یوحنا 15

اَز حقیقی یَه اَنگِرَه رَزیمَه

1«اَز حقیقی یَه اَنگِرَه رَزیمَه و چِمِن دَده باغَوونَه. 2هَر لاخه ای که مِن کا میوه مَدَه، چِمِن دَده اَیی دَوِرِه، و هَر لاخه ای که میوه بواَرِه، اَیی هَرَس بَکَردی تا وِرتَر میوه بواَرِه. 3شِمَه حِسَه اَ کلامی واسی که شِمَه نَه واتَمه، پاکی رونَه. 4بَه مِن کا بومونَه، و اَز نی شِمَه نَه بَمَندیم. هَتَه که لاخه نیمَشا اِشتَن کا میوه بواَرِه اَگم اَنگِرَه رَزی کا مَمونِه، شِمَه نی نیمَشایَه میوه بواَرَه اَگم مِنَه مَمونَه.

5«اَز اَنگِرَه رَزیمَه و شِمَه لاخه اِن. کسی که مِنَه بَمَندی و اَز اَیی نَه، اَ هَ کسی اِستَه که وِرَه میوه بواَردی؛ چوم بَه مِن کا جِدا، شِمَه نیمَشایَه هیچ کاری بِکَرَه. 6اَگم کسی مِنَه مَمونِه، ایلَه لاخه ای شیوارَه که اَیی فِر آدَن و خِشک آبو. خِشک لاخه اون جَمع آکَرِن و آتشی دیلَه کا دَرَفنِن، سونِن. 7اَگَم مِنَه بومونَه و چِمِن کلام شِمَه نَه بومونِه، هَر چِه پیستِرونَه، بِپییَه و شِمَه را اَنجام بَبی. 8چِمِن دَده شکوه و جلال اِنتَه آشکار بَبی که شِمَه میوه وِر بواَرَه؛ و اِنتَه ثابت بَکَردیرون چِمِن شاگِردیرونَه.

9هَتَه که دَده مِنَه خِش بَه، اَز نی شِمَه نَه خِش بیمَه؛ چِمِن محبتی کا بومونَه. 10اَگَم چِمِن اَحکامی اَنجام بِدییَه، چِمِن محبتی کا بَمَندیرون؛ هَتَه که اَز چِمِن دَده اَحکامی اَنجام دوعَمَه و چَیی محبتی کا بَمَندیم. 11اِم گَفون شِمَه نَه واتِمَه تا چِمِن شادی شِمَه کا بِبو و شِمَه شادی کامل آبو.

12« چِمِن حُکم اِمَه که یَندی نَه خِش بِبییَه، هَتَه که اَز شِمَه نَه خِش بیمَه. 13محبتی اِمی کا وِرتَر نییَه که ایی نفر اِشتَن جانی اِشتَن رَفِقون را فیدا بِکَرِه. 14شِمَه چِمِن رَفِقیرونَه، اَگم چیی که شِمَه را حُکم بَکَردیم، اَنجام بِدییَه. 15دِ شِمَه نَه نوکَر نِواجِم، چوم نوکَر اِشتَن اَربابی کارون کا خَوَر نیشَه. بَلکَم شِمَه نَه چِمِن رَفِق بَواتیم، چوم هَر چیی دَده کا دَرَسَمه، شِمَه اَیی کا خَوَردار کَردَمه. 16شِمَه مِن اِنتخاب کَردَه نیرونَه، بَلکَم اَز شِمَه اِنتخاب کَردَمه و تعیین کَردَمه تا بِشَه و میوه بواَرَه و شِمَه میوه بومونِه، تا هَر چیی دَده کا چِمِن نومی نَه بِپییَه آدَه شِمَه. 17اَز اِم چییون شِمَه را حُکم بَکَردیم تا یَندی نَه خِش بِبییَه.

دنیا نفرت

18«اَگم دنیا شِمَه کا بیزارَه، بِزونَه که شِمَه کا پیشتر بَه مِن کا بیزار بینَه. 19اَگم دنیا شِن بَبیرون، دنیا شِمَه نَه اِشتَن کسون شیوار خِش بَبی. امّا چوم دنیا شِن نیرونَه بَلکَم اَز شِمَه دنیا کا اِنتخاب کَردَمه، دنیا شِمَه کا بیزارَه. 20کلامی که شِمَه نَه واتَمه، ویرِرون بِبو: ” نوکَر اِشتَن اَربابی کا یالتَر نی.“ اَگم مِن اذیت کَردِشونَه، شِمَه نی اَذیت بَکَردین؛ اَگم چِمِن کلامی اَنجام دوشونَه، شِمَه کلامی نی اَنجام بَداین. 21امّا اِم چییون گِردی چِمِن نومی واسی شِمَه نَه بَکَردین، چوم کسی که مِن ویسا آکَردَشَه آنِزونِن. 22اَگم اومَه نِبیمَه و اَوون نَه گَفِم ژَندَه نِبَه، گناهی نِدارین؛ امّا حِسَه دِ مونَه ایی اِشتَن گناه را نیشونَه. 23کسی که بَه مِن کا بیزارَه، چِمِن دَده کا نی بیزارَه. 24اَگم چَوون دیلَه کا کارونی کَردم نِبَه که هیچکس چِمِن غَیراز کَردش نی، گناهی نِدارین؛ امّا حِسَه، با اِم که اَ کارون ویندَشونَه، هَم مِن کا و هَم چِمِن دَده کا بیزاری نَه. 25امّا کلامی که چَوون توراتی کا نیویشته بییَه بَسی اِتِفاق دَلَکِه که واتَه بییَه: ”بیخودی بَه مِن کا بیزاری نَه.“

26«امّا وختی اَ یاور که دَده وَری کا شِمَه را ویسا آکَرِم بومَی، یعنی هَ روح حقیقت که دَده وَری کا بومَی، اَ چِمِن درباره شهادتی بَدای. 27و شِمَه نی شهادتی بَدایرون، چوم که صِفته نَه مِنَه مَند بیرونَه.

Currently Selected:

یوحنا 15: ITB

Highlight

Copy