Luke 12
12
1အယ်းအခှိင်မောင် လူထွောင်ပွေါင်းမျောတွို့ဟော် စုဝီးလော်ကျော့ပွီး တယွောဂ်နောင့်တယွောဂ် တဂ်နန်းမိလွောဂ်အွောင် ဖှဂ်ကျော့ရယ်။ ကွိုယ်တော်ယေရှုဟော် ဆပယ့်တိုမျောကွို ဦးဆုန်းပထမော့ မိင့်ဆွိုယော်မောင် “တဆေးaရယ်လွိုမျွိုး ဖာရိရှဲတွို့ယယ့် ဆူတော်ကွောင်းယွောင်ဆွောင်ရယ့်ဆူရယ် ကွိုဆတိပှုကျော့ပေါ်။ 2ဖုန်းကွာထောသမျောတွို့ဟော် ပိုလော်လောဂ်မောင်ဖှဂ်ပွီး ကွာဝထောသမျော့အယော်တွို့ဟော်လယ်း ဆိဆလော်ယော့လောဂ်မောင်ဖှဂ်ရယ်။ 3အယ်းယော်ကျွောင့် အမွောင်ထားမောင် တိတိပယ့်ဟိုးသမျော့အယော်တွို့ဟော် နေ့ခန်းအခှိင်မောင် လူအောလုန်းဆိဆစေဖွို့ ကျေညော်သလွိုမျွိုးဖှဂ်မောင် ဖှဂ်ပွီး အလုန်ပိထောရယ့်အခန်းထားမောင် တိတိပယ့်ဟိုးဆွိုသမျေားအယော်တွို့ဟော် အိင်ခွေါင်မွိုးပိုခေါ့နေ ခှောင်းအိုပွီး ဟိုးသလွိုမျွိုး ဖှဂ်ပေလောဂ်မယ်” လွို့ မိင့်တိုမူလေရယ်။ 4တဖန် ကွိုယ်တော်ခေါ့ “မိင့်ဆွေတွို့၊ ဂရုစောဂ်ပွီး နောထွောင်ကျော့ပေါ်။ နန်တွို့ယယ့်ခန်ဓော်ကွိုယ်ကွို ဆတ်နောင်ရယ့်ဆူရယ်ကွို မကျွောဂ်ကျော့နောင့်။ ဆူတွို့ဟော် နန်တွို့ယယ့် ကွိုယ်ခန်ဓော်ကွိုဆတ်နောင်ပေမယ့် အယ်းထဂ်ပွိုပွီး နော်ကြင်အွောင် စော်မောင့်မလုတ်နောင်ကျော့ပေါ်။ 5ဟော်ပေမယ့် နန်တွို့ကျွောဂ်ယော့မယ့်ဆူခေါ့ ဖရောဆန် တပေါထယ်းပယ်းဖှဂ်တိုမူရယ်။ ဖရောဆန်ဟော် နန်တွို့ယယ့်အဆဂ်ကွို နွိယူနောင်ယုန်မကော့လွို့ ငရားကွို ပွို့နောင်ရယ့် အခွမ့်အော်နော်ဆိတိုမူရယ့်အတွ ဖရောဆန်ကွိုပယ်း အပှယ့်အဝို့ ကျွောဂ်ဆန့်ရယ်။ 6ငစိင်စော် ငေါကွောင်ကွို အဿရိဒန်းကောနေပှောbနောင့် ဝါယူလွို့ ယော့နောင်ရယ်မဟွိလော။ ဟော်ပေမယ့် ဖရောဆန်ဟော် တန်ဖွိုးကော်တရော်နည်းရယ့် အယ်းငစိင်စော်ရယ်ထားကော့ တကွောင်ကွိုတအွောင် တန်ဖွိုးထောတိုမူရယ်။ 7ဖရောဆန်အတွ နန်တွို့ဟော် ငစိင်စော်မျောထဂ် အဖွိုးတန်ပေါ်ပေရယ်။ နန့်တွို့ယယ့်ခွေါင်းပိုခေါ့ ဆပန်အယေအတွကွိုတအွောင် ဆိဆတိုမူရယ့်အတွ နန်တွို့စိမပူကျော့နောင့်” လွို့ မိင့်တိုမူရယ်။ 7ဖရောဆန်အတွ နန်တွို့ဟော် ငစိင်စော်မျောထဂ် အဖွိုးတန်ပေါ်ပေရယ်။ နန့်တွို့ယယ့်ခွေါင်းပိုခေါ့ ဆပန်အယေအတွကွိုတအွောင် ဆိဆတိုမူရယ့်အတွ နန်တွို့စိမပူကျော့နောင့်” လွို့ မိင့်တိုမူရယ်။ 8ဆဂ်လဂ်ပွီး ကွိုယ်တော်ခေါ့ “နန်တွို့ကွို ငေါ် ဟိုးခှန်းတော်ခေါ့ စူမဆွို လူတွို့ယယ့်ချယ့်မောင် ငေါ့ယယ့်ဆပယ့်တိုဖှဂ်ကျွောင်းကွို ဝမ်ခေါင်ယန် လူဆောတိုဖှဂ်ရယ့်ငေါ်ဟော်လယ်း ဖရောဆန်နောင့်အတူ ဆူ့ယယ့်နတ်ဒေဝါမျောချယ့်မောင် အယ်းလူဟော် ငေါ့ယယ့်ဆပယ့်တိုဖှဂ်ကျွောင်းကွို ဝမ်ခေါင်ဟိုးဆွိုမောင်ဖှဂ်ရယ်။ 9ဟော်ပေမယ့် စူမဆွို လူတွို့ယယ့်ချယ့်မောင် ငေါ့ယယ့်ဆပယ့်တိုမဟွိလွို့ ဟိုးဆွိုပေါ်ခေါ့ ငေါ်ဟော်လယ်း ဖရောဆန်နောင့်အတူ ဆူ့ယယ့်နတ်ဒေဝါမျောချယ့်မောင် ဟော်လူယော် ငေါ့ယယ့်ဆပယ့်တို မဟွိကျွောင်းကွို ဝမ်ခေါင်ဟိုးဆွိုမောင်ဖှဂ်ရယ်။ 10လူဆောတိုဖှဂ်ရယ့် ငေါ့ကွို ပှဂ်မောဟိုးဆွိုယန် ဖရောဆန်ဟော် ဆူတွို့ကွို ခွမ့်ခွှဂ်တိုမူမောင်ဖှဂ်ပေမယ့်လယ်း ညင်အလန်းတိုကွို ပှဂ်မောဟိုးဆွိုရယ့်လူ စူကွိုမဆွို ဖရောဆန်ဟော် ခွမ့်ခွှဂ်မောင်မဟွိပေါ်။ 11လူတွို့ဟော် ငေါ့ကွိုယုန်ကျည်ရယ့်အတွကျွောင့် နန်တွို့ကွို ဓမ္မာရုန်မျော၊ အုတ်ချုတ်ဆူမျောနောင့် အော်နော်ပေါင်မျောချယ့်မောင်ပေါ် စီယန်ဖွို့ခိုဆွောင်ခှန်းခေါင်ယော့ရယ့်အခေါ် မောင်လယ်း စော်နန်မျွိုးပှန်လယ်ဟိုးဆွိုယော့မောင်ကွို စိမပူကျော့နောင့်။ 12စော်ကျွောင့်လောဟန်ကော နန်တွို့ စော်နန်မျွိုးပှန်လယ်ထွဆွိုယော့မယ်ဆွိုတော်ကွို အယ်းအခှိင်မောင်ပယ်း ညင်အလန်းတိုခေါ့ နန်တွို့ကွို ဟိုးကျောပေးတိုမူလောဂ်မယ်” လွို့ မိင့်တိုမူရယ်။ 13အယ်းနွောဂ်မောင် လူထုပရိတ်ဆတ်ထားခေါ့ လူတယွောဂ်ခေါ့ ကွိုယ်တော်ယေရှုကွို “ကွိုယ်တော်၊ တွို့ဖော့ ထောပေးပဂ်ဟော့ရယ့် အမွီပစ္စည်းတွို့ကွို ခွားပေးဖွို့အတွ ငေါ့ယယ့်အကွိုကွို အမိင့်ပေးတိုမူပေါ်” လွို့ ရွှောဂ်တန်လေရယ်။ 14ဟော်ပေမယ့် ကွိုယ်တော်ခေါ့ “မိင့်ဆွေ နန်တွို့နေယွောဂ်ကျောမောင်ဆိရယ့် အမွီကိစ္စော့မျော ခွားဝီပေးဖွို့အတွ ဆုန်းဖှဂ်ချဂ်ခှော့ပေးဖွို့ တရောဆူကျွီးအဖှဂ် စူခေါ့ ငေါ့ကွို ခန့်ထောသလော” လွို့ပှန်လည်မိင့်တိုမူလေရယ်။ 15အယ်းနွောဂ်မောင် ကွိုယ်တော်ခေါ့ လူထုပရိတ်ဆတ်တွို့ကွို “ကော်တရောလိုးဖော့ကျွီးခှန်း အမျွိုးမျွိုးတွို့ခေါ့နေ ရွှောင်ကျော့ပေါ်။ စော်ကျွောင့်လောဟန်ကော နန်တွို့ပေါင်ဆောင်ရယ့်စည်းစိင်မျောဟော် နန်တွို့ယယ့်အဆဂ်ကွို လုန်ချုန်စိခှော့ယော့မု ပေးနောင်ခှန်းမဆိရယ့်အတွကျွောင့်ပယ်း ဖှဂ်ရယ်” လွို့ မိင့်တိုမူရယ်။ 16အယ်းနွောဂ်မောင် ကွိုယ်တော်ယေရှုခေါ့ လူထုပရိတ်ဆတ်တွို့ကွို ပုန်ဥဖမော်တခုနောင့် မိင့်တိုမူရယ့်ဟော်မောင် “တခေါ်ခေါ့ အဆီးအနောင်အထွကွောင်းရယ့် လာယော်ကွိုပေါင်ရယ့် သဌေးတယွောဂ်ဆိလေရယ်။ 17အယ်းယော်ကျွောင့် ဆူခေါ့ ငေါ့ယယ့် အဆီးအနှောင်ရယ်ကွို လွောင်ဖွို့ နေယော်လွဂ်မဆိရယ့်အတွ အခု ငေါ် စော်နန်ပှုလုတ်ယော့မလော” လွို့ တွယ်းနေလေရယ်။ 18အယ်းနွောဂ်မောင် ဆူခေါ့ “ငေါ် စော်နန်ပှုလုတ်ယော့မယ်ဆွိုရယ့်ဟော်ကွို ငေါ်ဆိဆပီ။ ငေါ့ယယ့် စပေါကှီအဟွောင်းမျောကွို ဖျဂ်ပွီး ပွိုကျွီးရယ့် စပေါကှီကွို ဆွောဂ်ပွီးယန် ထွဆိလော်မယ့် ကွောဂ်ပါးအဆီးအနောင်မျောနောင့်အတူ ငေါ့ယယ့်စည်းစိင်မျောကွို ဆိင်းထောမယ်။ 19အယ်းလွိုလုတ်လောဂ်ယန် ငေါ့မောင် နွေ့ာဂ်ထောဂ် နဂ်ပွေါင်းမျောစွာအတွ လုန်လွောဂ်ရယ့်ကွောဂ်ပါးအဆီးနောင်မျောနောင့်အတူ အချောကွောင်းမွမ်ရယ့်အယော်မျောကွို ဆိင်းထောပွီးပီဖှဂ်လွို့ အလုတ်လုတ်စရော်မလွိုတို့ပယ်း ဆဂ်ဆဂ်ဆော်ဆော်နောင့် အနောယူပွီး စောလောဂ် ဆွောဂ်လောဂ်နောင့် ပျိုပျိုပယ်းနေတို့မယ်” လွို့ ဟိုးလေရယ်။ 20ဟော်ပေမယ့် ဖရောဆန်ခေါ့ အယ်းလူကွို “ဆွိုးသွမ်းရယ့်လူ၊ နန်ဟော် ခုညော့မောင်ပယ်း ဆေယော့လောဂ်မောင်ဖှဂ်ရယ်။ အယ်းလွိုဖှဂ်ယန် နန်ဆိင်းထောရယ့်အယော်တွို့ဟော် အချောဆူမျောနောင်းကွို ယွောဂ်ဆိုးမောင်ဖှဂ်ရယ်” လွို့ မိင့်တိုမူရယ်။ 21အယ်းယော်ဟော် “ကွိုယ့်အတွပယ်း ဆိင်းထောတတ်ကျော့ပေမယ့်လယ်း ဖရောဆန်ခေါ့ အဖွိုးတန်ရယ်လွို့ ယူဆော့ရယ့်အယော်မျောကို တန်ဖွိုးမထောဆူမျောဟော် အယ်းလွိုဖှဂ်လောဂ်မယ်” လွို့ မိင့်တိုမူရယ်။ 22အယ်းနွောဂ်မောင် ကွိုယ်တော်ယေရှုခေါ့ ဆပယ့်တိုတွို့ကွို “အယ်းယော်ကျွောင့် နန်တွို့ကွို ငေါ်ဟိုးခှန်တော်ကော့ နန်တွို့အဆဂ်ချန်နေထောင်ဖွို့အတွ လွိုအောဂ်ရယ့်အယော်မျောကွို စိမပူကျော့နောင့်။ နန်တွို့မောင် စောစရော် အလုန်အလွောဂ်မဆိမောင်ကွိုယော၊ ဝဂ်စရော်အလုန်အလွောဂ်မဆိမောင်ကွိုယော စိမပူကျော့နောင့်။ 23အကျွောင်းမောင်ကော အဆဂ်ဟော် အစော်ထဂ်ပွိုပွီးအရယ်းကျွီးရယ်။ တကွိုယ်ဟော်လယ်း အဝဂ်ထဂ်ပွိုပွီး အရယ်းကျွီးရယ်။ 24ကျားအာ့မျောကွို လေ့လော်ကျေ့ပေါ်။ ဆူတွို့ဟော် မျွိုးစယ့်မျောကွိုလယ်း မစောဂ်ပျွိုး အဆီးအနောင်မျောကွိုလယ်း မယွိဆိင်းကျော့ယော့ပေါ်။ အဆီးအနောင် သိုလွောင်ဖွို့စပေါကှီလယ်းမဆိပေါ်။ ဟော်ပေမယ့် ဖရောဆန်ဟော် ဆူတွို့ကွို ကျွယ်းမွီးထောတိုမူရယ်။ နန်တွို့ဟော် ငရယ်ထဂ် အမျောကျွီး ပွိုတန်ဖွိုးဆိရယ်။ 25နန်တွို့ထားမောင် စော်လူဟော် စိပူပန်မုရယ်နောင့် ကွိုယ့်ယယ့်အဆဂ်ကွို တနော်ရီတအွောင် ပွိုပွီးချယ်စေနောင်လော။ 26အယ်းယော်ကျွောင့် နန်တွို့ဟော် အဆေးငါဆုန်းဖှဂ်ရယ့်အယော်ကွိုတအွောင် မလုတ်နောင်ကျော့ယန် အချောအယော်ရယ်ကွို စော်ကျွောင့်စိပူနေကျော့သလော။ 27တိုးရောင်းပန်းမျောဟော် စလွိုမျွိုးချန်ပွီးကျွီးထွားလော်ရယ်ဆွိုတော်ကွို ကျေ့ရှု့ဆန်ချန်ကျော့ပေါ်။ ဆူတွို့ဟော် ခတ်ခါးရယ့်အလုတ်ကွိုလယ်းမလုတ်၊ အဝဂ်ကွိုလယ်း မချုတ်လုတ်ကျော့။ ဟော်ပေမယ့် နန်တွို့ကွို ငေါ်ဟိုးခှန်တော်ခေါ့ ချယ့်အယန်ခေါ့ ဖုန်းစည်းစိင်နောင့်ပှယ့်စုန်ရယ့် ရှောလမုန်ဘရန်ကျွီးတအွောင် ဝဂ်ကွောင်းစောခှော့ရယ်ဝဂ်ထောခယ့်ပေမယ့်လယ်း ဆူ့ယယ့်အဝဂ်အစောမျောဟော် အယ်းတိုးရောင်းပန်းရယ်ထားခေါ့ ပန်းတပွမ့်လွောဂ်တွောင် ခှော့ပေါ့ခှန်းမဆိခယ့်ပေါ်။ 28အို ယုန်ကျည်ချဂ်နည်းပနန်းရယ့်လူရယ်၊ ဆူတွို့ဟော် အခှိင်တွိုကော်လော့တခုမောင်ပယ်း အဆတ်ချန်ကျော့ပွီး မကျော်မီအခှိင်အတွမ်းမောင် မျဂ်ပန်မျောနောင့်အတူ မီးဖွိုထားကွို ခဂ်ခှော့ခေါင်ယော့ပွီး တိုးရောင်းပန်းရယ်ကွိုတအွောင် ဖရောဆန်ဟော် အခှော့ဆန်ပေးယန် နန်တွို့ကွို ပွိုပွီး အခှော့ဆန်ပေးမောင် အဆေအချော်ပယ်းဖှဂ်ရယ်။ 29စော်ကွိုစောဆွောဂ်ယော့မလော ဆွိုတော်ကွို စိပူပန်မနေကျော့နောင့်။ 30ဖရောဆန်ကွို မဆိဆရယ့်ဆူရယ်ခေါ့ပယ်း အမှားတမ်း စိပူပန်တတ်ရယ်။ ဟော်ပေမယ့် ဆွယ်မွှို့တိုမောင်ဆိရယ့် ဖော့ဖရောဆန်ခေါ့ နန်တွို့လွိုအောဂ်ရယ့်အယော်မျောကွို ဆိဆတိုမူရယ့်အတွကျွောင့်နန်တွို့ဟော် အယ်းအယော်မျောအတွ စိပူပန်ခှန်းမဆိဆန့်ပေါ်။ 31အယ်းအစော ဖရောဆန်ယယ့် ဆော်ဆနော်တိုအတွကွိုပယ်း ဦးစောပေးလုတ်ဆွောင်ကျော့ပေါ်။ အယ်းလွိုလုတ်ယန် နန်တွို့လွိုအောဂ်ရယ့် အယော်မင်သမျော့ကွို ဖရောဆန်ခေါ့ အလုန်အလွောဂ်ဖှယ့်ဆည်းပေးတိုမူပေါ်လောဂ်မယ်” လွို့မိင့်တိုမူလေရယ်။ 32တဖန် ကွိုယ်တော်ခေါ့ “သိုးငါအုတ်စုနောင့်တူကျော့ရယ့် ငေါ့ယယ့်ဆပည့်တိုတွို့ ငေါ်ဟော် နန်တွို့ယယ့် သိုးထိင်းနောင့်တူရယ်။ အယ်းယော်ကျွောင့် နန်တွို့ မကျွောဂ်ကျော့နောင့်။ ဆွယ်မွှို့တိုမောင်ဆိရယ့် နန်တွို့ယယ့်ဖော့ဖရောဆန်ဟော် ဆွယ်မွှို့တိုမောင်နန်တွို့နောင့်အတူ အုတ်စွိုးစေခှန်းကွို အလွိုဆိတိုမူရယ်။ 33ဆိသမျော့ပစ္စည်းရယ်ကွို ယွောင်းခှော့ပွီး ဆားရားနွမ်းပေါရယ့်ဆူရယ်ကွို စွမ့်ကျားကျော့ပေါ်။ မဆွီးမဟွောင်းတတ်ရယ့် ပိဆင်အိရယ်ကွို ပှုလုတ်ပွီး နန်တွို့ယယ့် ပစ္စည်းဥစ္စော်မျောကွို သခွိုးရယ် မယွောဂ်နောင်၊ ပွိုးမွားရယ် မဖျဂ်ဆီးနောင်ရယ့် ဆွယ်မွှို့တိုနောင်းမောင်ပယ်း မကွိင်းခန်းနောင်ရယ့်ပစ္စည်းဥစ္စော်မျောကွို ဆိင်းထောကျော့ပေါ်။ 34စော်ကျွောင့်လောဟန်ကော နန်တွို့ပစ္စည်းဥစ္စော်မျောဆိရယ့်နေယော်မောင် နန်တွို့ယယ့်စိနလုန်းဟော်လယ်း ယွောဂ်နေတတ်ရယ့်အတွကျွောင့်ဖှဂ်ရယ်” လွို့ မိင့်တိုမူရယ်။ 35ကွိုယ်တော်ခေါ့ဆဂ်လဂ်ပွီး “အစေခေါင်ရယ်ဟော် ခေါပတ်ကွို မှားမှားစယ်းပွီး မီးအိင်ကွိုထွမ်းပွီး သခန်ပှန်လော်မယ့်အခိင်ကွို စွောင့်နေသလွိုမျွိုး နန်တွို့ဟော်လယ်း ငေါ်ပှန်လော်မယ့် နေ့ရတ်နောင့်အခိင်ကွို အဆန်သင့်စွောင့်နေကျော့ပေါ်။ 36မိမိတွို့ယယ့် သခန်ဟော် မန်ဂလော်ဆွောင်ပွားခေါ့နေ ပှန်လော်ပွီး တခေါကွို ခွေါဂ်ရယ့်အခေါ် ချခှင်း ထော့ပွီး ဖွမ့်ပေးနောင်ဖွို့ အဆန်သင့်ပှန်ထောရယ့်အစေခေါင်လွိုမျွိုး ငေါ်ပှန်လော်ရယ့်အခိင်မောင်လယ်း အဆန်သင့်ရှိနေကျော့ပေါ်။ 37အယ်းအခေါ် သခန်ဟော် ဆူပှန်လော်ရယ့်အခှိင်ကွို ဆတိနောင့် စွောင့်နေရယ့် အစေခေါင်ရယ်ကွို ဆုလောဂ်မျော ပေးဆနော်လောဂ်မယ်။ နန်တွို့ကွို ငေါ်အမင်ဟိုးယော့ယန် သခန်ဟော် ခေါပတ်ကွို စယ်းပွီး အယ်းအစေခေါင်ရယ်ကွို စောစရော်ရယ်နောင့် တည်ခန်းကျွယ်းမွယ်းလောဂ်မယ်။ 38သခန်ဟော် ညော့သခွေါင်အခှိင် အယ်းလွိုမောင့်မဟွိ မွိုးလန်းရယ့်အခှိင်cမောင် ပှန်လော်ရယ့်အခေါ် အဆန်သင့် ပှန်ထောပွီးစွောင့်နေကျော့ရယ့် အစေခေါင်ရယ်ကွို တွိယော့ယန် သခန်ဟော် ကော်တရော်သဖိုးကှော့တိုမူလောဂ်မောင်ဖှဂ်ရယ်။ 39အိင်သခန်ဟော် သခွိုးလော်မောင်ကွိုဆိဆပွီး ဆတိဆိဆိနေယန် ကွိုယ့်ယယ့်အိင်ကွို ဖွောဂ်ထွမ်းဝမ်ယွောဂ်ပွီး ခွိုးယူနောင်မောင်မဟွိကျွောင်းကွို နန်တွို့ဆိဆမတ်ထောဖွို့လွိုရယ်။ 40အယ်းအတောင်းပဲ နန်တွို့ဟော်လယ်း အမှားအဆန်သင့် ဖှဂ်နေကျော့ပေါ်။ စော်ကျွောင့်လောဟန် လူဆောတိုဖှဂ်ရယ့်ငေါ်ဟော် နန်တွို့ မထန်မတ်ထောရယ့်အခှိင်မောင် ပှန်ကျို့လော်မောင်ဖှဂ်ရယ်” လွို့မိင့်တိုမူလေရယ်။ 41အယ်းအခေါ် ပေတရုခေါ့ ကွိုယ်တော်ကွို “ကွိုယ်တော်၊ ဟော်ပုန်ဥဖမော်ကွို ငေါ်တွို့အတွပယ်း မိင့်တိုမူသလော အယ်းလွိုမောင့်မဟွိ လူတောင်းအတွ မိင့်တိုမူသလော” လွို့ မေးရွှောဂ်လေရယ်။ 42အယ်းအခေါ် ကွိုယ်တော်ခေါ့ “ငေါ်ဟော် ဟော်အယော်ရယ်ကွို လူတောင်းအတွ မိင့်တိုမူခှန်းဖှဂ်ရယ်။ သခန်ဟော် ဆူ့ယယ့် အိင်ဆူအိင်ဆောမျောကွို အုတ်ချုတ်ဖွို့နောင့် အခှိင်မင် အစောအဆွောဂ် ပှင်ဆန်ပေးဖွို့ ညင်ပညော်နောင့်ပှယ့်စုန်ပွီး ဆဂ်စော်ဆိရယ့် အစေခေါင်တဦးကွို ခွေါင်းဆွောင်အဖှဂ် ခန့်အောဂ်ထောပွီးနွောဂ် ဆူယော် အဝီးတနေယော်ကွို ခရီးထွဆိုးလေရယ်။ 43အခှိင်ကျော်ပွီးရယ့်နွောဂ်မောင် သခန်ဟော် အိင်နောင်းပှန်ယွောဂ်လော်ရယ့်အခေါ် အယ်းဆဂ်စော်ဆိရယ့် အစေခေါင်ဟော် ဆူ့ယယ့်တော်ဝမ်ကွို ကွောင်းကွောင်းလုတ်ထောရယ့်ဟော်ကွို မျိုယန် သခန်ဟော် ဆူ့ကွို ကော်တရော် သဖိုးကှော့လောဂ်မောင်ဖှဂ်ရယ်။ 44နန်တွို့ကွို ငေါ်အမင်ဟိုးယော့ယန် သခန်ဟော် အယ်းလူကွို မိမိယယ့်စည်းစိင်ဥစ္စော်တွို့ကွို ယုန်ယုန်ကျည်ကျည်အောဂ်နောင်ပွီး စွောင့်ရွှောဂ်စေလောဂ်မောင်ဖှဂ်ရယ်။ 45ဟော်ပေမယ့် အယ်းအစေခေါင်ဟော် ‘ငေါ့ယယ့်သခန် ပှန်လော်မောင်မဟွိဘူး’ လွို့တွယ်းပွီး တချောအစေခေါင်ရယ်ကွို ညမ်းဆားပွီး ဆွောဂ်စောမူးနေယန်ကော 46အယ်းအစေခေါင်ယယ့်သခန်ဟော် ဆူမထန်မတ်ထောရယ့် နေ့ရတ်အခှိင်မောင် ယွောဂ်လော်ပွီး ဆူ့ကွို ပှန်းထောင်ရယ့် အပှဂ်ဒေါင်ကွိုပေးပွီး ဆဂ်စော်တရောမဆိရယ့်အစေခေါင်ရယ်နောင့်အတူတူ ထောလောဂ်မယ်။ 47ကွိုယ့်သခန် ဖှဂ်စေလွိုရယ့်အယော်ကွို ဆိဆပေမယ့်လယ်း အဆန်သင့်မပှန်ထောရယ့် အစေခေါင်မျောဟော် ပှန်းပှန်းထောင်ထောင် အပှဂ်ပေးခှန်းကွို ခေါင်ယော့လောဂ်မောင်ဖှဂ်ရယ်” လွို့မိင့်တိုမူလေရယ်။ 48ဟော်ပေမယ့် ကွိုယ့်သခန်ယယ့်အလွိုကွို မဆိဆပယ်း အပှဂ်ပှုမိရယ့် အစေခေါင်ခေါ့ နယ်းနယ်းပယ်း အပှဂ်ပေးခေါင်ယော့မောင်ဖှဂ်ရယ်။ ဆူ့ကျယ်းဇူးမျောမျောခေါင်စောယော့ရယ့်ဆူဟော် တော်ဝမ်ပွိုပွီး ဆိလောဂ်မယ်။ ပွိုပွီး ယုန်ကျည်အောဂ်နောင်မူမျောမျောယော့ဆိထောရယ့်ဆူရယ်ဟော် ပွိုပွီး မျောမျောတွောင်းခေါင်တော်ကွို ခေါင်ယော့လောဂ်မယ်။ 49အယ်းနွေ့ ကွိုယ်တော်ခေါ့ “မီးဟော် ရွှေကွို သန့်စင်စေသလွိုမျွိုး နန်တွို့ကွိုလယ်း သန့်စင်စေရယ့် တရောစီယန်ခှန်းမျော လုတ်ဆွောင်ဖွို့ ဟော်ကဘော်မှေပိုနောင်း ငေါ်လော်ခယ့်ခှန်းဖှဂ်ရယ်။ ဖရောဆန်ဟော် နန်တွို့ကွို တရောစီယန်မယ့်အခှိင် လူတွို့အကျောမောင် တကွားတပှောဖှဂ်စေမယ့် အခှိင်ဟော် စော့တန်ခယ့်ပွီးဖှဂ်ဖွို့အတွ ငေါ်အလွိုဆိရယ်။ 50ဟော်ပေမယ့် မကျော်ခန်မောင် ငေါ်ဟော် ကျွီးမောရယ့်ဒုက်ခေါ့ဆားရားကွို ခေါင်စောယော့တို့မောင်ဖှဂ်ရယ်။ ငေါ်ဟော် စိဆားရားပွီး စိတိုးကော့ယွောဂ်နေယော့အုန်းမောင်ဖှဂ်ရယ်။ 51ငေါ်ဟော် ဟော်လိုးကော့နောင်း ကျို့လော်ခှန်းဟော် လူတွို့အကျောမောင် ညိင်းခှောင်းစေဖွို့အတွ ကျို့လော်ခှန်းဖှဂ်ရယ်လွို့ မထန်ကျော့နောင့်။ အယ်းအစော လူတွို့အကျောမောင် စိဝမ်းကွားစေဖွို့အတွ ငေါ်ကျို့လော်ခှန်းဖှဂ်ရယ်။ 52အခုအခှိင်ခေါ့စော့ပွီး လူငေါယွောဂ်ဆိရယ့် အိင်ထွောင်စုတစုမောင် ဆုန်းယွောဂ်ဟော်တဖဂ်၊ နေယွောဂ်ဟော် တဖဂ်၊ တဦးကွိုတဦး စိဝုန်းကွားကျော့လောဂ်မယ်။ 53ငေါ့အတွကျွောင့် ဖော့နောင့်ဆော၊ မွေ့နောင့် ဆမီး၊ ယွောဂ်ခမော့နောင့်ချွီးမော့တွို့အကျော အခှန်းခှန်းစိဝုန်းကွားကျော့လောဂ်မယ်” လွို့ မိင့်တိုမူရယ်။ 54အယ်းနွေ့ာဂ်မောင် ကွိုယ်တော်ယေရှုဟော် လူထုပရိတ်ဆတ်ကွို “နန်တွို့ဟော် အနွေ့ာဂ်အရောဂ်ခေါ့ မယ်းမွောင်ရယ့် မွိုးတိင်တဂ်လော်တော်ကွို မျိုယန် မွိုးလော်တို့မယ်လွို့ ချခှန်းဟိုးတတ်ကျော့ရယ်။ အယ်းအတောင်းလယ်း ဖှဂ်တတ်ရယ်။ 55တွောင်လေတောဂ်ရယ့်အခေါ်မောင်လယ်း ယော်ဆီဥတု ပူပှန်းလော်တို့မယ်လွို့ နန်တွို့ ဟိုးတတ်ကျော့ရယ်။ အယ်းအတောင်းလယ်း ဖှဂ်တတ်ရယ်။ 56ဆူတိုကွောင်းယွောင်ဆွောင်နေကျော့ရယ့် ဆူမျော၊ နန်တွို့ဟော် ကိုးကန်နောင့် မှေကျွီးကွို ကျေ့ပွီး ယော်ဆီဥတုကွို ခန့်မှန်းနောင်ကျော့ပေမယ့် အခုလဂ်ဆိအခှိင်မောင် ဖှဂ်ပျနေရယ့်အဓိပါကွို စော်ကျွောင့်ခွားချော မဆိဆနောင်ကျော့သလော။ 57နန်တွို့ဟော် မင်ကန်ရယ့်အယော်ကွို ယွီးခြာပွီးလုတ်ဆွောင်ဖွို့ ကွိုယ့်ကွိုကွိုယ် စော်ဖှဂ်လွို့ မဆန်ချန်ကျော့သလော။ 58တစုန်တယွောဂ်ခေါ့ နန့်ကွို တရောစွားဆွိုယန် တရောရုန်းကွို မယွောဂ်ခန်ခေါ့ခယန်း ညိနောင်းပွီး ကှေအေးစေဖွို့ ကျွိုးစောကျော့။ အယ်းလွိုမောင့်မဟွိယန် တရောဆူကျွီးခေါ့ နန့်ကွို အပှဂ်ဆိရယ်လွို့ ဆတ်မှတ်ပွီး တော်ဝမ်ဆိရယ့် လူရယ်ယယ့်လဂ်ထားကွို အောဂ်နောင်ပွီး နန့်ကွို ထွောင်ထား အကှဉ်းခှော့လောဂ်မယ်။ 59ငေါ်ဟိုးခှန်တော်ခေါ့ နန်တွို့ဟော်လယ်း ထွောင်ထားခေါ့ မထွခန် နန်ပေးခှေယော့မယ့် နွောဂ်ဆုန်းလတ္တာတပှောdကွိုတအွောင် မပေးခှေယန် နန်ဟော်ထွောင်ထားခေါ့နေထွယော့မောင်မဟွိ” လွို့ မိင့်တိုမူရယ်။
Currently Selected:
Luke 12: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
