یوحنا 14

اَز راه و حقیقت و زندگی اِستیمَه

1عیسی واتِشه: «شِمَه دیل پریشون مَبو. بِه خِدا ایمان بِدارَه؛ بَه مِن نی ایمان بِدارَه. 2چِمِن دَده کَ کا اتاق وِر اِستَه. اَگم اِنتَه مَبی مَگم شِمَه نَه بَواتیم که اَز بَشیم تا شِمَه را جِگایی حاضیر آکَرِم؟ 3و اَ موقع که شیمَه و جِگایی شِمَه را حاضیر آکَردِمَه، هَنی بومَیم و شِمَه بَبَردیم چِمِن وَر، تا اوآ کا که اَز مَندیمَه شِمَه نی بِبییَه. 4جِگایی که اَز بَشیم شِمَه چَیی راه بَزنیرون.» 5توما عیسی نَه واتِشه: «آقا، اَمَه نیمَزنَم تِه کییا کارا بَشیش، بَس چِنتَه بَشایمون راه بِزونم؟» 6عیسی اَیی نَه واتِشه: «اَز راه و حقیقت و زندگی اِستیمَه؛ هیچکس نیمَشا بِشو آسِمونی یَه دَده وَر مَگم چِمِن واسطه نَه. 7اَگم مِن آزونیرون، چِمِن دَده نی آزونیرون؛ امّا چِمی پَش اَیی آزونَه و اَیی ویندَرونَه.» 8فیلیپُس عیسی نَه واتِشه: «آقا، آسِمونی یَه دَده بَمون نِشون بِده، که هِم اَمَه را وَستَه.» 9عیسی اَیی نَه واتِشه: «فیلیپُس، خَیلی وختَه از شِمَه نَه اِستیمَه و حَلا مِن آنِزونی؟ کسی که مِن ویندَشه، آسِمونی یَه دَده ویندَشَه؛ بَس چِنتَه یَه که بَواتیش ”آسِمونی یَه دَده بَمون نیشون بِدَه“؟ 10باوَر نِداری که اَز دَده کاایمَه و دَده بَه مِن کایَه؟ گَفونی که اَز شِمَه نَه بَواتیم اِشتَن کام نییَه، بَلکَم دَده ایی که چِمِن دیلَه کا ساکنَه اِشتَن کارون اَنجام بَدای. 11چِمِن اِم گَفی باوَر بِکَرَه که اَز دَده دیلَه کاایمَه و دَده چِمِن دیلَه کایَه؛ اَگم نِه اَ کارون واسی اِمی باوَر بِکَرَه.

12«حقیقتن، شِمَه نَه بَواتیم، کسی که بَه مِن ایمان بِدارِه، اَ کارونی که اَز بَکَردیم، اَ نی بَکَردی، و حتی کارونی اَوون کا یالتَر بَکَردی، چوم که اَز بَشیم دَده وَر. 13هر چیی که چِمِن نومی نَه بِپییَه، اَز اَیی اَنجام بَدایم، تا دَده، زوعَه کا جلال بِگِرِه. 14اَگم چیی چِمِن نومی کا بَه مِن کا بِپییَه، اَیی اَنجام بَدایم.

عیسی روح القدسی وعده بَدای

15«اَگم مِنَه خِش بِبَه، چِمِن اَحکامی عَمل بَکَردیرون. 16و اَز دَده کا بَپیستیم و اَ ایلَه دییَر یاوری شِمَه آدَه تا همیشه شِمَه نَه بِبو، 17یعنی روح حقیقت که دنیا نیمَشا اَیی قبول بِکَره، چوم که اَیی نِه بَویندی و نِه آزونِه. شِمَه اَیی آزونَه، چوم که اَ شِمَه نَه بَمَندی و شِمَه دیلَه کا بَبی.

18«شِمَه یتیم نییَرزِم؛ بومَیم شِمَه وَر. 19روکَته پَش دنیا دِ مِن نِوینِه، امّا شِمَه بَویندیرون. چوم که اَز زِنده‌ایمَه، شِمَه نی زندگی بَکَردیرون. 20اَ روزی کا، بَزنیرون که اَز دَده دیلَه کا ایمَه و شِمَه چِمِن دیلَه کا و اَز شِمَه دیلَه کا. 21هر کسی که چِمن اَحکامی هِستِشه و اَوون اَنجام بَدای، اَ اِستَه که مِنَه خِشه؛ و اَ کسی که مِنَه خِشه، چِمِن دَده اَیی نَه خِش بَبی و اَز نی اَیی نَه خِش بَبیم، و اِشتَن بَیی ظاهر بَکَردیم.»

22یهودا، نِه یهودا اِسْخَریوط، عیسی نَه واتِشه: «آقا، چِنتَه یَه که تِه اِشتَن اَمه را ظاهر آکَری، امّا نِه اِم دنیا مردمی را؟» 23عیسی جَواو دوشَه: «اَگم کسی مِنَه خِش بِبو، چِمِن کلامی عَمل بَکَردی، و چِمِن دَده اَیی نَه خِش بَبی، و اَمَه بومَیمون چَیی وَر و اَیی نَه بَمَندیمون. 24هر کسی که مِنَه خِش نییَه، چِمِن کلامی اَنجام نیمَدای؛ و اِم کلامی که شِمَه دَرسَه مِن کا نییَه، بَلکَم دَده ایی کا اِستَه که مِن ویسا آکَردَشَه.

25«اِم چییون وختی شِمَه نَه واتِمَه که حَلا شِمَه نَه اِستیمَه. 26امّا اَ یاور، یعنی روح القدس، که دَده اَیی چِمِن نومی نَه ویسا آکَرِه، اَ گِرد چییون شِمَه یاد بَدای و هَر چِه اَز شِمَه نَه واتِمَه، شِمَه یاد بواَردی. 27شِمَه را آرامش و سلامتی بَنایم؛ چِمِن آرامش و سلامتی آدَم شِمَه. اَ چیی که اَز شِمَه آدَم، اَ چیی شیوار نییَه که دنیا شِمَه آدَه. شِمَه دیلِن پریشون آمَبون و مَرزَه شِمَه دیلی کا ترس دَلَکه. 28دَرَسِرونَه که شِمَه نَه واتِمَه، ”اَز بَشیم، و هَنی بومَیم شِمَه وَر.“ اَگم مِنَه خِش بیرون، شاد بَبیرون که بَشیم دَده وَر، چوم که دَده مِن کا یالتَرَه. 29حِسَه اِمی پیش اَز اِمکه اِتِفاق دَلَکِه شِمَه نَه واتِمَه، تا وختی اِتِفاق دَلَکَه ایمان بواَرَه. 30وِر وخت مَندَه نییَه که شِمَه نَه گَف بِژَنِم، چوم اِم دنیا رَئیس، که شیطان بِبو، کارا بومَی. اَ هیچ اِدعایی چِمِن سَری کا نیشَه؛ 31امّا اَز اَ کاری بَکَردیم که دَده مِن فرمان دوعَشَه، تا دنیا بِزونِه که اَز دَده نَه خِشیمَه. پِرِزَه، اییا نَه بِشَم.

Currently Selected:

یوحنا 14: ITB

Highlight

Copy