Luke 10
10
1အယ်းနွေ့ာဂ်မောင် ကွိုယ်တော်ဟော် အချောဆပယ့်တိုခနဂ်ဆာဦးaကွို ယွီးချာပွီး နေယွောဂ်တတွားစီတွားပွီး ကွိုယ်တော်ကျို့တိုမူမယ့် မွှို့တောင်း၊ ဝိုတောင်းကွို ကျွိုတန်စေခွှဂ်လောဂ်ရယ်။ 2ဆပယ့်တိုတွို့ကွို မစေခွှဂ်ခန် ကွိုယ်တော်ခေါ့ ဆူတွို့ကွို ဟော်လွိုမျွိုးမိင့်တိုမူရယ်။ “ငေါ့ကွို လဂ်ခေါင်ယုန်ကျည်ဖွို့ အဆန်သင့်ဖှဂ်နေရယ့် လူအမျောဆိပေမယ့်လယ်း အယ်းဆူတွို့နောင်း မန်ဂလော်ဆတန်းကွောင်းကွို ဟိုးကျောဖျန့်ဝီပေးဖွို့ လူတွို့မောင်ကော နည်းနေရယ်။ အယ်းလူတွို့ဟော် ယွိဆိင်းဖွို့ အဆန်သင့်ဖှဂ်နေရယ့် ကျွီးမောကှာပနန်းရယ့် လာကွမ်းနောင့်တူရယ်။ ဟော်ပေမယ့်လယ်း အယ်းယော်ကွိုယွိဆိင်းဖွို့အတွ လုန်လွောဂ်ရယ့်အလုတ်ဆမောမျောမဆိပေါ်။ အယ်းယော်ကျွောင့် ယွိဆိင်းဆူယယ့်သခန် ဖရောဆန်နောင်းမောင် ယွိဆိင်းဖွို့အလုတ်ဆမောမျော မျောမျောစေခွှဂ်ပေးဖွို့ တွောင်းရွှောဂ်ကျော့ပေါ်။ 3အခု နန်တွို့ဟော် လူတွို့နောင်းကွို ဆတိထောပွီးဆိုးကျော့ပေါ်။ အကျွောင်းမောင်ကော ကူယော်ကာယော်မနေရယ့် သိုးငါလွိုမျွိုး နန်တွို့ကွို ရတ်စဂ်ကျောင်းကျုတ်ရယ့် ဝံပုလွေလွိုမျွိုး နန်တွို့ကွို ဆန့်ကျင်ကျော့မယ့် လူမျောနောင်းကွို ငေါ်စေသခွှဂ်တိုမူရယ့်အတွကျွောင့်ဖှဂ်ရယ်။ 4နန်တွို့ဆိုးကျော့ယော့မောင် ပိဆင်အိ၊ လွာအိနောင့် ဖနောဂ်တွို့ကွိုလယ်း မယူဆိုးကျော့နောင့်။ လောင်းမောင်လယ်း လူတွို့ကွိုနွိဆဂ်ပွီး အခှိင်မဖွှိင်းကျော့နောင့်။ 5စော်အိင်ကွိုမဆွို နန်တွို့ဝမ်ကျော့ရယ့်အခေါ် ‘ဟော်အိင်မောင် ညိင်းခှောင်းခှန်းဆိပေါ်စေ’ လွို့ ကွောင်းရယ့်စကောနောင့်ဆုပေးကျော့ပေါ်။ 6တကာလွို့ အယ်းနေယော်မောင် ညိင်းခှောင်းခှန်းကွို လွိုလွိုလောလောလဂ်ခေါင်ရယ့်ဆူ ဆိဟန်ကော နန့်ယယ့်ကွောင်းစကောနောင့် ဆုပေးခှန်းဟော် အယ်းနေယော်မောင် ဆိနေလောဂ်မယ်။ တကာလွို့ လွိုလွိုလောလောလဂ်မခေါင်ပေါ်ကော့ ညိင်းခှောင်းခှန်းဟော် အယ်းနေယော်မောင် ဆိနေမောင်မဟွိပေါ် 7တအိင်ခေါ့နေတအိင် ဆိုးလော်တည်းခွိုခှန်း မလုတ်ကျော့နောင့်။ အယ်းတအိင်ထယ်းမောင်ပယ်း တည်းခွိုပွီး အိင်သခန်ကျွယ်းရယ့်ဟော်ကွို စောဆွောဂ်ကျော့ပေါ်။ အကျွောင်းမောင်ကော အလုတ်လုတ်ရယ့်ဆူဟော် လုတ်အောခေါ့ကွို ယော့ထောဂ်ရယ်။ 8မွှို့တမွှို့ကွို ဝမ်ရယ့်အခေါ်မောင် အယ်းမွှို့ခေါ့လူတွို့ဟော် နန်တွို့ကွို ကျွိုဆွိုလဂ်ခေါင်ကျော့ယန် ဆူတွို့ ကျွယ်းမွီးရယ့် ဟော်ကွို စောကျော့ပေါ်။ 9အယ်းမွှို့မောင်ဆိရယ့် ဖျောနော်နေဆူမျောကွို ကျောင်းမော်စေပွီး ‘ဖရောဆန်ယယ့်ဆော်ဆနော်တိုပိုထွမ်းဖွို့ အခှိင်နီးကောဂ်လော်ပီ’ လွို့ဆူတွို့ကွို ဟိုးပျော့ကျော့ပေါ်။ 10ဟော်ပေမယ့် မွှို့တမွှို့ကွို ဝမ်ပွီး နန်တွို့ကွို အယ်းမွှို့ခေါ့လူတွို့ဟော် လဂ်ခေါင်မကျွိုဆွိုကျော့ယန်ကော အယ်းမွှို့ယယ့် လောင်းမော့ပိုကွိုထွပွီး 11‘ဖရောဆန်ဟော် နန်တွို့ကွိုပါမယ့်အကျွောင်းကွို နန်တွို့ကွိုဆတိပေးရယ့်အနေနောင့် ငေါ်တွို့ချေမောင် ကောဂ်နေရယ့် နန်တွို့မွှို့ခေါ့မှေမွိမျောကွို ငေါ်တွို့ခေါ်ခှော့ခယ့်ရယ်။ ဟော်ပေမယ့်လယ်း ဖရောဆန်ယယ့်ဆော်ဆနော်တို ပိုထွမ်းလုနီးဖှဂ်ကျွောင်း နန်တွို့ဆိမတ်ကျော့ပေါ်’ လွို့ ဟိုးကျော့ပေါ်။ 12နန်တွို့ကွို ငေါ်ဟိုးခှန်တော်ခေါ့ တရောစီယန်ရယ့်နေ့ ယွောဂ်ရယ့်အခေါ် အယ်းမွှို့ခေါ့လူတွို့ဟော် သောဒုံမွှို့bခေါ့ မကွောင်းရယ့် လူရယ်ထဂ်ပွိုပွီး ပှန်းထောင်ရယ့် စီယန်ခှန်းကွိုခေါင်ယော့မောင်ဖှဂ်ရယ်” လွို့မိင့်တိုမူလေရယ်။ 13“အွို ခေါရာဇိန်နောင်ဗက်ဇဲဒမွှို့ဆောမျော၊ နန်တွို့အတွ စလွောဂ်အွောင်ကျွောဂ်ဖွို့ကွောင်းလောဂ်မလော။ ငေါ်ပှုခယ့်ရယ့်အောင့်အိုးစရော်အမုရယ်ကွို လူမျွိုးချောတွို့ယယ့်မွှို့မျောဖှဂ်ကျော့ရယ့် တုရုမွှို့နောင့်ဇိဒုန်မွှို့ရယ်မောင်ပယ်း ပှုခယ့်မယ်ဆွိုယန် အယ်းမွှို့ဆိ လူအပွေါင်းတွို့ဟော် အမှန်နွောင်တော့ယော့ကျော့မောင်ဖှဂ်ပွီး ဆူတွို့ဟော် လျှော်တေအဝဂ်cကွိုဝဂ်ဆန်ပွီး၊ ပှော်ပုန်ထားမောင် ထောင်ပွီးဆူတွို့ယယ့်အပှဂ်အတွ နွောင်တော့ယော့ကျွောင်း ပျော့ဆော့ကျော့လောဂ်မယ်။ 14ဟော်ကျွောင့် ဖရောဆန်ဟော် လူတောင်းကွိုတရောစီယန်ရယ့် နေ့မောင် တုရုနောင့်သောဒုန်မွှို့မျောရှိလူမျောထဂ် နန်တွို့ကွို ပွိုပွီး ပှန်းထောင်ရယ့် ပှဂ်ဒေါင်ပေးလောဂ်မယ်။ 15ကပေရနောင်မွှို့ဆောတွို့၊ နန်တွို့ဟော် ဆွယ်မွှို့တိုမောင် ခှီးမှင့်မွှောဂ်စောခေါင်ယော့မယ်လွို့ ကွိုယ့်ကွိုကွိုယ် ထန်နေကျော့သလော။ နန်တွို့ဟော် ငရားကွိုပယ်း ပွို့ခေါင်ယော့လောဂ်မယ်” လွို့ မိင့်တိုမူလေရယ်။ 16အယ်းနွေ့ာဂ်မောင် ကွိုယ်တော်ခေါ့ ဆပယ့်တိုရယ်ကွို “ဆပယ့်တိုတွို့၊ နန်တွို့စကောကွို နောထွောင်လဂ်ခေါင်ရယ့်ဆူဟော် ငေါ့စကောကွို နောထွောင်လဂ်ခေါင်ရယ့်ဆူပယ်းဖှဂ်ရယ်။ နန်တွို့ကွို ညမ်းပါရယ့်ဆူမောင်ကော ငေါ့ကွိုညမ်းပါရယ့်ဆူဖှဂ်ရယ်။ ငေါ့ကွို ညမ်းပါရယ့်ဆူဟော် ငေါ့ကွို စေခွှဂ်လောဂ်ရယ့်ဖရောဆန်ကွို ညမ်းပါရယ့်ဆူဖှဂ်ရယ်” လွို့ မိင့်တိုမူလေရယ်။ 17အယ်းယော်ကျွောင့် ဆပယ့်တိုခနဂ်ဆာတွို့ထွဆိုးပွီးရယ့်နွောဂ်မောင် ဆူတွို့ကွို ကွိုယ်တော်မိင့်ရယ့်အတောင်း လုတ်ဆွောင်ကျော့ရယ်။ ဆူတွို့ ပှန်ယွောဂ်လော်ရယ့်အခေါ် ဆူတွို့ဟော် ကော်တရော် ပျိုဆွမ်ဝုန်းမွှောဂ်နေကျော့ပွီး “ကွိုယ်တော်၊ ငေါ်တွို့ဟော် မကွောင်းဆွိုးဝါးရယ်ကွို ကွိုယ်တော်ယယ့်တန်ခွိုးတိုနောင့်အခွမ့်အော်နော်ကွိုဆုန်းပွီး အမိင့်ပေးလောဂ်ရယ့်အခေါ် ဆူတွို့နော်ခေါင်ကျော့ပေါ်ရယ်” လွို့ ရွှောဂ်တန်ကျော့ရယ်။ 18ကွိုယ်တော်ယေရှုခေါ့ နန်တွို့ကွို “မကွောင်းဆွိုးဝါးမျော နန်တွို့စကောကွို နော်ခေါင်ရယ့်အခေါ် မာရ်နတ်ဟော် ဆီးပွေါဂ်လဂ်သလွိုမျွိုး ကိုးကန်ခေါ့နေ တလန့် ပွိကှော့ဆိုးရယ့်ဟော်ကွို ငေါ် မျိုခယ့်ယော့ရယ်။ 19နောထွောင်ကျော့ပေါ်။ ငေါ်ဟော် နန်တွို့ကွို မွှီဆွိုးမျော၊ ကန်းမီးကွောဂ်မျောကွို နန်းချေပွီးငေါ်တွို့ယယ့် ရန်ဆူဖှဂ်ရယ့် မာရ်နတ်ကွို အွောင်နောင်ဖွို့ အခွမ့်အော်နော်ကွို ပေးအောဂ်ထောပီဖှဂ်ရယ်။ အယ်းယော်ကျွောင့် နန်တွို့ကွို စော်အယော်ခေါ့မောင့် ထိခေါဂ်နော်ကျန်စေလောဂ်မောင်မဟွိပေါ်။ 20ဟော်ပေမယ့် မကွောင်းဆွိုးဝါးမျောခေါ့ နန်တွို့ယယ့်စကောကွို နော်ခေါင်ယုန်လွောဂ်နောင့် ဝုန်းဆော်မနေကျော့နောင့်။ နန်တွို့ယယ့် နောင်မယ်ကွို နိဗ္ဗာန်ဆွယ်မွှို့တိုမောင် ရယ်းမတ်ထောခေါင်ယော့တော်ကွိုပယ်း ပွိုပွီးဝုန်ဆော်ကျော့ပေါ်” လွို့ မိင့်တိုမူလေရယ်။ 21အယ်းအခှိင်မောင် ညင်အလန်းတိုဟော် ကွိုယ်တော်ယေရှုကွို ဝုန်းမွှောဂ်ဝုန်းဆော်ဖှဂ်စေရယ့်အတွ ကွိုယ်တော်ခေါ့ “ဆွယ်မွှို့တိုနောင့် ဟော်ကဘော်လိုးကော့ကွို အုတ်ချုပ်တိုမူရယ့် အဖော့ဖရောဆန်၊ ကွိုယ့်ကွိုကွိုယ် ညင်ပညော်ဆိရယ်လွို့ ထန်မတ်နေရယ့်ဆူတွို့ကွို ဟော်အမင်တရောတွို့ကွို ဖော့ဖရောဆန်ဟော် ဆိဆမျိုစေခှန်းမဆိဝါးနောင့် လူပယ့်ငါလွိုမျွိုး အဆိညင်ပညော် မပှယ့်စုန်ရယ့်ဆူတွို့ကွိုပယ်း ဆိဆမျိုစေရယ့်အတွကျွောင့် ကျယ်းဇူးတန်ပေါ်ရယ်။ ဟော်ယော်ကော အဖော့ဖရောဆန် သဖိုးကှော့တိုမူရယ့် အယော်ဖှဂ်ရယ့်ဟော်ကွိုလယ်း ငေါ်ဆိဆပေါ်ရယ်” လွို့ ဖရောဆန်ယယ့် ဂုန်ကျယ်းဇူးကွို ခှီးမွမ်းတိုမူရယ်။ 22အယ်းနွောဂ်မောင် ကွိုယ်တော်ယေရှုခေါ့ အယ်းနေယော်မောင်ဆိနေကျော့ရယ့် လူအပွောင်းတွို့ကွို “ငေါ့ယယ့် အဖော့ဖရောဆန်ဟော် အယော်အောလုန်းကွို အုတ်ချုပ်နောင်ရယ့် အခွမ့်အော်နော်ကွို ပေးအောဂ်ထောတိုမူပီဖှဂ်ရယ်။ ဖော့ဖရောဆန်ခေါ့လွားပွ ဆောတိုကွို စူမောင့်မဆိဆနောင်သလွို ဆောတိုနောင့် ဆောတိုဆိဆစေလွိုဆူမျောခေါ့လွားပွီး အဖော့ဖရောဆန်ကွို စူမောင့်မဆိဆနောင်ပေါ်” လွို မိင့်တိုမူရယ်။ 23အယ်းနွေ့ာဂ်မောင် ကွိုယ်တော်ဟော် ဆူ့ယယ့် ဆပယ့်တိုမျောဖဂ်ကွို ခှယ့်ပွီး “ငေါ်ပှုခယ့်ရယ့် အယော်ရယ်ကွိုမျိုခယ့်ကျော့ယော့ရယ့်ဆူတွို့ဟော် အမင်တကာကွိုပယ်း ကောင်ကွောင်းကျော့ရယ်။ 24နန်တွို့ကွို ငေါ်ဟိုးခှန်ရယ့်ဟော်မောင် ချယ့်အယန်ခေါ့ခယန်း ပရောဖက်မျောနောင့် ဆန်ဘရန်မျောတွို့တအွောင် နန်တွို့မျိုတွိခွမ့်ယော့ရယ့်အယော်မျော မျိုခွမ့်ယော့ဖွို့၊ ကျောဆိဆခွမ့်ယော့ဖွို့ ကော်တရော်လွိုခှန်ခယ့်ကျော့ပေမယ့်လယ်း ဆူတွို့ဟော် မမျိုခယ့်ယော့၊ မကျောခယ့်ယော့ပေါ်” လွို့ဆူတွို့ကွို ပယ်း ဆီးချောမိင့်တိုမူရယ်။ 25တနေ့မောင် ကွိုယ်တော်ယေရှုဟော် လူထုပရိတ်ဆတ်တွို့ကွို ဆုန်းမော့ဆန် ကျောနေခှိင် ကျောင်းတတ်ဆရော်တယွောဂ်ဟော် ကွိုယ်တော်ကွို စောင်းလွိုရယ့်အတွကျွောင့် မေးခွမ်းမေးဖွို့ မတ်လောဂ်လေရယ်။ အယ်းနွောဂ်မောင် ဆူခေါ့ ကွိုယ်တော်ကွို “ကွိုယ်တော်၊ နိစ္စော့ထော်ဝရော့အဆဂ်ကွို ယော့ဆိစေဖွို့အတွ စလွိုမျွိုးလုတ်ယော့မလော” လွို့ မေးမှန်းခယ့်လေရယ် 26အယ်းအခေါ် ကွိုယ်တော်ခေါ့ “ကျောင်းစော်မောင် စလွိုမျွိုး ရယ်းထောသလော၊ အယ်းဟော်ရယ်ကွို နန်စလွိုမျွိုး နောလည်သလော” လွို့ ပှန်လယ်မေးမှန်းလေယော် 27အယ်းလူခေါ့ “ကျောင်းစော်မောင် နန့်ယယ့်အဆန်သခန်ဖှဂ်တိုမူရယ့် ဖရောဆန်ကွို ကွိုယ် စိနလုန်းဆုန်းပေါလုန်းနော့ ထွိဖိုပျော့ပွီး နန်တွို့အဆိညင်ဆိသမျော့နောင့် အစွမ်းကွိင် မေတ္တော်ထောခှဂ်ခန်ယော့မောင်ဖှဂ်ရယ်။ အယ်းအပှန် နန့်ယယ့် အိင်နီးခှန်းကွိုလယ်း ကွိုယ့်ကွိုကွိုယ် မေတ္တော်ထောခှဂ်ခန်သလွိုမျွိုး ခှဂ်ခန်ယော့မယ်လွို့ ရယ်းဆောထောပေါ်ရယ်” လွို့ ပှန်ပွီးရွှောဂ်တန်လေရယ်။ 28ကွိုယ်တော်ခေါ့လယ်း “မင်ပေါ်ရယ်။ အယ်းအတောင်းလုတ်ပေါ်။ အယ်းအတောင်းလုတ်ယန် နန်ဟော် နိစ္စထော်ဝရော့အဆဂ်ကွို ယော့ဆိမောင်ဖှဂ်ရယ်” လွို့ မိင့်တိုမူလေရယ်။ 29အယ်းအခေါ် ကျောင်းတတ်ဆရော်ခေါ့ ဆူ့ယယ့်မေးခွမ်းဟော် မင်ကန်ကျွောင်းပျော့ဆော့လွိုလွို့ “ကွိုယ်တော်၊ အယ်းလွိုဆွိုယန် ငေါ့ယယ့်အိင်နီးခှန်းဟော် စူရယ်ပေါ်လော” လွို့မေးရွှောဂ်လေရယ်။ 30ကွိုယ်တော်ခေါ့ အယ်းလူကွို ပုန်ဥဖမော်တခုနောင့်ဖှေကျော်ရယ့်ဟော်မောင် “တခေါ်ခေါ့ ဂျူးလူမျွိုးတယွောဂ်ဟော် ဂျေရုဆလင်မွှို့ခေါ့နေ ဂျေရိခေါမွှို့ကွို ခရီးဆိုးလေရယ်။ လောင်းခရီးမောင် တောင်မှော့ရယ်ဟော် အယ်းလူကွို တောဂ်ခယ့်ကှော့ပွီး ဆူ့မောင်ဆိသမျော့အယော်အောလုန်းနောင့် ဆူ့ယယ့်အဝဂ်အစောမျောကွို တအွောင်ခွှဂ်ယူပွီး ယူဆိုးခယ့်ကျော့လေရယ်။ အယ်းတောင်မှော့တွို့ဟော် ဆူ့ကွို ဆေလုနီးပေါဖှဂ်ရယ့်အထိ ရောဂ်ကျော့ပွီးရယ့်နွောဂ်မောင် အဝီးကွိုထွဆိုးခယ့်ကျော့လေရယ်။ 31အယ်းနွောဂ် ဂျူးပုရောဟိတ်တယွောဂ်ဟော် အယ်းလောင်းခရီးအတောင်း လော်ရယ့်အခေါ်မောင် ဒေါင်ယော်ရယ်နောင့် လယ်းကှော့နေရယ့်လူကွို မျိုပေမယ့် လောင်းယယ့်အချောတဖဂ်ခေါ့နေ ရွှောင်ထွဆိုးလေရယ်။ 32အယ်းလွိုပယ်း လေဝိလူမျွိုးdတယွောဂ်ဟော်လယ်း အယ်းနေယော်ကွို ယွောဂ်လော်ရယ့်အခေါ်မောင် ဆူ့ကွိုမျိုပေမယ့် အချောလောင်းတဖဂ်ခေါ့ရွှောင်ထွဆိုးပှန်ရယ်။ 33ဟော်ပေမယ့် အယ်းနေယော်ကွို ခရီးထွလော်ရယ့် ရှမာရိအမျွိုးဆောတယွောဂ် ယွောဂ်လော်ရယ့်အခေါ်မောင် ဆူ့ကွို မျိုတော်နောင့် ဆနောဂရုနော်ဖှဂ်ရယ့်အတွ 34ဆူ့ယယ့် အနောကွိုဆိုးပွီး ဒေါင်ယော်ရယ်ကွို သံလွင်ဆီ၊ စပျစ်ဝိုင်နောင့် ဆေးကျိုးလိင်းပေးပွီး အဝဂ်နောင့် စယ်းပေးရယ်။ ပွီးယန် ဆူ့ကွို မြည်းငါeပိုတန်ပွီး တည်းခွိုဆွောင်ကွို ခိုလော်ခယ့်ရယ်။ ယွောဂ်လော်ရယ့်အခေါ်မောင်လယ်း ဆူ့ကွို ပှုစုစွောင့်ရွှောဂ်ပေးလေရယ်။ 35နွေ့ာဂ်တနေ့မွိုးလန်းရယ့်အခေါ် ဆူဟော် တည်းခွိုဆွောင်သခန်ကွို ဒေနော်ရီဒန်းကောပှော နေပှောကွို ပေးပွီး ‘ကျယ်းဇူးပှုပွီး ဟော်လူနော်ကွို ပှုစုစွောင့်ရွှောဂ်ပေးပေါ်။ ဆူ့ကွို ပှုစုလွို့ အယ်းထဂ်မကော့ ကွိင်ကှော့ယန်လယ်း ငေါ်ပှန်လော်ရယ့်အခေါ် ပေးပေါ်မယ်’ လွို့ ဟိုးခယ့်လေရယ်” ဆွိုပွီးဖှဂ်လေရယ်။ 36အယ်းနွောဂ် ကွိုယ်တော်ခေါ့ ကျောင်းတတ်ဆရော်ကွို “နန့်ယယ့်အမျိုမောင် အယ်းလူဆုန်းယွောဂ်မောင် ဓမျှော့တောဂ်ခေါင်ယော့ရယ့် လူယယ့် စဂ်မှိင်ရယ့်အိင်နီးခှန်းဟော် စူလော” လွို့ မေးလေရယ်။ 37အယ်းအခေါ် ကျောင်းတတ်ဆရော်ခေါ့ “ဆူ့အပို ဆနောကျင်နော်ပွီး ကူညီပေးရယ့် လူဖှဂ်ပေါ်ရယ်” လွို့ ပှန်လယ်ဖှေကျောယော် ကွိုယ်တော်ခေါ့ “နန်ဟော်လယ်း ဆိုးပွီး လူတွို့ကွို ဟော်နည်းအတောင်း ပှုကှင့်ပေါ်” လွို့ မိင့်တိုမူလေရယ်။ 38အယ်းနွေ့ာဂ်မောင် ကွိုယ်တော်ဟော် ဆပယ့်တိုတွို့နောင့်အတူ ခရီးဆဂ်ဆိုးနေခှိင် ဝိုတဝိုကွို ယွောဂ်ဆိလော်လေရယ်။ အယ်းဝိုမောင် မာသလွို့ခိုရယ့် အမျွိုးဆမီးတယွောဂ်ဟော် ကွိုယ်တော်နောင့် ဆူ့ယယ့်ဆပယ့်တိုမျောကွို ဆူ့ယယ့်အိင်ကွို တည်းခွိုဖွို့ပန့်လေရယ်။ 39ဆူ့မောင် မာရိလွို့ခိုရယ့် တေမော့ငါ တယွောဂ်ဆိရယ်။ မာရိဟော် ကွိုယ်တော်ယယ့် ချေရန်းမောင်ထောင်ပွီး တရောတိုမျောကွို နော်ကျောနေလေရယ်။ 40မာသမောင်ကော ဧည့်ဆည်မျောအတွ ဧည့်ဝဂ်ပှုဖွို့ အလုတ်မျောနေလေရယ်။ နွေ့ာဂ်ဆုန်းမောင် မာသဟော် ကွိုယ်တော်နောင်းကွို တွိုးကောဂ်ပွီး “ကွိုယ်တော်၊ ငေါ့ယယ့် တေမော့ဟော် အိင်မုကိစော့အောလုန်းကွို ငေါ်တယွောဂ်ထယ်း လုတ်ယော့အွောင်လွို့ ခဂ်ထောရယ့်အတွ ငေါ့ကွိုကူညီပေးဖွို့ ဆူ့ကွိုဟိုးပေးပေါ်” လွို့ ရွှောဂ်တန်လေရယ်။ 41အယ်းအခေါ် ကွိုယ်တော်ခေါ့ “မာသ၊ နန်ဟော် အယော်ယော်ကွို စွိုးရိင်စိနောင့် အလုတ်မျောနေပေမယ့်လယ် 42အမင်တကာခေါ့ တကာလွိုအောဂ်ရယ့်အယော်ခေါ့ တခုပယ်း ဆိရယ်။ မာရိမောင်ကော အယ်းကွောင်းရယ့်အယော်ကွို ယွီးချာထောပွီးပီဖှဂ်လွို့ အယ်းယော်ကွို ဆူ့နောင်းခေါ့ ဖယ်ဆောလွို့မယော့တို့ဘူး” လွို့ မိင့်တိုမူလေရယ်။
Currently Selected:
Luke 10: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
