Luke 20
20
1တနေ့မောင် ကွိုယ်တော်ယေရှုဟော် ဗိမာန်တိုဝမ်းအတွမ်းမောင် လူရယ်ကွို ဖရောဆန်ယယ့်မန်ဂလော်ဆတန်းကွောင်းကွို ဟိုးကျောသွန်သင်တိုမူနေခှိင် ပုရောဟိတ်အကျွီးအကားမျော၊ ကျောင်းတတ်ဆရော်မျောနောင့် ဂျူးလူမျွိုးအကျွီးအကားမျောဟော် ကွိုယ်တော်ကွိုတွိဆုန်ဖွို့လော်ယွောဂ်ခယ့်ကျော့လေရယ်။ 2ဆူတွို့ခေါ့ ကွိုယ်တော်ကွို “ဟော်အယော်မျောကွို လုတ်ဆွောင်ဖွို့အတွ နန့်မောင်စော်အခွမ့်အော်နော်ဆိသလော။ ဟော်အခွမ့်အော်နော်တွို့ကွို နန့်ကွို စူပေးအောဂ်ထောပေါ်သလော။ ငေါ်တွို့ကွို ဟိုးပျော့ပေါ်” လွို့ မေးမှန်းတွောင်းဆွိုခယ့်ကျော့ရယ်။ 3အယ်းအခေါ် ကွိုယ်တော်ခေါ့ “နန်တွို့ကွို ငေါ်တခုအယန်မေးမယ်။ နန်တွို့ဖှေကျော့ပေါ်။ 4ယောဟန်ဟော် လူတွို့ကွို ယေနဂ်မန်ဂလော်ပှုပေးဖွို့အတွ ဆူ့ယယ့်အခွမ့်အော်နော်ကွို ဖရောဆန်နောင်းခေါ့နေ ယော့ခယ့်ခွမ်လော အယ်းလွိုမောင့်မဟွိ လူတွို့နောင်းခေါ့နေ ယော့ခယ့်ခွမ်လောလွို့” ပှန်ပွီးမေးတိုမူရယ်။ 5အယ်းအခေါ် ဆူတွို့ဟော် အခှန်းခှန်းဆွီးနွီးကျော့ပွီး “တကာလွို့ ဖရောဆန်နောင်းခေါ့ ယော့ဆိခယ့်ပေါ်ရယ်လွို့ဖှေယန် ဆူဟော် ငေါ်တွို့ကွို ‘အယ်းလွိုဟန် နန်တွို့ စော်ကျွောင့် ယောဟန်ယယ့် ဆတန်းစကောတွို့ကွို မယုန်ကျည်ကျော့သလော’ လွို့ပှန်လည်မေးမြန်းလောဂ်မယ်။ 6လူတွို့နောင်းခေါ့ ယော့ဆိခယ့်ပေါ်ရယ်လွို့ ဖှေလောဂ်ယန်လယ်း လူအောလုန်းခေါ့ ယောဟန်ကွို ပရောဖက်တပေါလွို့ ယုန်ကျည်လဂ်ခေါင်နေကျော့ရယ့်အတွ ဆူတွို့ဟော် ငေါ်တွို့ကွို ကွှောဂ်ခါးရယ်နောင့်ခတ်ကျော့လောဂ်မယ်” လွို့ ဟိုးဆွိုကျော့လေရယ်။ 7အယ်းယော်ကျွောင့် ဆူတွို့ဟော် ကွိုယ်တော်ကွို “လူရယ်ကွို ယေနဂ်မန်ဂလော်ပေးဖွို့အတွ ယောဟန်ကွို စူခေါ့အခွမ့်အော်နော်ပေးခယ့်ရယ် ဆွိုတော်ကွို ငေါ်တွို့မဆိဆပေါ်” လွို့ပှန်ဖှေခယ့်ကျော့လေရယ်။ 8အယ်းအခေါ် ကွိုယ်တော်ယေရှုခေါ့ “ငေါ်ယယ့်မေးခွမ်းကွို နန်တွို့မဖှေနောင်ရယ့်အတွ ဟော်အယော်ရယ်ကွိုလုတ်ဆွောင်ဖွို့အတွ ငေါ့ကွို စူခေါ့အခွမ့်အော်နော်ပေးအောဂ်ထောခယ့်ရယ် ဆွိုတော်ကွိုလယ်း နန်တွို့ကွို ငေါ်ဖှေမောင်မဟွိဘူး” လွို့ မိင့်တိုမူခယ့်လေရယ်။ 9အယ်းနွောဂ်မောင် ကွိုယ်တော်ယေရှုခေါ့ လူထုပရိတ်ဆတ်တွို့ကွို ပုန်ဥဖမော်တခုနောင့် မိင့်တိုမူခယ့်ရယ့်ဟော်မောင် “လူတယွောဂ်ဟော် စပျစ်ချောင်တချောင်ကွို စောဂ်ခယ့်လေရယ်။ အယ်းနွောဂ်မောင် ဆူဟော် အယ်းချောင်ကွို မှေငေါမျောနောင်း အငေါခှော့ခယ့်ပွီးနွောဂ်မောင် အချောတင်းပှယ်ကွို ခရီးထွဆိုးခယ့်ပွီး အယ်းနေယော်မောင် အခှိင်ကျော်ကျော်နေထောင်ခယ့်လေရယ်။ 10စပျစ်ဆီးပိုခှိင်ကွိုယွောဂ်လော်ရယ့်အခေါ် ချောင်သခန်ဟော် မှေငေါဆမောမျောနောင်းကွို အစေခေါင်တယွောဂ်ကွို စေခွှဂ်ပွီး ဆူယော့ဆန့်ယော့ထောဂ်ရယ့်ဝီစုကွို ဆိုးယူစေလောဂ်ရယ်။ အဆီးစောချောင်အလုတ်ဆမောရယ်ခေါ့လယ်း အယ်းအစေခေါင်ကွို ရောဂ်နောဂ်ပွီး စော်မောင့်မပေးပယ်း လဂ်ခှယ်းခှယ်း ပှန်စေလောဂ်ကျော့ရယ်။ 11အယ်းယော်နောင့် ချောင်သခန်ခေါ့ ဆူယော့ဆန့်ယော့ထောဂ်ရယ့်ဝီစုကွို ယော့ဖွို့အတွ အချောအစေခေါင်တယွောဂ်ကွို ထောဂ်ပွီးစေခွှဂ်ခယ့်လေရယ်။ ဟော်ပေမယ့် မှေငေါမျောဟော် အယ်းအစေခေါင်ကွိုလယ်း ရောဂ်နောဂ်ကျော့ပွီး အချတကွားဖှဂ်အွောင်လုတ်ပွီး ပှန်ခွဂ်လောဂ်ကျော့ရယ်။ 12နွောဂ်ထောဂ်တခေါ် ချောင်သခန်ဟော်တတိယော့အစေခေါင်ကွို ထောဂ်ပွီးစေခွှဂ်လေရယ်။ ဟော်ပေမယ့် ဆူတွို့ဟော် အယ်းအစေခေါင်ကွိုလယ်း ပှင်းထောင်ရယ့်အနော်ကွိုယော့စေပွီး စပျစ်ချောင်ထားခေါ့နေမွောင်းထွိခယ့်ကျော့ရယ်။ 13အယ်းယော်ကျွောင့် ချောင်သခန်ခေါ့ ‘အခု ငေါ်စလွိုမျွိုးလုတ်ယော့မလော။ ငေါ် ကော်တရော်ခှဂ်ယော့ရယ့် ငေါ့ယယ့်ဆောတိုကွို စေခွှဂ်ယော့မယ်။ ဆူတွို့ဟော် ငေါ့ယယ့်ဆောကွိုကော ရွိုဆေလေးစောကျော့မောင်ဖှဂ်ပွီး ငေါ်ယော့ဆန့်ရယ့် ဝီစုကွိုလယ်း ပေးကျော့လောဂ်မောင်ဖှဂ်ရယ်’ လွို့ ဆွိုပွီး ဆူ့ယယ့်ဆောဖှဂ်ဆူကွို စေခွှဂ်လောဂ်လေရယ်။ 14မှေငေါမျောဟော် ချောင်သခန်ယယ့်ဆောလော်နေတော်ကွို မျိုရယ့်အခေါ် ‘ဆူယော် တခှိင်ခှိင်မောင် ဟော်ချောင်ကွို အမွီဆဂ်ခေါင်ယော့မယ့်ဆူဖှဂ်ရယ်။ ငေါ်တွို့ဟော် ဆူ့ကွိုဆတ်လောဂ်ယန် ဆူအမွီယော့ဆိမယ့် ပစ္စည်းဉစ္စော်မျောဟော် ငေါ်တွို့အပေါင် ဖှဂ်လော်လောဂ်မယ်’ လွို့အခှန်းခှန်းဆွီးနွီးတောင်ပန်ခယ့်ကျော့ရယ်။ 15အယ်းယော်ကျွောင့် ချောင်သခန်ယယ့် ဆောယွောဂ်လော်ရယ့်အခေါ် ဆူတွို့ဟော် စပျစ်ချောင်ယယ့် အပှန်ဖဂ်ကွိုဆွားထွိပွီး ဆဂ်လောဂ်ကျော့ရယ်။ အယ်းလွိုဖှဂ်ဟန် ချောင်သခန်ဟော် ဆူတွို့ရယ်ကွို စလွိုမျွိုးလုတ်မယ်ဆွိုတော်ကွို နန်တွို့ဆိဆကျော့သလော။ 16ချောင်သခန်ဟော် စပျစ်ချောင်ကွိုဆူကွိုယ်တောင်ဆိုးပွီး မှေငေါရယ်ကွို ဆဂ်ပေါဂ်လောဂ်မောင်ဖှဂ်ရယ်။ အယ်းနွောဂ် ဆူယော် ဆူ့ယယ့်စပျစ်ချောင်ကွို ပှုစုစွောင့်ရွှောဂ်ဖွို့အတွ အချောမှေငေါမျောကွို ယွီးခြာလောဂ်မောင်ဖှဂ်ရယ်” လွို့မိင့်တိုမူလေရယ်။ ကွိုယ်တော်ယေရှု အယ်းလွိုမိင့်တိုမူတော်ကွို ကျော့ယောဆူမျောခေါ့လယ်း “ဟော်အယော်ဟော် စော်အခေါ်မောင့် ဖှဂ်မလော်ပေါ်စေနောင့်” လွို့ဟိုးဆွိုခယ့်ကျော့လေရယ်။ 17ကွိုယ်တော်ယေရှုဟော် အယ်းလူတွို့ကွိုစယ့်စယ့်ကျေ့ပွီး “တကာလွို့နန်တွို့ဟော် စော်အခေါ်မောင့်ဟော်လွိုမျွိုးဖှဂ်မလော်ဆန့် လွို့ ဟိုးယန် ‘ဆူဟော် အိင်ဆွောဂ်ရယ့်ဆူမျောခဂ်ထောရယ့် ကွှောဂ်လွိုမျွိုးဖှဂ်ပေမယ့်လယ်း ဖရောဆန်ဟော် အယ်းယော်ကွိုအိင်တလုန်းယယ့် အရယ်းကျွီးဆုန်းကွှောဂ်တုန်းအနေ နောင့် ဖန်ဆန်းထောတိုမူရယ်’ လွို့ကျောင်းစော်မောင်ရယ်းဆောထော ရယ့်အကျွောင်းအယော်မျောမောင် စော်ကွိုဆွိုလွိုပေါ်သလော။ 18ကာတန်ဆန်မေရှိယကွို ညမ်းပါရယ့်လူစူမဆွိုတွို့ဟော် အယ်းကွှောဂ်တုန်းပိုနောင်းကှော့ရယ့်လူနောင့်တူပွီး အယ်းလူတွို့ဟော် တစော့စီကွားကျေကျော့ယော့လောဂ်မယ်။ အယ်းလွိုမောင့်မဟွိ အယ်းကွှောဂ်တုန်းဟော် အယ်းလူတွို့အပိုနောင်းကွို ကှော့လော်ဟန်လယ်း ဆူတွို့ဟော်အကွိင်အစန် ကျေမွဆိုးလောဂ်မောင်ဖှဂ်ရယ်” လွို့ မိင့်တိုမူရယ်။ 19ကျောင်းတတ်ဆရော်မျောနောင့် ပုရောဟိတ်အကျွီးအကားမျောခေါ့ ကွိုယ်တော်ယေရှုဟော် ဟော်ပုန်ဥဖမော်ကွို ဆူတွို့ကွို ဦးတည်ပွီး မိင့်တိုမူရယ့်ဟော်ကွို ဆိဆကျော့ရယ့်အတွကျွောင့် ဆူတွို့ဟော် ကွိုယ်တော်ကွို ခှခှန်းဖောင်းလွိုကျော့ရယ်။ ဟော်ပေမယ့် လူအမျောခေါ့ ဆူတွို့ကွို ရန်မူကျော့မောင်ကွို ကျွောဂ်ရယ့်အတွ ကွိုယ်တော်ကွို မဖောင်းခယ့်ကျော့ပေါ်။ 20အယ်းနွောဂ်မောင် ကျောင်းတတ်ဆရော်မျောနောင့် ပုရောဟိတ်အကျွီးအကားမျောခေါ့ ကွိုယ်တော်ယေရှုကွို အနီးကောဂ် စွောင့်ကျေ့နေပွီး လူအခှို့ကွိုပိဆင်ပေးပွီး ရွိုးဆောဖွောင့်မတ်ဆူအဖှဂ် အယွောင်ဆွောင်စေပွီး ကွိုယ်တော်ကွိုလှည့်ဖျောဖွို့ စေခွှဂ်ခယ့်ကျော့ရယ်။ ဆူတွို့ဟော် ကွိုယ်တော်ယေရှုကွို ရောမအုတ်ချုတ်ဆူမျောနောင့် အော်နော်ပေါင်မျောနောင်းကွို အောဂ်နောင်ပွီး အပှဂ်ပေးဖွို့အတွ ကွိုယ်တော်ဟော် မောယွမ်းရယ့်အကျွောင်းယော်တခုခုကွို မိင့်တိုမူစေဖွို့ မေးခွမ်းမျောနောင့်ထွောင်ချွောဂ်ဆန်မေးမှန်းခယ့်ကျော့ရယ်။ 21အယ်းယော်ကျွောင့် အယ်းလူရယ်ခေါ့ ကွိုယ်တော်ကွို “ကွိုယ်တော်၊ ကွိုယ်တော်ဟော် အမင်တရောကွိုဟိုးကျောသွန်သင်ပွီး လူတောင်းကွိုလယ်း မျဂ်နော်လောဂ်ခှန်းမဆိပယ်း တန်းတူညီမျော့ဆဂ်ဆံတော်ကွို ငေါ်တွို့ဆိဆပေါ်ရယ်။ ဖရောဆန်ဟော် လူရယ်ကွိုကှန့်ဆုန်းစေလွိုရယ့်အယော်မျောနောင့်ပဂ်ဆဂ်ရယ့် အမင်တရောကွို ကွိုယ်တော်ဟော်အမှားဆန်ကျောပေးပေါ်ရယ်။ 22ရောမဧကရာဇ်ကွို အခွမ်ဆဂ်သဂ်ခှန်းဟော် ပညောဂ်တရောတိုအယော့မင်ကန်ခှန်းဆိ၊ မဆိဆွိုတော်ကွို ငေါ်တွို့ကွိုအခုပယ်းဟိုးပျော့ပေါ်” လွို့ရွှောဂ်တန်ခယ့်ကျော့လေရယ်။ 23ဟော်ပေမယ့် အယ်းလူတွို့ဟော် ကွိုယ်တော်ယေရှုကွို ထွောင်ချွောဂ်ဆန်ပွီးမေးမှန်းနေကျော့ကျွောင်းကွို ကွိုယ်တော်ဟော် ဆိဆတိုမူရယ်။ 24အယ်းယော်ကျွောင့် ကွိုယ်တော်ခေါ့ ဆူတွို့ကွို “ရောမငွယ်ဒန်းကောပှောတပှောကွိုပျော့ပေါ်။ အယ်းဒန်းကောပိုမောင် ဆူရို့ပုန်နောင့်ဆူ့နောင်မယ်ကွိုရယ်းထွိုးထောသလော” လွို့မေးတိုမူရယ်။ 25အယ်းလူတွို့ခေါ့လယ်း “ရောမဧကရာဇ်ဆီဇာယယ့်ရို့ပုန်နောင့်နောင်မယ်ပေါ်” လွို့ပှန်လည်ဖှေဆွိုကျော့လေရယ်။ အယ်းယော်ကျွောင့် ကွိုယ်တော်ခေါ့ ဆူတွို့ကွို “ရောမဧကရာဇ်ဆီဇာကွို ဆူနောင့်ဆောင်ရယ့်အယော်ရယ်ကွို ပေးဆွောင်ပွီး ဖရောဆန်နောင့်ဆောင်ရယ့်အယော်ရယ်ကွိုလယ်း ဖရောဆန်ကွိုပေးဆွောင်ကျော့ပေါ်” လွို့မိင့်တိုမူလေရယ်။ 26အယ်းလူတွို့ဟော် လူထုပရိတ်ဆတ်မျောတွို့ယယ့်ချယ့်မောင် ထွောင်ချွောဂ်ဆန်ပွီးမေးမှန်းခှန်းမပှုနောင်ခယ့်ကျော့ပေါ်။ အယ်းအပှင် ကွိုယ်တော်ဟော် ဆူတွို့ကွိုထောဂ်ပွီး မေးမှန်းခှန်းမပှုနောင်လွောဂ် အွောင်ဖှေကျောတိုမူခယ့်တော်ကျွောင့် ဆူတွို့ဟော်အောင့်အိုးပွီး တိဆိဆိုးခယ့်ကျော့လေရယ်။ 27အယ်းနွောဂ်မောင် ဇဒ္ဒုကဲaအခှို့ဟော် ကွိုယ်တော်ယေရှုနောင်းကွို ယွောဂ်လော်ကျော့လေရယ်။ အယ်းဆူတွို့ဟော် ဖရောဆန်ခေါ့ လူရယ်ကွို ဆေယော်ခေါ့နေ အဆဂ်ပှန်ချန်လော်စေမောင်မဟွိကျွောင်းကွို ယုန်ကျည်ထောကျော့ဆူမျောဖှဂ်ရယ်။ 28အယ်းဇဒ္ဒုကဲမျောခေါ့ ကွိုယ်တော်ယေရှုကွို “ကွိုယ်တော်၊ မောရှေယယ့်ပညောဂ်ကျောင်းမောင် ‘မိင်းမော့ဆိရယ့်လူတယွောဂ်ဟော် ဆောဆမီးမယော့ဝါးနောင့် ဆေခယ့်ယန် တေဖှဂ်ဆူခေါ့ အယ်းအမျွိုးဆမီးကွို လဂ်ထောဂ်ယူပွီး ဆူတွို့နေယွောဂ်ခေါ့နေ မွီးလော်မယ့် ဆောဦးbကွို အကွိုဖှဂ်ဆူယယ့် မျွိုးဆဂ်လွို့ မတ်ယူယော့မယ်’ လွို့ရယ်းဆောထောပေါ်ရယ်။ 29အယ်းလွိုဟိုးယန် တခေါ်ခေါ့ မွေ့ဆောစုတစုမောင် ညီအကွို ခနဂ်ယွောဂ်ဆိခယ့်ရယ်။ အကွိုအကျွီးဆုန်းဖှဂ်ရယ့်လူဟော် အိင်ထွောင်ကှော့ပွီးရယ့်နွောဂ်မောင် ဆောဆမီးမယော့ဝါးနောင့် ဆေဆိုးခယ့်ရယ်။ 30ဒုတိယော့တယွောဂ်ဟော်လယ်း ဆူ့အကွိုယယ့် မိင်းမော့ဖှဂ်ရယ့် ကှင်ခယ့်ရယ့်မွိဆွိုးမော့ကွို လဂ်ထောဂ်ခယ့်ရယ်။ ဟော်ပေမယ့် ဆူဟော်လယ်း ဆောဆမီးမယော့ဝါးနောင့် ဆေဆိုးခယ့်လေရယ်။ 31အယ်းနွောဂ်မောင် တတိယော့မွှောဂ်တေဖှဂ်ဆူခေါ့လယ်း အယ်းမိင်းမော့နောင့် လဂ်ထောဂ်ပွီး ဆောဆမီးမဆိဝါးနောင့် ဆေဆိုးခယ့်လေရယ်။ အယ်းလွိုနောင့် ညီအကွိုခနဂ်ယွောဂ်လုန်းဟော် အယ်းမိင်းမော့နောင့်လဂ်ထောဂ်ပွီးဆောဆမီးမယော့ဝါးနောင်း ဆေဆိုးခယ့်ကျော့ရယ်။ 32နွောဂ်ဆုန်းမောင် အယ်းအမျွိုးဆမီးဟော်လယ်း ဆေဆိုးခယ့်ရယ်။ 32နွောဂ်ဆုန်းမောင် အယ်းအမျွိုးဆမီးဟော်လယ်း ဆေဆိုးခယ့်ရယ်။ 33အယ်းယော်ကျွောင့် ဖရောဆန်ဟော် လူရယ်ကွို အဆတ်ပှန်ချန်စေရယ့်အခေါ် အယ်းမိင်းမော့ဟော် အယ်းညီအကွိုခနဂ်ယွောဂ်ထားခေါ့ စူမိင်းမော့ဖှဂ်မလော။ စော်ကျွောင့်လောဟန်ကော အယ်းမိင်းမော့ဟော် ဆူတွို့အောလုန်းနောင့် လဂ်ထောဂ်ခယ့်ရယ့်အတွကျွောင့်ဖှဂ်ရယ်” လွို့မေးရွှောဂ်ကျော့ရယ်။ 34ကွိုယ်တော်ယေရှုခေါ့ ဆူတွို့ကွို “ယနေ့ ဟော်ကဘော်လိုးကော့မောင် အဆတ်ချန်နေထောင်ကျော့ရယ့်လူတွို့ခေါ့ပယ်း လဂ်ထောဂ်ခှန်းနောင့် ပေးစောခှန်းတွို့ကွို လုတ်တတ်ကျော့ရယ်။ 35ဟော်ပေမယ့် အနော်ကောဂ်ကော်လော့မောင် ဆေခှန်းခေါ့နေပှန်ချန်ဖွို့နောင့် ဆွယ်မွှို့တိုမောင် ထော်ဝရော့နေထောင်ဖွို့ ထောက်တန်ရယ်လွို့ ဖရောဆန်ခေါ့ ယူဆော့ထောရယ့် လူတွို့ဟော် လဂ်ထောဂ်ခှန်းနောင့် ပေးစောခှန်းကွို လုတ်ဖွို့မလွိုအောဂ်ကျော့ပေါ်။ 36စော်ကျွောင့်လောဟန်ကော ဆူတွို့ဟော်နတ်ဒေဝါရယ်လွိုမျွိုး စော်အခေါ်မောင့်ထောဂ်ပွီး ဆေခှန်းလယ်းမဆိ၊ လဂ်ထောဂ်ခှန်းလယ်းမဆိတို့မောင်အမင်ပယ်းဖှဂ်ရယ်။ ဆူတွို့ဟော် ဆေယော်ခေါ့နေ ပှန်ချန်လော်ဖွို့အခွမ့်ကွို ခေါင်စောဖွို့တန်ရယ့်လူရယ်ဖှဂ်ရယ့်အတွကျွောင့် ဆူတွို့ဟော် ဖရောဆန်ယယ့်ဆောဆမီးမျောလယ်း ဖှဂ်လော်ကျော့ပေါ်လောဂ်မယ်။ 37အယ်းအပှင် ဆေပွီးရယ့်လူတွို့ဟော်အဆဂ်ပှန်ချန်လော်နောင်မောင် မဟွိဘူးလွို့ နန်တွို့ထန်မျိုနေကျော့ခှန်းဟော်မောနေရယ်။ စော်ကျွောင့်လောဟန်ကော မောရှေယယ့်ကျောင်းစော်မောင်တအွောင် မီးလွောင်နေရယ့် ချုန်ပုတ်ဆွိုရယ့် ကျောင်းပိုဒ်နောင့်ဆဂ်ဆေပျော့ပွီး ‘ဖရောဆန်ဟော် အာဗြဟံ၊ ဣဇက်နောင့်ယာကုပ်တွို့ယယ့် ဖရောဖှဂ်ရယ်’ လွို့ဆွိုခှန်းဟော် ဆေပွီးရယ့်လူတွို့အဆဂ်ပှင်ချန်ခှင်းအကျွောင်းကွို ဆန်းလန်းအွောင် ရယ်းဆောထောခယ့်ခှန်းဖှဂ်ရယ်။ 38အယ်းလူတွို့ဟော် ဖရောဆန်ယယ့်ချယ့်တိုမောင် ထော်ဝရော့ကော်လော့ပတ်လုန်း အဆဂ်ချန်နေရယ့်လူမျောဖှဂ်ရယ့်အတွ ဖရောဆန်ဟော် ဆေပွီးရယ့်လူတွို့ယယ့် ဖရောမဟွိပယ်း အဆတ်ချန်ရယ့်လူတွို့ယယ့် ဖရောဖှဂ်ရယ်” လွို့ မိင့်တိုမူရယ်။ 39အယ်းအခေါ် ကျောင်းတတ်ဆရော်အခှို့ခေါ့ “ကွိုယ်တော်၊ ကွိုယ်တော်ယယ့်အဖှေဟော် ကော်တရော်ကွို ကွောင်းပေါ်ရယ်” လွို့ရွှောဂ်တန်ခယ့်ကျော့လေရယ်။ 40အယ်းအခှိင်ခေါ့စော့ပွီး စူခေါ့မောင့် ကွိုယ်တော်ကွို အယ်းလွိုမျွိုး ထွောင်ချွောဂ်ဆန်ရယ့် မေးခွမ်းမျောကွို မေးမှန်းခှန်းမလုတ်ရားတို့ပေါ်။ 41အယ်းနွောဂ်မောင် ကွိုယ်တော်ခေါ့ ဆူတွို့ကွို “မေရှိယဟော် ဘရန်ဒါဝိဒ်ယယ့် ဆောတိုဖှဂ်ရယ်လွို့ ဟိုးရယ့်ဟော်ကွို နန်တွို့စလွိုမျွိုး နောလည်ထောကျော့သလော။ 42ဒါဝိဒ်မန်းကျွီးတအွောင် မေရှိယအကျွောင်းကွို ဆာလံကျောင်းထားမောင် ‘ဖရောဆန်ဟော် ငေါ့ယယ့်အဆန်မေရှိယကွို ငေါ်ဂုဏ်ပှုခှီးမွှောဂ်မယ့်နေယော်ဖှဂ်ရယ့် ငေါ့ယယ့်လဂ်ယော်ဖဂ်မောင်ထောင်လော။ 43ငေါ်ဟော် နန့်ယယ့် ရန်ဆူတွို့ကွို နန့်ယယ့်ချေတန်ခုန်ဖှဂ်စေလောဂ်မယ်’ လွို့ မိင့်တိုမူရယ်” ဆွိုပွီးဖှဂ်ပေါ်ရယ်။ 44အယ်းယော်ကျွောင့် ဘရန်ဒါဝိဒ်တအွောင် မေရှိယကွို “အဆန်” လွို့ခိုယန် မေရှိယဟော် ဆူ့ယယ့်ဆောစနန်ဖှဂ်နောင်ပေါ်မလော။ 45ကွိုယ်တော်ယေရှု မိင့်တိုမူနေရယ့်ဟော်ကွို လူထုပရိတ်ဆတ်တွို့ နော်ကျောနေခှိင် ကွိုယ်တော်ခေါ့ ဆပယ့်တိုတွို့ကွို 46“ကျောင်းတတ်ဆရော်တွို့ ပှုမူနေထောင်ကျော့သလွိုမျွိုး မပှုမူကျော့ဖွို့ဆတိပှုကျော့ပေါ်။ ဆူတွို့ဟော် တင်ဖွိုးကျွီးရယ့်ဝဂ်ရုန်ချယ်ရယ်ကွို ဝဂ်ပွီး လည်ဆိုးလော်တတ်ကျော့ပွီး စျေးအရောဂ်မောင်လယ်း လူတွို့ယယ့်တလေးတစော နွိဆဂ်ခှန်းကွို ခေါင်ယူလွိုကျော့ရယ်။ ဓမ္မာရုန်မျောမောင်လယ်း အကွောင်းဆုန်းထောင်ခုန်မျော၊ စောဆွောဂ်ပွားမျောမောင်လယ်း အထူးနေယော်မျောကွို သဖိုးကှော့ကျော့ရယ်။ 47ဆူတွို့ဟော် မွိဆွိုးမော့ရယ့်နောင်းခေါ့ ပစ္စည်းဉစ္စော်မျောကွို အတင်းဆိင်းယူတတ်ပွီး လူအမျောခေါ့ ဖွှောင့်မတ်ရယ်လွို့ ထန်စေဖွို့အတွ အချယ်ကျွီးဟန်ဆွောင် ဆုတွောင်းတတ်ကျော့ရယ်။ အယ်းယော်ကျွောင့် ဆူတွို့ဟော် ပွိုပွီး ကျွီးလေးရယ့် ပှဂ်ဒေါင်စီယန်ခှန်းကွို ခေါင်ကျော့ယော့လောဂ်မောင်ဖှဂ်ရယ်” လွို့ မိင့်တိုမူရယ်။
Currently Selected:
Luke 20: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
