نی عیسی اِشتَن شاگِردون نَه واتِشه: «ایلَه پولدارَه مِردی ایلَه مِتِریشی اِستبَه. اَ مِردی را خَوَر آرَستَه که اَ مِتِر چَیی اَموالی بِه وا بَدای. 2مِتِری دَخوندِشه و اَیی کا دَفرسِشه: ”اِم گفِن چیی نَه که اِشتِه درباره دَرَسِم؟ اِشتِه حسابون پَس آدَه که دِ نیمَشای چِمِن مِتِر بِبی.“
3اَ مِتِر اِشتَن نَه فیکر کَردِشه: ”حِسَه که چِمِن اَرباب پیستِشه مِن کاری کا بَرکنار بِکَرِه از چِه بِکَرِم؟ اَز که نِه تاو هِستِمَه خیلیک بِژنِم و گَدایی کا نی عار هِستِمَه. 4ها، بَزنیم چِه بِکَرِم که وختی مِن مِتِر بییِه کا بَركِنار بِکَرِه، کسونی بِبون که مِن اِشتَن کَ اون کا راه بِدَن.“ 5بَس، کسونی که چَیی اَربابی قرضدار بینَه گِلَه بِه گِلَه دَخوندِشه. اَوّلی کا دَفَرسِشه: ”چِمِن اَربابی چَدَه قرض داریش؟“ 6اَ جَواو دوشَه: ”صَد گِله خُمرَه زِیتونَ روئَن.“ مِتِر واتِشه: ”اِشتِه صورت حسابی ویگِه، و اَلبَحَل بِنِش و بینیویس، پینجا خُمرَه!“ 7دومله مِتِر اَ ایلَه کا دَفَرسِشه: ”تِه چَدَه قرض داریش؟“ اَ واتِشه: ”صَد خَروار گَندِم.“ مِتِر اَیی نَه واتِشه: ”اِشتِه صورت حسابی ویگِه و بینیویس هَشتاد خَروار!“
8ارباب، حُقَه بازَه مِتِری عقلمَندی کا تعریف کَردِشه؛ چوم که بی ایمان مردم اِشتَن رابِطه و کارون کا خَلکی نَه، خِدا شِناس آدَمون کا عقلمَندتَری نَه. 9شِمَه نَه بَواتیم اِم فاسدَه دنیا مالی، رَفِقون پَیدا کَرده را مصرف بِکَرَه که وختی شِمَه مال تَمون آبَه، شِمَه اَبَدی یَه کَ اون کا راه بِدَن.
10«کسی که وِرَه روکَه کارون کا اَمانتدار بِبو، یالَه کارون کا نی امّانتدار بَبی، و کسی که وِرَه روکَه کارون کا امّانتدار مَبو، یالَه کارون کا نی اَمانتدار نییَب. 11بَس اَگم شِمَه اِم فاسدَه دنیا مالی کا امّانتدار مَبییَه، کی اَ حَقیقی یَه ثِروَتی دَسپارِه شِمَه؟ 12و اَگم شِمَه خَلکی مالی کا اَمانتدار مَبییَه، کی شِمَه اِشتَن مالی آدَه شِمَه؟ 13هیچ نوکَری نیمَشا دِ گِله اَربابی خدمت بِکَرِه، چوم یا ایلَه کا متنفر بَبی و اَ ایلَه نَه خِش بَبی، یا ایلَه دیل دَوِندِه و اَ ایلَه خار و خفیف بَزنی. شِمَه نیمَشایه هم خِدا خدمت بِکَرَه و هم پولی خدمت بِکَرَه.»
14فریسییِن که پولدوست بینَه، وختی گِردِه اِم گَفون دَرَسِشونَه، عیسی ریشخَند کَردِشونَه. 15عیسی اَوون نَه واتِشه: «شِمَه کسونی اِستیرونَه که مردمی وَری کا اِشتَن درستکار نیشون بَدایرون، امّا خِدا شِمَه دیلی کا خَوَرِش اِستَه. چوم اَ چیی که مردمی نَظری کا وِر اِرزِش هِستِشه، خِدا نظری کا مِردالَه چییَه!
16«تا یحیی دوران، تورات و پیغمبرون نیویشته اِن شِمَه راهنما بینَه. چَیی پَش خِدا پاُتشایی شادَه خَوَر اِعلام بَبی و گِرد پیستِشونَه زوری نَه دَشون چَیی دیلَه. 17امّا راحتتَره آسِمون و زمین اَز بِین بِشون تا اِم که ایلَه نقطه ای توراتی کا بی اعتبار بِبو!
18«هَر کسی اِشتَن ژِنی طلاق بِدَه و دییَر ژِنی بِبَره، زِنا کَردَشه، و هَر کسی نی طلاق ویگِته ژِنی بِبَره، زنا کَردَشه.
پولدارَه مِرد و فقیرَه ایلعازر
19«ایلَه پولدارَه مِردی بَه که گِرونه اَرغَوانی یَه خَلا، نَرمَه کتانه پارچه کا دَکَری و هَر روز خوشگذرونی نَه زِندگی بَکَردی. 20چَیی کَ، بَری پیشی کا، ایلَه فقیرَه مِردی خِسی که چَیی نومِ ایلعازَر بَه و چَیی جان گِرد زخمی بَه. 21ایلعازَر آرزو داری که اَ پولدارَه مِردی سِفره پس مَندَه چیون نَه اِشتَن اِشکَمی سیر آکَرِه. حَتی اِسبه اِن نی بومَین و چَیی زَخمون آلیسین. 22اَ فقیر، مَردَه و مَلائیکه اِن اَیی بَردِشونَه اِبراهیم پیغمبری وَر. اَ پولدارَه مِرد نی مَردَه و اَیی دَفن کَردِشونَه. 23اَ پولدارَه مِرد هَتَه که جَهندمی تونی کا کارا عذاب کَشی، دَیشتَه و دوری نَه اِبراهیم پیغمبری ویندِشه و ایلعازَری نی ویندِشه که اِبراهیمی وَری کا بَه. 24بَس بِلندَه سَسی نَه واتِشه: ”اِی دَده اِبراهیم، بَه مِن رَحم بِکَه. ایلعازَری ویسا آکَه که اِشتَن اَنگِشتی تِکی آوی کا بِژَنه و چِمِن زوونی خُنک آکَرِه، چوم اَز اِم آتشی دیلَه کا کارا عَذاب کَشِم.“ 25امّا اِبراهیم پیغمبر بَیی نَه واتِشه: ”بَلَه، ویر بوعَه که تِه وختی زِنده بیش، چاکَ چییِن اِشتِه نصیب بینَه و بَدَه چییِن ایلعازَری نصیب بینَه. امّا حِسَه اَ اییا کا آسایِشی کایَه و تِه عَذابی کا ایش. 26چِمی غِیراز، چَمَه و شِمَه میانه کا ایلَه یالَه پرتگاهی یَه؛ تا کسونی که پیستِشونَه اییانَه بان شِمَه وَر مَشان، و کسونی که اوآکا اینَه نی مَشان بان چَمَه وَر.“ 27اَ پولدارَه مِرد جَواو دوشَه: ”بَس اِی دَده، تِه مِنَّت بَکَردیم ایلعازَری ویسا آکَه چِمِن دَده کَ، 28چوم از پینج گِله بِرا هِستِمَه. اَیی ویسا آکَه تا چِمِن بِرا اون هشدار بِدَه، نَبادا اَوِن نی بان اِم عَذابَ جِگا.“ 29امّا اِبراهیم واتِشه: ”اَوِن موسی تورات و پیغمبرون نیویشته اون هِستِشونَه، چَوون گَفی گوش آکَرِن.“ 30اَ مِرد واتِشه: ”نِه، اِی دَده اِبراهیم، بَلکَم اَگم مَردَه اون وَری نَه ایی نفر بِشو چَوون وَر، اَوِن توبه بَکَردین.“ 31اِبراهیم جَواو دوشَه: ”اَگم اَوِن موسی و پیغمبرون گَفی گوش مَدَن، حَتی اَگم کسی مَردَه پَش نی زِنده آبو، اَوِن قانع نِبون.“»
Currently Selected:
لوقا 16: ITB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
