Luke 13
13
1အယ်းအခှိင်မောင် လူတခှို့ဟော် ကွိုယ်တော်ယေရှုနောင်းကွို လော်ပွီး အုတ်ချုပ်ဆူပိလတ်ဟော် ဂျေရုဆလင်မွှို့မောင်ဆိရယ့် ဗိမာန်တိုဝမ်းထားမောင် ဂါလိလဲပှယ်ဆောမျောဟော် ဖဆရာဆန်ကွို ပူဇော်မုမျောပှုလုတ်နေခှိင်မောင် ဆူ့ယယ့်စဂ်ဆောမျောကွိုအမိင့်ပေးပွီး ဆတ်ဖှဂ်စေခယ့်ရယ့်အတွ အယ်းလူတွို့ယယ့်ဆွီးဟော် ပူဇော်ယော့ရယ့်ပစ္စည်းမျောနောင့် ရိုးနိုးဆိုးခယ့်ကျွောင်းကွို ရွှောဂ်တန်ခယ့်ကျော့လေရယ်။ 2အယ်းအခေါ် ကွိုယ်တော်ခေါ့ “အယ်းအဆတ်ခေါင်ခယ့်ယော့ရယ့်ဂါလိလဲပှယ်ဆောတွို့ဟော် တချောဂါလိလဲပှယ်ဆောတွို့ထဂ် ပွိုပွီး အပှဂ်ဒုစရောဂ်ကျွီးမော ရယ့်အတွ ခုလွိုအဖှဂ်မျွိုးကျုန်ယော့ရယ်လွို့ နန်တွို့ ထန်ကျော့သလော။ 3အယ်းလွိုမဟွိပေါ်။ နန်တွို့ကွို ငေါ်ဟိုးခှန်တော်ခေါ့ နန်တွို့အောလုန်းဟော်လယ်း နွောင်တော့ဆောင်ဝီကော့မယော့ကျော့ဘူးဟန်ကော အယ်းလွိုပယ်း ပျဂ်စီးကျော့ယော့လောဂ်မယ်။ 4အယ်းအပှန် ရှိလောင်မျိုစန်aလယ်းပွှိုကှော့ရယ့်အတွကျွောင့် ပိပွီးဆေဆိုးရယ့်လူဆဆတ်ဦးဟော် ဂျေရုဆလင်မွှို့မောင်ဆိရယ့် အချောလူရယ်ထဂ် ပွိုပွီး အပှဂ်ကျွီးရယ်လွို့ ထန်ကျော့သလော။ 5အယ်းလွိုမဟွိပေါ်။ နန်တွို့ကွို ငေါ်ဟိုးခှန်တော်ခေါ့ နန်တွို့အောလုန်းဟော်လယ်း နွောင်တော့ဆောင်ဝီဂေါ့ မယော့ကျော့ဘူးဟန်ကော အယ်းလွိုပယ်း ဆေကျော့ယော့လောဂ်မယ်” လွို့မိင့်တိုမူလေရယ်။ 6အယ်းနွေ့ာဂ်မောင် ကွိုယ်တော်ဟော် ပုန်ဥဖမော်နောင့် မိင့်တိုမူတော်ခေါ့ “လူတယွောဂ်ဟော် ဆူ့ယယ့် စပျစ်ချောင်မောင် သဖန်းပန်တပန်ကွို စောဂ်ပျွိုးထောရယ်။ အယ်းနွောဂ် အဆီးဆီးရယ့်အခိင်ကှော့ယွောဂ်လော်တော်ကျွောင့် အဆီးမျောကွို လော်ယွောဂ်ကျေ့ရှုရယ့်အခေါ် အဆီးတဆီးမောင့်ကွို မတွိခယ့်ယော့ပေါ်။ 7အယ်းယော်ကျွောင့် ဆူခေါ့ ဦးယန်မူးကွိုခိုပွီး ‘ဟော်သဖန်းပန်မောင် သဖန်းဆီးဆီးမယ်ထန်ပွီး ငေါ်စွောင့်ကျေ့နေတော်ဟော် ဆုန်းနဂ်တောင်တောင်ဆိပွီ။ ဟော်ပေမယ့် အခုအခိင်အထိအဆီးတလုန်းမောင့် မဆီးဘူး။ အယ်းယော်ကျွောင့် ဟော်သဖန်းပန်ကွို ခွိလယ်းလောဂ်ပေါ်။ စော်အပန်ယော် မှေပိုမောင် အကျွိုးမဆိနေယော်ယူနေရယ်’ လွို့ ဟိုးလောဂ်ရယ်။ 8အယ်းအခေါ်မောင် ဦးယန်မူးခေါ့ ‘ဟော်အပန်ကွို နွောဂ်ထောဂ် တနဂ်လွောဂ်ထောဂ်ပွီးစွောင့်ကျေ့ပေးပေါ်အုန်း။ ငေါ်ဟော်အပန်နောပတ်လည်ကွိုတူးပွီး မှေအိုးဇော်ထည့်ကျေ့ပေါ်အုန်းမယ်မယ်။ 9အယ်းလွိုလုတ်ယန်ကော နွေ့ာဂ်တနဂ်မောင် အဆီးမျောဆီးနောင်ပေါ်ရယ်။ တကာလွို့ အဆီးမဆီးယန် နန်ခွိလယ်းနောင်ပေါ်ရယ်’ လွို့ ဟိုးလေရယ်” လွို့မိင့်တိုမူလေရယ်။ 10နွေ့ာဂ်ထောဂ်ဥပုသ်နေ့တနေ့မောင် ကွိုယ်တော်ဟော် ဓမ္မာရုန်တခုမောင် ဟိုးကျောဆုန်းမော့တိုမူလေရယ်။ 11အယ်းနေယော်မောင် ဆာ့ဆတ်နဂ်တောင်တောင် မကွောင်းဆွိုးဝါး ပှုစောခေါင်ယော့ရယ့်အတွကျွောင့် မသန်စွမ်းဖှဂ်ခေါကွန်းပွီး မတ်လွို့မယော့နောင်ရယ့် အမျွိုးဆမီးတယွောဂ်ဆိလေရယ်။ 12ကွိုယ်တော်ဟော် အယ်းအမျွိုးဆမီးကွို မျိုရယ့်အခေါ် အနီးကွိုခိုပွီး “အမျွိုးဆမီး၊ နန်ယော် အခုအခှိင်ခေါ့စော့ပွီး မသန်စွမ်းဖှဂ်ခှန်းခေါ့နေ လွဂ်မွှောဂ်ပီဖှဂ်ရယ်” လွို့ မိင့်တိုမူလေရယ်။ 13အယ်းနွောဂ် ကွိုယ်တော်ဟော်ဆူ့ယယ့်လဂ်တိုကွို အယ်းအမျွိုးဆမီးအပိုမောင် တန်လောဂ်ရယ့်အခေါ် ခှခှန်းပယ်း ဆူဟော် ခေါတည့်ဆိုးဟော့လွို့ မတ်တဂ်ယောဂ်လောဂ်ပွီး ဖရောဆန်ယယ့် ဂုန်ကျယ်းဇူးကွို ခှီးမွမ်းလေရယ်။ 14ဟော်ပေမယ့် ကွိုယ်တော်ယေရှုဟော် ဥပုသ်နေ့မောင်အနော်ရိုးကော်ကွို ပျွောဂ်ကန်းစေရယ့်အတွကျွောင့် ဓမ္မာရုန်တော်ဝမ်ခေါင် အမျွိုးဆောဟော် တိုးဆော့အမှဂ်ထွလွို့ လူထုပရိတ်ဆတ်တွို့ကွို “ရတ်တပတ်မောင် အလုတ်လုတ်ခွမ့်ဆိရယ့်ရတ် ချောဂ်ရတ်ဆိရယ်။ အယ်းရတ်ရယ်မောင်ပယ်း အနော်ရိုးကော်ပျွောဂ်ကန်းစေဖွို့အတွ လော်ကျော့ပေါ်။ ဥပုသ်နေ့မောင် လော်ပွီး ကုဆော့မှုခေါင်ယူခှန်း မပှုကျော့နောင့်” လွို့ဆွိုလေရယ်။ 15အယ်းအခေါ် ကွိုယ်တော်ခေါ့ “ဆူတိုကွောင်းယွောင်ဆွောင်နေရယ့်ဆူမျော။ ဥပုသ်နေ့မောင် နန်တွို့ယယ့် နိုးမျော၊ မြည်းမျောကွို တားကုပ်ထားခေါ့ ခွှဂ်ပွီး ယေပေးဆွောဂ်ဖွို့ ခိုဆိုးခှန်းခေါ့ အလုတ်လုတ်နေခှန်းပယ်း မဟွိဘူးလော။ 16အယ်းလွိုဟန် ဆာ့ဆဂ်နဂ်ကျော် မသန်စွမ်းဖှဂ်ဖွို့မကွောင်းဆွိုးဝါးခေါ့ ပှုစောထောရယ့် အာဗြဟံယယ့်မျွိုးဆဂ်ဖှဂ်ရယ့် ဟော်အမျွိုးဆမီးကွိုလယ်း လွဂ်မွှောဂ်ခွမ့်ပေးခှန်းဟော် မောနေရယ်လွို့ ဆွိုနောင်သလော” လွို့ မိင့်တိုမူလေရယ်။ 17အယ်းလွို့မိင့်ဆွိုလောဂ်ရယ့်အခေါ် ကွိုယ်တော့်ကွိုရန်မူနေကျော့ဆူအပွေါင်းတွို့ဟော် အချယော့ဆိုးခယ့်ကျော့ရယ်။ ဟော်ပေမယ့် လူထုပရိတ်ဆတ်အောလုန်းတွို့ဟော် ကွိုယ်တော်ပှုတိုမူရယ့် အောင့်အိုးစရော်အမုမျောကွို ကှေနောဂ်ဝုန်းမွှောဂ်ကျော့လေရယ်။ 18အယ်းနွောဂ်မောင် ကွိုယ်တော်ခေါ့ “ဖရောဆန်ယယ့်ဆော်ဆနော်တိုဟော် စော်အယော်နောင့်တူကျွောင်း နန်တွို့ကွိုနောင်းပျော့ယော့မယ်ဟန်ကေ 19အယ်းအယော်ဟော် ကော်တရော်ကွိုဆေးရယ့် မွိညမ်းနဂ်စယ့်နောင့်တူရယ်။ လူတယွောဂ်ဟော် မွိညမ်းစယ့်ကွိုယူပွီး ဆူ့ယယ့် ဥယန်ချောင်မောင် စောဂ်ရယ့်အခေါ် အယ်းမျွိုးစယ့်ဟော် အပန်ကော်တရော်ကျွီးလော်ပွီး အယ်းအပန်မောင် ငတွို့ဟော် အဆောဂ်လုတ်ပွီး နောခွိုကျော့လေရယ်” လွို့ မိင့်တိုမူရယ်။ 20နွောဂ်ထောဂ်တခေါ် ကွိုယ်တော်ယေရှုခေါ့ “ဖရောဆန်ယယ့်ဆော်ဆနော်တိုဟော် စော်အယော်နောင့်တူကျွောင်း နောင်းပျော့ယော့မယ်ဟန်ကေ 21အယ်းအယော်ဟော် တဆေးနောင့်တူရယ်။ အမျွိုးဆမီးတယွောဂ်ဟော် ဂျုန်မွိဆုန်းအိထားကွို ရိုးထည့်လောဂ်ရယ့်အခေါ်မောင် အယ်းမွိကွို ဖွောင်းပွစေလော်ရယ်” လွို့ မိင့်တိုမူရယ်။ 22အယ်းနွောဂ်မောင် ကွိုယ်တော်ယေရှုဟော် လောင်းခရီးစန်တဆွောဂ်မောင်ဆိရယ့် တမွှို့မောင့်တမွှို့ တဝိုမောင့်တဝိုကွိုလည့်လှည်ပွီးလူရယ်ကွို ဟိုးကျောဆန်ကျောတိုမူပွီး ဆပည့်တိုမျောနောင့်အတူ ဂျေရုဆလင်မွှို့ကွို ခရီးဆဂ်လေရယ်။ 23အယ်းအခေါ် လူတယွောဂ်ခေါ့ ကွိုယ်တော်ယေရှုကွို “ကွိုယ်တော်၊ ဖရောဆန်ယယ့် ကာတန်ခှန်းခေါင်ယော့ဆူမောင် လူနယ်းနယ်းပယ်း ကာတန်ခှန်းခေါင်ယော့မလော” လွို့ မေးရွှောဂ်လေရယ်။ 24အယ်းအခေါ် ကွိုယ်တော်ယေရှုခေါ့ “အိင်တအိင်ယယ့် ကှင်းပနန်းရယ့်တခေါပွေါဂ်နောင့်တူရယ့် ဖရောဆန်ယယ့်ဆော်ဆနော်တိုအတွမ်းကွို ဝမ်ယွောဂ်နောင်ဖွို့ အစွမ်းကွိင်ကျိုးစောကျော့ပေါ်။ အကျွောင်းမောင်ကော လူအမျောတွို့ဟော် အယ်းအထားကွို ဝမ်ယွောဂ်ဖွို့အတွ နည်းလောင်းမျွိုးစုန်နောင့် ကျွိုးစောကျော့ပေမယ့်လယ်း ဝမ်ယွောဂ်နောင်ကျော့လောဂ်မောင်မဟွိလွို့ ငေါ်ဟိုးနောင်ရယ်။ 25အိင်သခန်ဟော် ထော့လော်ပွီး တခေါကွိုပိလောဂ်ယန် နန်တွို့ဟော် အထားကွို ဝမ်ယွောဂ်ဖွို့ နွောဂ်ကှော့လေပီဖှဂ်ရယ်။ အယ်းအခေါ် နန်တွို့ဟော် အပှန်မောင်မတ်ပွီး တခေါကွိုခွေါဂ်ပွီး ‘ဆရော်၊ ငေါ်တွို့ကွို တခေါဖွမ့်ပေးပေါ်’ လွို့ တွောင်းပန်ပေမယ့်လယ်း အိင်သခန်ခေါ့ ‘နန်တွို့ကွို ငေါ်မဆိဆသလွို နန်တွို့စော်မရောဂ်ခေါ့လော်တော်ကွိုလယ်း ငေါ်မဆိဆပေါ်’ လွို့ ပှန်ဟိုးလောဂ်မယ်။ 26အယ်းအခေါ် နန်တွို့ခေါ့လယ်း ‘ငေါ်တွို့ဟော် ဆရော်တွို့နောင့်အတူတူ စောဆွောဂ်ခယ့်ကျော့ဖူးပွီး ငေါ်တွို့နေထောင်ရယ့် မွှို့ဝိုမျောမောင်ဆိရယ့် လောင်းမျောပိုမောင်လယ်း ဆရော်ယယ့် ဆန်ကျောမုတွို့ကွို နော်ကျောခယ့်ဖူးရယ့်အတွ ဆရော်ကွို ဆိဆပေါ်ရယ်’ လွို့ ရွှောဂ်တန်ကျော့လေရယ်။ 27အိင်သခန်ခေါ့လယ်း ‘ငေါ်ဟော် နန်တွို့ကွို မဆိဆရယ့်အပှန် နန်တွို့စော်အရောဂ်ခေါ့ လော်ရယ့်ဟော်ကွိုလယ်း ငေါ်အမင်တကာမဆိဆပေါ်။ မကွောင်းမုလုတ်ရယ့်လူအပွေါင်းတွို့ ငေါ့နောင်းခေါ့နေ ထွဆိုးကျော့ပေါ်’ လွို့ မိင့်တိုမူလေရယ်။ 28အယ်းအခေါ် အာဗြဟံ၊ ဣဇက်၊ ယာကုပ်နောင့် အချော ပရောဖက်အပွေါင်းတွို့ဟော် ဖရောဆန်ယယ့် ဆော်ဆနော်တိုမောင်ဆိနေကျော့ရယ့်ဟော်ကွို နန်တွို့တွိမျိုကျော့ယော့ပေမယ့်လယ်း နန်တွို့မောင်ကော အပှန်ကွိုမွောင်းထွိခေါင်ယော့ရယ့်အတွ နန်တွို့ဟော် အယ်းနေယော်မောင် အောင်ကွိုကျွိပွီး ဝုန်းနယ်းငွိုကျွေးကျော့ယော့လောဂ်မယ်။ 29အယ်းအပှင် ကဘော်အရောဂ်ရောဂ်ခေါ့ လူမျွိုးချောတွို့ဟော်လယ်း အချယ့်၊ အနွောဂ်၊ တွောင်၊ မွှောဂ် အစော့ဆိရယ့် အရောဂ်လေးမျနော်ခေါ့နေ ယွောဂ်လော်ကျော့ပွီး ဖရောဆန်ယယ့်ဆော်ဆနော်တိုအတွမ်းကွိုဝမ်ပွီး စောဆွောဂ်ပွားမောင် ထောင်ယော့လောဂ်မယ်။ 30ကွိုယ်တော်ခေါ့ဆတ်ပွီး အခုအခှိင်မောင် အရယ်းမပေါ်လွို့ယူဆော့ယော့ရယ့်လူမျောကွို ဖရောဆန်ခေါ့ အရယ်းပေါ်ရယ့်လူဖှဂ်စေပွီး အရယ်းပေါ်ရယ်လွို့ ယူဆော့ယော့ရယ့်အချောလူမျောကွို ဖရောဆန်ဟော် အရယ်းမပေါ်ရယ့်လူမျောလွို့ မတ်ယူလောဂ်မောင်ဖှဂ်ရယ်” လွို့မိင့်တိုမူလေရယ်။ 31အယ်းအခှိင်မောင် ဖာရိရှဲအခှို့ဟော် ကွိုယ်တော်ယေရှုနောင်းကွိုယွောဂ်ဆိလော်ကျော့ပွီး “အုတ်ချုတ်ဆူဟေရုဒ်အန္တိပဟော် နန့်ကွိုဆဂ်ဖွို့ကျောင်စည်နေရယ့်အတွကျွောင့် ဟော်အရောဂ်ခေါ့နေ ဝီးရယ့်နေယော်ကွိုထွဆိုးပေါ်” လွို့ရွှောဂ်လေရယ်။ 32အယ်းအခေါ် ကွိုယ်တော်ခေါ့ ဆူတွို့ကွို “မှေခွီးလွိုမျွိုး ရတ်စဂ်ကျောင်းကျုတ်ရယ့် အယ်းဟေရုတ်ကွို ဆိုးဟိုးကျော့ပေါ်။ ငေါ်ဟော် ခုနေ့နောင့် မနဂ်ခေါ်မောင် မကွောင်းဆွိုးဝါးတွို့ကွို မွောင်းထွိပွီး နေမကွောင်းရယ့်လူတွို့ကွို ကျောင်းမော်စေအုန်းမောင်ဖှဂ်ပွီး ဆုန်းရတ်မွှောဂ်ရယ့်နေ့မောင် ငေါ့ယယ့်အမုတော်ဝမ်ကွို ပွီးမွှောဂ်စေမယ်။ 33ဟော်ပေမယ့်လယ်း ပရောဖက်တွို့ဟော် ဂျေရုဆလင်မွှို့ခေါ့လွားပွီး အချောအရောဂ်မောင်ဆေယော့မယ်လွို့ မဆိရယ့်အတွကျွောင့် ခုနေ့၊ မနဂ်ခေါ်နောင့် သန်ဘက်ခေါ်နေ့တွို့မောင် ငေါ်ဟော် ခရီးဆဂ်ဆိုးနေယော့အုန်းမယ်” လွို့ မိင့်တိုမူရယ်။ 34အယ်းနွောဂ်မောင် ကွိုယ်တော်ယေရှုခေါ့ “အို ဂျေရုဆလင်မွှို့မောင် နေထောင်ကျော့ရယ့်လူအပွေါင်းတွို့၊ ငေါ်ဟော် နန်တွို့အတွ ကော်တရော် ဝုန်းနယ်းယော့ရယ်။ နန်တွို့ဟော် ချယ်းအခှိင်ခေါ့ခယန်း ပရောဖက်မျောကွို အကျိင်ကျိင်ဆတ်ဖှဂ်ခယ့်ကျော့ရယ်။ နန်တွို့နောင်းကွို ဖရောဆန်စေခွှဂ်တိုမူရယ့် လူတွို့ကွိုလယ်း နန်တွို့ဟော် ကွှောဂ်ခါးနောင့်ပွေါဂ်ပွီး ဆတ်ဖှဂ်ခယ့်ကျော့ရယ်။ ကျမော့ကျွီးဟော် ဆူ့ယယ့်ကျငါမျောကွို အတွောင်နောင့်အုတ်ပွီး ကော်ကွာစွောင့်ဆွောဂ်သလွိုမျွိုး ငေါ်ဟော်လယ်း နန်တွို့ကွို အကျိင်ကျိင်ကော်ကွာစွောဂ်ဆွောဂ်လွိုပေမယ့်လယ်း နန်တွို့ဟော် ငေါ့ကွို လဂ်မခေါင်ခယ့်ကျော့ပေါ်။ 35နောထွောင်ကျော့ပေါ်။ ဖရောဆန်ဟော် နန်တွို့နောင့်နန်တွို့နေထောင်ရယ့်မွှို့ကွို စွမ့်ပါတိုမူလောဂ်မယ်။ နန်တွို့ကွိုငေါ်ဟိုးခှန်တော်ခေါ့ ‘ဖရောဆန်ယယ့် အခွမ့်အော်နော်နောင့်ကျို့လော်ရယ့်ဆူဟော် ကွောင်းကျွိုးမျောကွိုယော့ဆိပေါ်စေ’ လွို့ နန်တွို့မဟိုးမီအခှိင်ထိ နန်တွို့ဟော် ငေါ့ကွိုစော်အခေါ်မောင့် မျိုတွိယော့လောဂ်မောင်မဟွိ” လွို့ မိင့်တိုမူရယ်။
Currently Selected:
Luke 13: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
