Luke 23
23
1အယ်းနွောဂ်မောင် တရောစီယန်ရယ်းအဖွဝမ်အောလုန်းတွို့ဟော် မတ်တတ်ထော့ယောဂ်လောဂ်ကျော့ပွီး ကွိုယ်တော်ယေရှုကွို အုတ်ချုတ်ဆူပိလတ်နောင်းခိုဆွောင်ဆိုးခဲ့ကျော့လေရယ်။ 2အယ်းလူတွို့ခေါ့ “ဟော်လူဟော် တင်းဆူပှယ်ဆောမျောကွို လိင်ညော်လည့်ဖျောပွီးယန်လောင်းမောကွိုယွောဂ်စေပွီး ဧကရာဇ်မန်းကွို အခွမ်မဆဂ်ကျော့ဖွို့တောမှဂ်နေတော်ကွိုယော၊ ဆူ့ကွိုယ်ဆူ မေရှိယဆွိုရယ့် ဂျူးလူမျွိုးတွို့ယယ့်ဘရန်တပေါဖှဂ်ကျွောင်း ဟိုးဆွိုနေတော်ကွိုပေါ် တွိဆိခယ့်ယော့ပေါ်ရယ်” လွို့ ပိလတ်ယယ့်ချယ့်တိုမောင် စော့တန်ပွီးစွပ်စွားဟိုးဆွိုကျော့လေရယ်။ 3အယ်းယော်ကျွောင့် ပိလတ်မန်းခေါ့ ကွိုယ်တော်ယေရှုကွို “နန်ဟော် ဂျူးလူမျွိုးတွို့ယယ့်ဘရန်ဆွိုတော် မင်ကန်သလော” လွို့ မေးလေရယ်။ ကွိုယ်တော်ယေရှုခေါ့လယ်း “နန်ဟိုးရယ့်အတောင်းပယ်း ဖှဂ်ပေါ်ရယ်” လွို့ပှန်ဖှေတိုမူလေရယ်။ 4အယ်းနွောဂ်မောင် ပိလတ်မန်းခေါ့ ပုရောဟိတ်အကျွီးအကားမျောနောင့်လူထုပရိတ်ဆတ်တွို့ကွို “ဟော်လူနောင်းမောင် စော်အပှဂ်တစုန်တရော်မောင့်ငေါ်မတွိ” လွို့ဆွိုလေရယ်။ 5ဟော်ပေမယ့် အယ်းလူတွို့ခေါ့ ကွိုယ်တော်ယေရှုကွို ဆဂ်ပွီးပှဂ်တန်စွဂ်စွားခယ့်ကျော့လေရယ်။ ဆူတွို့ခေါ့ “ဟော်လူဟော် ဂါလိလဲပှယ်ခေါ့စော့ပွီး ဂျေရုဆလင်မွှို့ထိတအွောင် ယုဒပှယ်တခွမ်လုန်းမောင် ရောမအစွိုးရော့ကွိုဆန့်ကျင်ကျော့ဖွို့အတွ လူရယ်ကွို ဆူ့ယယ့်သွန်သင်ချဂ်မျောနောင့် တောဂ်တွမ်းခယ့်ပေါ်ရယ်” လွို့ ဖိအောပေးဟိုးဆွိုခယ့်ကျော့လေရယ်။ 6အယ်းစကောကွို ပိလတ်မန်းကျောရယ့်အခေါ် “ဟော်လူယော် ဂါလိလဲပှယ်ဆောဖှဂ်သလော” လွို့ မေးလေရယ်။ 7အယ်းနွောဂ်မောင် ပိလတ်ခေါ့ ကွိုယ်တော်ယေရှုကွို ဟေရုဒ်အန္တိပအုတ်ချုပ်ရယ့် ဂါလိလဲပှယ်ခေါ့ဖှဂ်ကျွောင်းကွိုဆိဆရယ့်အခေါ် ဂျေရုဆလင်မွှို့မောင် ယွောဂ်ဆိနေရယ့်အုတ်ချုပ်ဆူဟေရုဒ်နောင်း ကွိုယ်တော်ယေရှုကွို ပွို့လောဂ်လေရယ်။ 8အုတ်ချုတ်ဆူဟေရုဒ်ဟော် ကွိုယ်တော်ယေရှုကွို မျိုတွိယော့ရယ့်အခေါ် ကော်တရော်ဝုန်းမွှောဂ်ဆိုးလေရယ်။ စော်ကျွောင့်လောဟန် ဆူဟော် ကွိုယ်တော်ယေရှုအကျွောင်းကွို ကျောဆိဆထောပွီး ကွိုယ်တော်ကွိုတွိမျိုလွိုရယ့်အခှိင် ဟော်ကျော်မှင့်ခယ့်ပွီဖှဂ်ရယ်။ ဆူဟော် ကွိုယ်တော်ပှုတိုမူရယ့်အောင့်အိုး စရော်အမုအယော်တခုခုကွို မျိုယော့ဖွို့လယ်းမျိုလန့်နေခယ့်ရယ် 9အယ်းယော်ကျွောင့် ဟေရုဒ်ဟော် ကွိုယ်တော်ယေရှုကွို မေးခွမ်းအမွှောဂ်အမျောကွို မေးလေရယ်။ ဟော်ပေမယ့် ကွိုယ်တော်ယေရှုဟော် စော်ကွိုမောင့် ပှန်လည်ဖှေကျောခှန်းမဆိခယ့်ပေါ်။ 10အယ်းနွောဂ်မောင် ပုရောဟိတ်အကျွီးအကားမျောနောင့် ကျောင်းတတ်ဆရော်မျောဟော် အယ်းနေယော်မောင်မတ်ပွီး ကွိုယ်တော်ယေရှုကွို ပှန်းပှန်းထောင်ထောင် ပှဂ်တန်စွပ်စွားကျော့လေရယ်။ 11ဟေရုဒ်နောင့် ဆူ့ယယ့် စဂ်ဆောမျောဟော် ကွိုယ်တော်ယေရှုကွို မလေးမစောပှုပွီး ကာ့ရလွှောင်ပွှောင်ခယ့် ကျော့လေရယ်။ အယ်းနွောဂ်မောင် ဟေရုဒ်ဟော် ကွိုယ်တော်ကွို ဆန်ဘရန်အဖှဂ် ဟန်ဆွောင်စေဖွို့အတွ ဆန်ဘရန်ဝဂ်စုန်ကွို ဝဂ်ဆန်စေပွီးယန် ပိလတ်မန်းနောင်းကွို ပှန်ပွို့လောဂ်ကျော့လေရယ်။ 12အယန်ခေါဂ် ဟေရုဒ်မန်းနောင့် ပိလတ်မန်းတွို့ဟော် အခှန်းခှန်းရန်ညွှိုးရန်စော့မျော ဆိခယ့်ကျော့ပေမယ့်လယ်း ဟော်နေ့မောင်ကော မိင့်ဆွေမျောအဖှဂ်ကွို ယွောဂ်ဆိဆိုးကျော့လေရယ်။ 13အယ်းနွောဂ်မောင် အုတ်ချုတ်ဆူပိလတ်ဟော် ပုရောဟိတ်အကျွီးအကားမျော၊ ဂျူးလူမျွိုးအကျွီးအကားမျောနောင့် ကှန်ရယ့်လူမျောကွို စုဝီးစေပွီ 14“နန်တွို့ဟော် ဟော်လူဟော် လူထုကွို အထန်အမျိုလွားမောစေဖွို့လုန့်ဆွိုခယ့်ရယ်လွို့ဆွိုပွီး ငေါ့နောင်းကွို နန်တွို့ခိုလော်ပွီး စွားချဂ်တန်ခယ့်ကျော့ရယ်။ ဟော်ပေမယ့် ငေါ်ဟော် နန်တွို့ချယ့်မောင်ပယ်း ဆူ့ကွို စဂ်ဆေးခယ့်ပေမယ့် ဟော်လူနောင်းမောင် နန်တွို့စွဂ်စွားသလွိုမျွိုး အပှဂ်တစုန်တခုကွိုမောင့် ငေါ်မတွိခယ့်ပေါ်။ 15ဟေရုဒ်ဟော်လယ်း ဟော်လူနောင်းမောင် အပှဂ်ချော်မတွိရယ့်အတွကျွောင့် ပှဂ်ဒေါင်ပေးခှန်းမဆိပယ်း ငေါ့နောင်းကွိုပှန်ပွီးပွို့လောဂ်ရယ်။ ဟော်လူမောင် ဆေဒေါင်ကှော့လွောဂ်ရယ့် အပှဂ်တစုန်တခုကွိုမောင့် မပှုခယ့်ပေါ်။ 16အယ်းယော်ကျွောင့် ဆူ့ကွို ကှိင်ဒေါင်ပေးစေပွီး ပှန်ခွှဂ်လောဂ်မယ်” လွို့ ဆွိုလေရယ်။ 17ပိလတ်ခေါ့ အယ်းလွိုဟိုးဆွိုယော့ခှန်းအကျွောင်းမောင် ပဿခါပွားတိုကော်လော့မောင် လူရယ်အတွဂျူးလူမျွိုးအပှဂ်ဆောတဦးကွို လွဂ်ညိင်းချောင်းဆော်ခွမ့်ပေးယော့လေဆိရယ့် ထုန်းစောင်aကျွောင့်ဖှဂ်ရယ်။ 18ဟော်ပေမယ့် အယ်းလူတွို့အောလုန်းခေါ့ “ဆူ့ကွိုဆေဒေါင်ပေးလောဂ်ပေါ်။ ငေါ်တွို့အတွ ဗာရဗ္ဗကွို ခွှဂ်ပေးပေါ်” လွို့တပှောင်ထယ်း အိုဟဂ်ကျော့လေရယ်။ 19ဗာရဗ္ဗဟော် မွှို့ထားမောင်ဖှဂ်ပွားခယ့်ရယ့် ရောမအစွိုးရောကွို တိုလောင်ပုန်ကန်မုမောင် ပေါ်ဝမ်ဖဂ်ဆဂ်မုနောင့် လူဆဂ်မုအတွထွောင်ထားမောင် ထည့်ထောခှန်း ခေါင်ယော့ဆူဖှဂ်ရယ်။ 20အယ်းယော်ကျွောင့် ပိလတ်မန်းဟော် ကွိုယ်တော်ယေရှုကွို ခွှဂ်ပေးလွိုရယ့်အတွကျွောင့် အယ်းလူစုလူဝီးကွို ထောဂ်မံပွီး ဟိုးဆွိုလေရယ်။ 21ဟော်ပေမယ့် အယ်းလူတွို့ခေါ့ “ဆူ့ကွို လဂ်ဝိုးကောဂ်တောင်ပိုမောင်တန်ပွီး ဆတ်လောဂ်ပေါ်။ ဆူ့ကွို လဂ်ဝိုးကောဂ်တောင်bပိုမောင်တန်ပွီး ဆတ်လောဂ်ပေါ်” လွို့ အိုဟဂ်ကျော့လေရယ်။ 22အယ်းအခေါ် ပိလတ်မန်းခေါ့ “ဆူဟော် စနန်ပှဂ်မုမျွိုးကွို ကျူးလွမ်ခယ့်လွို့လော။ ဆူ့ကွို ဆေဒေါင်ပေးယော့လွောဂ်ရယ့် အပှဂ်ကွို ငေါ်မတွိဘူး။ အယ်းယော်ကျွောင့် ဆူ့ကွို ကှိင်ဒေါင်ပေးပွီး ခွှဂ်ပေးလောဂ်မယ်” လွို့ တတိယော့အကှိင်ထောဂ်မန်ပွီး ဆွိုလေရယ်။ 23ဟော်ပေမယ့် အယ်းလူတွို့ဟော် ကွိုယ်တော်ယေရှုကွို လဂ်ဝိုးကောဂ်တောင်ပိုတန်ပွီး ဆတ်ဖွို့ပယ်း ဆဂ်လဂ်အိုဟဂ်ပွီး တွမ်းအောပေးနေကျော့ရယ်။ နွောဂ်ဆုန်းမောင် ဆူတွို့ယယ့်ကှာပနန်းရယ့် အိုဟဂ်တွောင်းဆွိုရယ့်အဆောင်ကျွောင့် အနောင်ယော့ဆိဆိုးလေရယ်။ 24အယ်းယော်ကျွောင့် ပိလတ်မန်းဟော် ဆူတွို့အိုဟဂ်တွောင်းဆွိုရယ့်အတောင်း ဆဖိုးတူဖွို့ ဆုန်းဖှတ်လောဂ်ပွီးနွောဂ် 25တိုလောင်ပုန်ကန်မုနောင့်လူဆတ်မုနောင့် ထွောင်ထားမောင်ပှဂ်ဒေါင်ကှော့ခေါင်နေယော့ရယ့်ဗာရဗ္ဗကွို လွဂ်ညိင်းချောင်းဆော်ခွမ့်ပေးပွီး ကွိုယ်တော်ယေရှုကွိုကော ဆူတွို့ယယ့် ဆန်ဒေါ့အတောင်းလုတ်ဖွို့အောဂ်နောင်လောဂ်လေရယ်။ 26အယ်းယော်ကျွောင့် စဂ်ဆောတွို့ဟော် ကွိုယ်တော်ယေရှုကွို ခိုဆွောင်ဆိုးခှိင် ကျေးလဂ်ဒေဆော့ခေါ့နေ ဂျေရုဆလင်မွှို့ကွိုလော်နေရယ့် ကုရေနေမွှို့ဆော ရှိမုန်ကွို ဖောင်းဆီးပွီး လဂ်ဝိုးကောဂ်တောင်ကွို အတန်းအကျောဂ်ထောင်းစေပွီး ကွိုယ်တော်ယေရှုယယ့်နွောဂ်ကွို လောဂ်စေခယ့်ရယ်။ 27လူမျောစွာတွို့ဟော်လယ်း ကွိုယ်တော်ယေရှုယယ့်နွောဂ်ကွို လောဂ်ပေါ်လော်ကျော့လေရယ်။ အယ်းလူတွို့အထားမောင် ကွိုယ်တော်ယေရှု ဆေဆုန်းတို့မောင်ဖှဂ်ရယ့်အတွ ဝုန်းနည်းကျော့နန်းလွို့ ယန်ပတ်မျောကွိုထုရောဂ်ပွီး ကှာလွောင်စွာငွိုကျွယ်းနေကျော့ရယ့် အမျွိုးဆမီးတွို့ဟော်လယ်း ကွိုယ်တော်ယေရှုယယ့် နွောဂ်တိုကွိုလောဂ်ပေါ်လော်ကျော့လေရယ်။ 28အယ်းယော်ကျွောင့် ကွိုယ်တော်ယေရှုဟော် အယ်းအမျွိုးဆမီးတွို့ဖဂ်ကွို ခှယ့်ပွီး “ဂျေရုဆလင်ခေါ့ အမျွိုးဆမီးရယ်၊ ငေါ့အတွ မငွိုကျွယ်းကျော့နောင့်။ အယ်းအစော နန်တွို့နောင့် နန်တွို့ယယ့်ဆောဆမီးရယ်အပိုဖှဂ်လော်မယ့် အယော်ရယ်အတွကွိုပယ်း ငွိုကျွယ်းကျော့ပေါ်။ 29အကျွောင်းမောင်ကော ‘ကွိုယ်ဝမ်မဆွောင်ဖူးရယ့် အမွှုံဖှဂ်နေရယ့်အမျွိုးဆမီးနောင့် လူပယ့်ငါကွို နန်းမတောဂ်ဖူးရယ့်အမျွိုးဆမီးမျောဟော် ကောင်ကွောင်းကျော့ရယ်’ လွို့ လူရယ်ခေါ့ ဟိုးဆွိုကျော့မယ့်အခိင်ဟော် မကျော်ခန်ကှော့ယွောဂ်လော်တို့မောင် ဖှဂ်ရယ်။ 30အယ်းနွောဂ် လူရယ်ဟော် တွောင်မျောကွို ‘ငေါ်တွို့အပို ပွှိုကှော့ကှော့ကျော့ပေါ်’ လွို့ဟိုးကြောပွီး တွောင်ကွိင်းရယ်ကွိုလည်း ‘ငေါ်တွို့ကွို ဖုန်းအုပ်ကျော့ပေါ်’ လွို့ ဟိုးဆွိုကျော့လောဂ်မယ်။ 31စိင်းနေရယ့် ဆတ်ပန်လွိုမျွိုးဖွှောင့်မတ်ရယ့်ငေါ့ကွို ဆူတွို့ဟော် ဟော်လွိုမျွိုးပှုကျော့ရယ့်ဆွိုယန် ချွောဂ်သွေ့နေရယ့်ဆတ်ပန်လွိုမျွိုးဖှဂ်ရယ့် အပှဂ်ပေးခှန်းခေါင်ယော့မယ့် နန်တွို့ကွို ပွိုပွီး ဆွိုးဆွိုးဝါးဝါး ပှုမူကျော့မောင် အမင်ပယ်းဖှဂ်ရယ်” လွို့မိင့်တိုမူလေရယ်။ 32စဂ်ဆောမျောဟော် အချောရော်ဇဝဂ်ဆောနေယွောဂ်ကွိုလယ်း ဆေဒေါင်ပေးဖွို့အတွ ကွိုယ်တော်ယေရှုနောင့်အတူ ခိုဆွောင်ဆိုးခယ့်ကျော့လေရယ်။ 33ဆူတွို့ဟော် ဦးခွေါင်းခွံလွို့ ခိုရယ့်အရောဂ်ကွိုယွောဂ်ရယ့်အခေါ် ကွိုယ်တော်ယေရှုကွို လဂ်ဝိုးကောဂ်တောင်ပိုမောင်တန်ပွီး ဆောင်နောင့်ရောဂ်လောဂ်ကျော့လေရယ်။ ကွိုယ်တော်နောင့်အတူ ရော်ဇဝဂ်ဆောနေယွောဂ်တွို့ကွို လဂ်ဝိုးကောဂ်တောင်ပိုမောင် ဆောင်နောင့်ရောဂ်ထောခယ့်ကျော့ရယ်။ ကွိုယ်တော်ဟော် အယ်းဆူတွို့နေယွောဂ်ကျောမောင်ဆိရယ့် အလာခေါ့ လဂ်ဝိုးကောဂ်တောင်ပိုမောင် ဆိနေခယ့်ရယ်။ 34အယ်းအခေါ် ကွိုယ်တော်ယေရှုခေါ့ ဆူ့ကွိုလဂ်ဝိုးကောဂ်တောင်ပို တန်ကျော့ရယ့်ဆူမျောအတွ “အွို ဖော့ဖရောဆန်၊ ဆူတွို့ဟော် ဆူတွို့ စော်ကွိုလုတ်နေမိရယ်ဆွိုတော်ကွို မဆိဆကျော့ရယ့်အတွ ဆူတွို့ကွို ခွမ့်ခွှဂ်ပေးတိုမူပေါ်” လွို့ ဆုတွောင်းပေးခယ့်လေရယ်။ အယ်းနွောဂ်မောင် စဂ်ဆောမျောဟော် ကွိုယ်တော်ယယ့်အဝဂ်မျောကွိုမယ်းနောဂ်ပွီး ခွားဝီယူကျော့ရယ်။ 35လူရယ်ဟော်လယ်း အယ်းအရောဂ်မောင်မတ်ပွီး စွောင့်ကျေ့နေကျော့လေရယ်။ အယ်းနွောဂ်မောင် ဂျူးလူမျွိုးအကျွီးအကားမျောဟော် ကွိုယ်တော်ယေရှုကွို လွှောင်ပွှောင်ခယ့်ကျော့ပွီး “ဆူဟော် အချောလူမျောကွို ကာတန်ခယ့်ရယ်။ ဆူဟော် ဖရောဆန်ယွီးကွောဂ်တိုမူထောရယ့် မေရှိယမင်ယန် ဆူ့ကွိုယ်ဆူကာတန်ဆန့်ရယ်” လွို့ဟိုးဆွိုခယ့်ကျော့ရယ်။ 36စဂ်ဆောတွို့ဟော်လယ်း ကွိုယ်တော်ယေရှုကွို လွှောင်ပွှောင်ခယ့်ကျော့ပွီး ကွိုယ်တော်အနီးကွို ဝိုင်ခှဉ်cကွိုဆွောဂ်ခေါင်းပွီးယန် 37“နန်ဟော် ဂျူးလူမျွိုးတွို့ယယ့်ဘရန်မင်ယန် ကွိုယ့်ကွိုကွိုယ် ကာတန်ပေါ်” လွို့ဟိုးဆွိုခယ့်ကျော့လေရယ်။ 38ကွိုယ်တော်ယေရှုယယ့် ဦးခွေါင်းတိုအပိုမောင်လယ်း “ဟော်လူဟော် ဂျူးလူမျွိုးတွို့ယယ့် ဘရန်ဖှဂ်ရယ်” လွို့ ရယ်းထွိုးထောရယ့် ဆောင်းပုတ်ကွို ခှိဆွားထောလေရယ်။ 39အယ်းနွောဂ်မောင် လဂ်ဝိုးကောဂ်တောင်ပိုမောင် ဆွားကောဂ်ထောခှန်းခေါင်ယော့ရယ့် ရော်ဇဝဂ်ဆောတဦးထားခေါ့ တဦးခေါ့လယ်း ကွိုယ်တော်ယေရှုကွို “နန်ဟော်မေရှိယမင်ယန် နန့်ကွိုနန်ကာတန်ပေါ်။ ငေါ်တွို့ကွိုလယ်း ကာတန်ပေါ်” လွို့စိုကောဟိုးဆွိုလေရယ်။ 40ဟော်ပေမယ့် တချောရော်ဇဝဂ်ဆောတယွောဂ်ခေါ့ အယ်းလူကွို “နန်ဟော် ဟော်လွိုမျွိုး ဟိုးဆွိုခှန်းမလုတ်ဆန့်ပေါ်။ နန်ဟော်လယ်း ဟော်လူလွိုမျွိုးပယ်း ဆေယော့တို့မောင်ဖှဂ်ရယ့်အတွကျွောင့် ဖရောဆန်ကွို ရွိုဆေလေးစောဆန့်ရယ်။ 41ငေါ်တွို့နေယွောဂ်ဟော် ကျူးလွမ်ခယ့်ရယ့်အပှဂ်ဒုစရောဂ်မျောနောင့် ထောဂ်တန်ရယ့်ပှဂ်တောင်ကွိုခေါင်ယော့ဖွို့အတွ ဟော်နည်းလောင်းနောင့်အပှဂ်ပေးခေါင်ယော့ခှန်းဟော် မင်ကန်ရယ်။ ဟော်ပေမယ့် ဟော်လူမောင်ကော စော်အပှဂ်ကွိုမောင့် ကျူးလွမ်ထောခှန်းမဆိ” လွို့ဆုန်းမော့ဟိုးဆွိုခယ့်လေရယ်။ 42အယ်းအခေါ် ဆူခေါ့ဆလဂ်ပွီး ကွိုယ်တော်ကွို “နန်ဟော် ဆန်ဘရန်တပေါအဖှဂ် အုတ်စွိုးဖွို့ပှန်လော်ရယ့်အခှိင်မောင် ငေါ့ကွို ကာတန်ဖွို့အမတ်ယော့ပေးပေါ်” လွို့ ရွှောဂ်တန်လေရယ်။ 43ကွိုယ်တော်ယေရှုခေါ့ ဆူ့ကွို “နန့်ကွို ငေါ်အဆေအချော်ဟိုးမောင်ကော နန်ဟော် ခုနေ့မောင်ပယ်း ပရဒိသုဘုံdမောင် ငေါ်နောင့်အတူဆိနေမောင်ဖှဂ်ရယ်” လွို့ မိင့်တိုမူရယ်။ 44အယ်းအခှိင်မောင်ကော နေမွယ်းတည့်ခှိင်eဖှဂ်ရယ်။ အယ်းအခှိင်ခေါ့စော့ပွီးညော့ခန်းဆုန်းနော်ရီအထိ ကဘော်မှေတခုလုန်းဟော်မယ်းမွောင်နေလေရယ်။ 45အကျွောင်းမောင်ကော နေယယ့်အလန်းယွောင်ဟော် ပျွောဂ်ကွာဆိုးရယ့်အတွကျွောင့်ဖှဂ်ရယ်။ အယ်းအခှိင်မောင် ဗိမာန်တိုအတွမ်းမောင်ဆိရယ့်ကန့်လန့်ကော်ဟော်လယ်း နေချောင်းကွားဆိုးလေရယ်။ 46အယ်းအခှိင်မောင် ကွိုယ်တော်ယေရှုဟော်လယ်း အဆောင်ကှာနောင့် “အို ဖော့ဖရောဆန်၊ ငေါ့ယယ့်ဝိညာဉ်ကွို အဖော့ဖရောယယ့်လဂ်ထားနောင်း အောဂ်နောင်ပေါ်ရယ်” လွို့ဟိုးပွီးရယ့်နွောဂ်မောင် အဆတ်ချုပ်ညိင်းတိုမူရယ်။ 47ဟော်အဖှဂ်ပျဂ်ကွို မျိုတွိယော့ရယ့် ရောမတောဂ်မူးဟော် ဖရောဆန်ယယ့် ဖုန်းတခွိုးကွို ခှီးမွမ်းပွီး “ဟော်လူဟော် အမင်တကာပယ်း အပှဂ်မဆိရယ့်လူ ဖှဂ်ရယ်” လွို့ဟိုးဆွိုခယ့်လေရယ်။ 48ဟော်အဖှဂ်အပျဂ်မျောကွို ကျေ့ရှုဖွို့ စုဝီးယွောဂ်ဆိလော်ကျော့ရယ့် လူထုအရိတ်ဆတ်အပွောင်းတွို့ဟော်လယ်း ကွိုယ်တော်ယေရှုယယ့် အဖှဂ်ကွို မျိုလောဂ်ကျော့ယော့ရယ့်အခေါ် ဝုန်းနယ်းပူဆွီးနန်းလွို့ကွိုယ့်ယယ့်ယန်ဘတ်ကွိုထုပွီး ပှန်ဆိုးကျော့လေရယ်။ 49ကွိုယ်တော်ယေရှုယယ့် အဆိမိင့်ဆွေအပွောင်းတွို့ခေါ့စော့ပွီး ဂါလိလဲပှယ်ခေါ့နေ ကွိုယ်တော်ယယ့်နွောဂ်ကွို လောဂ်ပေါ်လော်ကျော့ရယ့် အမျွိုးဆမီးအပွောင်းတွို့ဟော်လယ်း ဟော်အဖှဂ်အပျဂ်မျောကွို မနီးမဝီးခေါ့နေ လောင်းမျိုခယ့်ကျော့လေရယ်။ 50အယ်းအခှိင်မောင် ယောသပ်လွို့ခိုရယ့် လူတယွောဂ်ဟော် အယ်းနေယော်နောင်းလော်လေရယ်။ ဆူဟော်ယုဒပှယ် အရိမဿဲမွှို့ခေါ့ဖှဂ်ရယ်။ ဆူဟော် ဖွှောဂ်မတ်မင်ကန်ရယ့်ဆူတယွောဂ် ဖှဂ်ပွီး ဂျူးကောင်စီအဖွဝမ်တယွောဂ်ဖှဂ်ရယ်။ 51ဆူဟော် ကွိုယ်တော်ယေရှုနောင့် ပဂ်ဆဂ်ပွီး တရောစီယန်ရယ်းအဖွဂ်ယယ့် စီယန်ဆုန်းဖှဂ်ချဂ်မျောနောင့် လုတ်ဆွောင်ချဂ်တွို့ကွို သဖိုးမတူရယ့်လူဖှဂ်ပွီး ဖရောဆန်ယယ့်ဆော်ဆနော်ပိုထွမ်းမယ့်အခှိင်ကွို စွောင့်မျိုနေရယ့်ဆူလယ်း ဖှဂ်ရယ်။ 52ဆူဟော် အုတ်ချုပ်ဆူပိလတ်နောင်းကွိုဆိုးပွီး ကွိုယ်တော်ယေရှုယယ့်အလွောင်းကွို ယူဆွောင်ပွီး ဆဂျွိုခွမ့်ပေးဖွို့တွောင်းရွှောဂ်လေယော် ပိလတ်ဟော်လယ်း သဖိုးတူခယ့်ရယ်။ 53အယ်းနွောဂ် ယောသပ်ဟော် အချောဆူမျောယယ့်အကူအညီနောင့် ကွိုယ်တော်ယေရှုယယ့်အလွောင်းကွို လဂ်ဝိုးကောဂ်တောင်ပိုခေါ့နေ အွောဂ်ကွိုခှော့ပွီး ကွောင်းမွမ်ရယ့်ပိစော့အချယ်ကျွီးနောင့် အလွောင်းကွို ပတ်ပွီး ကွှောဂ်ဆွောင်ထူထောဂ်ရယ့် တွောင်ကွိင်းမောင် ဖွောဂ်ထောရယ့် လှိုဏ်ဂူထားမောင် ကွောင်းကွောင်းမွမ်မွမ် ထည့်ဆွမ်းထောခယ့်လေရယ်။ အယ်းလှိုဏ်ဂူဟော် ဆင်းကှောင်းနေယော်အဖှဂ် စူခေါ့မောင့် အဆုန်းပှုထောခှန်း မဆိဆီးရယ့် ဆင်းကှောင်းဂူအဆဂ် ဖှဂ်လေရယ်။ 54ကွိုယ်တော်ယေရှုဆေရယ့်နေ့ဟော် ဥပုသ်နေ့မတောင်ခန် ဆွောဂ်ကျော်နေ့ဖှဂ်ပွီး ဥပုသ်နေ့ဟော်ယွောဂ်ဆိလော်တို့မောင်ဖှဂ်ရယ့်အတွ ဂျူးလူမျွိုးတွို့ယယ့် ထုန်းစောင်အယော့လယ်း အယ်းနေ့မွမ်းလွားပေါင်းမောင် အလုတ်မလုတ်ကျော့ဖွို့တောမှဂ်ထောလေရယ်။ 55ကွိုယ်တော်ယေရှုနောင့်အတူ မွှို့ထားကွို လောဂ်ပေါ်လော်ကျော့ရယ့် ဂါလိလဲပှယ်ခေါ့ အမျွိုးဆမီးမျောဟော်လယ်း ယောသပ်နောင့်အတူ လောဂ်ဆိုးခယ့်ကျော့ရယ်။ ဆူတွို့ဟော် ဆင်းကှောင်းဂူကွို မျိုတွိခယ့်ကျော့ပွီး ကွိုယ်တော်ယေရှုယယ့်အလွောင်းတိုကွို အယ်းဆင်းကှောင်းဂူအထားမောင် စလွိုမျွိုးထောခယ့်ရယ်ဆွိုတော်ကွိုလယ်း ကျေ့ရှုခယ့်ကျော့လေရယ်။ 56အယ်းနွောဂ် အယ်းအမျွိုးဆမီးတွို့ဟော် ဆူတွို့ယယ်အိင်မျောဆိယော် မွှို့ထားကွို ပှန်ဆိုးခယ့်ကျော့ရယ်။ အယ်းနေညော့နေပေါင်းမောင် ဆူတွို့ဟော် ကွိုယ်တော်ယေရှုယယ့်အလွောင်းကွို လိင်းပေးဖွို့အတွ အမွီးနောင့်ဆော်ဆီမျောကွို ပှန်ဆန်ခယ့်ကျော့ပွီးနွောဂ် ဖရောဆန်ယယ့်ပညောဂ်တိုမျောကွို လောဂ်နော်ပွီး ဥပုသ်နေ့မောင် အနောယူခယ့်ကျော့လေရယ်။
Currently Selected:
Luke 23: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
