Luke 21
21
1အယ်းအခေါ်မောင် ကွိုယ်တော်ယေရှုနောင့် ဆပည့်တိုတွို့ရယ်ဟော် ဗိမာန်တိုဝမ်းအထားမောင်ဆိနေခှိင် ကွိုယ်တော်ဟော်မတ်နေတိုမူပွီး ဘေးပတ်ပတ်လည်ကွို လောင်းမျိုကျေ့လောဂ်ရယ့်အခေါ် ချောင်းဆော်ရယ့်ဆူရယ်ဟော် အခှူခေါင်ပုန်းထားကွို အခှူငွယ်မျော ထည့်ဝမ်နေကျော့တော်ကွို တွိမျိုတိုမူလေရယ်။ 2အယ်းနွောဂ်မောင် ဆားရားရယ့် မွိဆွိုးမော့တဦးဟော်ယွောဂ်လော်ပွီး တင်ဖွိုးနယ်းရယ့်ဒန်းကောပှောနေပှော ထယ့်ဝမ်ခှူဒန်းနေတော်ကွို ကွိုယ်တော်ဟော် မျိုလေရယ်။ 3အယ်းအခေါ် ကွိုယ်တော်ယေရှုခေါ့ ဆူ့ယယ့်ဆပည့်တိုရယ်ကွို “ဟော်မွိဆွိုးမော့ဟော် တချောလူရယ်အောလုန်းထဂ် ပွိုပွီးထူးမှဂ်ရယ့်အခှူဒေါ်နော့ကွို ပှုခယ့်ခှန်းဖှဂ်ကျွောင်း နန်တွို့ကွိုငေါ်အဆေအချော်ဟိုးနောင်ရယ်။ 4အကျွောင်းမောင်ကော အယ်းလူချောင်းဆော်အောလုန်းတဟော် ဆူတွို့ယယ့်ငွယ်ကျေးထားခေါ့ အနယ်းငါကွိုပယ်း ထယ့်ဝမ်ခှူဒန်းခယ့်ကျော့ရယ်။ ဟော်ပေမယ့် ဟော်မွိဆွိုးမော့ဟော် ကော်တရော်ဆားရားပေမယ့်လယ်း ဆူအဆဂ်ချန်ယောဂ်တည်ဖွို့ ဝမ်းစော်အတွဖှဂ်ရယ့် ဆိသမျော့ငွယ်ရယ်ကွို ထယ့်ဝမ်ခှူဒန်းခယ့်တော်ကျွောင့်ဖှဂ်ရယ်” လွို့ မိင့်တိုမူရယ်။ 5အယ်းနွောဂ်မောင် ကွိုယ်တော်ယေရှုယယ့်ဆပယ့်တိုအခှို့တွို့ခေါ့ ဗိမာန်တိုဟော် ခှော့ပေါ့ရယ့်ကွှောဂ်တုန်းမျော၊ ပူဇော်ဆဂ်ကောဂ်ထောရယ့်ဝဂ်ထုပစ္စည်းမျောနောင့် ဆန်မှန်းထောရယ့်အတွကျွောင့် ကော်တရော်ခှော့ပေါ့ကျွောင်း ဟိုးဆွိုနေကျော့လေရယ်။ 6ဟော်ပေမယ့် ကွိုယ်တော်ယေရှုခေါ့ “နန်တွို့ မျိုတွိနေယော့ရယ့် အယ်းအယော်ရယ်အောလုန်းတွို့ဟော် ပွှို့ကှော့ပျဂ်စီးမယ့်အခှိင်ယွောဂ်လော်တို့မောင်ဖှဂ်ရယ်။ ကွှောဂ်တုန်းတတုန်းတအွောင်မောင့် နကွိုယ်နေယော်အတောင်း ဆိနေတို့မောင်မဟွိပယ်း ဖွှိုဖျဂ်ဖျဆီးခှန်းခေါင်ယော့လောဂ်မောင် ဖှဂ်ရယ်” လွို့ မိင့်တိုမူရယ်။ 7ဆပယ့်တိုတွို့ခေါ့လယ်း ကွိုယ်တော်ကွို “ကွိုယ်တော်၊ အယ်းလွိုအဖှဂ်အပျရယ်ဟော် စော်အခှိင်မောင် ဖှဂ်လော်မော်ပေါ်လော။ အယ်းအဖှဂ်အပျဂ်မျော မကျော်ခန်ဖှဂ်ပျလော်တိုမယ်ဆွိုတော်ကွို စော်အယော်ရယ်ကွိုကျေ့ပွီး ငေါ်တွိုဆိဆနောင်ပေါ်သလော” လွို့ မေးရွှောဂ်ကျော့လေရယ်။ 8အယ်းအခေါ် ကွိုယ်တော်ယေရှုခေါ့ ဆူတွို့ကွို “အယ်းအခှိင်ယွောဂ်ရယ့်အခေါ် နန်တွို့ကွို စူခေါ့မောင့် ခှယ့်စောခှန်းမပှုနောင်အွောင် ဆတိပှုကျော့ပေါ်။ အကျွောင်းမောင်ကော လူမျောစွာတွို့ခေါ့ ဆူတွို့မောင် ငေါ့ယယ့်အခွမ့်အော်နော်ဆိရယ်လွို့ အမောရယ်ဟိုးဆွိုပွီး ဆူတွို့ဟော်မေရှိယဖှဂ်ရယ်လွို့ ဟိုးဆွိုကျော့လောဂ်မယ်။ အယ်းအပှန် ဆူတွို့ခေါ့ ဖရောဆန်ဟော် ဟော်ကဘော်ကျွီးကွို အုတ်စွိုးမယ့်အခှိင်ဟော်ယွောဂ်ဆိလော်ပွီဖှဂ်ရယ် လွို့လယ်းဟိုးဆွိုလောဂ်မယ်။ ဟော်ပေမယ့် နန်တွို့ဟော် အယ်းဆူတွို့ယယ့်နွောဂ်ကွို မလောဂ်ကျောနောင့်။ မယုန်ကျည်ကျော့နောင့်။ လယ့်ဖျောမုကွို မခေါင်ယော့အွောင် ဆတိပှုကျော့ပေါ်။ လူအမျောခေါ့ ငေါ့အယွောင်ဆွောင်ပွီး ‘ငေါ်ဟော် ခရစ်တော်ဖှဂ်ရယ်’၊ ‘အခှိင်ကှော့လော်ပီ’ ဆွိုပွီးဟိုးဆွိုကျော့လောဂ်မယ်။ ဆူတွို့နွေ့ာဂ်ကွို မလောဂ်ကျော့နောင့်။ 9တင်းနိုင်ငေါင်မျောဟော် တနိုင်ငေါင်နောင့် တနိုင်ငေါင် စဂ်တောဂ်နေကျော့ပွီး တင်းနိုင်ငေါင်တောင်းမောင်ဆိရယ့် ပှယ်ဆူမျောဟော်လယ်း ဆူတွို့ယယ့် အစွိုးရော့မျောကွို ဆန့်ကျင်နေကျော့တော်ကွို ကျောရယ့်အခေါ် မကျွောဂ်ကျော့နောင့်။ စော်ကျွောင့်လောဟန်ကော ဟလွိုမျွိုးဖှဂ်ပျဂ်လော်မယ့် အယော်မျောဟော် အယန်ဖျဂ်ပျဂ်လော်ယော့မောင်မင်ပေမယ့်လယ်း ကဘော်ကျွီးအဆုန်းဆတ်ခှိင်ဟော် ခှခှင်းကှော့ယွောဂ်လော်အုန်းမောင် မဟွိပေါ်” လွို့ မိင့်တိုမူရယ်။ 10ဆဂ်လဂ်ပွီး ကွိုယ်တော်ယေရှုခေါ့ “လူမျွိုးတမျွိုးနောင့်တမျွိုး၊ တင်းပှယ်တခုနောင့်တခုတွို့ဟော် စဂ်ဖှဂ်ကျော့လောဂ်မယ်။ 11ကဘော်နေယော်အနောင့်မောင်လယ်း ပှင်းထောင်ရယ့်မှေငလျင်နွိခှန်း၊ ငတ်မွဂ်ခှန်းနောင့် ကောဂ်ရွိုးကော်ဆွိုးတွို့ကှော့ယွောဂ်ခှန်းဖှဂ်လော်လောဂ်မယ်။ မွို့ကိုးကန်ခေါ့နေလယ်း ကျွောဂ်ဖွို့ကွောင်းရယ့်အယော်မျောနောင့် ထူးချောရယ့်ဖျဂ်ပျဂ်မုမျော ဖှဂ်ပိုလောဂ်မယ်။ 12ဟော်ပေမယ့် အယ်းအဖှဂ်အပျဂ်မျောမဖှဂ်ပျခန်မောင် လူရယ်ဟော်ငေါ့အတွနောင့် နန်တွို့ထားခေါ့တခှို့ကွိုဖောင်းဆီးနိစဂ်ကျော့ပွီး ဓမ္မာရုန်ခွေါင်းဆွောင် မျောယယ့်ချယ့်မောင်ဖောင်းပွီး ထွောင်ခှော့ကျောလောဂ်မယ်။ နန်တွို့ဟော် ငေါ့ယယ့်နွောဂ်လောဂ်မျောဖှဂ်တော်ကျွောင့် ဆန်ဘရန်နောင့် အော်နော်ပေါင်မျောယယ့်ချယ့်မွောဂ်မောင် စဂ်ဆေးခှန်းခေါင်ယော့ဖွို့ နန်တွို့ကွို ခိုဆွောင်ဆိုးကျော့လောဂ်မယ်။ 13အယ်းလွိုမျွိုး ဖှဂ်လော်ရယ့်အခေါ် နန်တွို့ဟော် ငေါ့ယယ့်အကျွောင်းကွို ဆဂ်ဆေခေါင်ပွီး ဆူတွို့ကွို ဟိုးကျောဖွို့အခွမ့်အရယ်းယော့လော်ကျော့လောဂ်မောင်ဖှဂ်ရယ်။ 14အယ်းယော်ကျွောင့် နန်တွို့ဟော် ကွိုယ့်ကွိုကွိုယ် စလွိုမျွိုးကော်ကွာဟိုးဆွိုယော့မယ်ဆွိုတော်ကွို စိမပူကျော့နောင့်။ 15စော်ကျွောင့်လောဟန်ကော နန်တွို့ယယ့်ရန်ဆူအပွောင်းတွို့ခေါ့ နန်တွို့ကွိုညမ်းလွို့မယော့နောင်အွောင် ဟိုးယော့မယ်စကောနောင့် ညင်ပညော်ကွို နန်တွို့ကွိုငေါ်ပေးမောင်ဖှဂ်ရယ့်အတွကျွောင့်ဖှဂ်ရယ်။ 16နန်တွို့ယယ့်မွေ့ဖော့၊ ညီအကွို၊ ဆွယ်မျွိုး၊ မိင့်ဆွေရယ်ကွိုယ်တောင်ခေါ့ နန်တွို့ကွို ဆဂ်စော်ဖွောဂ်ပွီး အော်နော်ပေါင်မျောနောင်းကွို အောဂ်နောင်ပွီး နန်တွို့ယယ့်ရန်ဆူရယ်ကွို ကူညီကျော့လောဂ်မောင်ဖှဂ်ရယ်။ အော်နော်ပေါင်ရယ်ကော့ နန်တွို့ထားခေါ့ တခှို့ကွိုဆတ်ကျော့လောဂ်မယ်။ 17ငေါ့အတွကျွောင့် လူအမျွိုးမျွိုးတွို့ဟော် နန်တွို့ကွို ငွိုးကျော့လောဂ်မယ်။ 18ဟော်ပေမယ့် နန်တွို့ကွို စူခေါ့မောင့် အမှားထော်ဝရော့a ဒုက်ခေါ့ပေးနောင်မောင်မဟွိရယ့်အတွ စိပူခှန်း မဆိကျော့နောင့်။ 19အယ်းအယော်မျောအောလုန်းကွို ခေါင်နောင်ယီဆိပွီး ငေါ့ကွိုယုန်ကျည်ခှန်းကွို မစွမ့်လွဂ်ကျော့ယန် နန်တွို့ဟော် နိစ္စော့ထော်ဝရော့အဆတ်ကွို ယော့ဆိမောင်ဖှဂ်ရယ်” လွို့မိင့်တိုမူလေရယ်။ 20အယ်းနွောဂ်မောင် ကွိုယ်တော်ယေရှုဟော် “ဂျေရုဆလင်မွှို့ကွို ရန်ဆူစဂ်တောဂ်မျော ဝိုင်းထောကျော့တော်ကွို နန်တွို့မျိုယော့ရယ့်အခေါ် အယ်းစဂ်တောဂ်ဟော် မကျော်ခန်မောင်အယ်းမွှို့ကွို အကွိင်လုန်းဖျဂ်စီးကျော့တို့မောင်ကွို နန်တွို့အဆေအချော် ဆိဆနောင်ကျော့ပွီဖှဂ်ရယ်။ 21အယ်းအခေါ် ယုဒပှယ်မောင် ဆိနေရယ့်လူရယ်ဟော် တွောင်ပိုကွို တဂ်ပှေးကျော့ယော့လောဂ်မယ်။ ဂျေရုဆလင်မွှို့ထားမောင်ဆိနေကျော့ရယ့် လူမျောဟော်လယ်း မွှို့ပှင်ကွိုစွမ့်ခိုထွပှေးကျော့ယော့မယ်။ ကျေးလဒေဆော့မျောမောင် နေထောင်ကျော့ရယ့်ဆူမျောဟော်လယ်း မွှို့ထားကွို ဝမ်နောင်ကျော့လောဂ်မောင် မဟွိပေါ်။ 22အကျွောင်းမောင်ကော ဖရောဆန်ဟော် ဂျေရုဆလင်မွှို့ဆောတွို့ကွို အပှဂ်ပေးတိုမူမောင် ဖှဂ်ရယ့်အတွကျွောင့်ဖှဂ်ရယ်။ အယ်းလွိုအပှဂ်ပေးခှန်းဟော် ကျောင်းစော်မောင် ရယ်းဆောထောရယ့်အယော်မျော ပှယ့်စုန်လော်စေဖွို့အတွ ဖှဂ်ရယ်။ 23အယ်းလွိုဖှဂ်ပျဂ်ရယ့် နေ့ရတ်မျောမောင် ခှေးဖောဂ်ကျွီးနေရယ့်အမျွို့ဆမီးမျောနောင့် နန်းစွို့အရွာလူပယ့်ငါကွိုပှုစုနေယော့ရယ့် မွေ့မျောဟော် ကော်တရော်ကွို ဒုက်ခေါ့ယွောဂ်ကျော့လောဂ်မယ်။ စော်ကျွောင့်လောဟန်ကော အစ္စရယ်းလူမျွိုးအပိုမောင် ဖရောဆန်ယယ့်ဒိုးဆော့ဟော် ကှော့ယွောဂ်လော်မောင်ဖှဂ်ရယ့်အတွကျွောင့် ဆူတွို့ဟော် ကျွီးမောရယ့်ဆားရားဒုက်ခေါ့ ယွောဂ်ကျော့ယော့မောင်ဖှဂ်ရယ် 24တခှို့လူတွို့ဟော်ဆငါနောင့်ဆတ်ခှန်းခေါင်ယော့ပွီး တခှို့ဟော်လယ်း အချောတင်းပှယ်မျောနောင်းဖောင်းခိုဆွောင်ဆိုးခှန်းခေါင်ကျော့ယော့လောဂ်မယ်။ လူမျွိုးချောတွို့ဟော်လယ်း ဖရောဆန်စီစင်သတ်မတ်ထောရယ့်အခှိင်ထိ ဂျေရုဆလင်မွှို့ကွိုအုတ်ချုပ်ပွီးဖိနိပ်ချုပ်ချယ်ကျော့လောဂ်မယ်” လွို့ မိင့်တိုမူရယ်။ 25အယ်းနွောဂ်မောင် ကွိုယ်တော်ယေရှုခေါ့ “ဟော်ကဘော်ကျွီး အဆုန်းဆတ်ခိင်ယွောဂ်ရယ့်အခေါ် နေ၊ ခှော့နောင့် ကျာရယ်မောင် ထူးဆန်းရယ့် အယော်မျောဖှဂ်ပျလော်မောင်ကွို မျိုတွိုယော့ကျော့မောင်ဖှဂ်ရယ်။ ကဘော်တဝှမ်းဆိ နိုင်ငေါင်တောင်းခေါ့ လူမျောဟော်လယ်း ပန်လာယယ့်ကှာလွောင်ရယ့်မှယ်ဟီးဆောင်မျောနောင့် ယေလိုင်းလုန်းကျွီးမျောယယ့်ရောဂ်ခတ်ဆောင်ရယ်ကျွောင့်လယ်း ထိင့်လန့်တွိင်လုတ်ခှန်းမျော ဖှဂ်ကျော့ယော့လောဂ်မယ်။ 26လူရယ်ဟော် ကဘော်မှေပိုမောင် ကျွောဂ်ဖွို့ကွောင်းရယ့် ဘေးအန်တရယ်မျော ကှော့ယွောဂ်လော်ရယ့်အတွကျွောင့် ကော်တရော်ကျွောဂ်လော်ကျော့ပွီး မူးမေ့လယ်းကှော့ကျော့လောဂ်မောင်ဖှဂ်ရယ်။ စော်ကျွောင့်လောဟန်ကော ဖရောဆန်ဟော် ကျာမျော၊ ဂျွိုလ်မျောနောင့်အတူ ကိုးကန်မောင်ဆိရယ့် အယော်အောလုန်းတွို့ကွို လုတ်ခေါ်စေရယ့်အတွကျွောင့်ဖှဂ်ရယ်။ 27ကျွီးမှဂ်ရယ့်တခွိုးတိုနောင့်အတူ ဖုန်းတခွိုးတိုကွိုပျော့ရယ့် မွိုးတိင်မျောကွိုဝမ်းယန်ပွီး ငေါ်ဟော်ကဘော်မှေပိုနောင်းကွို ကျို့လော်မောင်ဖှဂ်ရယ်။ အယ်းအခှိင်မောင် နေယော်တောင်းမောင်ဆိရယ့် လူအပွောင်းတွို့ခေါ့ ငေါ်လူဆောတိုကွို မျိုတွိကျော့ယော့မောင်ဖှဂ်ရယ်။ 28အယ်းကျွောဂ်စရော်ကွောင်းရယ့် အဖှဂ်အပျဂ်မျော စော့ပွီးဖှဂ်ပျဂ်လော်ရယ့်အခေါ် နန်တွို့ဟော် ဆတ်တိဆိဆိနောင့် မတ်တတ်ယောဂ်ပွီး ယုန်ကျည်မုအပှယ့်နောင့် နန်တွို့ယယ့်ဦးခွေါင်းကွို မော့ထောလောဂ်ပေါ်။ စော်ကျွောင့်လောဟန်ကော မကျော်ခန်မောင် ဖရောဆန်ဟော် နန့်ကွို ဒုက်ခေါ့ဆားရားခေါ့နေ ကာတန်တို့မောင်ဖှဂ်ရယ့်အတွကျွောင့်ပယ်းဖှဂ်ရယ်” လွို့ မိင့်တိုမူရယ်။ 29အယ်းနွောဂ်မောင် ကွိုယ်တော်ယေရှုဟော်ဆူ့ဆပယ့်တိုတွို့ကွို ပုန်ဥဖမော်တခုနောင့် မိင့်တိုမူခယ့်ရယ်။ ကွိုယ်တော်ခေါ့ ဆူတွို့ကွို “သဖန်းပန် အယ်းဟော်မောင့်မဟွိတချောအပန်ရယ်ကွို ကျေ့ပွီး ဆန်ခန်းစော်ယူကျော့ပေါ်။ 30အယ်းအပန်တွို့မောင် အဝနုမျော စော့ပွီးထွပိုလော်ရယ့်ဟော်ကွို မျိုတွိကျော့ရယ့်အခေါ် နွေယော်ဆီယွောဂါလုနီးပီလွို့ နန်တွို့ဟော် ဆိဆကျော့ရယ်။ 31အယ်းလွိုမျွိုးပယ်း နန်တွို့ကွို ငေါ်မိင့်တိုမူခယ့်ရယ့် ကျွောဂ်စရော်ကွောင်းရယ့် အဖှဂ်အပျဂ်မျော စော့ပွီးဖှဂ်ပျဂ်လော်တော်ကွို နန်တွို့မျိုကျော့ယော့ရယ့်အခေါ် ဖရောဆန်ယယ့်ဆော်ဆနော်တိုဟော် မကျော်ခန်အခှိင်မောင် စော့ပွီးပိုထွမ်းလော်တို့မောင်ဖှဂ်ကျွောင်း နန်တွို့အဆေအချော် ဆိဆနောင်ကျော့မောင်ဖှဂ်ရယ်။ 32နန်တွို့ကွို ငေါ်အမင်ဟိုးမောင်ကော အခုအဆဂ်ချန်နေကျော့ရယ့်လူအောလုန်းတွို့ဟော် ဟော်အဖှဂ်ပျဂ်မျော မဖှဂ်ပျဂ်ခန်အခှိင်ထိဆေခှန်းကွိုမယွောဂ်နောင်ကျော့ပေါ်။ 33ကိုးကန်ကျွီးနောင့်ကဘော်မှေကျွီးတခုလုံးဟော် တည်မှားမောင်မဟွိပေမယ့်လယ်း ငေါ့ယယ့်စကောမျောဟော် ထော်ဝရော့တည်မှားနေမောင်ဖှဂ်ရယ်။ 34ဟော်ပေမယ့် နန်တွို့စလွိုမျွိုးနေထောင်ယော့မယ်ဆွိုတော်ကွို ဆတိပှုကျော့ပေါ်။ နန်တွို့ဟော် အပျိုလွမ်ပွီး စောလောဂ်ဆွောဂ်လောဂ်၊ ဖဝို့အတွပူပန်လောဂ်နောင့် နန်တွို့ယယ့် အခှိင်ရယ်ကွို မဖွှုန်းတီးကျော့နောင့်။ အယ်းလွိုလုတ်ကျော့ယန် နန်တွို့ငေါ်ပှန်ကျို့လော်မယ့်အခိင်မောင် အဆန်သင့်ဖှဂ်နေကျော့လောဂ်မောင်မဟွိပေါ်။ အကျွောင်းမောင်ကော တရိဆန်တကွောင် ထွောဂ်ချွောဂ်မောင်မိနေသလွိုမျွိုး ငေါ်ဟော်လယ်း နန်တွို့မျိုလန့်မထောရယ့်အခှိင်မောင် တလန့်တဆန့် ပှန်ကျို့လော်မောင် ဖှဂ်တော်ကျွောင့်ဖှဂ်ရယ်။ 35အယ်းနေ့ရတ်မောင် ဖှဂ်ပျဂ်လော်တို့မယ့်အယော်ရယ်ဟော် ကဘော်တဝှမ်းလုန်းမောင်ဆိရယ့် လူအောလုန်းအပိုကွို သဂ်ယွောဂ်စေပွီး ဘေးဒုက်ခေါ့နောင့် ကျုန်တွိစေမောင်ဖှဂ်ရယ်။ 36အယ်းယော်ကျွောင့် အခှိင်တောင်းအတွ ဆတိဆိကျော့ပေါ်။ ကှော့ယွောဂ်လော်တို့မယ့် ဘေးဒုက်ခေါ့တွို့ကွို ခေါင်နောင်ယီဆိကျော့ဖွို့နောင့် ငေါ်လူဆောတိုယယ့်ချယ့်မောင် ယုန်ကျည်ချဆိဆိနောင့် မတ်တတ်ယောဂ်နောင်ဖွို့အတွ ဖရောဆန်နောင်းမောင် ဆုတွောင်းကျော့ပေါ်” လွို့ မိင့်တိုမူရယ်။ 37အယ်းယော်ပွီးယန် ကွိုယ်တော်ဟော် ဗိမာန်တိုမောင် နေ့အခေါ်ရယ်မောင် တရောတိုမျောဟိုးကျောသွန်သင်ပွီး ညော့အခေါ်မောင် သံလွင်တွောင်ပိုကွိုဆိုးပွီးနေတိုမူရယ်။ 38လူထုပရိတ်ဆတ်အပွောင်းတွို့ဟော်လယ်း ကွိုယ်တော်ယေရှုယယ့်ဟိုးကျောသွန်သင်မုတွို့ကွို ကျောနော်ဖွို့ မနဂ်စိုးစိုးထော့ပွီး ကွိုယ်တော်ဆိရယ့် ဗိမာန်တိုဝမ်းနောင်းကွို ယွောဂ်လော်ကျော့လေရယ်။
Currently Selected:
Luke 21: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
