Luke 11
11
1တနေ့မောင် ကွိုယ်တော်ယေရှုဟော် တနေယော်မောင် ဆုတွောင်းတိုမူပွီးယန် ဆပယ့်တိုတဦးခေါ့ “ကွိုယ်တော်ယေရှု၊ ယေနဂ်မန်ဂလော် ဆရောယောဟန်ခေါ့ ဆူ့ယယ့်ဆပယ့်တိုရယ် ကွို ဆုတွောင်းနည်း ဆန်ပေးသလွိုမျွိုး ငေါ်တွို့ကွိုလယ်း ဆန်ပေးတိုမူပေါ်” လွို့ ရွှောဂ်ထောလေရယ်။ 2အယ်းအခေါ် ကွိုတော်ခေါ့ ဆူတွို့ကိုယ် “နန်တွို့ဆုတွောင်းကျော့ရယ့်အခေါ် ‘ဆွယ်မွှို့တိုမောင် ဆိတိုမူရယ့်ဖော့ဖရော၊ အဖော့ဖရောဆန်ယယ့်နောင်မယ်ကွို ရွိုဆေလေးမှဂ်ခှန်းခေါင်ယော့ပေါ်စေသော်။ ဆော်ဆနော်တိုလယ်းပိုထွမ်းပေါ်စေသော်။ 3ငေါ်တွို့အတွ လွိုအောဂ်ရယ့် အစော်အဟော်ရော့မျောကွို နေ့ရတ်တောင်း ပေးဆနောတိုမူပေါ်။ 4ငေါ်တွို့အပို အပှဂ်ဒုစရောဂ်ကျူးလွမ်ဆူအပွေါင်းတွို့ကွို ငေါ်တွို့ ခွမ့်ခွှဂ်ပေးသလွိုမျွိုး ငေါ်တွို့ယယ့် အပှဂ်ဒုစရောဂ်ရယ်ကွိုလယ်း ခွမ့်ခွှဂ်ပေးတိုမူပေါ်။ ငေါ်တွို့ အပှဂ်ဒုစရောဂ်ကျူးလွမ်မိစေဖွို့ မကွောင်းရယ့်အယော်ရယ်ကွို လုတ်ဖွို့ ခှယ့်စောရယ့်အယော်ရယ်ခေါ့နေ ကော်ကွာပေးတိုမူပေါ်’ လွို့ ဆုတွောင်းကျော့ပေါ်” ဆွိုပွီး မိင့်တိုမူရယ်။ 5တဖန် ကွိုယ်တော်ခေါ့ “နန်တွို့ထားခေါ့ တယွောဂ်မောင် မိင့်ဆွေတယွောဂ်ဆိရယ်ဆွိုပေါ်ကော့ ညော့သခွေါင်အခှိင်မောင် ဆူ့နောင်းဆိုးပွီ 6‘မိင့်ဆွေ၊ ငေါ့အဆိဧည့်ဆယ်တယွောဂ် ခရီးဝီးခေါ့နေ ယွောဂ်လော်လွို့ ဆူ့ကွို ကျွယ်းမွယ်းဧည့်ခေါင်ဖွို့ စော်မောင့်မဆိရယ့်အတွကျွောင့် မွိဆုန်းလုန်းလွောဂ်ခှေးပေးပေါ်’ လွို့ ဟိုးယန် 7နန့်ယယ့်မိင့်ဆွေခေါ့ ‘ငေါ့ကွိုမနွေ့ာဂ်ယှနောင့်၊ အိင်တခေါကွိုလယ်းပိထောပွီးပီ၊ မွေ့ဆောစုလယ်းအိနေပီ၊ ငေါ်ထော့ပွီးယန် နန့်ကွို စော်မောင့် လုတ်မပေးနောင်ပေါ်’ လွို့ အိင်ထားခေါ့နေ ပှန်ဟိုးပေါ်လောဂ်မယ်။ 8နန်တွို့ကွို ငေါ်ဟိုးခှန်တော်ခေါ့ အယ်းလူဟော် မိင့်ဆွေဖှဂ်တော်ကွိုထွောဂ်ပွီး နန့်ကွို စော်မောင့်လော်ပေးမောင်မဟွိပေမယ့ ဆူဟောဆူယယ့်နောင်မယ်ကွောင်းကွို ထိင်းဆိင်းဖွို့အတွထော့ပွီး နန်လွိုအောဂ်ရယ့် အယော်ရယ်ကွို ပေးပေါ်လောဂ်မယ်။ 9အယ်းယော်ကျွောင့် နန်တွို့ကွို ငေါ်ဟိုးခှန်တော်ခေါ့ တွောင်းခေါင်ကျော့ပေါ်၊ ယော့ကျော့လောဂ်မယ်။ ချော်ဖွယ်ကျော့ပေါ်၊ တွိဆိကျော့လောဂ်မယ်။ တခေါကွိုခွေါဂ်ပေါ်၊ ဖွမ့်ပေးပေါ်လောဂ်မယ်။ 10တွောင်းရယ့်ဆူတောင်း ယော့ကျော့လောဂ်မယ်။ ချော်ရယ့်ဆူတောင်း တွိကျော့လောဂ်မယ်။ တခေါကွို ခွေါဂ်ရယ့်ဆူတောင်းကွိုလယ်း ဖွမ့်ပေးပေါ်လောဂ်မယ်။ 11တကာလွို့ ဆော့ဆမီးခေါ့ စောစရော်အတွငေါတကွောင်ကွို တွောင်းယန် နန်တွို့ထားခေါ့စော်ဖော့ကော့မောင့် အဆိရှိရယ့်မွှီကွိုပေးမလော။ 12တကာလွို့ ဆောဆမီးခေါ့ ဆူ့ယယ့်စောစရော်အတွ ကျဂ်ဥကွိုတွောင်းယန် ကျဂ်ဥအစော နန်တွို့ထားခေါ့စော်ဖော့ကော့မောင့် ကန်းမီးကွောဂ်ကွိုပေးမလော။ 13အယ်းယော်ကျွောင့် နန်တွို့ဟော် မကွောင်းရယ့်ဆူဖှဂ်နေတအွောင် နန်တွို့ယယ့် ဆောဆမီးရယ်အတွ ကွောင်းရယ့်အယော်မျောကွိုပယ်း ပေးတတ်ရယ့်ဟန် နိဗ္ဗာန်မောင်ဆိရယ့် ဖော့ဖရောဆန်ဟော်လယ်း ဆူ့နောင်းခေါ့ တွောင်းရွှောဂ်ရယ့်ဆူ စူကွိုမဆွို ကွောင်းရယ့်အယော်မျောကွို ပေးမောင်ဖှဂ်ရယ့်အပှန် ညင်အလန်းတိုကွိုလယ်း အဆေအချော်ပေးတိုမူလောဂ်မောင်ဖှဂ်ရယ်” လွို့ မိင့်တိုမူရယ်။ 14တနေ့မောင် ကွိုယ်တော်ဟော် လူတဦးကွို ဆွံ့အော့စေရယ့် မကွောင်းဆွိုးဝါးကွို မွောင်းထွိတိုမူရယ်။ ကွိုယ်တော်ခေါ့ မကွောင်းဆွိုးဝါးကွို မွောင်းထွိပွီးရယ့်အခေါ် ဆွံ့အော့နေဆူဟော် စကောပှန်ဟိုးနောင်လွို့ လူထုပရိတ်ဆတ်တွို့လယ်း အောင့်အိုးဆိုးကျော့လေရယ်။ 15ဟော်ပေမယ့် အယ်းလူတွို့ထားခေါ့ လူတခှို့ခေါ့ “ဟော်လူဟော် မကွောင်းဆွိုးဝါးတွို့ကွို အုတ်ချုပ်ရယ့်လူ ဗေလဇေဗုလယယ့်အစွမ်းနောင့် မကွောင်းဆွိုးဝါးတွို့ကွို မွောင်းထွိနေခှန်းဖှဂ်ရယ်” လွို့ အခှန်းခှန်း ဟိုးနေကျော့ရယ်။ 16အချောဆူမျောခေါ့လယ်း ကွိုယ်တော်ကွို စောင်းဆောဂ်လွိုရယ့်အတွကျောင့် ဆူ့ယယ့်တခွိုးဟော် ဖရောဆန်နောင်းခေါ့နေ လော်ကျွောင်းမင်ယန် အောင့်အိုးစရော်အမုမျော လုတ်ပျော့ဖွို့ တွောင်းဆွိုကျော့ရယ်။ 17ဟော်ပေမယ့် ကွိုယ်တော်ခေါ့ အယ်းဆူတွို့ယယ့်စိကွို ဆိဆတိုမူလွို့ ဆူတွို့ကွို “နိုင်ငေါင်တခုမောင် လူရယ်ဟော် စိဝမ်းကွားပွီး အခှန်းခှန်း ဆန့်ကျင်နေကျော့ယန် အယ်းနိုင်ငေါင်ဟော် မကျော်ခန် ပျဂ်စီးယော့လောဂ်မယ်။ အယ်းလွိုပယ်း မွေ့ဆောစုတစုမောင်လယ်း စိဝမ်းကွားပွီး အခှန်းခှန်းတောဂ်ခေါဂ်ရန်ဖှဂ်နေယန် အယ်းမွေ့ဆောစုဟော် ပွှိုကွားယော့လောဂ်မယ်။ 18အယ်းနည်းတူပယ်း မာရ်နတ်ဟော်လယ်း ဆူ့ယယ့်အကွောင်းဆွိုးဝါးမျောနောင့် ဆန့်ကျင် ကွားပှောပွီး အခှန်းခှန်းတောဂ်ခေါဂ်နေယန် ဆူ့ယယ့်နိုင်ငေါင်ဟော်လယ်း ပျစီးယော့မောင်ဖှဂ်ရယ်။ အယ်လွိုဆွိုယော့ခှန်းဟော် နန်တွို့ခေါ့ ငေါ်ဟော် ဗေလဇေဗုလယယ့်အစွမ်းနောင့် မကွောင်းဆွိုးဝါးရယ်ကွို မွောင်းထွနေရယ်လွို့ ဟိုးဆွိုကျော့တော်ကျွောင့်ဖှဂ်ရယ်။ 19တကာလွို့ ငေါ်ဟော် ဗေလဇေဗုလယယ့်အစွမ်းနောင့် မကွောင်းဆွိုးဝါးကွို မွောင်းထွိနေရယ်ဆွိုဟန် နန်တွို့ယယ့် နွောဂ်လောဂ်ဆပယ့်မျောဟော် စူအခွမ့်အော်နော်နောင့် မကွောင်းဆွိုးဝါးရယ်ကွို မွောင်းထွိနေကျော့သလော။ အမင်စန်စဂ် ဖရောဆန်ယယ့်အခွမ့်အော်နော်နောင့်ပယ်း အယ်းလွိုပှုနောင်ကျော့ရယ့်မဟွိလော။ အယ်းယော်ကျွောင့် နန်တွို့ယယ့် စွဂ်စွားမှုဟော် မှောယွမ်းနေကျွောင်း နန်တွို့ယယ့်ဆပယ့်မျောကော့ ဆဂ်ဆေပျော့နေကျော့ရယ်။ 20ဟော်ပေမယ့်လယ်း ငေါ်ဟော် ဖရောဆန်ယယ့်တခွိုးတိုနောင့် မကွောင်းဆွိုးဝါးကွို မွောင်းထွိတော်ဖှဂ်ရယ့်အတွ ဖရောဆန်ယယ့်ဆော်ဆနော်တိုဟော် နန်တွို့နောင်းမောင် ယွောဂ်ဆိနေပီဆွိုတော်ကွို ဆဂ်ဆေပျော့နေတော်ဖှဂ်ရယ်” လွို့မိင့်တိုမူလေရယ်။ 21ကွိုယ်တော်ယေရှုခေါ့ “ခွမ်အောကျွီးမောရယ့်ဆူဟော် လဂ်နဂ်အပှယ့်စုန်နောင့် ဆူ့ယယ့်အိင်ကွို စွောင့်ကျောဂ်ရယ့်အခေါ် ဆူ့ယယ့်ပစ္စည်းဥစ္စော်ရယ်အောလုန်းဟော် စူခေါ့မောင့် ခွိုးယူနောင်မောင် မဟွိပေါ်။ 22ဟော်ပေမယ့် ဆူ့ထဂ်ခွမ်အောပွိုကျွီးရယ့်ဆူခေါ့ ဆူ့ကွိုလော်တောဂ်ခေါဂ်ပွီး အနောင်ယော့ယန်ကော ဆူအောထောယော့ရယ့် လဂ်နဂ်မျောကွို ဆိင်းယူ၊ ပစ္စည်းဥစ္စော်မျောကွိုလယ်း ယူဆိုးပွီး အချောဆူမျောကွို ခွားဝီပေးလောဂ်မယ်။ 23ငေါ့ဖဂ်မောင် မရောဂ်တည်ရယ့်ဆူဟော် ငေါ့ကွို ကန့်ကွရယ့်ဆူဖှဂ်ရယ်။ ဖရောဆန်အတွ လူရယ်ကွို စုဝီးဖွို့ငေါ့ကွို မကူညီရယ့်ဆူဟော် လူရယ်ကွို ဖရောဆန်နောင်းခေါ့ အဝီးကွို တကွားတပှောဖှဂ်ဆိုးစေရယ့်ဆူဖှဂ်ရယ်” ဆွိုပွီးဖှဂ်ရယ်။ 24တဖန် ကွိုယ်တော်ကော့ “မကွောင်းဆွိုးဝါးဟော် ဆူပူးကောဂ်နေရယ့်လူထားခေါ့ ထွပွီး ကန်တော်ရော့ထားမောင်လယ့်လည်ပွီး နောခွိုဖွို့နေယော်ကွို ချောဖွယ်လေရယ်။ ဟော်ပေမယ့် ချော်လွို့မတွိရယ့်အတွ ‘ငေါ်အယန်နေခယ့်ဖူးရယ့် ငေါ့အိင်ကွိုပယ်းပှန်မယ်’ လွို့ ဟိုးပွီး ဆူပူးကောဂ်ခယ့်ရယ့် လူဆီကွိုပှန်လော်ခယ့်လေရယ်။ 25ပှန်ယွောဂ်ရယ့်အခေါ်မောင် အယန်ခေါ့ ဆူပူးကောဂ်ထောရယ့်လူယယ့် တကွိုယ်ဟော် သန့်ရှင်းဆောဂ်ယောဂ်အွောင် ခှယ်းကျန်းထောရယ့် နေထောင်ဆူမဆိရယ့် အိင်တလုန်းလွိုမျွိုး ဖှဂ်နေတော်ကွို တွိလောဂ်ယော့ရယ်။ 26အယ်းအခေါ်မောင် မကွောင်းဆွိုးဝါးခေါ့ ဆူ့ထဂ် ပွိုဆွိုးရယ့် နွေ့ာဂ်ထောဂ်မကွောင်းဆွိုးဝါးခနဂ်ကွောင်ကွို ဆိုးယွောဂ်ခိုလော်ပွီး အယ်းလူအထားမောင် ဝမ်ယွောဂ်နေထောင်ရယ့်အတွ အယ်းလူဟော်အယန်ခေါ့ထဂ် ပွိုပွီးအချေနေပွိုဆွိုးဆိုးလေတို့ရယ်” လွို့ မိင့်တိုမူလေရယ်။ 27ကွိုယ်တော်ယေရှုဟော် အယ်းအကျွောင်းအယော်မျောကွို ဟိုးကျောနေခှိင်မောင် လူအုတ်ထားခေါ့ အမျွိုးဆမီးတယွောဂ်ဟော် ကှာလွောင်ရယ့်အဆောင်နောင့် “ကွိုယ်တော်ကွို မွီးပွီး နန်းယေတောဂ်ကျွယ်း ပှုစုခယ့်ရယ့် အမျွိုးဆမီးဟော် ဖရောဆန်ခေါ့ သဖိုးကှော့တိုမူပီဖှဂ်ရယ်” လွို့ ရွှောဂ်တန်လေရယ်။ 28အယ်းအခေါ် ကွိုယ်တော်ခေါ့ “မင်ပေါ်ရယ်။ ဟော်ပေမယ့် ဖရောဆန်ယယ့်နွောဂ်ကပတ်တိုရယ်ကွို နော်ကျောယော့ပွီး လောဂ်နော်ကှင့်ဆုန်းရယ့် ဆူရယ်ခေါ့ ဖရောဆန်ယယ့်သဖိုးကှော့ခှန်းကွို ပွိုပွီးခေါင်ယော့ရယ့်ဆူရယ်ဖှဂ်ကျော့ရယ်” လွို့ပှန်လယ် မိင့်ကျောလေရယ်။ 29လူထုပရိတ်ဆတ်တွို့ဟော်ပွိုမျောလော်ပွီး ကွိုယ်တော်ယေရှုယယ့် ပတ်ပတ်လည်မောင် စုရုန်းလော်ကျော့ခှိင် ကွိုယ်တော်ခေါ့ “ခုခေတ်မောင်ဆိရယ့် လူတွို့ဟော် မကွောင်းရယ့်လူမျောဖှဂ်ကျော့ရယ်။ စော်ကျွောင့်လောဟန်ကော နန်တွို့ဟော် ငေါ့ကွို ဖရောဆန်ခေါ့ စေခွှဂ်တိုမူရယ့်ဆွိုတော်ကွို ဆဂ်ဆေပျော့လွိုစေပွီး အောင့်အိုးစရော်အမုမျောကွို ပှုစေလွိုကျော့ရယ်။ ဟော်ပေမယ့် ငေါ်ပျော့မယ့် တခုထယ်းသော အောင့်အိုးစရော်အမုဟော် ချယ့်အခှိင်ခေါ့ ပရောဖက်ဖဂ်ယောနaမောင်ဖှဂ်ခယ့်ရယ့် အောင့်အိုးစရော် အမုလွိုမျွိုးပယ်း ဖှဂ်လောဂ်မယ်။ 30ပရောဖက်ယောနမောင် ဖှဂ်ပျဂ်ခယ့်ရယ့်အယော်တွို့ဟော် ဖရောဆန်ခေါ့ စေခွှဂ်ခယ့်ကျွောင်း နိနေဝေမွှို့ဆောတွို့ကွို ဆဂ်ဆေပျော့ခယ့်ရယ်။ အယ်းလွိုမျွိုးပယ်း ငေါ်လူဆောတိုမောင် ဖှဂ်ပျဂ်ရယ့်အယော်တွို့ဟော် ငေါ့ကွို ဖရောဆန်ခေါ့စေခွှဂ်တိုမူကျွောင်းကွို နန်တွို့ကွို ဆဂ်ဆေပျော့လောမောင်ဖှဂ်ရယ်။ 31ချယ်းအခှိင်ခေါ့ အစ္စရေးပှယ်တွောင်ပေါင်းမောင်ဆိရယ့် ရှေဘပှယ်ခေါ့ ဘရန်မော့ဟော် ညင်ပညော်နောင့်ပှယ့်စုန်ရယ့် ရှောလမုန်ဘရန်ယယ့် တရောစကောတွို့ကွို ကျောနော်နောင်ဖွို့အတွ ဝီးရယ့်အရောဂ်ခေါ့နေ ခရီးဆဂ်ခယ့်ရယ်။ အခုမောင် ရှောလမုန်ဘရန်ကျွီးထဂ် ပွိုပွီးကျွီးမှဂ်ရယ့်ငေါ်ဟော် ဟော်အရောဂ်မောင်ဆိနေပေမယ့်လယ်း ငေါ်ဟိုးရယ့်စကောကွို နန်တွို့ဟော် နောမထွောင်ကျော့။ အယ်းယော်ကျွောင့် ဖရောဆန်ဟော် လူအပွောင်းတွို့ကွို တရောစီယန်ရယ့်အခေါ် ရှေဘပှယ်ခေါ့ ဘရန်မော့ဟော် လူအမျောနောင့်အတူ အယ်းအရောဂ်မောင်မတ်ပွီး နန်တွို့ကွို အပှဂ်တန်လောဂ်မောင်ဖှဂ်ရယ်။ 32နိနေဝေမွှို့ဆောတွို့ဟော် ယောနယယ့် ဟိုးကျောဆုန်းမော့မှုမျောကွို ကျောနော်ယော့ရယ့်အခေါ် ဆူတွို့ယယ့်အပှဂ်မျောခေါ့နေ နွောင်တော့ဆောင်ဝီကော့ယော့ခယ့်ကျော့ရယ်။ ဟော်ပေမယ့် အခုမောင်ကော ယောနထဂ်ပွိုပွီး ကျွီးမှဂ်ရယ့်ငေါ်ဟော် နန်တွို့နောင်းကွိုလော်ပွီး ဟိုးကျောဆုန်းမော့ပေမယ့်လယ်း နန်တွို့ဟော် နွောင်တောဆောင်ဝီကော့မယော့ခယ့်ကျော့ပေါ်။ အယ်းယော်ကျွောင့် ဖရောဆန်ဟော် လူအမျောတွို့ကွို တရောစီယန်ရယ့်အခေါ် နိနေဝေမွှို့ဆောတွို့ဟော် နန်တွို့နောင့်အတူမတ်ပွီး နန်တွို့ကွို အပှဂ်တန်စွဂ်စွားလောဂ်မောင်ဖှဂ်ရယ်” လွို့မိင့်တိုမူရယ်။ 33တဖန် ကွိုယ်တော်ခေါ့ “ဆီမီထွမ်းထောရယ့် မီးအိင်ကွို အွောင်းထောရယ့်၊ အယ်းလွိုမောင့်မဟွိ တွောင်းအွောဂ်မောင် ဆွိုထောရယ့်ဆူဆွိုတော်မဆိ။ အယ်းအစော အိင်ထားကွို ဝမ်လော်ရယ့်လူရယ် အလန်းယွောင်ယော့စေဖွို့ မီးအိင်ကွို မီးတောင်မောင်ပယ်း ခှိဆွားထောတတ်ကျော့ရယ်။ 34နန့်ယယ့်မျဂ်လုန်းမျောဟော် နန့်တကွိုယ်ယယ့်မီးအိင်နောင့်တူရယ်။ စော်ကျွောင့်လောဟန်ကော နန်တွို့ယယ့်မျဂ်လုန်းမျောဟော် အယော်ဝဂ်ထုမျောကွို မျိုနောင်ပေရယ်။ တကာလွို့ နန်တွို့ယယ့်မျဂ်လုန်းမျောဟော် ကွောင်းနေဟန်ကော နန်တွို့ဟော် အယော်အောလုန်းကွို ကွောင်းကွောင်းမျိုယော့လောဂ်မောင်ဖှဂ်ရယ်။ နန်တွို့ယယ့်မျဂ်လုန်းမျောဟော် မကွောင်းဟန်ကော နန်တွို့ဟော် စော်အယော်ကွိုမောင့် မျိုနောင်ကျော့မောင်မဟွိပယ်း အမွောင်ထုအတွမ်းမောင်ယွောဂ်နေသလွိုမျွိုး ဖှဂ်နေကျော့လောဂ်မယ်။ 35အယ်းနန်လွို့ နန်တွို့နောင်းမောင်ဆိရယ့် အလန်းကွို အမွောင်မဖှဂ်စေဖွို့အတွ ဆတိပှုကျော့ပေါ်။ 36အယ်းယော်ကျွောင့် အခန်းထားမောင်ဆိရယ့် မီးအိင်ဟော် နန်တွို့အပိုမောင် ထွမ်းလန်းနေပွီး နန်တွို့ဟော် အယော်အောလုန်းကွို ဆန်းဆန်းလန်းလန်း မျိုနောင်မောင်ဖှဂ်ရယ်” လွို့မိင့်တိုမူလေရယ်။ 37ကွိုယ်တော်ယေရှုဟော် အယ်းအယော်မျောကွို မိင့်ပွီးရယ့်အခေါ် ဖာရိရှဲတယွောဂ်ဟော် ကွိုယ်တော်ကွို ဧည့်ခေါင်ကျွယ်းမွီးဖွို့အတွ ဆူ့ယယ့်အိင်နောင်းကွို ပန့်ဖိင့်လွို့ ကွိုယ်တော်ဟော် ကျို့တိုမူပွီး စောပွားမောင် ထောင်လေရယ်။ 38ဟော်ပေမယ့် ကွိုယ်တော်ဟော် ဂျူးလူမျွိုးတွို့ဓလေ့ထုန်းစောင်အတောင်း အစော်မစောခန်မောင် အယန်ဦးဆုန်းလဂ်ကွိုစန်အွောင် ဆေးရယ့်အမုကွို မပှုရယ့်အတွ စော်ပွားမောင်ထောင်နေရယ့်ဟော်ကွို ဖာရိရှဲဟော် မျိုယန် အောင့်အိုးဆိုးလေရယ်။ 38အယ်းအခေါ် ကွိုယ်တော်ယေရှုခေါ့ “နန်တွို့ဖာရိရှဲမျောဟော် လူတွို့ယယ့်ချယ့်မောင် မင်ကန်ရယ်လွို့ ထန်မတ်ကျော့စေဖွို့ ဓလေ့ထုန်းစောင်မျောကွို ဂရုစောဂ်ပွီး လောဂ်နော်ပျော့ကျော့ပေမယ့်လယ်း နန်တွို့ယယ့် စိနှလုန်းထားမောင်ကော လိုးဖော့နောင့် အချောမကွောင်းရယ့်အယော်မျောနောင့် ပှယ့်နေကျော့ရယ်။ 39ဆွိုးသွမ်းနန်းရယ့်လူတွို့၊ နန်တွို့ယယ့်တကွိုယ်ကွို ဖန်ဆန်းခယ့်ရယ့် ဖရောဆန်ဟော် နန်တွို့ယယ့်စိနှလုန်းကွိုလယ်း ဖန်ဆန်းခယ့်ရယ် ဆွိုတော်ကွို မဆိဆဘူးလော။ 40အယ်းယော်ကျွောင့် လိုးဖော့ကျွီးပွီးမကွောင်းရယ့်အကှန့်ကွို မပှုကှန်ကျော့နောင့်။ ဟော်ပေမယ့် နန်တွို့မောင်ရှိရယ့်အယော်ရယ်ကွို ဆားရာနွမ်းပေါဆူတွို့ကွို စိရန်းအမင်နောင့် အပှယ့်အဝို့ပေးကောင်းကျော့ပေါ်။ အယ်းလွိုပှုယန် နန်တွို့ယယ့်စိနလုန်းနောင့်ခန္ဓော်ကွိုယ်ဟော် ဖရောဆန်ယယ့်ချယ့်တိုမောင် အမင်ပယ်း သန့်ရှင်းစန်ကျာလောဂ်မောင်ဖှဂ်ရယ်။ 41အယ်းယော်ကျွောင့် လိုးဖော့ကျွီးပွီးမကွောင်းရယ့်အကှန့်ကွို မပှုကှန်ကျော့နောင့်။ ဟော်ပေမယ့် နန်တွို့မောင်ရှိရယ့်အယော်ရယ်ကွို ဆားရာနွမ်းပေါဆူတွို့ကွို စိရန်းအမင်နောင့် အပှယ့်အဝို့ပေးကောင်းကျော့ပေါ်။ အယ်းလွိုပှုယန် နန်တွို့ယယ့်စိနလုန်းနောင့်ခန္ဓော်ကွိုယ်ဟော် ဖရောဆန်ယယ့်ချယ့်တိုမောင် အမင်ပယ်း သန့်ရှင်းစန်ကျာလောဂ်မောင်ဖှဂ်ရယ်။ 42ဖာရိရှဲတွို့၊ နန်တွို့ဟော် စလွောက်အွောင်ကျွောက်စရော်ကွောင်းလောဂ်မလော။ စော်ကျွောင့်လောဟန်ကော နန်တွို့ဟော် ပှစီးပန်၊ ခှုံးပန်နောင့်အချောဦးယန်ချောင်ခေါ့ထွရယ့် အဆီးအနောင်မျောယယ့် ဆာဖွို့တဖွို့ကွို ဖရောဆန်ကွို ပေးခှူခယ့်ကျော့ပေမယ့် နန်တွို့ဟော် လူရယ်ကွို လိင်ညော်ခှယ့်စောပွီး ဖရောဆန်ကွိုလယ်း အမင်တကာ ခှဂ်ခန်ခှန်းမဆိကျော့ပေါ်။ နန်တွို့ဟော် ဆာဖွို့တဖွို့ကွိုလယ်းပေးခှူယော့မယ့်အပှင် ဆူတပေါတွို့အပိုမောင်လယ်း မျော့မျော့တော့တော့နောင့်၊ ကျင်ကျင်နော်နော်ဆဂ်ဆန်ပွီး ဖရောဆန်ကွိုလယ်း ခှဂ်ခန်ခှန်းဆိကျော့ပေါ်။ 43ဖာရိရှဲရယ်၊ နန်တွို့ဟော် စလွောက်အွောင်ကျွောက်စရော်ကွောင်းလောဂ်မလော။ စော်ကျွောင့်လောဟန်ကော နန်တွို့ဟော် ဓမ္မာရုန်မျောမောင်လယ်း အကွောင်းဆုန်းခုန်မျောမောင် ထောင်လွိုကျော့ပွီး ဈေးရယ်ထားမောင်လယ်း လူအမျောယယ့် ရွိုရွိုဆေဆေနွိဆဂ်ခေါင်ယော့ခှန်းကွိုလယ်း လွိုခှန်ကျော့တော်ကျွောင့်ဖှဂ်ရယ်။ 44ဖာရိရှဲတွို့ နန်တွို့ဟော် စလွောက်အွောင်ကျွောက်စရော်ကွောင်းလောဂ်မလော။ စော်ကျွောင့်လောဟန်ကော နန်တွို့ဟော် ကွမ်းပှန်ထားမောင်ဆိရယ့် အမတ်အဆောမဆိရယ့် ဆင်းကှောင်းဂူမျောနောင့်တူရယ်။ လူတွို့ဟော် ဆန်းကှောင်းဂူတွို့ယယ့်အပိုမောင် မဆိဆပယ်း ဆိုးလော်တတ်ကျော့ရယ့်အခေါ် အယ်းလူတွို့ဟော်လယ်း မသန့်ရှင်းခှန်းအဖှဂ်ကွို ယွောဂ်ကျော့ယော့ရယ်” လွို့ မိင့်တိုမူရယ်။ 45အယ်းအခေါ် ကျောင်းတတ်ဆရော်တယွောဂ်ခေါ့ “ဆရော်၊ အယ်းလွို မိင့်ဆွိုတော်ခေါ့ ငေါ်တွို့ကွိုလယ်း ကာ့ရာ့ယော်ယွောဂ်ပေါ်ရယ်” လွို့ ရွှောဂ်တန်လေရယ်။ 46အယ်းအခေါ် ကွိုယ်တော်ယေရှုခေါ့လယ်း “ကျောင်းတတ်ဆရော်တွို့ နန်တွို့ဟော်လယ်း ဆားရားဒုက်ခေါ့နောင့်ကျုန်တွိကျော့ယော့မောင်ဖှဂ်ရယ်။ စော်ကျွောင်းလောဟန်ကော နန်တွို့ဟော် လောဂ်နော်ယော့ခတ်ခါးရယ့် တန်းကျောဂ်ရယ့်စည်းမျန်းစည်းကောင်းရယ်နောင့် လူရယ်ကွို လေးလောင်ရယ့်ဝမ်ထုတ်ဝမ်ပွိုးကွိုထောင်းစေပွီး နန်တွို့ကွိုယ်တောင်မောင်ကော အယ်းယော်ရယ်ကွို လောဂ်နော်ဖွို့အတွ ကျွိုးစောခှန်းတအွောင် မဆိကျော့တော်ကျွောင့်ဖှဂ်ရယ်။ 47နန်တွို့ဟော် ဆားရားဒုက်ခေါ့နောင့်ကျုန်တွိကျော့ယော့မောင်ဖှဂ်ရယ်။ စော်ဖှဂ်လွို့လောဟန်ကော နန်တွို့ဟော် ပရောဖက်မျောကွိုဂုန်ပှုဖွို့အတွ ဆူတွို့ယယ့် ဆင်းကှောင်းဂူမျောမောင် အထိင်းအမတ်ကွှောဂ်တောင်မျော စောဂ်ထူပေးကျော့ပေမယ့်လယ်း အမင်တကာမောင် ဆူတွို့ကွို ဆတ်ဖှဂ်ခယ့်ကျော့ဆူမျောမောင် နန့်တွို့ယယ့်ဖွိုးပွောင်မျောပယ်းဖှဂ်ကျော့ရယ်။ 48အယ်းလွိုပှုလုတ်ခှန်းခေါ့ နန်တွို့ဟော် နန်တွို့ဖွိုးပွောင်မျောယယ့်လုတ်ရောဂ်မျောဟော် မင်ကန်ရယ်လွို့ ထွောဂ်ခေါင်နေကျော့ခှန်းပယ်း ဖှဂ်ရယ်။ ဆူတွို့ဟော် ပရောဖက်မျောကွို ဆတ်ဖှတ်ခယ့်ကျော့ပွီး နန်တွို့ဟော် အယ်းဆူတွို့ယယ့် ဆန်းကှောင်းဂူမျောမောင် အထိင်းအမှတ်ကွောဂ်တောင်မျော စောဂ်ထူပေးကျော့ရယ်။ 49အယ်းယော်ကျွောင့် ဖရောဆန်ဟော် ညင်ပညော်နောင့်မိင့်တိုမူတော်ခေါ့ ‘ပရောဖက်မျောနောင့် အထူးဆပယ့်တိုမျောကွို နန်တွို့နောင်းငေါ်စေခွှဂ်မယ်။ ဟော်ပေမယ့် နန်တွို့ဟော်အယ်းဆူတွို့ထားခေါ့တခှို့ကွို ညိင်းပန်းနှိစဂ်ပွီး တခှို့ကွိုဆတ်ကျော့လောဂ်မယ်’ လွို့မိင့်တိုမူလေရယ်။ 50အယ်းကျွောင့်ဟော်နေ့ခေတ် လူဆောရယ်ဟော် ဖရောဆန်ဟော် ဖန်ဆန်းခယ့်ခိင်ခေါ့နေစော့ပွီး အယ်းဆူတွို့ယယ့်ဖွိုးပွေါင်မျော ဆဂ်ဖှဂ်ခယ့်ကျော့ရယ့်ပရောဖက်မျောအောလုန်းယယ့် ဆေဆုန်းခှန်းအတွ အပှဂ်ပေးလောဂ်မောင်ဖှဂ်ရယ်။ 51နန်တွို့ကွို ငေါ်အမင်ဆွိုမောင်ကော ပရောဖက်အာဗေလbခေါ့နေစော့ပွီး ဗိမာန်တိုနောင့်ပူဇော်ပုလ္လန်အကျောမောင် အဆဂ်ခေါင်ခယ့်ယော့ရယ့် ပရောဖက်ဇာခရိအထိ နန်တွို့ဖွိုးပွေါင်မျော ပှုလုတ်ခယ့်တော်တွို့အတွ ဖရောဆန်ဟော် နန်တွို့ကွို အပှဂ်ဒေါင်ခှော့မတ်တိုမူလောဂ်မောင် အဆေအချော်ပယ်းဖှဂ်ရယ်။ 52အို ကျောင်းတတ်ဆရော်တွို့ ဆားရားဒုက်ခေါ့နောင့် ကျုန်တွိယော့တို့မောင်ဖှဂ်ရယ်။ စော်ကျွောင့်လောဟန်ကော နန်တွို့ဟော် လူရယ်ကွိုဖရောဆန်နောင်း ယွောဂ်ဆိစေမယ့်လောင်းကွို ဖွမ့်ရယ့်ဆို့ကွို ပိဆွို့ကော်ဆီးထောကျော့ရယ်။ နန်တွို့ကွိုယ်တောင်ခေါ့လယ်း ဖရောဆန်ကွိုမဆိဆရယ့်အပှင် ဆိဆလွိုရယ့်လူရယ်ကွိုလယ်း ပိပန်တောဆီးနေကျော့ရယ်” လွို့မိင့်တိုမူလေရယ်။ 53အယ်းနွောဂ်မောင် ကွိုယ်တော်ယေရှုဟော် အယ်းအရောဂ်ခေါ့နေ ထွခွာတိုမူရယ့်အခေါ်မောင် ကျောင်းတတ်ဆရော်မျောနောင့် ဖာရိရှဲမျောဟော် ကွိုယ်တော်ကွို ရန်ညွိုးထောပွီး အကျွောင်းအယော်မျောတွို့နောင့် ပဂ်ဆဂ်ရယ့် ခတ်ခါးရယ့်မေးခွမ်းမျောကွို မေးမှန်းကျော့လေတို့ရယ်။ 54အယ်းလူတွို့ဟော် ကွိုယ်တော်မိင့်တိုမူရယ့် စကောမျောမောင် အမောတခုခုပေါ်ဝမ်ခယ့်ပေါ်ခေါ့ ကွိုယ်တော်ကွို အပှဂ်တန်စွဂ်စွားဖွို့ အတွ ခုလွိုမျွိုး ထွောင်ချွောဂ်ဆန်ပွီး မေးမှန်းခယ့်ကျော့ခှန်းဖှဂ်ရယ်။
Currently Selected:
Luke 11: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
