Luke 22
22
1ယခုအခေါ်မောင် ဂျူးလူမျွိုးတွို့နဂ်စန်ပှုလုတ်ရယ့် ပသခါပွားတိုလွို့ ခိုရယ့် တဆေးမဲ့မွိပွားတိုပှုလုတ်ဖွို့အခှိင် နီးကောဂ်လော်ပွီဖှဂ်ရယ်။ 2ပရောဟိတ်အကျွီးအကားမျောနောင့် ကျောင်းတတ်ဆရော်တွို့ဟော် ကွိုယ်တော်ယေရှုကွိုဆတ်နောင်ဖွို့အတွ တိတိပယ့်ကျောင်စည်နေကျော့ လေရယ်။ အကျွောင်းမောင်ကော ကွိုယ်တော်ကွို လူမျိုကွမ်းမောင်ဖောင်းဆီးလောဂ်ယန် လူထုပရိတ်ဆတ်တွို့ခေါ့ ပှုကျော့မယ့်အယော်ရယ်ကွို ကျွောဂ်ကျော့ရယ့်အတွကျွောင့်ဖှဂ်ရယ်။ 3အယ်းအခေါ် မာရ်နတ်ဟော် အထူးဆပယ့်တိုတဆာ့နေပေါထားမောင့် တပေါဖှဂ်ရယ့် ယုဒရှကာရုတ်နောင်းကွို ဝမ်ယွောဂ်ပူးကောဂ်လေရယ်။ 4အယ်းယော်ကျွောင့် ယုဒရှကာရုတ်ဟော် ပုရောဟိတ်အကျွီးအကားမျောနောင့် ဗိမာန်တော်အစွောင့်ခွေါင်းဆွောင်မျော ကွိုဆိုးပွီး ကွိုယ်တော်ယေရှုကွို ဆူတွို့လဂ်ထားကွို ဖောင်းဆီးအောဂ်နောင်ဖွို့ အကွောင်းဆုန်းနည်းလောင်းနောင့် ဖောင်းဆီးဖွို့အတွ ကူညီပေးနောင်ရယ့်အကျွောင်းကွို ဆွီးနွီးတောင်ပန်ကျော့လေရယ်။ 5အယ်းလူတွို့ဟော် ဝုန်းမွှောဂ်အောယော့စွာနောင့် ယုဒကွို ပိဆင်ပေးဖွို့ ကတိပှုကျော့လေရယ်။ 6ယုဒရှကာရုတ်ခေါ့လယ်း ဆဖိုးတူလွို့ လူထုပရိတ်ဆတ်မဆိရယ့် အခှိင်မောင် ကွိုယ်တော်ယေရှုကွိုဖောင်းဆီးအောဂ်နောင်ဖွို့ အခွမ့်အခေါ်ကွောင်းကွို စွောင့်နေလေရယ်။ 7အယ်းနွောဂ်မောင် တဆေးမဲ့မွိပွားတိုအခှိင်ကွိုယွောဂ်ဆိလော်လေရယ်။ အယ်းနေ့ဟော် ဂျူးလူမျွိုးတွို့ ပသခါပွားတိုအတွသိုးဆငါကွိုဆတ်ပွီး ပူဇော်ယော့ရယ့်နေ့ဖှဂ်ပေါ်ရယ်။ 8အယ်းယော်ကျွောင့် ကွိုယ်တော်ယေရှုခေါ့ ပေတရုနောင့်ယောဟန်ကွို ဂျေရုဆလင်မွှို့ထားကွိုဆိုးဖွို့စေခွှဂ်ပွီး “ငေါ်တွို့စောဆွောဂ်ဖွို့ ပသခါပွားတိုညော့စော်ကွို ပှန်ဆန်ထောကျော့ပေါ်” လွို့ မိင့်တိုမူရယ်။ 9ဆူတွို့ခေါ့လယ်း “ကွိုယ်တော်၊ ငေါ်တွို့ကွို စော်နေယော်မောင် ပှန်ဆန်စေလွိုပေါ် သလော” လွို့ မေးရွှောဂ်ကျော့လေရယ်။ 10ကွိုယ်တော်ခေါ့လယ်း “ဆေချော်နောထွောင်ကျော့ပေါ်။ နန်တွို့ မွှို့ထားကွို ဝမ်ရယ့်အခေါ် ယေအွိုးထောင်းလော်ရယ့်လူတယွောဂ်ကွို နန်တွို့တွိကျော့လောဂ်မယ်။ ဆူ့နွောဂ်ကွို လောဂ်ပွီး ဆူဝမ်ရယ့်အိင်ကွို နန်တွို့ဝမ်ဆိုးကျော့ပေါ်။ 11အယ်းနွောဂ်မောင် အိင်သခန်ကွို ‘ငေါ်တွို့ယယ့်ဆရော်ခေါ့ ဆပယ့်တို ရယ်နောင့်အတူ ပသခါပွားတိုညော့စော်ကွို စောဆွောင်ယော့မယ့်အခန်း စော်မောင်ဆိသလောလွို့ ကွိုယ်တော်ခေါ့ နန့်ကွို မေးခေါင်းလောဂ်ရယ်’ လွို့ ဟိုးကျော့ပေါ်။ 12အယ်းအခေါ် အိင်သခန်ဟော် နန်တွို့ကွို အပိုထောဂ်ကွို ခိုဆိုးပွီး အဆန်သင့်ခန်းကျန်းထောရယ့် အခန်းကှာကျွီးတခုကွို ပျော့လောဂ်မယ်။ အယ်းအခန်းမောင် ညော့စော်စောပွားကွို ပှန်ဆန်ကျော့ပေါ်” လွို့မိင့်တိုမူလေရယ်။ 13အယ်းနွောဂ်မောင် ပေတရုနောင့် ယောဟန်တွို့ဟော်လယ်း မွှို့ထားကွိုဝမ်ဆိုးကျော့ရယ့်အခေါ် ကွိုယ်တော်ယေရှုမိင့်တိုမူရယ့်အတောင်း တွိယော့လွို့ ပသခါပွားတိုအတွ ညော့စော်ကွို အဆန်သင့်ပှန်ဆန်ကျော့လေရယ်။ 14ပဿခါပွားတို စောဆွောဂ်ဖွို့အတွ အခှိင်ကှော့လော်ရယ့်အခေါ် ကွိုယ်တော်ယေရှုဟော် ဆပယ့်တိုတဆာ့နေပေါနောင့်အတူ စောပွားဝိုင်းမောင် ထောင်လေရယ်။ 15အယ်းနွောဂ်မောင် ကွိုယ်တော်ခေါ့ ဆူတွို့ကွို “ငေါ်ဟော် ဒုက်ခေါ့ဝီဆနော်မျောစွာနောင့် အဆေခေါင်ခှန်းမပှုမီ ဟော်ပသခါပွားတိုညော့စော်ကွို နန်တွို့နောင့်အတူစောဖွို့ ကော်တရော်အလွိုဆိရယ်။ 16ဖရောဆန်ယယ့်ဆော်ဆနော်တိုပိုထွမ်းလော်မယ့်ကော်လော့မောင် ပဿခါပွားတိုပှုလုတ်ယော့ခှန်းယယ့်ယီယွာချဂ်ကွို အဆဂ်ချန်နေရယ့်လူ အပွေါင်းတွို့ခေါ့အပှယ့်အဝို့နောလယ်ဆဖိုးပွေါဂ်ရယ့်အခှိင် မတောင်ခန်အထိ ငေါ်ဟော်နွောဂ်ထောဂ်ပဿခါစောပွားကွို စောတို့မောင်မဟွိကျွောင်း နန်တွို့ကွိုငေါ်ဆိဆစေလွိုရယ်” လွို့ မိင့်တိုမူရယ်။ 17အယ်းနွောဂ်မောင် ကွိုယ်တော်ယေရှုဟော် စပျစ်ယေခွဂ်ကွိုယူပွီး ဖရောဆန်ယယ့်ကျယ်းဇူးတိုကွိုခှီးမွမ်းပွီးယန် “ဟော်စပျစ်ယေခွဂ်ကွို ယူကျော့ပေါ်၊ အခှန်းခှန်းခွားဝီဆွောဂ်ကျော့ပေါ်။ 18နန်တွို့ကွို ငေါ်ဟိုးမယ်၊ ဖရောဆန်ဟော် ဆူ့ယယ့်ဆော်ဆနော်တို မတည်ထွောင်ခန်အခှိင်ထိ ဟော်စပျစ်ယေကွို နွောဂ်ထောဂ် ငေါ်ဆွောဂ်တို့မောင်မဟွိပေါ်။ 19တဖန် မွိကွိုယူပွီး ဖရောဆန်ယယ့်ကျယ်းဇူးတိုကွိုခှီးမွမ်းလောဂ်ပွီး ဆပယ့်တိုတွို့ကွို မွိကွိုဖဂ်ပေးလောဂ်ပွီး နန်တွို့ကွို ငေါ်ဟိုးခှန်တော်မောင် ဟော်မွိဟော် နန်တွို့အတွပေးဆောဂ်ရယ့် ငေါ့ယယ့်ခန်ဓော်ကွိုယ်ဖှဂ်ရယ်။ ငေါ့ကွို အွောဂ်မေ့ဆတိယော့ပွီး ငေါ်လုတ်ခယ့်ရယ့်အတောင်းဆဂ်ပွီး လုတ်ကျော့ပေါ်” လွို့ မိင့်တိုမူရယ်။ 20အယ်းနည်းအတောင်း ညော့စော်စောဆွောဂ်ပွီးနွောဂ်မောင် ကွိုယ်တော်ယေရှုဟော် စပျစ်ယေခွဂ်ကွိုကောင်ပွီး “ဟော်စပျစ်ယေဟော် နန်တွို့အကျွိုးအတွ ငေါ်လွောင်းပေးရယ့် ငေါ့အဆွီးတိုကွို ကွိုယ်စောပှုရယ်။ 21ဟော်ပေမယ့် ငေါ့ကွိုဆဂ်စော်ဖွောဂ်ပွီး ရန်ဆူလဂ်ထားကွို အောဂ်နောင်မယ့်ဆူဟော် ဟော်စောပွားမောင်ငေါ်နောင့်အတူ စောဆွောဂ်နေရယ်ဆွိုတော်ကွို နန်တွို့အောလုန်းကွို ငေါ်ဆိဆစေခှန်ပေါ်ရယ်။ 22ငေါ်လူဆောတိုဟော် ဖရောဆန်အလွိုဆိတိုရယ့်အတောင်း အဆေခေါင်ယော့မောင် အမင်ပယ်းဖှဂ်ရယ်။ ဟော်ပေမယ့် ငေါ့ကွိုဆဂ်စော်ဖွောဂ်ပွီး ရန်ဆူလဂ်ထားကွို အောဂ်နောင်မယ့်ဆူအတွကော ဆွိုးရွားရယ့်ပှဂ်ဒေါင်ကွို ခေါင်ယော့လောဂ်မောင်ဖှဂ်ရယ်” လွို့မိင့်တိုမူလေရယ်။ 23အယ်းနွောဂ် ဆပယ့်တိုတွို့ဟော် “ငေါ်တွို့ထားခေါ့ စူဟော် အယ်းလွိုမကွောင်းရယ့်အယော်ရယ်ကွို လုတ်ဖွို့ကျောင်ယွာနေသလော” လွို့ အခှန်းခှန်းစော့တန်မေးမှန်းခယ့်ကျော့လေရယ်။ 24အယ်းနွောဂ် ဆပယ့်တိုတွို့ဟော် ဆူတွို့ထားခေါ့ စူဟော် အကျွီးမှဂ်ဆုန်းဖှဂ်ကျွောင်း အခှန်းခှန်းစော့တန်အညမ်းပွားကျော့လေရယ်။ 25အယ်းယော်ကျွောင့် ကွိုယ်တော်ခေါ့ ဆူတွို့ကွို “လူမျွိုးချောဘရန်မျောဟော် လူရယ်ကွို ဖိနှိချုတ်ခြာပွီး အုတ်ချုတ်တတ်ကျော့ရယ်။ အယ်းလွိုမျွိုး ခွေါင်းဆွောင်မျောဟော် ဆူတွို့ယယ့် အခွမ့်အော်နော်ကွို အဆုန်းပှုပွီး လူရယ်ကွိုဖိနှိပွီး အုတ်ချုတ်ကျော့ပေမယ့်လယ်း ဆူတွို့ကွို လူအမျောခေါ့ ‘ခွေါင်းဆွောင်ကွောင်း’ လွို့ခေါင်လွိုကျော့ရယ်။ 26ဟော်ပေမယ့် နန်တွို့ဟော် အယ်းလူရယ်လွိုမျွိုး မဖှဂ်ဆန့်ကျော့ပေါ်။ အယ်းအစော နန်တွို့ထားခေါ့ အရယ်းအပေါ်ဆုန်းဆူဟော် အရယ်းမပေါ်ရယ့်ဆူလွိုမျွိုး နှိခှော့ပွီး ပှုမူနေထောင်ယော့မောင်ဖှဂ်ရယ်။ ခွေါင်းဆွောင်ဖှဂ်ဆူတောင်းဟော်လယ်း အချောဆူရယ်ကွို အစေခေါင်လွိုမျွိုး နိခှော့ပွီး အလုတ်အကျွယ်းပှုယော့မောင်ဖှဂ်ရယ်။ 27စောပွားမောင်ထောင်ပွီး စောဆွောဂ်နေရယ့်ဆူနောင့် အစောအဆွောဂ်ရယ်ကွိုပှန်ဆန်ပွီး လုတ်ကျွယ်းပှုစုနေရယ့်ဆူတွို့မောင် စူခေါ့ပွိုပွီးကျွီးမှဂ်သလော။ စောပွားမောင်ထောင်ပွီး စောဆွောဂ်နေရယ့်ဆူဟော် ပွိုပွီးကျွီးမှဂ်ရယ်မဟွိလော။ ဟော်ပေမယ့် ငေါ်ဟော်နန်တွို့ကျောမောင် အစောအဆွောဂ်ကွိုပှန်ဆန်ပွီး လုတ်ကျွယ်းပှုစုနေရယ့်ဆူလွိုမျွိုးပယ်းဖှဂ်ရယ်။ 28ငေါ်ဟော် ဒုက်ခေါ့ဆားရားမျောနောင့် ကျုန်တွိခယ့်ယော့ပွီး စောင်းဆောဂ်ခေါင်ခယ့်ယော့ရယ့်အခှိင်မျောမောင်လယ်း နန်တွို့ဟော် ငေါ့ဖေးမောင် ငေါ်နောင့်အတူ ဆိနေပေးခယ့်ကျော့ဆူမျောဖှဂ်ကျော့ရယ်။ 29အယ်းယော်ကျွောင့် ငေါ့ယယ့်ဖော့ဖရောဆန်ဟော် ငေါ့ကွို ဆန်ဘရန်အယော်မောင် အုတ်စွိုးယော့ရယ့်အခွမ့်ကွို ပေးအောဂ်ထောတိုမူသလွိုမျွိုး နန်တွို့ဟော်လယ်း ငေါ်နောင့်အတူအုတ်စွိုးယော့ရယ့်အခွမ့်ကွို ပေးအောဂ်ခှန်း ခေါင်ယော့မောင်ဖှဂ်ရယ်။ 30အယ်းနန်လွို့ နန်တွို့ဟော် ငေါ့ယယ့် နိုင်ငေါင်တိုမောင် ငေါ်ယယ့်စောပွားမောင် ငေါ်နောင့်အတူစောဆွောဂ်ယော့ရယ့်အခွမ့်ကွိုယော၊ ပလန်ပိုမောင်ထောင်ပွီး အစ္စရယ်းမျွိုးနွာစုဆဂ်နေစုကွို အုတ်ချုတ်ယော့မယ့်အခွမ့်ကွိုယော ယော့ဆိကျော့မောင်ဖှဂ်ရယ်” လွို့ မိင့်တိုမူရယ်။ 31အယ်းနွောဂ်မောင် ကွိုယ်တော်ယေရှုခေါ့ ရှိမုန်ပေတရုကွို “ရှိမုန်၊ ရှိမုန်၊ လာဆမောဟော် စပေါကွို အစယ့်နောင့် အခွံခွားချောသလွိုမျွိုး မာရ်နတ်ဟော်လယ်း နန်တွို့ငေါ့အပို ယုန်ကျည်ခှန်းစလွောဂ်ခေါင်မှားကျွောင်း စောင်းဆောဂ်ဖွို့အတွ ဖရောဆန်နောင်းမောင် ခွမ့်တွောင်းခယ့်ရယ်။ 32ဟော်ပေမယ့်လယ်း ရှိမုန်၊ နန်တွို့ဟော် ယုန်ကျည်ခှန်း ခေါင်မှားကျော့စေဖွို့အတွ ငေါ်ဆုတွောင်းပေါ်ရယ်။ အယ်းယော်ကျွောင့် နန်တွို့ဟော် နွောင်တော့ယော့ပွီး ငေါ့ဆီကွို ပှန်လည့်လော်ကျော့ရယ့်အခေါ် ငေါ့ယယ့်အချောဆပယ့်တိုမျောကွို ငေါ့အပိုထောဆိရယ့်ဆူတွို့ယယ့် ယုန်ကျည်ခှန်းခေါင်မှားစေဖွို့အတွ တောဂ်တွမ်းကျော့ပေါ်” လွို့ မိင့်တိုမူရယ်။ 33ဟော်ပေမယ့် ရှိမုန်ပေတရုခေါ့ ကွိုယ်တော်ယေရှုကွို “ကွိုယ်တော်၊ ငေါ်ဟော် ကွိုယ်တော်နောင့်အတူထွောင်ထားကွိုဝမ်ယော့ယန်ဖှဂ်စေ၊ ကွိုယ်တော်နောင့်အတူအဆေခေါင်ယော့တအွောင်မောင့် အဆန်သင့်ဆိပေါ်ရယ်” လွို့ ရွှောဂ်တန်လေရယ်။ 34ကွိုယ်တော်ယေရှုခေါ့လယ်း “ပေတရု နန့်ကွိုငေါ်ဟိုးမယ်။ နွောဂ်တနေ့မောင် မနဂ်စိုးစိုးနေမထွဂ်မီအခှိင်ဖှဂ်ရယ့် ကျဂ်မတွမ်မီမောင်ပယ်း နန်ဟော် ငေါ့ကွိုမဆိဆပေါ်လွို့ ဆုန်းကျိင်တောင်တောင် ညမ်းလောဂ်မယ် လွို့ ငေါ်အဆေအချော်ဟွိုးနောင်ရယ်” လွို့မိင့်တိုမူလေရယ်။ 35အယ်းနွောဂ်မောင် ကွိုယ်တော်ယေရှုခေါ့ ဆပယ့်တိုအောလုန်းတွို့ကွို “ငေါ်ဟော် နန်တွို့ကွို ပိဆင်အိ၊ ခရီးဆွောင်အိ၊ ဖနောဂ်တွို့ကွို ယူမဆိုးစေပယ်း မန်ဂလော်ဆတန်းကွောင်းကွို ဟိုးကျောဖွို့အတွ မွှို့ဝိုရယ်နောင်း စေခွှဂ်ခယ့်ခှိင်ခေါ့ အဆန်မပှေမုတခုခုမျောဆိခယ့်သလော” မေးတိုမူယော် ဆပယ့်တိုတွို့ခေါ့ “စော်အဆန်မပှေမု တခုခုမောင့်မဆိခယ့်ပေါ်” လွို့ ပှန်လယ်ရွှောဂ်တန်ခယ့်ကျော့ရယ်။ 36ကွိုယ်တော်ခေါ့ ဆူတွို့ကွို “ဟော်ပေမယ့် အခုမောင်ကော၊ လူတွို့ဟော် နန်တွို့ကွို ကူညီကျော့တို့မောင်မဟွိပေါ်။ အယ်းယော်ကျွောင့် ပိဆင်အိနောင့် ခရီးဆွောင်အိ ဆိရယ့်လူတောင်းဟော် ယူဆိုးဆန့်ပွီး ဆငါမဆိရယ့်လူဟော်လယ်း အပိုဝဂ်အန်းကှီကွိုယွောင်းပွီး ယော့ရယ့်ပိဆင်နောင့် ဆငါဝါကျော့ပေါ်။ 37အကျွောင်းမောင်ကော ‘ဟော်လူဟော် ရော်ဇဝဂ်ဆောလွိုမျွိုး ဆဂ်မှတ်ခေါင်ယော့လောဂ်မယ်’ လွို့ ငေါ့ယယ့်အကျွောင်းကွို ကျောင်းစော်မောင်ရယ်းဆောထောရယ့် အတောင်း အယ်းအဖှဂ်အပျဂ်မျောဟော် ငေါ့နောင်းမောင်အမင်တကာပယ်း ဖှဂ်ပျဂ်လော်တို့မောင်ဖှဂ်ရယ်” လွို့မိင့်တိုမူလေရယ်။ 38အယ်းအခေါ် ဆပယ့်တိုတွို့ခေါ့ “ကွိုယ်တော် ကျေ့ပေါ်လော၊ ငေါ်တွို့မောင် ဆငါချယ်နေလဂ်ဆိပေါ်ရယ်” လွို့ ရွှောဂ်ရယ့်အခေါ် ကွိုယ်တော်ခေါ့ “လုန်လွောဂ်ပေါ်ပီ” လွို့မိင့်တိုမူလေရယ်။ 39အယ်းနွောဂ်မောင် ကွိုယ်တော်ယေရှုဟော် ဂျေရုဆလင်မွှို့ခေါ့နေ ထွဆိုးပွီး ပှုတိုမူလေ့ဆိရယ့်အတောင်း သံလွင်တွောင်ပိုနောင်းကွို ကျို့တိုမူလေရယ်။ ဆပယ့်တိုတွို့ဟော်လယ်း ကွိုယ်တော်ယယ့်နွောဂ်တိုကွို လောဂ်ပေါ်ဆိုးခယ့်ကျော့ရယ်။ 40အယ်းနေယော်နောင်းကွို ယွောဂ်ရယ့်အခေါ် ကွိုယ်တော်ယေရှုခေါ့ ဆပယ့်တိုတွို့ကွို “ဖျောယွောင်းဆွီးဆွောင်ခှန်း မခေါင်ယော့စေဖွို့ ဖရောဆန်ခေါ့ နန်တွို့ကွို ကူညီပေးစေဖွို့ ဆုတွောင်းကျော့ပေါ်” လွို့မိင့်တိုမူလေရယ်။ 41အယ်းနွောဂ်မောင် ကွိုယ်တော်ယေရှုဟော် ဆူတွို့နောင့် မနီးမဝီးနေယော်နောင်းကွို တပေါထယ်းထွဆိုးတိုမူပွီးရယ့်နွောဂ်မောင် ဒူးထွောဂ်ပွီး ဖရောဆန်နောင်းမောင် ဆုတွောင်းတိုမူရယ့်ဟော်မောင် 42“အို ဖော့ဖရောဆန်၊ ဖော့ဖရောဆန် အလွိုတိုဆိယန် မကျော်မီအခှိင်တွမ်းမောင် ငေါ်ခေါင်စောယော့တို့မယ့် ဟော်ဒုက်ခေါ့ဆားရားတွို့ခေါ့နေ လွဂ်မွှောဂ်စေတိုမူပေါ်။ ဟော်ပေမယ့် ငေါ့ယယ့် အလွိုအတောင်းဖှဂ်စေတိုမူခှန်းမဟွိပယ်း ဖော့ဖရောဆန်ယယ့်အလွိုတို အတောင်းပယ်း ဖှဂ်စေတိုမူပေါ်” လွို့ဆုတွောင်းတိုမူရယ်။ 43အယ်းအခေါ် ဆွယ်မွှို့တိုခေါ့ ဖရောဆန်ယယ့်နတ်ဒေဝါတပေါဟော် ကွိုယ်တော်ယေရှုနောင်းလော်ပွီး စိယောကွိုယ်ပေါ် ခွမ်အောယော့စေဖွို့ခွမ်အောပေးခယ့်လေရယ်။ 44ကွိုယ်တော်ယေရှုဟော် ကော်တရော်ဝုန်းနယ်းပူဆွေးခှန်းတွို့နောင့် နော်ကျင်ခေါင်စောယော့ပွီး ပွိုပွီးစိအောဆန်ဆန်နောင့် ဆုတွောင်းတိုမူယော် ကွိုယ်တော်နောင်းခေါ့ ချွီးပွောဂ် ချွီးစမျောဟော် ဆွီးစ လွိုမျွိုး မှေကျွီးပိုကွို ကှော့တိုမူလေရယ်။ 45အယ်းလွိုဆုတွောင်းပွီးရယ့်နွောဂ်မောင် ကွိုယ်တော်ယေရှုဟော်ထော့ပွီး ဆပယ့်တိုရယ်နောင်းကွိုပှန်ကျို့လော်ရယ့်အခေါ် ဆူတွို့ဟော် ပမ်ပန်းပွီး အိပျိုနေကျော့တော်ကွိုတွိယော့လေရယ်။ 46အယ်းအခေါ် ကွိုယ်တော်ယေရှုခေါ့ ဆပယ့်တိုတွို့ကွို “စော်ကျွောင့်အိပျိုနေကျော့သလော။ ဖျောယွောင်းဆွီးဆွောင်ခှန်းမခေါင်ယော့စေဖွို့အတွ ထော့ပွီး ဆုတွောင်းကျော့ပေါ်” လွို့ မိင့်တိုမူရယ်။ 47ကွိုယ်တော်အယ်းလွိုမိင့်တိုမူနေခှိင်မောင်ပယ်း လူအုတ်ကျွီးဟော် တလန့်ယွောဂ်ဆိလော်ခယ့်ရယ်။ အယ်းလူအုတ်ကျွီးကွို ဦးဆွောင်ပွီး ခိုလော်ခယ့်ရယ့်လူဟော် ကွိုယ်တော်ယယ့်ဆပယ့်တိုဆာ့နေယွောဂ်ထားခေါ့ တယွောဂ်ဖှဂ်ရယ့် ယုဒရှာကာရုတ်ဖှဂ်ပွီး ဆူဟော် ကွိုယ်တော်ကွို နောင်းပွီးနွိဆဂ်ဖွို့ ကွိုယ်တော်အနောကွို ကောဂ်လော်လေရယ်။ 48ဟော်ပေမယ့် ကွိုယ်တော်ယေရှုခေါ့ “ယုဒရှာကာရုတ်၊ နန်ဟော် လူဆောတိုကွို အနောင်းနောင့် ရန်ဆူယယ့်လဂ်ထားကွို အောဂ်နောင်တို့မလွို့လော” လွို့မေးတိုမူရယ်။ 49ကွိုယ်တော်ယေရှုနောင့်ဆိနေကျော့ရယ့်ဆပယ့်တိုတွို့ခေါ့ စော်အယော်မျောဖှဂ်ပျလော်တို့မောင်ကွို ဆိဆပြီးဆူတွို့ခေါ့ ကွိုယ်တော်ကွို “ကွိုယ်တော်၊ ငေါ်တွို့ ဆူတွို့ကွို ဆငါနောင့်ခွိလောဂ်ယော့မလော” လွို့ မေးလေရယ်။ 50အယ်းအခေါ် ဆပည့်တိုမျောထားခေါ့ တယွောဂ်ဟော် ဂျူးပုရောဟိတ်အကျွီးအကားတဦးယယ့် အစေခေါင်တဦးကွို ဆငါနောင့်ခွိလောဂ်ယော် ညော်ဖဂ်နောကွို ထိဟော့ပွီး ပှဂ်ဆိုးလေရယ်။ 51အယ်းအခေါ် ကွိုယ်တော်ခေါ့ “ဟော်လွောဂ်နောင့်တိုလောဂ်တို့” လွို့မိင့်တိုမူပွီး အယ်းအစေခေါင်ယယ့် နောလွကွို လဂ်တိုနောင့်တွို့ထိလောဂ်ရယ့်အခေါ် အနော်ဟော် ပျွောဂ်ကန်းဆိုးလေရယ်။ 52အယ်းနွောဂ်မောင် ကွိုယ်တော်ယေရှုဟော် ဆူ့ကွို ဖောင်းဖွို့လော်ကျော့ရယ့် ဂျူးလူမျွိုးအကျွီးအကားမျော၊ ဗိမာန်တိုအစွောင့်မျောနောင့် ဂျူးပုရောဟိတ်အကျွီးအကားမျောကွို “နန်တွို့ဟော် ရော်ဇဝဂ်ဆောကွို ဖောင်းသလွိုမျွိုး ငေါ့ကွိုဖောင်းဆီးဖွို့ ကတွိမျော၊ ဆငါချယ်မျောကွိုတအွောင် ကောင်ပွီး ယူလော်ကျော့သလော။ 53ငေါ်ဟော် နေ့စန်နေ့တောင်း ဗိမာန်တိုထားမောင် ဆိနေခိင် နန်တွို့ဟော် ငေါ့ကွိုမဖောင်းဆီကျော့။ ဟော်ပေမယ့် ဟော်အခှိင်ဟော် နန်တွို့ယယ့် အခှိင်ဖှဂ်ပွီး မာန်နတ်ယယ့်အမွောင်စွမ်းအောနောင့် အုတ်စွိုးရယ့်အခှိင်လယ်းဖှဂ်ရယ်” လွို့ မိင့်တိုမူရယ်။ 54အယ်းနွောဂ် ဆူတွို့ဟော် ကွိုယ်တော်ယေရှုကွို ဖောင်းချုပ်ပွီး အကျွီးဆုန်းပုရောဟိတ်ယယ့်အိင်ကွို ဆွားခိုဆိုးကျော့လေရယ်။ ပေတရုဟော်လယ်း အယ်းဆူတွို့နောင့် ခေါဂ်ဝီးဝီးခေါ့နေ လောဂ်ပေါ်ဆိုးလေရယ်။ 55အကျွီးဆုန်းပရောဟိတ်ယယ့်ချောင်ဝမ်းအလာမောင် လူတခှို့ဟော် မီးဖွိုပွီး အတူတကွစုဝီး ထောင်နေကျော့လေရယ်။ ပေတရုဟော်လယ်း အယ်းဆူတွို့ကျောမောင် ထောင်နေလေရယ်။ 56အယ်းနွောဂ်မောင် အစေခေါင်အမျွိုးဆမီးတယွောဂ်ဟော် မီးဖွို့ယယ့် အလန်းယွောင်ဖဂ် မျတ်နော်မူနေပွီး ထောင်နေရယ့် ပေတရုမျိုရယ့်အခေါ် စူးစောဂ်ကျေ့ပွီး အချောလူမျောကွို “ဟော်လူဟော် ယေရှုယယ့်အပွေါင်းအပေါ်ဖှဂ်ရယ်” လွို့ဆွိုလေရယ်။ 57ဟော်ပေမယ့် ပေတရုခေါ့ “အမျွိုးဆမီး၊ ဆူ့ကွို ငေါ်မဆိဆပေါ်” လွို့ ညမ်းဆွိုလောဂ်ရယ်။ 58ခနောင့်အကျော်မောင် တချောတယွောဂ်ခေါ့လယ်း ပေတရုကွို မျိုလွို့ “နန်ဟော်လယ်း ဆူတွို့ထားခေါ့ တယွောဂ်ဖှဂ်ရယ့်” လွို့ ဟိုးပှန်ရယ်။ ဟော်ပေမယ့် ပေတရုခေါ့ “မိင့်ဆွေ၊ ငေါ်ဟော် ဆူတွို့အဖွ ထားခေါ့မဟွိပေါ်” လွို့ ညမ်းဆွိုပှန်ရယ်။ 59အယ်းနွောဂ်မောင် တနော်ရီအကျော်မောင် အချောတယွောဂ်ခေါ့လယ်း ပေတရုနောင့် ပဂ်ဆဂ်ပွီး “ဟော်လူယယ့် စကောဟိုးပုန်ဆွိပုန်မျောဟော် ဂါလိလဲနာခေါ့ဖှဂ်ကျွောင်းဖိုပျော့ရယ်။ အယ်းယော်ကျွောင့် ဟော်လူဟော် ယေရှုနောင့်အတူဆိရယ့်လူ အဆေအချော်ပယ်းဖှဂ်ရယ်” လွို့အခေါင်အမော်ဟိုးဆွိုလေရယ်။ 60ဟော်ပေမယ့် ပေတရုခေါ့ “မိင့်ဆွေ၊ နန်ဟိုးနေရယ့်အကျွောင်းအယော်မျောကွို အမင်တကာကွို ငေါ်မဆိဆပေါ်” လွို့ ညမ်းဆွိုပှန်ရယ်။ အယ်းလွိုဟိုးနေခှိင်မောင်ပယ်း ကျဂ်တွမ်လေရယ်။ 61အယ်းအခေါ် ကွိုယ်တော်ယေရှုခေါ့ ပေတရုကွို ခှယ့်ပွီးကျေ့တိုမူလေရယ်။ ပေတရုဟော် ကွိုတော်ယေရှုမိင့်တိုမူခယ့်ရယ့်အတောင်း “ခုနေ့ညော့ ကျမတွမ်ခန်မောင်ပယ်း နန်ဟော် ငေါ့ကွိုမဆိဆပေါ်လွို့ ဆုန်းကှိင်တောင်တောင်ညမ်းဆွိုလောဂ်မယ်” လွို့ ဆွိုရယ့်ကွိုယ်တော်ယယ့်စကောကွို တလန့် ပှန်လည်အမတ်ယော့ခယ့်လေရယ်။ 62အယ်းယော်ကျွောင့် ပေတရုဟော်ချောင်ဝမ်းထားမော့ အပှင်ကွိုထွပွီး ဝုန်းနယ်းပလ ငွိုကျွယ်းလေတို့ရယ်။ 63ကွိုယ်တော် ယေရှုကွိုစွောင့်ကျောဂ်နေကျော့ရယ့် လူမျောဟော်ကွိုယ်တော်ကွို လွှောင်ပွှောင်ပွီး ရောဂ်ပွိကျော့လေရယ်။ 64ဆူတွို့ဟော် ကွိုယ်တော်ယေရှုယယ့် မျဂ်လုန်းကွို အဝဂ်မျောနောင့်စယ်းထောကျော့ပွီးယန် ထောဂ်မန်ရောဂ်ပွိပွီး “နန်ယော် ပရောဖက်မင်ယန် နန့်ကွို ရောဂ်ပွိနေရယ့်ဆူဟော် စူဖှဂ်ရယ်ဆွိုတော်ကွို ဟိုးပေါ်” လွို့ဆွိုကျော့လေရယ်။ 65အယ်းအပှင် ဆူတွို့ဟော် ကွိုယ်တော်ကွို တချောလွှောင်ပွောင်ကာ့ရရယ့်စကောအမျွိုးမျွိုးတွို့နောင့် စိုကောဟိုးဆွိုခယ့်ကျော့လေရယ်။ 66မွိုးလန်းရယ့်အခေါ် အယ်းလူထုထားခေါ့ ပရောဟိတ်အကျွီးအကားမျော၊ ကျောင်းတတ်ဆရော်မျောနောင့် ဂျူးလူမျွိုးအကျွီးအကားမျောတွို့ဟော်စုဝီးကျော့ပွီး ကွိုယ်တော်ကွို တရောစီယန်ရယ်းအဖွဆိယော်တရောရုန်းကွို ခိုဆွောင်ဆိုးကျော့လေရယ်။ 67အယ်းနွောဂ်မောင် ဆူတွို့ခေါ့ ကွိုယ်တော်ယေရှုကွို “နန်ဟော် မေရှိယဟွိသလော၊ မဟွိသလော ငေါ်တွို့ကွိုဟိုးပေါ်” လွို့မေးမှန်းကျော့လေရယ်။ ဟော်ပေမယ့် ကွိုယ်တော်ယေရှုခေါ့ “နန်တွို့ကွို ငေါ်ဟော်အမင်တကာပယ်း မေရှိယဖှဂ်ရယ်လွို့ဟိုးယန်လယ်း နန်တွို့ဟော် ယုန်ကျည်ကျော့မောင်မဟွိ။ 68ငေါ်ဟော် နန်တွို့ကွို မေးခွမ်းမေးယန်လယ်း နန်တွို့ဟော် ဖှေကျော့မောင်မဟွိ။ 69ဟော်ပေမယ့် လူဆောတိုဟော် ဖုန်းတခွိုးတိုနောင့် ပှယ်စုန်ရယ့် ဖရောဆန်ယယ့်လဂ်ယော်ဖဂ်မောင် ထောင်တိုမူပွီး အုတ်ချုတ်ယော့မယ့် နေ့ရတ်ဟော် မကျော်ခန် ယွောဂ်ဆိလော်တို့မောင်ဖှဂ်ရယ်” လွို့မိင့်ဆွိုလေရယ်။ 70အယ်းအခေါ် ဆူတွို့အောလုန်းခေါ့ “အယ်းနန်ဟန် နန်ဟော်ဖရောဆန်ယယ့်ဆောတိုဖှဂ်သလော” လွို့ မေးကျော့လေရယ်။ ကွိုယ်တော်ခေါ့လယ်း “နန်တွို့ဟိုးရယ့်အတောင်း အမင်ပယ်းဖှဂ်ရယ်” လွို့မိင့်တိုမူလေရယ်။ 71အယ်းအခေါ် ဆူတွို့ခေါ့လယ်း “ငေါ်တွို့ဟော် ဆူ့ယယ့်ပါစောဂ်ခေါ့ ဟိုးရယ့်စကောကွို ကျောယော့ပီဖှဂ်ရယ့်အတွကျွောင့် ဆူ့ကွို တရောစီယန်ဖွို့ တချောစော်ဆဂ်ဆေကွိုမောင့် မလွိုအောဂ်တို့ပေါ်” လွို့ အခှန်းခှန်းဟိုးဆွိုကျော့လေရယ်။
Currently Selected:
Luke 22: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
