Luke 24
24
1တနန်းဂနွေနေ့ မနဂ်စိုးစိုးမောင် အယ်းအမျွိုးဆမီးမျောဟော် အဆန်သင့်ပှင်ဆန်ထောရယ့် အမွီးနောင့်ဆော်ဆီမျောကွို ယူဆွောင်ပွီး ကွိုယ်တော်ယေရှုယယ့် ရုပ်အလွောင်းထောဆိရယ့် ဆင်းကှောင်းဂူနောင်း ဆိုးယွောဂ်ကျော့လေရယ်။ 2ဆူတွို့ဆင်းကှောင်းဂူအနီးကွို ယွောဂ်ကျော့ရယ့်အခေါ် ဆင်းကှောင်းဂူကွိုပိထောရယ့် ကျွီးမောလေးလောင်ရယ့် ကွှောဂ်တုန်းကျွီးကွို တယွောဂ်ယွောဂ်ခေါ့ တွမ်းဖာထောသလွိုမျွိုး အဝီးတနေယော်နောင်း ယွောဂ်နေရယ့်ဟော်ကွို မျိုတွိခယ့်ကျော့ယော့ရယ်။ 3အယ်းယော်ကျွောင့် ဆူတွို့ဟော်ဆင်းကှောင်းဂူထားကွို ဝမ်ယွောဂ်ခယ့်ကျော့ပွီး ကွိုယ်တော်ယေရှုယယ့်အလွောင်းကွို ချော်ဖွယ်ခယ့်ကျော့ပေမယ့်လယ်း ကွိုယ်တော်ယယ့်အလွောင်းတိုဟော် အယ်းနေယော်မောင် မဆိနေခယ့်ပေါ်။ 4ဆူတွို့ဟော် ကွိုယ်တော်ယေရှုယယ့်အလွောင်းတိုနောင့် ဖဂ်ဆဂ်ပွီးစလွို့ ဖှဂ်ရယ်ဆွိုတော်ကွို စိင်းစောလွို့ မယော့နောင်ဖှဂ်နေကျော့ခှိင်မောင် ပွှောင်လဂ်နေရယ့်အဝဂ်အစောမျောကွို ဝဂ်ဆန်ထောဆူနေဦးဟော် တလန့်ပိုလော်ပွီး ဆူတွို့ဘေးမောင် လော်မတ်နေခယ့်ကျော့ရယ်။ 5အယ်းယော်ကျွောင့် အမျွိုးဆမီးတွို့ဟော် ကော်တရော်ကျွောဂ်လန့်တွိင်လုတ် ဆိုးကျော့ပွီး မှေကျွီးပိုမောင် ဆူတွို့ယယ့်ဦးခွေါင်းကွိုထိပွီး အယ်းလူနေဦးကွို အရွိုအဆေပေးကျော့လေရယ်။ အယ်းလူနေယွောဂ်ခေါ့ ဆူတွို့ကွို “လူဆေမျောကွိုပယ်း ထောရယ့်ဆင်းကှောင်းဂူမောင် အဆဂ်ချန်ရယ့်ဆူကွို စော်အတွကျွောင့် ချော်ဖွယ်နေကျော့သလော။ 6ဆူယော် ဟော်ဆင်းကှောင်းဂူမောင်မဆိတို့ဘူး။ ကွိုယ်တော်ဟော် ဆေယော်ခေါ့နေ အဆဂ်ပှန်ချန်ဆိုးခယ့်ပီဖှဂ်ရယ်။ ကွိုယ်တော်ဟော် နန်တွို့အောလုန်းနောင့်အတူ ဂါလိလဲပှယ်မောင် ဆိခယ့်ရယ့်အခှိင်ခေါ့ မိင့်တိုမူခယ့်ရယ့်အယော်ရယ်ကွို ဆတိယော့ကျောပေါ်။ 7ငေါ်လူဆောတိုကွို အပှဂ်ဒုစရောဂ် ဆမောရယ်ယယ့် လဂ်ထားကွို အောဂ်နောင်ခှန်းခေါင်ယော့မယ်။ ငေါ့ကွို လဂ်ဝိုးကောဂ်တောင်ပိုမောင်တန်ပွီး ဆူတွို့ယယ့် ဆတ်ဖှတ်ခှန်းကွို ခေါင်ယော့လောဂ်မယ်။ ဟော်ပေမယ့် ဖရောဆန်ဟော်ငေါ့ကွို ဆုန်းရဂ်မွှောဂ်ရယ့် နေ့မောင် အဆပှန်ချန်စေတိုမူလောဂ်မယ်လွို့ မိင့်တိုမူခယ့်ရယ်မဟွိလော” လွို့ဆွိုကျော့ရယ်။ 8အယ်းနွောဂ် အမျွိုးဆမီးတွို့ဟော် ကွိုယ်တော်ယေရှုမိင့်တိုမူခယ့်တော်မျောကွို ဆတိယော့ဆိုးခယ့်ကျော့ရယ်။ 9အယ်းယော်ကျွောင့် ဆင်းကှောင်းဂူခေါ့နေ ပှန်လော်ခယ့်ကျော့ပွီး မွှို့ကွိုယွောဂ်ဆိရယ့်အခေါ် အယ်းအဖှဂ်အပျဂ်မျောအောလုန်းကွို အထူးဆပယ့်တိုတဆာ့တဦးနောင့် တချောဆပယ့်မျောကွိုပေါ် ဟိုးပျော့ခယ့်ကျော့လေရယ်။ 10အယ်းအကျွောင်းအယော်မျောကွို အထူးဆပယ့်တိုတွို့ကွို ပှန်ဟိုးပျော့ကျော့ရယ့်လူမျောမောင် မာဂဒလဝိုခေါ့ မာရိ၊ ယောဟန္န၊ ယာကုပ်ယယ့်မွေ့ဖှဂ်ရယ့်ဆူ မာရိနောင့် အချောအမျွိုးဆမီးမျော ဖှဂ်ကျော့ရယ်။ 11ဟော်ပေမယ်း အယ်းအမျွိုးဆမီးတွို့ ဟိုးကျောခယ့်ရယ့်စကောတွို့ဟော် အဓိပါမဆိလွို့ ထန်ကျော့ရယ့်အတွကျွောင့် ဆပယ့်တိုတွို့ဟော် မယုန်ကျည်ခယ့်ကျော့ပေါ်။ 12ဟော်ပေမယ့် ပေတရုဟော် မတ်တတ်ထော့ယောဂ်လောဂ်ပွီး ဆင်းကှောင်းဂူနောင်းကွို အမှန်ပှေးဆိုးလေရယ်။ ဆူဟော် ဆင်းကှောင်းဂူကွိုယွောဂ်ရယ့်အခေါ် အထားကွိုကျေ့လောဂ်ယော် ကွိုယ်တော်ယယ့်အလွောင်းတိုကွို ပတ်ထောရယ့် အဝဂ်စော့မျောကွိုပယ်း တွိယော့လေရယ်။ အယ်းယော်ကျွောင့် ဆူဟော် အယ်းအဖှဂ်အပျဂ်ကွို အောင့်အိုးပွီး အိင်ကွိုပှန်ခယ့်လေရယ်။ 13အယ်းနေ့မောင်ပယ်း ကွိုယ်တော်ယေရှုယယ့် အချောဆပယ့်တို နေယွောဂ်ဟော် ဂျေရုဆလင်မွှို့ခေါ့နေ ခနဂ်မှိင်လွောဂ်ဝီးရယ့် ဧမောက်ဝိုကွို ခရီးထွခယ့်ကျော့ရယ်။ 14ဆူတွို့ဟော် လောင်းခရီးမောင် ကွိုယ်တော်ယေရှုနောင့်ဖဂ်ဆဂ်ရယ့် မကျော်ဆီးခန်ခေါဂ် ဖှဂ်ပျခယ့်ရယ့် အကျွောင်းအယော်တွို့ကွို အခှန်းခှန်းဆွီးနွီးဟိုးဆွိုခယ့်ကျော့ရယ်။ 15အယ်းလွို တယွောဂ်နောင့်တယွောဂ် အခှန်းခှန်း ဆွီးနွီးဟိုးဆွိုပွီး ဆိုးနေရယ့်အခှိင်မောင် ကွိုယ်တော်ယေရှုဟော် ဆူတွို့အနောကွို ကောဂ်လော်ပွီး ဆူတွို့နောင့်အတူ လောင်းရွှောဂ်ပွီး ကျို့တိုမူလေရယ်။ 16ဟော်ပေမယ့် ဖရောဆန်ဟော် ဆူတွို့ကွို ကွိုယ်တော်ယေရှုကွို မှတ်မိနောင်ခှန်းမဆိစေဖွို့အတွ ကော်ဆီးထောတိုမူရယ့်အတွကျွောင့် ဆူတွို့ဟော် ကွိုယ်တော်ယေရှုကွို မျိုပေမယ့် လယ်း မမတ်မိခယ့်ကျော့ပေါ်။ 17အယ်းနန်လွို့ ကွိုယ်တော်ယေရှုခေါ့ “နန်တွို့ဟော် လောင်းခရီးမောင် စော်အကျွောင်းအယော်ရယ်ကွို ဆွီးနွီးနေကျော့သလော” လွို့ မေးတိုမူရယ့်အခေါ် ဆူတွို့နေဦးဟော်လယ်း ညွိုးငါရယ့်မျနော်နောင့် အယ်းနေယော်မောင် မတ်လောဂ်ကျော့လေရယ်။ 18အယ်းနွောဂ် ဆူတွို့နေဦးထားခေါ့ ကလောဖလွို့ ခိုရယ့်ဆူခေါ့ ကွိုယ်တော်ယေရှုကွို “ဂျေရုဆလင်မွှို့ကွို အလယ်လော်ကျော့ရယ့် လူတွို့ထားမောင် ပွီးခယ့်ရယ့်ရတ်အနယ်းငါကော့ ဖှဂ်ပျဂ်ခယ့်ရယ့်အယော်မျောကွို မဆိဆရယ့်ဆူမောင် နန့်တယွောဂ်ထယ်းပယ်း ဆိရယ်” လွို့ ဆွိုလေရယ်။ 19အယ်းယော်ကျွောင့် ကွိုယ်တော်ယေရှုခေါ့ “စော်အယော်မျောဖှဂ်ပျဂ်ခယ့်လွို့ လော” လွို့ မေးတိုမူရယ့်အခေါ် ဆူတွို့ခေါ့ ကွိုယ်တော်ကွို “နာဇရက်မွှို့ဆော ကွိုယ်တော်ယေရှုနောင့် ပဂ်ဆဂ်ရယ့် အဖှဂ်အပျဂ်မျောပယ်းဖှဂ်ရယ်။ ဆူဟော်ပရောဖက်တပေါ ဖှဂ်ပွီး ဖရောဆန်ခေါ့ဆူ့ကွိုလူအမျောကွို ဟိုးကျောသွန်သင်ဖွို့နောင့် ကျွီးမှဂ်ရယ့်အောင့်အိုးစရော်အမုရယ်ကွိုပှုနောင်ဖွို့အတွ တန်ခွိုးတိုနောင့်အခွမ့်အော်နော်ကွို ပေးအောဂ်ထောပေါ်ရယ်။ 20ဟော်ပေမယ့်ပရောဟိတ်အကျွီးအကားမျောနောင့် ဂျူးလူမျွိုးခွေါင်းဆွောင်မျောခေါ့ ကွိုယ်တော်ကွို ဆေဒေါင်ပေးပွီး စီယန်ဖွို့အတွ ရောမအော်နော်ပေါင်မျောလဂ်ထားကွို အောဂ်နောင်ခယ့်ကျော့ပွီး အယ်းအော်နော်ပေါင်တွို့ခေါ့လယ်း ကွိုယ်တော်ကွိုလဂ်ဝိုးကောဂ်တောင်ပိုမောင်ဆောင်နောင့်ရောဂ်ပွီး အဆေဆတ်ခယ့်ကျော့ရယ်။ 21ကွိုယ်တော်ယေရှုဟော် ငေါ်တွို့အစ္စရယ်းလူမျွိုးအပွေါင်းတွို့ကွို ငေါ်တွို့ယယ့်ရန်ဆူမျောလဂ်ထားခေါ့နေ ကာတန်တိုမူမယ့်မေရှိယဖှဂ်မယ်လွို့ မျိုလန့်ထောခယ့်ကျော့ပေါ်ရယ်။ ဟော်ပေမယ့် အယ်းအယော်တွို့ဟော် ဖှဂ်လော်မယ်လွို့ မထန်တို့ပေါ်။ အကျွောင်းမောင်ကော ကွိုယ်တော်နောင့်ပဂ်ဆဂ်ရယ့် အဖှဂ်အပျမျော ဖှဂ်ပျခယ့်တော်ဟော် ဆုန်းရတ်တောင်တောင် ဆိခယ့်ပွီဖှဂ်ရယ်။ 22ဟော်ပေမယ့် ငေါ်တွို့ထားခေါ့ အမျွိုးဆမီးတခှို့ဟော် ခုနေ့မနဂ်စိုးစိုးမောင် ကွိုယ်တော်ယေရှုယယ့် အလွောင်းတိုထောဆိရယ့် ဆင်းကှောင်းဂူကွို ဆိုးခယ့်ကျော့ပေမယ့်လယ်း 23ကွိုယ်တော်ယေရှုယယ့်အလွောင်းတိုကွို မတွိခယ့်ကျော့ယော့ပေါ်။ အယ်းနွောဂ် နတ်ဒေဝါတွို့ဟော် ဆူတွို့ကွို ကွိုယ်ထန်ပျော့ပွီး ကွိုယ်တော်ယေရှုဟော် အဆဂ်ချန်ပှန်တိုမူပီလွို့ ဟိုးပျော့ခယ့်တော်ကွို ဆူတွို့ခေါ့ ငေါ်တွို့ကွို ပှန်လည်ဟိုးပျော့ခယ့်လွို့ ငေါ်တို့အောင့်အိုးခယ့်ယော့ရယ်။ 24အယ်းယော်ကျွောင့် ငေါ်တွို့ထားခေါ့ လူတခှို့တွို့ဟော်လယ်း ဆင်းကှောင်းဂူကွို ဆိုးကျေ့ကျော့ရယ့်အခေါ်မောင်လယ်း အယ်းအမျွိုးဆမီးမျော ဟိုးပျော့ရယ့်အတောင်းပယ်း ကွိုယ်တော်ယေရှုယယ့်အလွောင်းတိုကွို မတွိ ခယ့်ကျော့ပေါ်” လွို့ ဆွိုကျော့လေရယ်။ 25အယ်းနွောဂ်မောင် ကွိုယ်တော်ယေရှုခေါ့ အယ်းဆပယ့်တိုနေဦးကွို “အွို လူမောဂ်တွို့ နန်တွို့ဟော် ပရောဖက်တွို့ရယ်းဆောခယ့်ရယ့်ကျောင်းစော်မောင် မေရှိယနောင့်ပဂ်ဆဂ်ရယ့် အကျွောင်းအယော်တွို့ကွိုယုန်ကျည်ဖွို့ စော်အတွကျွောင့်ခဂ်ခါးနေကျော့သလော။ 26မေရှိယဟော် ဖုန်းတိုမထန်ဆောမီ ဆားရားဒုက်ခေါ့ကွို ခေါင်စောယော့ပွီး ဆေဆုန်းယော့မယ်လွို့ ပရောဖက်မျောရယ်းဆောခယ့်ရယ့် ကျောင်းစော်မောင် ဆန်းဆန်းလန်းလန်း ဖိုပျော့ခယ့်တော်ကွို နန်တွို့မဆိဆသလော” လွို့ မိင့်တိုမူခယ့်လေရယ်။ 27အယ်းနွောဂ် ကွိုယ်တော်ယေရှုခေါ့ မောရှေနောင့် ပရောဖက်အောလုန်းတွို့ခေါ့ ရယ်းဆောခယ့်ရယ့် ကျောင်းစော်မျောခေါ့ ဆူ့ယယ့်အကျွောင်းကွို စလွိုမျွိုးရယ်းဆောဖိုပျော့ထောကျွောင်းကွို ဆပယ့်တိုတွို့ကွို ဆန်းပျော့ခယ့်ရယ်။ 28အယ်းလွိုနောင့် ကွိုယ်တော်ယေရှုနောင့်ဆပယ့်တိုနေဦးဟော် ဧမောက်ဝိုအနီးကွို ယွောဂ်ဆိလော်ကျော့ပွီး ဆပယ့်တိုတွို့ဟော် အယ်းဝိုကွို ထွဆိုးကျော့ရယ့်အခေါ် ကွိုယ်တော်ဟော် ခရီးဆဂ်ဆိုးမယ့်ပုန်စောင်ဆိလေရယ်။ 29ဟော်ပေမယ့် ဆူတွို့ခေါ့ ကွိုယ်တော်ကွို “မကျော်ခန် နေဝမ်ပွီးမွိုးချုပ်တို့မောင်ဖှဂ်ရယ့်အတွကျွောင့် ငေါ်တွို့နောင့်အတူ လော်ယွောဂ်ပွီး တည်းခွို ပေါ်” လွို့ကွိုယ်တော်ကွို ဖိင့်ခိုလေရယ်။ အယ်းဟော်ကျွောင့် ကွိုယ်တော်ယေရှုဟော်လယ်း ဆူတွို့နောင့်အတူ အိင်ထားကွို လောဂ်ဆိုးတိုမူလေရယ်။ 30အယ်းနွောဂ် ကွိုယ်တော်ယေရှုဟော် ဆူတွို့နောင့်အတူစောဆွောဂ်ဖွို့ ထောင်ကျော့ရယ့်အခေါ် ကွိုယ်တော်ဟော် မွိအခှို့ကွိုယူပွီး ဖရောဆန်ယယ့်ကျယ်းဇူးတိုကွို ခှီးမွမ်းပွီး မွိကွိုဖပွီး ဆပယ့်တိုရယ်ကွို ပေးလေရယ်။ 31အယ်းအခေါ် ဖရောဆန်ဟော် ဆူတွို့ကွို မတ်မိနောင်စွမ်းတွို့ကွိုပေးတိုမူပွီး ဆူတွို့ဟော် ကွိုယ်တော်ယေရှုကွို မတ်မိလေရယ်။ ဟော်ပေမယ့် ကွိုယ်တော်ယေရှုဟော် တလန့်တဆန့် ဆူတွို့ချယ့်ခေါ့ ပျွောဂ်ကွာဆိုးလေရယ်။ 32အယ်းနွောဂ်မောင် “လောင်းခရီးမောင် ကွိုယ်တော်ဟော် ငေါ်တွို့ကွို စကောဟိုးပွီး ကျောင်းစော်ယယ့်အဓိပါကွို ငေါ်တွို့ကွို ဆန်းပျော့တိုမူနေရယ့်အခှိင်မောင် ငေါ်တွို့ယယ့်စိနလုန်းဟော် ယန်ခွိင်စိလုတ်ဆောပွီး မျိုလန်းချနောင့် ပူလွောင်နေရယ်မဟွိပေါ်လော” လွို့အခှန်းခှန်းဟိုးဆွိုကျော့ရယ်။ 33အယ်းနွောဂ် ဆူတွို့ဟော် ချခှန်းထော့ပွီး ဂျေရုဆလင်မွှို့ကွို ပှန်ကျော့လေရယ်။ ဆူတွို့ အယ်းအရောဂ်ကွို ယွောဂ်ကျော့ရယ့်အခေါ် အထူးဆပယ့်တို ဆဂ်တယွောဂ်တွို့ဟော် အချောကွိုယ်တော်ယယ့်နွောဂ်လောဂ်မျောနောင့်အတူ စုဝီးနေကျော့တော်ကွို တွိကျော့ယော့လေရယ်။ 34အယ်းစုဝီးနေဆူ အပွေါင်းတွို့ခေါ့ ဆူတွို့နေယွောဂ်ကွို “ငေါ်တွို့ ကျောဆိခယ့်ယော့ရယ့် အဖှဂ်အပျမျောဟော် အမင်ပယ်းဖှဂ်ရယ်။ ကွိုယ်တော်ဟော် ဆေခှန်းခေါ့နေ အဆဂ်ပှန်ချန်တိုမူခှန်းဟော် အမင်ပယ်းဖှဂ်ပွီး ရှိမုန်ကွိုလယ်း ကွိုယ်ထန်ပျော့ခယ့်ရယ်” လွို့ အခှန်းခှန်းဟိုးဆွိုလေရယ်။ 35အယ်းနွောဂ် ဧမောက်ကျေးဝိုခေါ့ ပှန်လော်ခယ့်ကျော့ရယ့် ဆပယ့်တိုနေယွောဂ်တွို့ကော့ လောင်းခရီးမောင် ကွိုယ်တော်ယေရှုဟော် ဆူတွို့ယယ့်ချယ့်မောင် ပိုလော်ပွီး လောင်းတရွှောဂ် စကောဟိုးလော်ကျွောင်းနောင့် ကွိုယ်တော်ခေါ့ မွိကွိုဖပွီးပေးရယ့်အခေါ်မောင့်ပယ်း ကွိုယ်တော်ကွို မှတ်မိလော်ကျော့ကျွောင်း ဆူတွို့ကျုန်တွိခယ့်ယော့ရယ့် အဖှဂ်အပျမျောကွို လူတောင်းကွိုဟိုးပျော့ကျော့လေရယ်။ 36ဆပယ့်တိုတွို့ဟော် အယ်းလွိုမျွိုးအဖှဂ်အပျဂ်မျောကွို လူတောင်းကွို ဟိုးပျောနေကျော့ခှိင်မောင်ပယ်း တလန့်ကျွီး ကွိုယ်တော်ယေရှုဟော် ဆူတွို့အောလုန်းယယ့် အလာမောင် မတ်တတ်ယောဂ်ပွီး “ဖရောဆန်ဟော် နန်တွို့ကွို ညိင်းခှောင်းခှန်းအပွေါင်းကွို ပေးဆနောတိုမူပေါ်စေ” လွို့ မိင့်တိုမူလေရယ်။ 37ဟော်ပေမယ့် ဆပယ့်တိုတွို့ဟော် ကွိုယ်တော်ကွိုမျိုရယ့်အခေါ် ကဆေချွောဂ်ရယ်လွို့ ထန်မတ်ပွီး ကော်တရော်ကျွောဂ်လန့်ဆိုးကျော့လေရယ်။ 38အယ်းယော်ကျွောင့် ကွိုယ်တော်ယေရှုခေါ့ ဆူတွို့ကွို “နန်တွို့ စော်ကျွောင့် ကျွောဂ်လန့်နေကျော့သလော။ ငေါ်အဆချန်နေရယ်ဆွိုတော်ကွို သံသယော့ဝမ်နေကျော့သလော။ 39ငေါ့ယယ့် လဂ်ရယ် ခှေထွောဂ်ရယ်ကွို ကျေ့ပေါ်။ ငေါ် အမင်ပယ်းဖှဂ်ပေါ်ရယ်။ ငေါ့တကွိုယ်ကွို ကောင်ကျေ့ကျော့ပေါ်။ ကဆေမောင် အရွိုးနောင့်အဆောမဆိ။ ဟော်ပေမယ့် ငေါ့မောင်ကော အရွိုးနောင့်အဆော ဆိတော်ကွို နန်တွို့ မျိုကျော့ပေါ်ရယ်” လွို့ မိင့်တိုမူလေရယ်။ 40အယ်းလွိုဟိုးဆွိုပွီးနွောဂ် ကွိုယ်တော်ဟော် ဆူ့ယယ့်လဂ်နောင့် ခှေထွောဂ်တွို့ခေါ့ ဒေါင်ယော်မျောကွို ဆပယ့်တိုတွို့ကွို ပျော့တိုမူလေရယ်။ 41ဆပယ့်တိုတွို့ဟော်လယ်း ကွိုယ်တော်အဆပှန်ချန်လော်တော်ကွို မယုန်ကျည်နောင်ကျော့ပေမယ့်လယ်း ကွိုယ်တော်ကွို မျိုတွိကျော့ယော့ရယ့်အတွ ကော်တရော်အောင့်အိုးပွီး ဝုန်းမွှောဂ်ခယ့်ကျော့လေရယ်။ အယ်းယော်ကျွောင့် ကွိုယ်တော်ယေရှုခေါ့ ဆူတွို့ကွို “ငေါ့ကွို စောစရော် တခုခုပေးကျော့ပေါ်” လွို့ မိင့်တိုမူလေရယ်။ 42အယ်းနန်လွို့ ဆူတွို့ဟော် ကွိုယ်တော်ကွို ငေါကန်တပေါင်းကွို ပေးခယ့်လေရယ်။ 43ကွိုယ်တော်ယေရှုဟော်လယ်း ယူလောဂ်ပွီး ဆူတွို့ ချယ့်မောင်ပယ်း စောတိုမူလေရယ်။ 44အယ်းနွောဂ် ကွိုယ်တော်ခေါ့ ဆူတွို့ကွို “ငေါ်ဟော် နန်တွို့နောင့်အတူဆိခယ့်ရယ့်အခိင်ခေါ့ မိင့်တိုမူခယ့်ရယ့်အတောင်း မောရှေယယ့် ပညောဂ်ကျောင်း၊ ပရောဖက်မျောရယ်းဆောခယ့်ရယ့် ကျောင်းမျောနောင့် ဆာလံကျောင်းမျောမောင် ငေါ့ယယ့်အကျွောင်းနောင့် ဖဂ်ဆဂ်ပွီး ဖိုပျော့ထောရယ့်အကျွောင်းအယော်အောလုန်းဟော် အမင်တကာဖှဂ်ပျလော်ယော့မယ်လွို့ ငေါ်မိင့်ဆွိုခယ့်ရယ့်အတောင်း အခုမောင် အမင်တကာပယ်း ဖှဂ်ပျလော်ပွီဖှဂ်ရယ်” လွို့ မိင့်တိုမူလေရယ်။ 45အယ်းနွောဂ် ကျောင်းစော်တိုကွို နောလယ်နောင်စေဖွို့ ဆပယ့်တိုတွို့ယယ့် အဆိညင်ကွိုဖွမ့်ပေးတိုမူလေရယ်။ 46ကွိုယ်တော်ခေါ့ ဆပယ့်တိုရယ်ကွို “ကျောင်းစော်မောင် ရယ်းဆောထောတော်ကော့ ကာတန်ဆန်မေရှိယဟော် ဆားရားဒုက်ခေါ့မျောကွို ခေါင်စောယော့ပွီးအဆေခေါင်မောင်ဖှဂ်ပေမယ့်လယ်း ဆုန်းရတ်မွှောဂ်ရယ့်နေ့မောင် ဆေခှန်းခေါ့နေအဆဂ်ပှန်ချန်တိုမူလောဂ်မောင် ဖှဂ်ရယ်။ 47မေရှိယယယ့်ဆပယ့်တိုမျောဟော် အပှဂ်ဒုစရောဂ်မျောခေါ့နေ ခွမ့်ခွှဂ်ခေါင်ယော့ဖွို့ နွောင်တော့ယော့ပွီး ဖရောဆန်ဖကွို ပှန်လည့်ကျော့ဆူအောလုန်းဟော် ကာတန်ခှန်းခေါင်ယော့မယ်ဆွိုရယ့် မန်ဂလော်ဆတန်းကွောင်းကွို ဂျေရုဆလင်မွှို့ ခေါ့နေစော့ပွီး လူမျွိုးအပွေါင်းတွို့နောင်းကွိုဆိုးပွီး ဟိုးကျောလောဂ်မယ် လွို့ ကျောင်းစော်မောင် ရယ်းဆောဖိုပျော့ ထော့ရယ်။ 48အယ်းဟော်ကျွောင့် နန်တွို့ဟော် ငေါ်ကျုန်တွိခယ့်ယော့ရယ့်အဖှဂ်အပျဂ်မျောဟော် အမင်ဖှဂ်ကျွောင်း မျိုတွိခယ့်ကျော့ရယ့်ဆူမျောဖှဂ်ကျော့ရယ့်အတွ ဟော်အကျွောင်းအယော်တွို့ကွို လူရယ်ကွို ဆဆေခေါင်ပွီး ဟိုးပျိုးကျော့ယော့မောင် ဖှဂ်ရယ်။ 49ငေါ်ဟော် ငေါ့ယယ့် ဖော့ဖရောဆန်ပေးထောတိုမူခယ့်ရယ့် ကတိတိုအတောင်း ညင်အလန်းတိုကွို နန်တွို့နောင်းကွို စေခွှဂ်မောင်ဖှဂ်ရယ်။ ဟော်ပေမယ့် နန်တွို့ဟော် ဆွယ်မွှို့တိုခေါ့နေ တခွိုးတိုကွို လဂ်ခေါင်ယော့ဆိမယ့် အခိင်မတောင်မီအထိ ဂျေရုဆလင်မွှို့မောင်ပယ်း စွောင့်နေကျော့ပေါ်” လွို့ မိင့်တိုမူလေရယ်။ 50အယ်းနွောဂ်မောင် ကွိုယ်တော်ယေရှုဟော် ဆူ့ယယ့်ဆပယ့်တိုမျောကွို မွှို့ပှင်ဆိ ဗေသနိဝိုအနီးကွို ခိုဆိုးခယ့်ပွီးနွောဂ် ကွိုယ်တော်ဟော် ဆွယ်မွှို့တိုကွို မျိုကျေ့ယန်း လဂ်တိုကွိုမွှောဂ်ပွီး ဆပယ့်တိုတွို့ကွို ဆုပေးလေရယ်။ 51ကွိုယ်တော်ယေရှုဟော် အယ်းလွိုဆုပေးနေခိင်အတွမ်းမောင်ပယ်း ဖရောဆန်ဟော် ကွိုယ်တော်ကွို ဆွယ်မွှို့တိုကွို ခိုဆွောင်ဆိုးခှန်း ခေါင်ယော့လေရယ်။ 52ဆူတွို့ဟော် ကွိုယ်တော်ယေရှုကွို ဒူးထွောဂ်ချယ့်ခွိုးကျော့ပွီးယန် ဝုန်းမွှောဂ်ဝုန်းဆော်စွာနောင့် ဂျေရုဆလင်မွှို့ကွို ပှန်ဆိုးကျော့လေရယ်။ 53ဆူတွို့ဟော် ဂျေရုဆလင်မွှို့ကွိုယွောဂ်ရယ့်အခေါ် ဗိမာန်တိုဝမ်းကွိုဆိုးပွီး ဖရောဆန်ယယ့် ဂုန်ကျယ်းဇူးတိုကွို အမှားမပျဂ် ခှီးမွမ်းကျော့လေရယ်။
Currently Selected:
Luke 24: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
