لوقا 15

ژون آبَه گوسَندی مَثَّل

1باجگیرِن و گناهکارِن گِرد بومَین عیسی وَر تا چَیی گَفون دَرَسِن. 2فریسی فِرقه عُلما و توراتی معلِمِن غُرغُر بَکَردین، بَواتین: «اِم مِرد گناهکارون قبول بَکَردی و اَوون نَه غذا بَردی.» 3بَس عیسی اِم مَثَّلی اَوون را وَردِشه و واتِشه: 4«اَگم ایی نفر شِمَه کا صَد گِله گوسَند بِدارِه و ایلَه اَوون کا ژون آکَرِه، بَگم اَ نود و نِه گِله گوسَندی دَشتی کا نییَرزه و اَ، ایلَه ژون آبَه گوسَندی دومله نِشو تا اَیی بِتلَفه؟ 5و وختی اَ ژون آبَه گوسندی بِتلَفه، اَیی کَلَندوش بَگتی و شادی بَکَردی. 6وختی بومَی کَ، اِشتَن رَفِقون و خَمسوعه اون جَمع آکَرِه و بَواتی: ”مِنَه شادی بِکَرَه، چوم چِمِن ژون آبَه گوسَندی تِلَفتَمه.“ 7شِمَه نَه بَواتیم، هَتَه نی، ایلَه گناهکاری واسی که توبه بَکَردی، آسِمونی کا وِرتَر شادی برپا بَبی تا نود و نِه گِله صالِح آدَمی واسی که توبه لازِم نیشونَه.

ژون آبَه سِکه مَثَّل

8«و یا اَگم ایلَه ژِنی دَه گِله نقره سِکه بِدارِه و ایلَه اَ سِکه اون کا ژون آکَرِه، بَگم ایلَه چِرایی روشون آنِکَرِه و کَ گِزِه نِژَنِه و تا وختی که اَیی مَتلَفه دِقّتی نَه چَیی دومله نِگَردِه؟ 9وختی اَیی تلَفتِشه، اِشتَن رَفِقون و خَمسوعه اون جمع آکَرِه و بَواتی: ”مِنَه شادی بِکَرِه، چوم چِمِن ژون آبَه سِکه تِلَفتَمه.“ 10شِمَه نَه بَواتیم، هَتَه نی، ایلَه گناهکاری توبه کَردِه را، خِدا ملائیکه اون دیلَه کا، شادی بَرپا بَبی.»

ژون آبَه زوعَه مَثَّل

11دومله عیسی واتِشه: «ایلَه مِردی بَه که دِ گِله زوعَه اَش اِستبَه. 12روکَه زوعَه اِشتَن دَده نَه واتِشه: ”دَده، چِمِن سهمی که اِشتِه اَموالی کا بَه مِن آرَستِه، حِسَه بَه مِن آدَه.“ بَس دَده اِشتَن اَموالی اَ دِ گِله زوعَه میانه کا تَقسیم كَردِشه. 13چَن روزه پَش، روکَه زوعَه هَر چِه که داری جمع آکَردِشه و ایلَه دورَه مَملکتی را رایی بَه و اوآکا اِشتَن دارایی عَیاشی نَه بِه وا دوشَه. 14وختی هر چیی که داری خرج كَردِشه، بَرکَه قحطی اَ مَملکتی گِتِشه و اَ زوعَه تِییَه دَس آبَه. 15بَس زوعَه شَه و اَ مملیکتی ایلَه آدَمون نوکَر بَه. اَ آدَم اَیی ویسا آکَردِشه اِشتَن زمینی سَر تا خو اون غذا بِدَه. 16زوعَه ناجَش اِستبَه که اِشتَن اِشکَمی خو اون غذا نَه سیر آکَرِه، ولی هیچکس بَیی چیی آنِدَی. 17ولی وختی سَرحساب بَه واتِشه: ”چِمِن دَده کاریگرِن، چَدَه اِضافی یَه غذا نی هِستِشونَه، ولی اَز اییا کا کارا وِشیی بَمَردیم. 18پِرِزم و بَشیم چِمِن دَده وَر و اَیی نَه بَواتیم: ’دَده، اَز خِدا حقّی کا و اِشتِه حقّی کا گناه کَردِمَه. 19دِ لایِق نیمَه که مِنَه اِشتِه زوعَه بوآجِن. مِنَه اِشتِه ایلَه کاریگرون شیوار رَفتار بِکَه.‘“ 20بَس پِرِشته و دَده کَ را رایی بَه. امّا حَلا دور بَه که چَیی دَده اَیی ویندِشه و دیلِش اَیی را سیستَه. دَده ویریتَه، اَیی کَشَه آگِتِشه و ماچ کَردِشه. 21زوعَه واتِشه: ”دَده، اَز خِدا حقّی کا و اِشتِه حقّی کا گناه کَردَمه. دِ لایِق نیمَه که مِنَه اِشتِه زوعَه بوآجِن.“ 22امّا دَده اِشتَن نوکَرون نَه واتِشه: ”بِتیلَه! چاکتَرین خَلا بواَرَه و بَیی دَکَرَه. چَیی اَنگِشتی کا اَنگِشتر دَکَرَه و چَیی پااون کا کفش دَکَرَه. 23ایلَه کوکَه موندَه ایی بوعَرَه و سَرآبِرَه تا بَرَم و جَشن بِگِرم. 24چوم چِمِن اِم زوعَه مَردَه بَه، هَنی زِنده آبَه؛ ژون آبَه بَه، پیدا بَه!“ بَس دَمَندینَه شادی کَردِه.

25اَ موقع یالَه زوعَه مزرعه کا بَه. وختی اومَه و کَ نِزدیک آبَه دَرَسِشَه که آواز خونِن و وَشتَن بَکَردین. 26ایلَه نوکَرون کا دَخوندِشه و دَفَرسِشه که چِه خَورَه. 27نوکَر بَیی نَه واتِشه: ”اِشتِه بِرا اومَه و اِشتِه دَده چوم اَیی سَق و سلامت ویندِشه، اِمی واسی ایلَه کوکَه موندَه ای سَر آبِردَشه.“ 28امّا یالَه زوعَه عصبانی آبَه و نِپیستِشه با کَ دیلَه. چَیی دَده اومَه بِرون و بَیی مِنَّت کَردِشه. 29امّا یالَه زوعَه اِشتَن دَده جَواوی کا واتِشه: ”دَیِس، وِرَه سالونی یَه که اَز اِشتِه نوکَری کَردَمه و هرگز اِشتِه دَستورون کا سَرپیچی کَردَه نیمَه. امّا تِه هَرگز حتی ایلَه بِزَّه وَچَه نی مِن آدوعَه نیرَه تا چِمِن رَفِقون نَه جَشن بِگِرِم. 30امّا حِسَه که اِشتِه اِم زوعَه اومَه، اَ زوعَه ای که اِشتِه ثِروَتی فاییشه اون نَه بِه وا دوعَشَه، تِه اَیی را ایلَه کوکَه موندَه ایی سَر آبِردَرَه!“ 31دَده اَیی نَه واتِشه: ”زوعَه، تِه همیشه مِنَه ایش، و اَز هَر چیی که هِستِمَه اِشتِه شِنَه. 32امّا حِسَه اَمَه بَسی جَشن بِگِرَم و شادی بِکَرَم، چوم اِشتِه اِم بِرا مَردَه بَه، زِنده آبَه؛ ژون آبَه بَه، پیدا بَه!“»

Currently Selected:

لوقا 15: ITB

Highlight

Copy