Luke 9
9
1အယ်းနွောဂ်မောင် ကွိုယ်တော်ဟော် အထူးဆပယ့်တိုဆာ့နေဦးကွို ခိုပွီး စုစေပွီးယန် မကွောင်းဆွိုးဝါးအပွေါင်းတွို့ကွို မွောင်းထွိနောင်ဖွို့နောင့် အနော်ရိုးကော်ဆယ်မျောကွို ပျွောဂ်ကန်းစေနောင်ရယ့် တခွိုးစွမ်းအောနောင့် အော်နော်ရယ်ကွို ပေးအောဂ်လေရယ်။ 2အယ်းနွောဂ်မောင် ကွိုယ်တော်ဟော် ဆူတွို့ကွို ဖရောဆန်ယယ့် ဆော်ဆနော်တိုအကျွောင်းကွို ဟိုးဖွို့နောင့် ဖျောနော်နေဆူမျောကွို ကျောင်းမော်စေဖွို့အတွ စေခွှဂ်တိုမူလေရယ်။ 3ကွိုယ်တော်ခေါ့ ဆူတွို့ကွို “နန်တွို့ဆိုးရယ့်အခေါ် နန်တွို့နောင့်အတူ စော်အယော်ကွိုမောင့် ယူမဆိုးကျော့နောင့်။ တွောင်ဝေး၊ လွာအိ၊ အစောအစော်၊ ပိဆင်၊ အဝဂ်အပွိုမျောကွို ယူမဆိုးကျော့နောင့်။ 4စူယယ့်အိင်မဆွို နန်တွို့ကွို လဂ်ခေါင် ကျွိုဆွိုယန် အယ်းအရောဂ်ခေါ့ မထွမခှန်း အယ်းအိင်မောင်ပယ်း တည်းခွိုကျော့ပေါ်။ 5တကာလွို့ နန်တွို့ကွို လဂ်ခေါင်မကျွိုဆွိုရယ့် အိင်ကွိုကော နန်တွို့ အယ်းအရောဂ်ခေါ့ ထွလော်ရယ့်အခေါ်မောင် ဆူတွို့ကွိုဆတိပေးရယ့်အနေနောင့် နန်တွို့ခှေထွောဂ်ခေါ့ ဖွီမွိရယ်ကွို ခေါ်ခှော့ခယ့်ကျော့ပေါ်a” လွို့ မိင့်တိုမူရယ်။ 6အယ်းနွောဂ်မောင် အထူးဆပယ့်တိုတွို့ဟော်လယ်း ကွိုယ်တော်နောင်းခေါ့ ထွလော်ကျော့ပွီးရယ့်အခေါ် အနာနာအရောဂ်ရောဂ်ကွို ဆိုးပွီး ဖရောဆန်ယယ့် မန်ဂလော်ဆတန်းကွောင်းမျောကွို ဟိုးကျောယန်း ဖျောနော်နေဆူမျောကွို ပျွောဂ်ကန်းစေဖွို့ ကုပေးခယ့်ကျော့လေရယ်။ 7အယ်းအခှိင်မောင် ဂါလိလဲပှယ်ကွို အုတ်ချုပ်ဆူဟေရုဒ်အန္တိပဟော် ကွိုယ်တော်ပှုသမျောတွို့ကွို ကျောဆိဆရယ့်အခေါ် စွိုးယိင် ပူပန်လော်လေရယ်။ စော်ကျွောင့်လောဟန် လူတခှို့ခေါ့ “ယေနဂ်မန်ဂလော်ဆရော်ယောဟန် အဆဂ်ပှန်ချန်လော်ပီ” ဖှဂ်ရယ်။ 8အချောဆူတွို့ခေါ့လယ်း “ပရောဖက်ဧလိယ ပှန်ကျို့လော်ပီ” ဖှဂ်ရယ်၊ အခှို့ခေါ့လယ်း “ချယ့်အယန်ခေါ့ဆိခယ့်ရယ့် ပရောဖက်ရယ်ထားခေါ့တပေါ အဆဂ်ပှန်ချန်လော်ပီ” ဖှဂ်ရယ်ဆွိုပွီး ဟိုးဆွိုနေကျော့ရယ့် အတွကျွောင့်ဖှဂ်ရယ်။ 9အယ်းနွောဂ်မောင် ဟေရုဒ်ခေါ့ ဟော်အယော်ရယ်ကွို ပှုလုတ်နေရယ့်ဆူဟော် ယေနဂ်မန်ဂလော်ဆရော် ယောဟန်ကော မဖှဂ်နောင်ဘူး။ အကျွောင်းမောင်ကော ငေါ်ဟော် ငေါ့ယယ့်စဂ်ဆောမျောကွို အမိင့်ပေးပွီး “ယောဟန်ယယ့် ခွေါင်းကွို ငေါ်ဖှဂ်စေခယ့်ပွီးပီ။ ဟော်ပေမယ့်လယ်း အခု ဆတန်းကျောနေယော့ရယ့် ဆူဟော် စူလော” လွို့ ဟိုးပွီး ကွိုယ်တော်ကွို ကော်တရော် တွိခှန် ခယ့်လေရယ်။ 10အထူးဆပယ့်တိုမျော ပှန်ယွောဂ်လော်ကျော့ရယ့်အခေါ် ဆူတွို့ ပှုခယ့်သမျော့ကွို ကွိုယ်တော်နောင်း ရွှောဂ်တန်ကျော့ရယ်။ အယ်းအခေါ် ကွိုယ်တော်ဟော် ဆူတွို့နောင့်အတူ ဗက်ဇဲဒဝိုကွို ကျို့တိုမူရယ်။ 11ဟော်ပေမယ့် အယ်းအကျွောင်းကွို လူအမျောတွို့ ကျောဆိဆကျော့ရယ့်အခေါ် ကွိုယ်တော်ယယ့်နွောဂ်ကွို လောဂ်လော် ခယ့်ကျော့ရယ်။ ကွိုယ်တော်ခေါ့လယ်း ဆူတွို့ကွို ကျွိုဆွိုပွီး ဖရောဆန်ယယ့်ဆော်ဆနော်တို အကျွောင်းနောင့် ပဆဂ်လွို့ ဆန်းလန်းဟိုးကျောပွီး ဖျောနော်နေဆူတွို့ကွိုလယ်း ပျွောဂ်ကန်းစေတိုမူရယ်။ 12ညော့နေစွောင်းရယ့်အခေါ် အထူးဆပယ့်တိုနေယွောဂ်ဟော် ကွိုယ်တော်နောင်းကွို ယွောဂ်ဆိလော်ပွီး “ကွိုယ်တော်၊ ဟော်အရောဂ်မောင် လူဆူကန်းရယ့် အရောဂ်ဖှဂ်နေရယ့်အတွ ဟော်လူအုတ်ကျွီးကွို အနီးအနောတဝိုက်မောင်ဆိရယ့် ကျေးလဂ်တိုးဝိုရယ်နောင်းကွို စေခွှဂ်တိုမူပေါ်။ ဆူတွို့မောင် တည်းခွိုဖွို့နောင့် အစောအစော် ရယ် လွိုအောဂ်ပေါ်ရယ်” လွို့ ရွှောဂ်တန်ကျော့လေရယ်။ 13ကွိုယ်တော်ခေါ့ “ဆူတွို့ကွိုစောစရော်တခုခုပေးလောဂ်ပေါ်” လွို့ အထူးဆပယ့်တိုတွို့ကွို မိင့်တိုမူလောဂ်ပွီး ဆူတွို့ခေါ့ “ငေါ်တွို့မောင့် မွိအဆေးငေါလုန်းနောင့် ငေါနေကွောင်ပယ်း ဆိပေါ်ရယ်။ ဟော်လူအောလုန်းကွို ကျွယ်းမယ်ဟန်ကော အစောအစော်မျောဆိုးပွီး ဝါယော့ပေါ်လောဂ်မယ်” လွို့ ရွှောဂ်တန်ကျော့လေရယ်။ 14စော်ကျွောင့်လောဟန်ကော အယ်းလူအုတ်ကျွီးမောင် ယွောဂ်ကျောဆောဦးယေ ငေါထွောင်ခန့်ဆိလေရယ်။ အယ်းအခေါ် ကွိုယ်တော်ခေါ့ အထူးဆပယ့်တိုမျောကွို “လူအယွောဂ်ငေါဆာစီအုတ်စုခွားပွီး ထောင်ကျော့ဖွို့ လူတွို့ကွို ဟိုးလောဂ်ပေါ်” လွို့ မိင့်တိုမူလွို့ 15အထူးဆပယ့်တိုခေါ့လယ်း ကွိုယ်တော်မိင့်ရယ့်အတောင်း လူရယ်ကွို ထောင်စေလေရယ်။ 16အယ်းနွောဂ်မောင် ကွိုယ်တော်ဟော် မွိငေါလုန်းနောင့် ငေါနေကွောင်ကွို ယူလောဂ်ပွီး ကိုးကန်ကွိုမျိုကျေ့ပွီး ဖရောဆန်ယယ့်ဂုဏ်တိုကွို ခှီးမွမ်းဆုတွောင်းပွီး ပွောင်မွိနောင့် ငေါမျောကွိုဖပွီး အထူးဆပယ့်တိုမျောခေါ့တဆန့် လူမျောကွို ဝီပေးစေလေရယ်။ 17လူအောလုန်းတွို့ဟော်လယ်း အဝို့စောယော့ရယ့်အပှင် စောကျွမ်းစောကှန်မျောကွို အထူးဆပယ့်တိုတွို့ခေါ့ ကွောဂ်ယူဆိင်းကျော့ယော် ချန်းတွောင်းဆာ့နေတွောင်း အပှယ့်ယော့ကျော့လေရယ်။ 18တနေ့မောင် ကွိုယ်တော်တပေါထယ်းဆုတွောင်းနေခှိင် ဆပယ့်တိုမျော ယွောဂ်လော်ကျော့ရယ့်အခေါ် ကွိုယ်တော်ခေါ့ ဆူတွို့ကွို “လူရယ်ခေါ့ ငေါ့ကွို စူလွို့ဟိုးနေကျော့သလော” လွို့ မေးမှန်းလောဂ်ရယ်။ 19ဆူတွို့ခေါ့ “တခှို့ကော ကွိုယ်တော်ကွို ယေနဂ်မန်ဂလော်ဆရော် ယောဟန်လွို့လယ်း ဟိုးကျော့ရယ်။ ဧလိယလွို့လယ်း ဟိုးကျော့ရယ်။ အယန်ခေါ့ဆိခယ့်ရယ့် ပရောဖက်တပေါ အဆဂ်ပှန်ချန်လော်ရယ်လွို့လယ်း ဟိုးနေကျော့ပေါ်ရယ်” လွို့ ရွှောဂ်တန်ကျော့လေရယ်။ 20အယ်းအခေါ် ကွိုယ်တော်ခေါ့ “နန်တွို့နန် ငေါ့ကွိုစူလွို့ထန်ကျော့သလော” လွို့ မေးလွို့ ပေတရုခေါ့ “ကွိုယ်တော်ခေါ့ ဖရောဆန်စေခွှဂ်လောဂ်ရယ့် ကာတန်ဆန်မေရှိယ ဖှဂ်ပေါ်ရယ်” လွို့ပှန်ရွှောဂ်ထောလေရယ်။ 21ကွိုယ်တော်ခေါ့လယ်း ဟော်အကျွောင်းအယော်ကွို စူကွိုမောင့် မဟိုးဖွို့ တန်းတန်းကျောဂ်ကျောဂ် တောမှဂ်တိုမူလေရယ်။ 22အယ်းနွောဂ်မောင် ကွိုယ်တော်ခေါ့ ဆပယ့်တိုမျောကွို “လူဆောတိုဖှဂ်ရယ့်ငေါ်ဟော် ကျွီးမောရယ့် ဒုက်ခေါ့မျောကွိုခေါင်ယူဖွို့ လွိုအောဂ်ရယ့်အတွ ဂျူးလူမျွိုးအကျွီးအကားမျော၊ ပုရောဟိတ်အကျွီးအကားမျောနောင့် ကျောင်းတတ်ဆရော်မျောယယ့် ညမ်းပါခှန်းကွိုခေါင်ယော့မောင်ဖှဂ်ရယ်။ လူတွို့ဟော် ငေါ့ကွို အဆေဆဂ်ကျော့ပွီးရယ့်အခေါ် ဆုန်းရတ်မွှောဂ်နေ့မောင် ငေါ်ဟော် အဆဂ်ပှန်ချန်လောဂ်မယ်” လွို့ မိင့်တိုမူရယ်။ 23အယ်းနွောဂ်မောင် ကွိုယ်တော်ခေါ့ လူထုပရိတ်ဆတ်တွို့ကွို “ငေါ့ယယ့် နွောဂ်လောဂ်ဆပယ့်ဖှဂ်ခှန်ရယ့် စူမဆွိုဟော် ကွိုယ်ကျွိုးစွမ့်ပွီး ကွိုယ့်ယယ့် လဂ်ဝိုးကောဂ်တောင်ကွို ကွိုယ်တောင်ထောင်းပွီး နေ့စန်ရတ်ဆဂ် ငေါ့နွောဂ်ကွို လောဂ်နောင်ရယ့်လူဖှဂ်ယော့မယ်။ 24အကျွောင်းမောင်ကော ဟော်လိုးကော့မောင် ကွိုယ့်အဆဂ်ကွို ကာတန်လွိုရယ့်လူ စူမဆွို နိစ္စော့ထော်ဝရော့အဆဂ်ကွို ယော့မောင်မဟွိပေမယ့်လယ်း ငေါ့အတွကျွောင့်နောင့် ကွိုယ့်အဆဂ်ကွိုတအွောင် စွမ့်နောင်ရယ့်စိဆိယန် နိစ္စော့ထော်ဝရော့အဆတ်ကွို ယော့လောဂ်မောက်ဖှဂ်ရယ်။ 25လူဟော် ဟော်ကဘော်လိုးကော့မောင်ဆိရယ့် စည်းစိမ်မျောကွို ပေါင်ဆောင်ယော့ပေမယ့်လယ်း ဆူ့ယယ့် အဆဂ်ကွိုအဆုန်းခေါင်ယော့ယန် စော်အကျွိုးဆိမလော။ 26နန်တွို့ဟော် ငေါ်နောင့် ငေါ့ယယ့်တရောစကောအတွ ချကျွောဂ်နေကျော့ယန် လူဆောတိုဖှဂ်ရယ့်ငေါ်ဟော်လယ်း ငေါ့ယယ့် ဖုန်းအဆရေ၊ ဖော့ဖရောဆန်ယယ့်ဖုန်းအဆရေနောင့် ဆွယ်မွှို့တိုမောင်ဆိရယ့် နတ်ဒေဝါမျောယယ့်ဖုန်းအဆရေတွို့နောင့် ဟော်ကဘော်လိုးကော့ကွို ပှန်ကျို့လော်ရယ့်အခေါ်မောင် နန်တွို့ဟော် ငေါ့ယယ့်နွောဂ်လောဂ်ဆပယ့်တိုမျော မဟွိကျွောင်း ငေါ်ညမ်းပါတိုမူမယ်။ 27နန်တွို့ကွို ငေါ်အမင်ဟိုးယော့ယန် ဟော်နေယော်မောင် မတ်နေကျော့ရယ့် လူတခှို့ဟော် ဖရောဆန်ယယ့်ဆော်ဆနော်တိုကွို မမျိုတွိယော့ဝါးနောင့် ဆေယော့မောင်မဟွိဘူး” လွို့မိင့်တိုမူလေရယ်။ 28အယ်းလွိုမိင့်တိုမူပွီးရယ့်အခေါ် ဆတ်ရတ်ခန့်အကျော်မောင် ကွိုယ်တော်ဟော် ပေတရု၊ ယောဟန်နောင့် ယာကုပ်တွို့ကွို ခိုဆွောင်ပွီး ဝဂ်ပှုဆုတွောင်းဖွို့အတွ တွောင်ပိုကွိုကျို့တိုမူရယ်။ 29ကွိုယ်တော်ဆုတွောင်းနေခှိင်မောင် ဆူ့ယယ့် ရုပ်အဆန်းပုန်စောင်ဟော် ပွှောင်းလားဆိုးပွီး ဝဂ်ရုန်တိုဟော်လယ်း ကော်တရော်ဖှူဖွယ်းလော်လေရယ်။ 30အယ်းနွောဂ်မောင် ပရောဖက်မောရှေနောင့် ဧလိယတွို့ဟော် တလန့်ပိုလော်ပွီး ကွိုယ်တော်နောင့်စကောဟိုးကျော့လေရယ်။ 31ဆူတွို့ဟော် ဖုန်းတခွိုးတိုမျော ထွမ်းလန်းနေပွီး ဖရောဆန်ရယ့်အလွိုတိုအတောင်း ဂျေရုဆလင်မွှို့မောင် မကျော်မီမောင် ဖှဂ်လော်မယ့်ကွိုယ်တော်ယယ့် အဆေခေါင်တိုမူမယ့်အကျွောင်းကွို ဟိုးဆွိုနေကျော့ရယ်။ 32အယ်းအခှိင်မောင် ပေတရုနောင့် အချောဆပယ့်တိုနေဦးမောင်ကော အိမိုးကှော့နေခယ့်ကျော့ရယ်။ ဆူတွို့ နွိုးလော်ရယ့်အခေါ် ခှခှန်းပယ်း ဖုန်းတခွိုးတိုမျောနောင့် ပှယ့်စုန်ရယ့် ကွိုယ်တော်ကွို ဖူးမျိုကျော့ယော့လေရယ်။ အယ်းအခှိင်မောင် ဆူတွို့ဟော် ကွိုယ်တော်နောင့်အတူ မတ်နေရယ့် ပရောဖက်နေပေါကွိုလယ်း မျိုတွိလောဂ်ယော့လေရယ်။ 33အယ်းနွောဂ်မောင် မောရှေနောင့်ဧလိယတွို့ ထွခွာခှိင်မောင် ပေတရုခေါ့ ကွိုယ်တော်ကွို “ကွိုယ်တော်၊ ဟော်နေယော်ဟော် နေခှန်စရော် ကော်တရော်ကွောင်းရယ့်နေယော်ဖှဂ်ပေါ်ရယ်။ အယ်းယော်ကျွောင့် ကွိုယ်တော်ယေရှုအတွ တားတလုန်း၊ ဧလိယအတွ တားတလုန်းနောင့် မောရှေအတွ တားတလုန်းကွို ငေါ်တွို့ ဆွောဂ်လုတ်ပေးပယော့စေ” လွို့ ရွှောဂ်ထောလေရယ်။ ဟော်ပေမယ် ဆူဟော် ဆူ့ကွိုယ်ဆူ စော်ကွိုဟိုးလောဂ်ရယ်ဆွိုတော်ကွိုတအွောင် မဆိဆပေါ်။ 34ပေတရု အယ်းလွိုရွှောဂ်ထောနေခှိင် မွိုးတိင်ကျွီးတခုဟော်ဆူတွို့အပိုကွို အုတ်လော်ရယ့်အတွကျွောင့် ဆူတွို့ဟော် ကော်တရော်ကွို ကျွောဂ်လန့်ဆိုးကျော့လေရယ်။ 35အယ်းနွောဂ်မောင် မွိုးတိင်ထားခေါ့ “ဟော်လူဟော် ငေါ်ယွီးကွောဂ်ထောရယ့် ငေါ့ယယ့်ဆောတိုဖှဂ်ရယ်။ ဆူ့စကောကွို နောထွောင်ကျော့ပေါ်” ဆွိုရယ့်အဆောင်တိုထွပိုလော်လေရယ်။ 35အယ်းနွောဂ်မောင် မွိုးတိင်ထားခေါ့ “ဟော်လူဟော် ငေါ်ယွီးကွောဂ်ထောရယ့် ငေါ့ယယ့်ဆောတိုဖှဂ်ရယ်။ ဆူ့စကောကွို နောထွောင်ကျော့ပေါ်” ဆွိုရယ့်အဆောင်တိုထွပိုလော်လေရယ်။ 36အယ်းအဆောင်တိုခေါ့ မိင့်တိုမူပွီးရယ့်အခေါ် ဆပယ့်တိုတွို့ဟော် ကွိုယ်တော်ယေရှုတပေါထယ်းကွိုပယ်း ဖူးမျိုကျော့ယော့လေရယ်။ ဆပယ့်တိုတွို့ဟော် ဆူတွို့တွိမျိုခယ့်ယော့ရယ့် အကျွောင်းအယော်တွို့ကွို အခှိင်ကော်လော့ကျော်ရယ့်အထိ စော်တဦးတယွောဂ်ကွိုမော့ မဟိုးပယ်း တိတိဆိဆိနေခယ့်ကျော့ရယ်။ 37နွောဂ်တနေ့မောင် ကွိုယ်တော်ယေရှုနောင့် အယ်းဆပယ့်တိုဆုန်းဦးတွို့ဟော် တွောင်ပိုခေါ့ ဆန်လော်ကျော့ယော် လူထုပရိတ်ဆတ်မျောတွို့ခေါ့ ကွိုယ်တော်ကွို လော်ယွောဂ်တွိဆုန်ကျော့လေရယ်။ 38အယ်းနွောဂ်မောင် လူထုပရိတ်ဆတ်ထားခေါ့ လူတယွောဂ်ဟော် ကွိုယ်တော်ယေရှုကွို အိုခိုပွီး “ကွိုယ်တော် ငေါ့ယယ့်ဆောကွို ကာတန်ပေးဖွို့ တွောင်းပန်ပေါ်ရယ်။ ဆူဟော် ငေါ့ယယ့် တဦးထယ်းဆောဖှဂ်ပေါ်ရယ်။ 39ဆူ့ကွို မကွောင်းဆွိုးဝါးဟော် ပူးဝမ်နိစဂ်နေရယ့်အတွ ဆူဟော်အလန့်တကျောအိုဟဂ်ပွီးယန် တကွိုယ်လုန်းတွိင်လုတ်ပွီး ပစောဂ်ထားခေါ့ အမွှုပ်လယ်းထွလော်တတ်ပေါ်ရယ်။ အယ်းမကွောင်းဆွိုးဝါးဟော် ဆူ့ကွို ပမ်ပန်းနော်ကျန်စေပွီး ဆူ့နောင်းခေါ့လယ်း စော်အခေါ်မောင့်ထွဆိုးခှန်းမဆိပေါ်။ 40ငေါ်ဟော် ကွိုယ်တော်ယယ့်ဆပယ့်တိုရယ်နောင်း မကွောင်းဆွိုးဝါးကွို မွောင်းထွိဖွို့တွောင်းပန်ပွီး မွောင်းထွိခေါင်းပေမယ့်လယ်း ဆူတွို့မမွောင်းထွိနောင်ကျော့ဘူး” လွို့ ရွှောဂ်ထောလေရယ်။ 41အယ်းအခေါ် ကွိုယ်တော်ခေါ့ လူထုပရိတ်ဆတ်အပွောင်းတွို့ကွို “နန်တွို့ဟော် ဖရောဆန်ကွိုအမင်တကာ ယုန်ကျည်ခှန်းမဆိကျော့ရယ့် အပှဂ်ဆိရယ့်ဆူမျောဖှဂ်ကျော့ရယ်။ ငေါ်ဟော် နန်တွို့နောင့်အတူ ဆိနေခှိင်မောင်ကျော်ခယ့်ပေမယ့်လယ်း နန်တွို့ဟော် ငေါ့ကွို မယုန်ကျော့ဆေးဘူး” လွို့ ဟိုးပွီး ကွိုယ်တော်ခေါ့ အယ်းလူကွို “နန့်ယယ့်ဆောကွို ငေါ့နောင်းခိုလော်ခယ့်ပေါ်” လွို့ မိင့်တိုမူခယ့်လေရယ်။ 42အယ်းလူပယ့်ငါ ကွိုယ်တော်ယေရှုနောင်း လော်နေခှိင်မောင် မကွောင်းဆွိုးဝါးဟော် ဆူ့ကွိုမှေပိုနောင်းခဂ်ခှော့ပွီး တကွိုယ်လုန်းကွို တွိင်လုတ်စေလေရယ်။ ဟော်ပေမယ့် ကွိုယ်တော်ဟော် မကွောင်းဆွိုးဝါးကွို လူဆငါနောင်းခေါ့ ထွဆိုးဖွို့ဆုန်းမော့ခယ့်လေရယ်။ ကွိုယ်တော်ဟော် လူပယ့်ငါကွို ကုပေးပွီးရယ့်နွောဂ်မောင် ဆူ့ယယ့်ဖော့နောင်းကွို ပှန်အောဂ်ပေးခယ့်လေရယ်။ 43လူအပွေါင်းတွို့ဟော်လယ်း ဖရောဆန်ယယ့်ကျွီးမှဂ်ရယ့် တခွိုးတိုကွို ဖူးမျိုကျော့ယော့ပွီး အောင့်အိုးမဆုန်းဖှဂ်နေလေရယ်။ ကွိုယ်တော်ပှုတိုမူရယ့် အယော်အောလုန်းကွို လူအပွေါင်းတွို့ အောင့်အိုးနေကျော့ခှိင် ကွိုယ်တော်ဟော် ဆပယ့်တိုတွို့ကွို 44“နန်တွို့ ငေါ်ဟိုးရယ့်စကောရယ်ကွို အော်ယုန်စောဂ်ပွီး နောထွောင်ကျော့ပေါ်။ လူဆောတိုဖှဂ်ရယ့်ငေါ့ဟော် မကျော်မီအခှိင်မောင် ဆဂ်စော်ဖွောဂ် ခှန်းကွိုခေါင်ယော့ပွီး မကွောင်းရယ့်အုတ်ချုပ်ဆူတွို့ယယ့် လဂ်ထားကွို အောဂ်နောင်ခှန်း ခေါင်ယော့တို့မယ်” လွို့ မိင့်တိုမူရယ်။ 45ဆပယ့်တိုတွို့မောင်ကော အယ်းစကောယယ့်အဓိပါကွို နောမလည်နောင်စေဖွို့ ကွာဝထောခှန်းခေါင်ယော့ရယ့် အတွကျွောင့် ကွိုယ်တော်စော်ကွို ဆွိုလွိုကျွောင်းကွို နောမလည်ခယ့် ကျော့ပေါ်။ အယ်းအပှန် ကွိုယ်တော်ကွို မေးမှန်းဖွို့လယ်း ဆူတွို့ဟော် ကျွောဂ်နေခယ့်ကျော့လေရယ်။ 46အယ်းနွောဂ်မောင် ဆပယ့်တိုတွို့ဟော် ဆူတွို့ထားမောင် စူဟော် အကျွီးမှဂ်ဆုန်းဖှဂ်ရယ်ဆွိုတော်ကွို ညမ်းခွိင်နေကျော့ရယ်။ 47ဟော်ပေမယ့် ကွိုယ်တော်ခေါ့ အယ်းဆူတွို့ ယယ့်စိထားမောင်စလွိုမျွိုးတွယ်းနေရယ်ဆွိုတော်ကွို ဆိဆတိုမူရယ့်အတွကျွောင့် လူပယ့်ငါတယွောဂ်ကွို ဆူ့ယယ့်အနောမောင် မတ်နေစေပွီးရယ့်နွောဂ်မောင် 48ဆပယ့်တိုရယ်ကွို “စူမဆွိုငေါ့အတွကျွောင့်နောင့် ဟော်လူပယ့်ငါကွို လဂ်ခေါင်ရယ့်ဆူဟော် ငေါ့ကွိုလဂ်ခေါင်ရယ့်ဆူဖှဂ်ရယ်။ ငေါ့ကွို လဂ်ခေါင်ရယ့်ဆူဟော် ငေါ့ကွိုအခွမ့်အော်နော်နောင့်စေခွှဂ်တိုမူရယ့် ဖရောဆန်ကွို လဂ်ခေါင်ရယ့်ဆူပယ်းဖှဂ်ရယ်။ အကျွောင်းမောင်ကော နန်တွို့အောလုန်းကျောမောင် ကွိုယ့်ကွိုကွိုယ် အနိခှော့ဆုန်းဆူလွို့ မတ်ယူရယ့်ဆူဟော် ဖရောဆန်ယယ့်အမျိုမောင်အကျွီးမှဂ်ဆုန်းဆူဖှဂ်ရယ်” လွို့ မိင့်တိုမူလေရယ်။ 49အယ်းအခေါ် ယောဟန်ခေါ့ “ကွိုယ်တော်၊ ကွိုယ်တော်ယယ့် နောင်မယ်ကွိုဆွန်းပွီး လူရယ်နောင်းခေါ့ မကွောင်းဆွိုးဝါးရယ်ကွို မွောင်းထွိနေရယ့်လူတယွောဂ်ကွို ငေါ်တွို့တွိခယ့်ရယ်။ အယ်းဆူဟော် ငေါ်တွို့ယယ့်အဖွထားကော့ဆူမဟွိရယ့်အတွ အယ်းလွိုမလုတ်ဖွို့ဆူ့ကွို တောမှဂ်ခယ့်ပေါ်ရယ်” လွို့ ရွှောဂ်တန်ရယ့်အခေါ် 50ကွိုယ်တော်ယေရှုခေါ့ “ဆူ့ကွို မတောပေါ်နောင့်။ နန်တွို့ကွို မဆန့်ကျင်ရယ့်ဆူဟော် နန်တွို့ကွို အကူအညီပေးမယ့်ဆူပယ်းဖှဂ်ရယ်” လွို့ မိင့်တိုမူလေရယ်။ 51အယ်းအခေါ် ကွိုယ်တော်ဟော် ဆွယ်မွှို့တိုကွို ပှင်ကျို့မယ့်အခိင်ဖွို့ နီးကောဂ်လော်လွို့ ဂျေရုဆလင်မွှို့ကွိုဆိုးဖွို့ အခေါင်အမော်စိဆုန်းဖျဂ်ချခှော့လောဂ်လေရယ်။ 52ကွိုယ်တော်ယေရှုဟော် ဆူ့ယယ့်ချယ့်ခေါ့ ကျွိုဆိုးကျော့ဖွို့ ဆပယ့်တိုရယ့်ထားကော့ တခှို့ကွို မိင့်တိုမူခယ့်လေရယ်။ ဆူတွို့ဟော်ရှမာရိပှယ်မောင်ရှိရယ့် ဝိုတဝိုကွို ယွောဂ်ဆိုးကျော့ရယ့်အခေါ် ကွိုယ်တော်နောင့်အချောဆူမျော တည်းခွိုဖွို့အတွ ပှန်ဆန်ပေးခဲ့ကျော့ရယ်။ 53ဟော်ပေမယ့် ဝိုဆူဝိုဆောမျောဟော် ဆူတွို့ယယ့် ဝိုမောင် တည်းခွိုနေထောင်ဖွို့အတွ ညမ်းပါခယ့်ကျော့လေရယ်။ အကျွောင်းမောင်ကော ကွိုယ်တော်နောင့်ဆပည့်တိုရယ်ဟော် ဂျေရုဆလင်မွှို့ကွို အခေါင်အမော်ဦးတည်ပွီးခရီးကျော့တော်ကျွောင့်ဖှဂ်ရယ်။ 54ယာကုပ်နောင့်ယောဟန်bတွို့ဟော် အယ်းအဖှဂ်အပျဂ်ကွိုမျိုရယ့်အခေါ် “ကွိုယ်တော်၊ ငေါ်တွို့ ပှုသလွိုမျွိုး ဖရောဆန်နောင်းမောင် တွောင်းရွှောဂ်ပွီး အယ်းဆူတွို့နောင်းကွို ကိုးကန်ခေါ့နေ မီးကွိုကှော့စေပွီး ပျစီးစေယော့မလောc” လွို့ ရွှောဂ်တန်ကျော့ယော် 55ကွိုယ်တော်ခေါ့ ဆူတွို့ဖဂ်ကွိုခှယ့်ပွီး ဆုန်းမော့လောဂ်လေရယ်။ 56အယ်းနွောဂ် ဆူတွို့အောလုန်းဟော် အချောဝိုတဝိုကွို ထွဆိုးကျော့လေရယ်။ 57ကွိုယ်တော်ယေရှုနောင့် အထူးဆပယ့်တိုတွို့ ဂျေရုဆလင်မွှို့နောင်း ဆိုးယော်လောင်းခရီး မောင် လူတယွောဂ်ဟော် ကွိုယ်တော်နောင်း လော်ပွီး “ကွိုယ်တော်၊ ငေါ်ဟော် ကွိုယ်တော်ယယ့် ဆပယ့်တိုဖှဂ်လွိုရယ့်အတွ ကွိုယ်တော် ကျို့တိုမူမယ့် နေယော်တောင်းကွို လောဂ်ပေါ်မယ်” လွို့ ရွှောဂ်တန်လေရယ်။ 58ဟော်ပေမယ့် ကွိုယ်တော်ယေရှုခေါ့ “မှေခွီးတွို့ဟော် တွားတွို့မောင်နေထောင်ကျော့ပွီး ကိုးကန်မောင် ပျောင်နေကျော့ရယ့် ငတွို့မောင်လယ်း အဆောဂ်မျောဆိကျော့ရယ်။ ဟော်ပေမယ့် လူဆောတိုမောင်ကော အိဖွို့ အနောယူဖွို့တအွောင် အိင်မဆိဘူး” လွို့ မိင့်တိုမူလေရယ်။ 59အယ်းနွောဂ်မောင် ကွိုယ်တော်ယေရှုခေါ့ အချောဆူတယွောဂ်ကွို “ငေါ့နွောဂ်ကွို လောဂ်ပွီးငေါ့ဆပယ့်လုတ်ပေါ်” လွို့ မိင့်တိုမူလေရယ်။ ဟော်ပေမယ့် အယ်းလူခေါ့ “ကွိုယ်တော်၊ ငေါ့ကွို အိင်နောင်း အယန်ပှန်ခွမ့်ပှုပေါ်။ ငေါ့ယယ့်ဖော့ဆေပွီးရယ့်နွောဂ်မောင် ဆူ့ကွိုဆဂျွိုပွီးမောင့်ပယ်း ကွိုယ်တော်နောင်းကွို ငေါ်လော်မယ်” လွို့ ရွှောဂ်တန်လေရယ်။ 60ဟော်ပေမယ့် ကွိုယ်တော်ယေရှုခေါ့ ဆူ့ကွို “ဖရောဆန်ကွို မနော်ခေါင်ရယ့်ဆူဟော် လူဆေနောင့်တူရယ်။ လူဆေတွို့ကွို လူဆေမျောခေါ့ပယ်း ဆဂျွိုကျော့ပေါ်စေ။ နန့်မောင်ကော ဖရောဆန်ယယ့် ဆော်ဆနော်တိုအကျွောင်းကွို လူတွို့နောင်းဆိုးပွီး လောဂ်ဟိုးကျောကျော့” လွို့ မိင့်တိုမူခယ့်လေရယ်။ 61အယ်းနွောဂ်မောင် အချောဆူတယွောဂ်ခေါ့လယ်း “ကွိုယ်တော်၊ ငေါ် ကွိုယ်တော်ယယ့် ဆပယ့်တိုအနေနောင့် ကွိုယ်တော်ယယ့်နွောဂ်ကွို လောဂ်ပေါ်မယ်။ ဟော်ပေမယ့် အိင်ကွိုပှန်ပွီး မွေ့ဆောစုကွို နွောဂ်ဆခွမ့်ပှုပေါ်” လွို့ ရွှောဂ်တန်လေယော် 62ကွိုယ်တော်ခေါ့ “လာကွို ထွမ်ယက်ပွီး နွောဂ်ကွိုခှယ့်ကျေ့ မယ်ဟန်ကော အယ်းလူယယ့် အလုတ်ဟော် အဆုန်းဝမ်မောင်မဟွိပေါ်။ အယ်းလွိုမျွိုးပယ်း တယွောဂ်ယွောဂ်ဟော် ငေါ့ယယ့်နွောဂ်ကွို ဆပယ့်တိုအနေနောင့်အစော့ပှုပွီး လောဂ်ပေါ်လွိုပေမယ့်လယ်း အချောအယော်မျောအပိုမောင် အောရုန်ယွောဂ်နေဟန်ကော ဆူဟော် ဖရောဆန်ယယ့် ဆော်ဆနော်တိုမောင် အဆုန်းဝမ်ရယ့် အလုတ်မျောကွို လုတ်ဆွောင်နောင်မော်မဟွိပေါ်” လွို့မိင့်တိုမူလေရယ်။
Currently Selected:
Luke 9: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
