Popular Bible Verses from Luke 24

Share

ငေါ်ဟော် ငေါ့ယယ့် ဖော့ဖရောဆန်ပေးထောတိုမူခယ့်ရယ့် ကတိတိုအတောင်း ညင်အလန်းတိုကွို နန်တွို့နောင်းကွို စေခွှဂ်မောင်ဖှဂ်ရယ်။ ဟော်ပေမယ့် နန်တွို့ဟော် ဆွယ်မွှို့တိုခေါ့နေ တခွိုးတိုကွို လဂ်ခေါင်ယော့ဆိမယ့် အခိင်မတောင်မီအထိ ဂျေရုဆလင်မွှို့မောင်ပယ်း စွောင့်နေကျော့ပေါ်” လွို့ မိင့်တိုမူလေရယ်။

ဆူယော် ဟော်ဆင်းကှောင်းဂူမောင်မဆိတို့ဘူး။ ကွိုယ်တော်ဟော် ဆေယော်ခေါ့နေ အဆဂ်ပှန်ချန်ဆိုးခယ့်ပီဖှဂ်ရယ်။ ကွိုယ်တော်ဟော် နန်တွို့အောလုန်းနောင့်အတူ ဂါလိလဲပှယ်မောင် ဆိခယ့်ရယ့်အခှိင်ခေါ့ မိင့်တိုမူခယ့်ရယ့်အယော်ရယ်ကွို ဆတိယော့ကျောပေါ်။

အယ်းအခေါ် ဖရောဆန်ဟော် ဆူတွို့ကွို မတ်မိနောင်စွမ်းတွို့ကွိုပေးတိုမူပွီး ဆူတွို့ဟော် ကွိုယ်တော်ယေရှုကွို မတ်မိလေရယ်။ ဟော်ပေမယ့် ကွိုယ်တော်ယေရှုဟော် တလန့်တဆန့် ဆူတွို့ချယ့်ခေါ့ ပျွောဂ်ကွာဆိုးလေရယ်။ အယ်းနွောဂ်မောင် “လောင်းခရီးမောင် ကွိုယ်တော်ဟော် ငေါ်တွို့ကွို စကောဟိုးပွီး ကျောင်းစော်ယယ့်အဓိပါကွို ငေါ်တွို့ကွို ဆန်းပျော့တိုမူနေရယ့်အခှိင်မောင် ငေါ်တွို့ယယ့်စိနလုန်းဟော် ယန်ခွိင်စိလုတ်ဆောပွီး မျိုလန်းချနောင့် ပူလွောင်နေရယ်မဟွိပေါ်လော” လွို့အခှန်းခှန်းဟိုးဆွိုကျော့ရယ်။

ကွိုယ်တော်ခေါ့ ဆပယ့်တိုရယ်ကွို “ကျောင်းစော်မောင် ရယ်းဆောထောတော်ကော့ ကာတန်ဆန်မေရှိယဟော် ဆားရားဒုက်ခေါ့မျောကွို ခေါင်စောယော့ပွီးအဆေခေါင်မောင်ဖှဂ်ပေမယ့်လယ်း ဆုန်းရတ်မွှောဂ်ရယ့်နေ့မောင် ဆေခှန်းခေါ့နေအဆဂ်ပှန်ချန်တိုမူလောဂ်မောင် ဖှဂ်ရယ်။ မေရှိယယယ့်ဆပယ့်တိုမျောဟော် အပှဂ်ဒုစရောဂ်မျောခေါ့နေ ခွမ့်ခွှဂ်ခေါင်ယော့ဖွို့ နွောင်တော့ယော့ပွီး ဖရောဆန်ဖကွို ပှန်လည့်ကျော့ဆူအောလုန်းဟော် ကာတန်ခှန်းခေါင်ယော့မယ်ဆွိုရယ့် မန်ဂလော်ဆတန်းကွောင်းကွို ဂျေရုဆလင်မွှို့ ခေါ့နေစော့ပွီး လူမျွိုးအပွေါင်းတွို့နောင်းကွိုဆိုးပွီး ဟိုးကျောလောဂ်မယ် လွို့ ကျောင်းစော်မောင် ရယ်းဆောဖိုပျော့ ထော့ရယ်။

ဆူတွို့ဆင်းကှောင်းဂူအနီးကွို ယွောဂ်ကျော့ရယ့်အခေါ် ဆင်းကှောင်းဂူကွိုပိထောရယ့် ကျွီးမောလေးလောင်ရယ့် ကွှောဂ်တုန်းကျွီးကွို တယွောဂ်ယွောဂ်ခေါ့ တွမ်းဖာထောသလွိုမျွိုး အဝီးတနေယော်နောင်း ယွောဂ်နေရယ့်ဟော်ကွို မျိုတွိခယ့်ကျော့ယော့ရယ်။ အယ်းယော်ကျွောင့် ဆူတွို့ဟော်ဆင်းကှောင်းဂူထားကွို ဝမ်ယွောဂ်ခယ့်ကျော့ပွီး ကွိုယ်တော်ယေရှုယယ့်အလွောင်းကွို ချော်ဖွယ်ခယ့်ကျော့ပေမယ့်လယ်း ကွိုယ်တော်ယယ့်အလွောင်းတိုဟော် အယ်းနေယော်မောင် မဆိနေခယ့်ပေါ်။