Luke 19
19
1အယ်းနွေ့ာဂ်မောင် ကွိုယ်တော်ယေရှုဟော်ဆပယ့်တိုတွို့နောင့်အတူ ဂျေရိခေါမွှို့ကွို ဖှဂ်သန်းပွီး ကျို့တိုမူလေရယ်။ 2အယ်းမွှို့မောင် ဇက္ခဲလွို့ ခိုရယ့်လူတဦးနေထောင်လေရယ်။ ဆူဟော် အခွမ်ကွောဂ် တော်ဝမ်ခေါင်တဦးဖှဂ်ပွီး ကော်တရော်ချောင်းဆော်ကျွာဝို့ဆူလယ်းဖှဂ်ရယ်။ 3ဆူဟော် ကွိုယ်တော်ယေရှု စူဖှဂ်ရယ်ဆွိုတော်ကွို တွိမျိုယော့ဖွို့ ကျွိုးစောပေမယ့်လယ်း အရောဂ်ကော်တရော်ပုရယ့်အတွကျွောင့် လူအုတ်ကျွီးဟော် ကွိုယ်တော်ယယ့်အနောမောင် ဝမ်းယန်ထောကျော့ရယ့်အတွ လူအုတ်ကျွီးကွိုကျိုပွီး ကွိုယ်တော်ကွိုမမျိုပယ်း ဖှဂ်နေခယ့်လေရယ်။ 4အယ်းယော်ကျွောင့် ဆူဟော် ကွိုယ်တော်ကွို တွိမျိုနောင်ဖွို့ လူထုပရိတ်ဆတ်တွို့ယယ့်ချယ့်ကွိုကျွိုပှေးဆိုးပွီး ကွိုယ်တော်လော်မယ့်လောင်းမောင်ဆိရယ့် သဖန်းပန်ပိုကွို တဂ်နေလေရယ်။ 5ကွိုယ်တော်ယေရှုဟော် အယ်းနေယော်ကွိုယွောဂ်ရယ့်အခေါ် သဖန်းပန်ပိုကွိုမော့ကျေ့ပွီး “ဇက္ခဲ၊ ခုညော့နန့်အိင်မောင် ငေါ်တည်းခွိုမယ်ဖှဂ်ရယ့်အတွ အမှန်ဆန်းလော်ပေါ်” လွို့ မိင့်တိုမူရယ်။ 6အယ်းယော်ကျွောင့် ဇက္ခဲခေါ့လယ်း သဖန်းပန်ပိုခေါ့ အမှန်ဆန်းလော်ပွီး ကွိုယ်တော်ယေရှုကွို ဆူ့ယယ့်အိင်ကွိုခိုဆိုးပွီး ဝုန်းမွှောဂ်ဝုန်းဆော် ကျွိုဆွိုလေရယ်။ 7ဟော်ပေမယ့် အယ်းအဖျဂ်အပျဂ်ကွို မျိုလောဂ်ယော့ရယ့်လူတွို့ခေါ့ “ကွိုယ်တော်ယေရှုဟော် အပှဂ်ဒုစရောဂ်ဆမောယယ့် အိင်မောင် တည်းခွိုဖွို့ လောဂ်ပေါ်ဆိုးလေပီ” လွို့ ပှဂ်တန်ဝေဖန်ကျော့လေရယ်။ 8အယ်းနွောဂ် ဇက္ခဲဟော် မတ်လောဂ်ပွီး ကွိုယ်တော်ကွို “နောထွောင်တိုမူပေါ် ကွိုယ်တော်၊ ငေါ်ပေါင်ဆောင်ရယ့် ပစ္စည်းဥစ္စော်တဝဂ်ကွို ဆားရားနွမ်းပေါရယ့်ဆူရယ်ကွို ပေးပေါ်မယ်။ အယ်းအပှင် လူရယ်နောင်းခေါ့ မတရောကွောဂ်ခေါင်ယော့ယူထောရယ့် အခွန်ငွယ်မျောကွိုလယ်း အယ်းလူရယ်ဆိခေါ့ ယော့ယူထောရယ့်ပမော်နော့ထဂ် လေးဆော့ပှန်ပေးလောဂ်ပေါ်မယ်” လွို့ ရွှောဂ်တန်လေရယ်။ 9အယ်းနွောဂ် ကွိုယ်တော်ယေရှုခေါ့ ဇက္ခဲကွို “နန်ဟော် အာဗြဟံယယ့်မျွိုးဆဂ်ဖှဂ်ရယ့်အတွကျွောင့် ခုနေ့ခေါ့စော့ပွီး နန်နောင့် နန့်မွေ့ဆောစုတစုလုန်းဟော် ဖရောဆန်ယယ့် ကာတန်ခှန်းကွို ခေါင်ယော့ပွီဖှဂ်ရယ်။ 10လူဆောတိုဖှဂ်ရယ့်ငေါ်ဟော်လယ်း ဖရောဆန်နောင့် ဝီးကွာနေကျော့ရယ့်ဆူရယ်ကွို ချော်ဖွယ်ပွီး ပှဂ်ဒေါင်ပေးခေါင်ယော့ခှန်းခေါ့နေ ကာတန်ဖွို့အတွ ဟော်လိုးကော့ကွိုကျို့လော်ခှန်းဖှဂ်ရယ်” လွို့ မိင့်တိုမူရယ်။ 11ကွိုယ်တော်ဟော် အယ်းအကျွောင်းအယော်တွို့ကွို နောထွောင်နေကျော့ရယ့်လူထုပရိတ်ဆတ်တွို့ကွို ပုန်ဥဖမော်တခုကွို ထောဂ်ပွီးပေးတော်မူလေရယ်။ စော်ကျွောင့်လောဟန်ကော ကွိုယ်တော်ဟော် ဂျေရုဆလင်မွှို့အနီးကွို ယွောဂ်လော်ရယ့်အတွကျွောင့် ဖရောဆန်ယယ့်ဆော်ဆနော်တိုဟော် ချခှန်းပယ်း ပိုထွမ်းတို့မယ်လွို့ဆူတွို့ထန်မတ်ကျော့တော်ကျွောင့် ဖှဂ်ရယ်။ 12“တခေါ်ခေါဂ်အရယ်းပေါ်ရယ့်မွေ့ဆောစုခေါ့နေ မွီးဖွားလော်ဆူတယွောဂ်ဟော် အုတ်ချုတ်ဆူအယွိအယော်ကွို ခေါင်ယူဖွို့အတွ ဝီးလောင်ရယ့်တင်းပှယ်တခုကွို ဆိုးယွောဂ်ခယ့်လေရယ်။ 13ဆူဟော် ခရီးမထွခန်မောင် ဆူ့ယယ့် အစေခေါင်ဆာယွောဂ်ကွိုခိုလောဂ်ပွီး တယွောဂ်ခှန်းကွို ပိဆင်တမီနော့aစီပေးပွီး ‘ငေါ်ပှန်လော်ရယ့်အခှိင်အထိ ဟော်ပိဆင်မျောနောင့်စီးပိုးချော်ကျော့’ လွို့မိင့်ခယ့်ရယ်။ 14ဟော်ပေမယ့် ဆူ့ယယ့်တင်းဆူပှယ်ဆောတွို့ဟော် ဆူ့ကွိုငွိုးကျော့ရယ့်အတွကျွောင့် အုတ်ချုပ်ဆူအကျွီးအကားနောင်းကွို ဆတန်းပေးဆူတခှို့ကွို စေခွှဂ်ပွီး ‘ဟော်လူကွို ငေါ်တွို့ယယ့် အုတ်ချုပ်ဆူအဖှဂ်အလွိုမဆိပေါ်’ လွို့ရွှောဂ်ထောစေလေရယ်။ 15ဟော်ပေမယ့် အုတ်ချုတ်ဆူအကျွီးအကားဟော် ဆူ့ကွို အုတ်ချုတ်ဆူအဖှဂ် ခန့်အောဂ်ခယ့်ပွီး ဆူဟော်လယ်း ဆူ့ယယ့်တင်းပှယ်ကွို ပှန်လော်ခယ့်လေရယ်။ အယ်းနွောဂ် ဆူငွယ်မျောပေးအောဂ်ထောခယ့်ရယ့် အစေခေါင်တွို့ဟော် စီးပိုးချော်ပွီး အမှဂ်ငွယ်စလွောဂ်ယော့ဆိခယ့်ကျွောင်း ဆိဆလွိုရယ့်အတွကျွောင့် အယ်းအစေခေါင်ရယ်ကွို ခိုစေခယ့်လေရယ်။ 16ပထမော့အစေခေါင်ခေါ့ ဆူ့ဆီကွိုလော်ပွီး ‘သခန်ပေးပဂ်ဟော့ရယ့်ပိဆင်တမီနော့ကွို ဆာဆော့တွိုးပွားအွောင် လုတ်ထောပေါ်ရယ်’ လွို့ ရွှောဂ်တန်လေရယ်။ 17အုတ်ချုပ်ဆူခေါ့လယ်း ‘ကော်တရော်ကွို ကွောင်းပေါ်ရယ်။ နန်ဟော် အစေခေါင်ကွောင်းတယွောဂ်ဖှဂ်ပွီး ဆေးငါရယ့်အမုကိစ္စော့မောင်တအွောင် ယုန်ကျည်နောင်ကျွောင်းကွို ပျော့နောင်ခယ့်ရယ့်အတွ နန့်ကွို မွှို့ဆာမွှို့အုတ်ချုပ်ခွမ့်ကွိုပေးမောင်ဖှဂ်ရယ်’ လွို့ ဟိုးလေရယ်။ 18ဒုတိယော့အစေခေါင်ခေါ့လယ်း လော်ပွီး ‘သခန်ပေးပဂ်ဟော့ရယ့်ပိဆင်တမီနော့ကွို ငေါဆော့တွိုးပွားအွောင် လုတ်ထောပေါ်ရယ်’ လွို့ ရွှောဂ်တန်ရယ့်အခေါ် 19အုတ်ချုပ်ဆူခေါ့လယ်း အယ်းအစေခေါင်ကွို ‘ကော်တရော်ကွို ကွောင်းပေါ်ရယ်။ နန်ဟော် မွှို့ငေါမွှို့ကွို အုတ်ချုပ်ခွမ့်ကွိုပေးမောင်ဖှဂ်ရယ်’ လွို့ ဟိုးလေရယ်။ 20အယ်းနွောဂ် အချောအစေခေါင်တယွောဂ်ခေါ့လော်ပွီး ‘ငေါ်ဟော် သခန်ပေးပဂ်ဟော့ရယ့်ပိဆင်တမီနော့ကွို ခဝိုနောင့်ပတ်ပွီး လုန်လုန်ချုန်ချုန်ဆိင်းထောပေါ်ရယ်။ ဟော်မောင်ကျေ့ပေါ်။ 21သခန်ဟော် စည်းကောင်းကျွီးပွီး တိကှော့ရယ့်လူဖှဂ်ရယ့်အပှင် ကွိုယ်ပေါင်ဆောင်ခှန်းမဆိရယ့်အယော်မျောကွို ဆိင်းယူတတ်ပွီး ကွိုယ်စောဂ်ထောခှန်းမဆိရယ့် အယော်မျောကွိုလယ်း ယွိဆိင်းတတ်ရယ့်လူဖှဂ်ရယ့်အတွ ငေါ်ဟော် ကျွောဂ်မိပေါ်ရယ်။ အယ်းယော်ကျွောင့် ငေါ်ဟော် ဟော်လွိုမျွိုးလုတ်ယော့ခှန်းဖှဂ်ပေါ်ရယ်’ လွို့ ရွှောဂ်တန်လေရယ်။ 22အယ်းအခေါ် အုတ်ချုတ်ဆူခေါ့ ‘နော်ခေါင်မုမဆိရယ့်အစေခေါင်၊ နန်ယယ့်စကောအတောင်း နန့်ကွိုငေါ်အပှဂ်စီယန်မောင်ဖှဂ်ရယ်။ ငေါ်ဟော် စည်းကောင်းကျွီးပွီး တိကှော့ရယ့်လူဖှဂ်ပွီး အချောဆူတွို့နောင်းခေါ့ ငေါ်နောင့်မဆောင်ရယ့် ပစ္စည်းဥစ္စော်မျောကွို ဆိင်းယူတတ်ပွီး ကွိုယ်စောဂ်ထောခှန်းမဆိရယ့် ဆီးနောင်မျောကွိုလယ်း ယွိဆိင်းတတ်ရယ့်လူဖှဂ်ရယ်ဆွိုတော်ကွို နန်အမင်တကာဆိဆယန် 23ငေါ်ပေးပဂ်ဟော့ရယ့် ငွယ်မျောကွို ဘန်မောင်အောဂ်ထောဆန့်ရယ်။ အယ်းလွိုမောင့် ငေါ်ပှန်လော်ရယ့်အခေါ်မောင် ငေါ့ယယ့်ငွယ်မျောကွို အတွိုးနောင့် ငေါ်ဟော်ယော့ဆိမောင်ဖှဂ်ရယ်’ လွို့ မိင့်လေရယ်။ 24အယ်းနွောဂ်မောင် အုတ်ချုပ်ဆူဟော် အနီးမောင်မတ်နေကျော့ရယ့်လူတွို့ကွို ‘အယ်းလူနောင်းခေါ့ ပိဆင်ကွိုယူပွီး ပိဆင်မျောကွိုဆာဆော့ပွားအွောင် လုတ်ဆွောင်ခယ့်ရယ့် အစေခေါင်ကွို ပေးလောဂ်ကျော့’ လွို့ အမိင့်ပေးခယ့်လေရယ်။ 25ဟော်ပေမယ် ဆူယယ့်အစေခေါင်တွို့ခေါ့ ‘သခန် အယ်းအစေခေါင်မောင် ပိဆင်ဆာမီနော့ဆိပွီးပေါ်ပီ’ လွို့ ရွှောဂ်တန်ကျော့လေရယ်။ 26ဟော်ပေမယ့် အုတ်ချုပ်ဆူခေါ့လယ်း ‘ငေါ်နန်တွို့ကွိုဟိုးမယ် ယုန်ကျည်အောထောယော့ရယ့်လူကွို ပွိုပွီးပေးမယ်၊ ဟော်ပေမယ့် မယုန်ကျည်ယော့ရယ့်လူရယ်ကွိုကော ဆူတွို့ယော့ဆိထောပွီးဆော အယော်ကွိုတအွောင် နွိယူခေါင်ကျော့ယော့မောင်ဖှဂ်ရယ်။ 27အယ်းအပှင် ငေါ့ယယ့်အုတ်ချုပ်မုကွို မလွိုလောရယ့် ရန်ဆူမျောကွို ဟော်နေယော်ကွိုခိုလော်ပွီး ငေါ့ယယ့်ချယ့်မောင် ဆတ်ပေါဂ်ကျော့ပေါ်’ ဆွိုပွီး ဟိုးလေရယ်” လွို့ မိင့်တိုမူလေရယ်။ 28အယ်းလွိုမိင့်တိုမူပွီးရယ့်နွောဂ်မောင် ကွိုယ်တော်ယေရှုဟော် ဆပည့်တိုတွို့ယယ့်ချယ့်ခေါ့ကျိုပွီး ဂျေရုဆလင်မွှို့ကွို ခရီးဆဂ်တိုမူရယ်။ 29သံလွင်တွောင်အနီးမောင်ဆိရယ့် ဗက်ဖာဂေဝိုနောင့် ဗေသနိဝိုကွို ယွောဂ်ရယ့်အခေါ် ကွိုယ်တော်ယေရှုဟော် ဆပယ့်တိုနေဦးကွို ချယ့်ခေါ့နေကျွိုတန်ပွီးဆိုးကျော့ဖွို့ စေခွှဂ်တိုမူလေရယ်။ 30ဆူတွို့ကွိုမစေခွှဂ်မီ ကွိုယ်တော်ခေါ့ “နန်တွို့ချယ့်မောင်ဆိရယ့် ဝိုကွို ဆိုးကျော့ပေါ်။ အယ်းနေယော်မောင် စူမောင့်မစီးဖူးဆေးရယ့် မြည်းbငါတကွောင် ကွို ကျွိုးနောင့်ခှယ်ထောတော်ကွို တွိယော့လောဂ်မယ်။ အယ်းမြည်းငါကွို ကျွိုးဖှေပေးပွီး ငေါ့နောင်းကွို ခိုလော်ခယ့်ကျော့။ 31တယွောဂ်ယွောဂ်ခေါ့ ‘နန်တွို့ကွို စော်ကျွောင့် မြည်းငါကွို ကျွိုးဖှေနေကျော့သလော’ လွို့ မေးယန် ‘ကွိုယ်တော်ခေါ့ အယ်းမြည်းငါကွို အဆုန်းပှုဖွို့လွိုအောဂ်လွို့ပေါ်’ လွို့ပှန်ဖှေကျော့” လွို့ မိင့်တိုမူရယ်။ 32အယ်းယော်ကျွောင့် ဆပယ့်တိုနေယွောဂ်ဟော်လယ်း အယ်းဝိုနောင်းကွို ဆိုးခယ့်ကျော့ပွီး ကွိုယ်တော်မိင့်တိုမူရယ့်အတောင်း မြည်းငါကွိုတွိကျော့လေရယ်။ 33ဆူတွို့ဟော် မြည်းငါကွို ကျွိုးဖှယ်နေခှိင်မောင် အယ်းမြည်းငါယယ့် သခန်တွို့ခေါ့ “စော်ကျွောင့်မြည်းငါကွို ကျွိုးဖှယ်နေကျော့သလော” လွို့ မေးခယ့်ကျော့လေရယ်။ 34ဆူတွို့ခေါ့လယ်း “ကွိုယ်တော်ခေါ့ အဆုန်းပှုဖွို့လွိုအောဂ်လွို့ပေါ်” လွို့ဖှေကျော့လေရယ်။ 35အယ်းနွောဂ်မောင် ဆပယ့်တိုတွို့ဟော် မြည်းငါကွို ကွိုယ်တော်ယေရှုနောင်းကွို ယူဆွောင်လော်ကျော့ပွီး မြည်းငါယယ့် တကွိုယ်ပိုမောင် ဆူတွို့ယယ့်အဝဂ်မျော ခန်းပေးပွီး ကွိုယ်တော်ယေရှုကွို ထောင်စေခယ့်လေရယ်။ 36အယ်းနွောဂ်မောင် ကွိုယ်တော်ယေရှုဟော် အယ်းမြည်းငါကွို စီးပွီး ဂျေရုဆလင်မွှို့ကွို ကျို့တိုမူယော်လောင်းခရီးမောင် လူတွို့ဟော် ကွိုယ်တော်ကွိုဂုန်ပှုဖွို့အတွ ဆူတွို့ယယ့် ဝဂ်ရုန်မျောကွို လောင်းပိုမောင် ခန်းထောပေးခယ့်ကျော့လေရယ်။ 37ကွိုယ်တော်ယေရှုဟော် လူထုပရိတ်ဆတ်ကျွီးနောင့်အတူ ဂျေရုဆလင်မွှို့အနီးမောင်ဆိရယ့် သံလွင်တွောင်ခေါ့နေ ဆန်းလော်ရယ့်လောင်းကွို ယွောဂ်ရယ့်အခေါ် ကွိုယ်တော်ယယ့်ဆပယ့်တိုအပွေါင်းတွို့ဟော် ကွိုယ်တော်ယေရှုပှုခယ့်ရယ့် အောင့်အိုးစရော်အမုအလုန်းစုန်တွို့အတွ ကှာလွောင်ရယ့်အဆောင်နောင့် ဝုန်းမွှောဂ်ဝုန်းဆော်အိုဟဂ်ကျော့ပွီး ဖရောဆန်ယယ့်ဂုဏ်ကျယ်းဇူးတိုကွို ခှီးမွမ်းခယ့်ကျော့လေရယ်။ 38“ဖရောဆန်ယယ့် အခွမ့်အော်နော်နောင့် ဆန်ဘရန်အဖှဂ် ကျို့ယွောဂ်လော်တိုမူရယ့် ကွိုယ်တော်ဟော် ကွောင်းကျွိုးချောင်းဆော်မျောယော့ဆိပေါ် စေ။ ဆွယ်မွှို့တိုမောင်ဆိရယ့် ဖရောဆန်ဟော် ညိင်းခှောင်းခှန်းဆိပေါ်စေ။ ဆွယ်မွှို့တိုမောင်ဆိရယ့် ဖရောဆန်ယယ့် ဖုန်းတခွိုးတိုဟော်လယ်း ထွမ်းလန်းပေါ်စေ” လွို့ အိုဟဂ်ခယ့်ကျော့လေရယ်။ 39အယ်းအခေါ် လူအုတ်ထားခေါ့ ဖာရိရှဲတခှို့ဟော် ကွိုယ်တော်ကွို “ကွိုယ်တော်၊ ကွိုယ်တော်ယယ့်ဆပယ့်ရယ်ကွို တိတိဆိဆိနေကျော့ဖွို့ အမိင့်ပေးတိုမူပေါ်” လွို့ရွှောဂ်ကျော့လေရယ်။ 40ကွိုယ်တော်ယေရှုခေါ့ ဆူတွို့ကွို “နန်တွို့ကွို ငေါ်ဟိုးယော့ယန် ငေါ့ယယ့်ဆပယ့်တိုရယ်ခေါ့ ငေါ့အတွခှီးမွမ်းကြွေးကျိုခှန်း မပှုကျော့ယန် ကွှောဂ်ခါးမျောကော့ ခှီးမွမ်းကြွေးကျိုခှန်း ပှုကျော့လောဂ်မယ်” လွို့မိင့်တိုမူလေရယ်။ 41အယ်းနွောဂ်မောင် ကွိုယ်တော်ယေရှုဟော် ဂျေရုဆလင်မွှို့အနီးကွို ယွောဂ်ဆိလော်ရယ့်အခေါ် မွှို့ကွိုကျေ့ပွီး ဟော်မွှို့မောင် နေထောင်ကျော့ရယ့်လူရယ်အတွ ဝုန်းနယ်းပွီး မျဂ်ယေကှော့တိုမူရယ်။ 42ကွိုယ်တော်ခေါ့ “အို ဂျေရုဆလင်မွှို့မောင် နေထောင်ကျော့ရယ့်လူအပွေါင်းတွို့၊ ဖရောဆန်နောင့်အတူ ညိင်းခှောင်းခှန်းယော့စေမယ့်နည်းလောင်းကွို နန်တွို့ဆိဆစေဖွို့ငေါ်ဟော် ကော်တရော်စိဆန်ဒေါ့ဆိခယ့်ပေမယ့်လယ်း အခုမောင်ကော နန်တွို့ မျိုနောင်ကျော့တို့မောင်မဟွိပေါ်။ 43အကျွောင်းမောင်ကော ဘေးဒုက်ခေါ့ခေါင်စောယော့မယ့် အခှိင်ကော်လော့ဟော် နန်တွို့နောင်းကွိုယွောဂ်ဆိလော်တို့မောင်ဖှဂ်ရယ်။ အယ်းအခှိင်မောင် နန်တွို့ယယ့် ရန်ဆူမျောဟော် နန်တွို့ယယ့် ပတ်လည်မောင် မွှို့ရွိုးတခုဆွောဂ်ပွီး နန်တွို့ကွို ဝမ်းထေားကျော့လောဂ်မယ်။ အယ်းယော်ပွီးယန် နန်တွို့ကွို အဖဂ်ဖဂ်ခေါ့ ပိဆွို့ပွီး တောဂ်ခေါဂ်ကျော့လောဂ်မောင်ဖှဂ်ရယ်။ 44နန်တွို့ယယ့်မွှို့တမွှို့လုန်းဟော် မှေပှင်နောင့်တညီထည်းဖှဂ်ဆိုးရယ့်အထိ နန်တွို့ယယ့် အဆွောဂ်အဦးမျောနောင့် နောင်ယောင်မျောကွိင်စန်ဆိုးရယ့်အထိတအွောင် ဆူတွို့ဟော် ဖွှိုခှော့ဖျဂ်ဆီးကျော့လောဂ်မောင်ဖှဂ်ပွီး နန်တွို့ မွှို့ခေါ့လူအောလုန်းကွိုလယ်း ဆတ်ကျော့လောဂ်မောင်ဖှဂ်ရယ်။ အကျွောင်းမောင်ကော နန်တွို့ကွိုကာတန်ဖွို့အတွ ဖရောဆန်ခေါ့ ကာတန်ဆန်မေရှိယကွို စေခွှဂ်တိုမူရယ့်အခှိင်ကွို နန်တွို့ဆတိမထောမိကျော့တော်ကျွောင့်ဖှဂ်ရယ်” လွို့ မိင့်တိုမူရယ်။ 45အယ်းနွေ့ာဂ်မောင် ကွိုယ်တော်ဟော် ဗိမာန်တိုထားကွိုဝမ်ပွီး ပူဇော်ဖွို့အတွ တရိဆန်မျောနော့ အချောအယော်မျောကွို ယွောင်းခှော့နေကျော့ရယ့်ဆူမျောကွို မွောင်းထွိတိုမူလေရယ်။ 46ကွိုယ်တော်ယေရှုခေါ့ အယ်းလူတွို့ကွို “‘ဖရောဆန်ဟော် ကျောင်းစော်ထားမောင် ဖရောဆန်ယယ့်အိင်တိုဟော် ဆုတွောင်းယော် နေယော်ဖှဂ်ယော့မယ်’ လွို့ကျောင်းစော်မောင်ရယ်းထောပေမယ့်လယ်း နန်တွို့ခေါ့ သခွိုးဓမျှော့မျော ခွိုအွောင်းရယ့်နေယော်လွိုမျွိုး ဖှဂ်စေခယ့်ပွီ” လွို့ မိင့်တိုမူရယ်။ 47အယ်းနွောဂ် ကွိုယ်တော်ယေရှုဟော် ဗိမာန်တိုမောင် နေ့စန်နေ့တောင်း ဟိုးကျောသွန်သင်ပေးလေရယ်။ ဟော်ပေမယ့် ပုရောဟိတ်အကျွီးအကားမျော၊ ကျောင်းတတ်ဆရော်မျောနောင့် ဂျူးလူမျွိုးအကျွီးအကားမျောဟော် ကွိုယ်တော်ကွိုဆတ်နောင်ဖွို့ နည်းလောင်းကွိုချော်ဖွယ်နေကျော့လေရယ်။ 48ဟော်ပေမယ့် လူထုပရိတ်ဆတ်အပွေါင်းတွို့ဟော် ကွိုယ်တော်ဟိုးကျောသွန်သင်တော်တွို့ကွို အော်ရုန်စောဂ်ပွီး နော်ကျောနေကျော့ရယ့်အတွကျွောင့် ဆူတွို့ဟော် အယ်းလွိုပှုလုတ်ဖွို့အတွ နည်းလောင်းချော်မတွိခယ့်ကျော့ပေါ်။
Currently Selected:
Luke 19: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
